وش أفضل طريقه للتعامل مع حرمه الأخ

طيب أنا بسأل سوْال وش اللي يضايق زوجة الأخ خير السكن معهم فرضنا انها سكنت معهم
وش يضايقها اذا مايسالونها وين راحت وين جت امرها بيد زوجها
تعزم اهلها عندها وتروح لهم وتقعد بساعات مب ساعه ثنتين لا يعني تطلع من العصر ترجع بعد العشاء واهلها مثلها خاصه بيتهم قريب منا اذا جوا اَهلها نستقبلهم أحسن شي ونجلس معهم شوي ونطلع نخليهم يأخذون راحتهم وإذا سالت ليش ماجلستوا نقول نتركك على راحتك
عيالها شايلينهم على كفوف الراحه نحبهم ونموت فيهم وهي وش سوت لاتتتدخلون في عيالي أنتم مخربينهم قسم يروحون لاهلها ويرجعون بحركات قليله أدب تقول متعلمينها منكم المشكله اخوي يردد نفس الكلام يوم قلت من وين يتعلم منا هذي يمكن متعلمها من البزارين هناك قام يدافع استغفر الله الحين تدافع عن بزارين انت ماربيتهم ولاشفتهم وترمي علينا اصلا ماعندنا بزارين غيرهم والباقين كلهم كبار ومع اهاليهم

مايقهرني إلا بعض البنات الله يهديهن يصير بالها بيت لحالها بس ماتطلبه إلا إذا ضمنت الزوج

من الأول مفروض شارطة بيت لحالها ومحد بيلومها مو من أول أسبوع زواج تقول طلعني الله يعينكم

وأخوكم يبي له فركة أذن يلا إن شاء الله يطلعون ويفكونكم وهذا درس لكم أي شخص بيتزوج عندكم

قولوا له من البداية اطلع بييت لحاالك أم زوجي وأمي وجدتي كلهن عندهن هالقانون بتتزوج خذ بيت تجلس

عندي أنت وإياها لاا خلك سعيد وبعيد كثر الاحتكاك يمررض ويوتر العلاقات صراحة الغلط من أخوك ومن زوجته

اللي ماتكلمت لين ضمنت العرس.

لا شهادة الحق تنقال هي شارطة بيت لحالها بس هو ضروفه ماتسمح مع أني اشوفه مقتدر وقالهم قبل الملكة أني حاليا ماقدر تبي الوضع على عيني وراسي ماتبي من الحين تقول وهي قبلت

يا قلبي ما تهنت بشهر العسل شكلها
اما انتم بسيط الحل ، لها حياتها ولكم حياتكم وان كنتو عايشين ببيت واحد

استغنو عنها
قومو ببيتكم كانها مو موجودة
اخوك بينو له انكم ما راح تتدخلون باي شي يخصها
عشان يعرف انكم مو راعين شر

حلو مشكلة المواصلات ، جيبو سواق تعاقدو مع شخص بالشهر
انما لا تناشبون اخوانكم اذا هم مايبون يقومون فيكم

يا قلبي امك وخالاتك لو انهم ما اختارو يخدمون لاهل ازواجهم
فهو مفروض عليهم ذاك الزمان

لكن مرة اخوك اختارت انها ما تخدم وحقها
فليش تتوقعين لازم ينطبق عليها زي ذاك الزمان ؟

انا لو اهل زوجي كانو طيبين بعد مابي اسكن معهم
لانك لو ضمنتي القلوب ما ضمنتي الخصوصية
تعرفين وش معنى خصوصية ؟ انك تروحين وتجين
بدون ما اهل زوجك كلللهم يعرفون عنك كل خطوة تخطينها
هذا احتياج داخل كل انسان الاوليات انحرمو منه مسكينات