هل قراري بالطلاق حل سليم شورو علي وساعدوني أرجوكم

الطلاق ابغض الحلال الى الله حاولي لاخر حد ان تتوصلون لحل للطرفين

اختي معليش مافيه سبب للطلاق هذه عشرة 10 سنين غير ان عندكم بنات ليه التشتيت
وترى حركه يقول البنات عند امي مبسوطين عشان يقهرك يحسب انك تكرهين امه كان رديتي عليهم عافيه خالتي ميب مقصرة معهم
يااختي زوجك كويس
اول شئ : موب مانعك عن الطلعات ويوديك ويجيبك وحارمك عن المصروف طيب هذه نقطه كويسه جدا لصالحة
الشئ الثاني مايتكلم ومابينكم نقاشات طيب كثير والله العظيم كذا تسحبين منهم الكلام تسحب هو سوالف النساء ماتعجبه وبعضهم مايحب الكلام الزايد
الغموض اللي بحياته مايبي يوجع راسك بسوالف الشغل كثير للاسف يشوف البنات ماتفهم هالسواليف فليه يتعب راسه
سالفه امه واهله تقدرين تقلبين عليه بمزح انك من كثر الجلسه بروحك صرت توسوس ولا شكلك طايح بالمسلسلات الكويتيه وبديت تطبق علينا الخ
مادري كيف تعاملك مع اهله لكن لجاء يوم قبل ماينام قولي له يافلان اذا بتروح لامك عطني خبر بجي معك عادي روحي لهم مره بالاسبوع عشانه
سالفه المصروف يوم يودي امه العمره كيف كان زعلك وعتابك ؟ الاسلوب له دور بعدين مثل كذا لا تعاتبين عادي كان جبتيها بطريقه يافلان الفلوس ماكفت وتسلفت من اختي ياليت عشان المرات الجاية والضرورات افتح لي حساب عشان تحول لي من الهاتف المصرفي اسهل واسرع
ويوم قالك انت معصبه عشان خذت امي كان ضحكتي عليه وقلتي الحمدلله والشكر بالعكس احد يعاف الاجر بالعكس كذا اطمنت ان شاء الله ذريتي بيقومون فيني مثل مانت قايم فيها
طيب يوم اخذ امه العمره كلمتيها وقلت لها عمره مقبوله ؟
ترى حركات بسيطه تمسح فكره اني اكره اهلك لصارت مناسباتهم جيبي هدايا غاليه بتغليفات حلوه بالاخير هي من فلوسه كيفه وبالاخير الرجال مانقص عليكم بشئ
السوالف لدخل المعتزل حقه جيبي قهوتك وشاهيك واجلسي معه موب لازم تسولفين بس خلك موجوده جنبه شوي شوي سولفي انت سوالف عامه وخفيفه لاهيب تشكي ولاحنه وزن ونفس الشئ بالطريق بمشاويركم السالفه يبغى لها صبر شوي شوفي هو وش يحب اخبار ولا رياضه واقري عنها وجيبيها وبينفتح نقاش لو مكون من اربع كلمات , ومره جيبي فلم خفيف قولي مشتهيه اشوفه معك اذا قالك مالي خلق قولي امسك جوالك وانا بشوفه عندك عشان الهدوء وسوي جو طفي اللاضاءة ولايكونون بناتكم عندكم
سالفه الولد اقلبيها عليه قول الحمد لله ترى الجنس من الله ثم منك + مافيها شئ لو حملتي ماعندك الا بنتين جيبي لهم زياده توكم وانتوا 10 سنين متزوجين يعني صراحه فترة طويله شوي امداهم بناتكم كبروا وشالوا نفسهم شويه


بعدين انت تقولين لتطلقك وضعي ماراح يكون جيد عند اهلي يعني فكري لها لتطلقتي فيه احد بيسولف معك وبيرد لك الصوت و تفضفضين له الخ الا نفس الوضع اذا موب اشين الكل بينشغل عنك و بيملون من التشكي كلهم لهم حياتهم ازواجهم عيالهم دراستهم ووظايفهم من خواتك واخوانك لصديقاتك على الاقل مع زوجك فيه من يقوم فيكم + بناتك حولك يردون عليك الصوت شوي شوي هم بيصاحبونك ويصيرون صديقاتك


الشئ الاخير يااختي زوجك مبين انه شخص طيب وكويس ماشفت فيه الا عيب العزله والظن انك تكرهين اهله وكلها اشياء بسيطه ممكن تتصلح بسهوله او تتعايشين معها وبناتك حولك وبوسط حضنك لو زوجك سيئ يااختي ماكان اقاربه يبونه لبناتهم


ليه تعطينهم اياه بارده مبرده هذا زوجك وبيتك انت عاد لطلق موب مصدقين وبيدقون اصبع وبيخطب وبيتزوج طيب انت وبناتك؟ يعيشون عند مرت اب ؟ وابوهم منعزل عنهم موب داري وش بيصير لهم لو تضربهم او تسبهم الخ موب داري بعزلته ولا يجون عند اهلك اللي تقولين وضعك ماراح يكون كويس عندهم




خذيلك فترة نقاهه الحين وعيشي عزوبية ورتبي افكارك واستخيري واخزي الشيطان

حسبي الله ونعم الوكيل على كل ظالم .. يقولي ارجع البيت وماحد درى بمشاكلنا ومدري وشو وهو مايخبي عن اهله شيء ويقولي عازمك بمطعم وش تبين من هديه بيرقع سواد وجهه الحقير قلت له ماني راجعه بعد سواتك فيني يبي ارجع له بكل سهوله وبعد لاغبت عن البيت اهله يدخلون شقتي بغيابي مالي خصوصيه !!

استخيري وأطلب بيت أو شقه خاصه فيك
وأشرطي عليه يوم بالأسبوع يطلع معكم
لكن عندي سؤال هل هو قليل الكلام معك أنت وإلا هذا طبع فيه مع الناس كلهم ؟
الله يصلح ما بينكم ويسخركم لبعضكم ويؤلف بين قلوبكم ويحفظكم لبناتكم ويحفظهن لكم ويجعلكم قرة عين لبعضكم

دائماً أدعي أن يجعله قرة عين لك ويجعلك قرة عين له