انا مابي اتطلق.. وهو مادري وش فيه كل شوي يطردني..والمشكلة ابوي مايبيني 😭

اسالكم بالله تدعون لي ربي يسخر لي زوجي واهله ويرده لي *


بنات انا كل ماولد زوجي ينقلب علي والله مازعلته
للعلم هو نكدي واستفزازي ويقط كلام يجبرك اقلها تسفلين فيه /هو مش سيء بس اهله مربينه على عدم تحمل المسؤلية وصار مايتحملنا وبس يدور الزلة ويتشكى
جبت له طفلين وكل بعد ولادة يقلب حياتي جحيم
مايهنيني بولادة ولابطفل ولاحتى يقدم لي نص ريال
الحين مشكلتي ابوه اللي كانه ضرتي حتى وولده مخطي يقول لا ماخطى بنتكم اخطت ويركبون راسهم حركاتهم قذره ومايهمهم احد ومشكلتي الثانية اللي خلت حياتي جحيم ابوي دايم يسلك له مايبي خراب بيتي
ويحاول يخطيني ويردني لزوجي لين كبر راسه وصار يعتبرني ويعتبر اهلي اي احد من الشارع
الحين زوجي مايبيني وابوي واخواني يقولون تحمليه مانببك ترجعين ولو رجعتي عيالك ينقلعون مع ابوهم طيب عيالي ماكملوا سنتين وش هالقلب!
لدرجة فكرت استاجر شقة مفروشة
زوجي يابنات تهاوش مع الوالد ولاول مره ينصفني ابوي ويخطي زوجي ويقول الحق/ المهم تهاوشوا زوجي هو اللي بدا وغلط على ابوي قلة ادب لاخر درجة قام ابوي غلط عليه
اللي صار قلب حرته فيني وقال خذ بنتك مابيها
وزوجي صار يلمح مالك مكان هنا ومايتكلم معي زين
وصار كل كلمة والثانية يقولي انقلعي ضفي وجهك
تناقشت معه بالطيب وحاولت ماقصر معه بشي لانه مايبيني ويدور الزله وانا ابي بيتي وعيالي والاستقرار
وعشان اهلي مايبوني لدرجة توني راجعه من السفر اقول لامي اشتقت لك بجي اسلم عليكم تقولي لاتجين اخاف تجين وماياخذك زوجك يخليك
وزوجي اذا ركب راسه عادي يسحبني بالشارع ويطلعني بالغصب من البيت//طبعا الهوشه صارت في اثناء السفر
وانا والله مابي خراب بيتي واضيع عيالي اصلا ماعندي فلوس ولا شي عشان اصرف عليهم
ابوي حالف لو جيته هددني ماتخرجين مكان ولا اصرف عليك وعلى عيالك يقول مالك الا اكل البيت
وش اسوي بعمري انا وين اودي عيالي
بنات ادعوا لي واعطوني حل او تصرف يهدي زوجي ويرده لعقله /لاحول ولا قوة الا بالله

31 تعليق 11,295 مشاهدة

شاركي في النقاش

سجلي الدخول لإضافة تعليق.

التعليقات

27
  1. @lazordyh

    لاحول ولاقوة الابالله
    الله يفرج همك يارب ويسخرهم لك
    مالك حل الا تتوجهين لربك بالدعاء والالحااااح وتحري وقت الاجابه اطلبيه فيها اللي بخاطرك
    صلي بالليل وادعي وابكي واشكي همومك لرب العباد
    هو القادر ع اصلاح امورك
    استغفري كثيييير ووكلي امرك لله مانقدر غير ندعيلك
  2. @kyodd

    الله يعينك موقفك صعب' حاولي في زوجك انك مالك
    دخل في مشاكله مع ابوووك...
    اطفالك اذا جا ابوهم زيني ملابسهم وكشخيهم وعطريهم
    وحطيهم بحظنه خليه يحبهم ويتعلق فيهم..
    ورسلي صورهم له.. خليه اذا ماحبك انتي يحب عيالك ويخليك عشانهم..علقيه فيهم.
    بس لاسمح الله تطلقتي عندك الضمان يصرفلك كل شهر 1000 ريال بتكفيك وتساعدك..الله يسهل آمرك ويعينك.
  3. @am_aymn_7_1

    اول شيء اخرجي من دور الضحية قدامهم خليك قوية اولادك محتاجينك لايحسوا انهم مو مرغوبين منهم لو ضليتي كذا بيطلقك لاتوريها انو حياتك بتنتهي ومااحد يبياك ثانيا زوجك مشكلته ممكن انتي صار عندك توسع مع الولادات الرجال هذا اهم شيء عندهم واخيرا التجيء الى الله بالاستغفار والوتر اخر الليل
  4. @ana_ndmanh

    الحين دام عارفه زوجك مو قد المسؤوليه تحلس وتجيبي 2 ورا بعض الله يهديك ليه؟؟؟ كان خليتي بينهم فرق شوي عشان يقدر عليهم ..


    ومن ناحيه مشكلتك الله يفرج همك اشوف مالك حل الا انك تسكتين وخلاص دام ماتبغينه يطلقك

تابعي تجارب أخرى من هذا القسم.