الدفاع المستميت عن الامهات .. غلط

الدفاع المستميت عن الامهات حتى في حال الظلم والاظطهاد صار ظاهرة


وهذا غلط لانه يحمل الام ذنوب ويعينها على الظلم وبكذا تعصي ربها


لازم الواحد يبر امه بس لما يعتبر من برها ظلم بنت الناس لا .. هذا غلط وحرام


ومن البر ان البنات ينبهون امهم اذا شافوها تظلم حريم اخوانهن مو يحرشونها لان ظلم الام لبنات الناس راح يرجع مهما طال الزمن على حظ بناتها والنماذج كثيرة






نعم امك ثم امك ثم امك ثم ابيك
والام حقها عظيم
وبر الوالدين من اسباب دخول الجنة
بس المجتمع بحاجة توعية بالحقوق والواجبات
ومثلما للوالدين حقوق عليهم واجبات
وزي مرة سمعت الشيخ المغامسي يقول من واجب الوالدين انهم يعينون ابنائهم على برهم ومايحملونهم فوق طاقتهم
يعني ام تتحكم في ولدها وزواجه وعلاقته بزوجته وتطلق بنات الناس وحدة ورى وحدةهذي تخلي ولدها نايم جنبها وما تبلى فيه بنات الناس




والا وحدة تبي جمعة بناتها عندها كل يوم ومرة ولدها ياويلها تروح لاهلها الا كل اسبوعين مرة هذا اظطهاد




والا وحدة تنجن اذا شافت مع زوجة ولدها جوال جديد والا عطر والا جددت شي فبيتها ياوييييله ويا سواد ليلطيب بنت الناس من اللي ملزوم فيها؟؟؟عجبي




والا وحدة تبي ولدها يسافر بها هي وبناتها وياويله ياخذ زوجته عشان ماتكدر جوهم وبنفس الوقت تمنعهم يسافرون لحالهم و اذا راحوا لحالهم و رجعوا يرجعون والعالم قالبة عليهم ..هذا ظلم






والا وحدة تستنزف ولدها ماديا وتخلص كل راتبه على غير حاجة بس عشان ما يبقى لبنت الناس شي هذا ظلم




والا وحدة كل شي تتبلى على بنت الناس بامور ماصارت عشان بس تقوم مشاكل بينها وبين ولدها وتتنكد عيشتهم ويكرهون بعض هذا تخبيب




والا وحدة تفرض على عيالها كلهم يسكنون عندها والبيت علبة سردين من البزارين والحريم محشورات تخاف يتمخلن بعيالها هذي ترصهم على قلبها وماتزوجهم احسن




والا واحد كل ماراح لاهله اهان زوجته وهي ماغلطت ويقول لها معليش استحملي اشوف امي تستانس اذا هاوشنا حريمنا... خير ان شاء الله وهالمسكينة اللي ابوك استأمنك عليها




واحد يعطي امه مفتاح بينه وغرفته بحجة انها امه وهي تفتش باغراض بنت الناس وتشوف خصوصياتها و اغراضها الخاصة ولعابها الزوجية وتفضح فيها هذا مو من حقه ولا حقها لا شرعا ولاعرفا




وواحد يجبر زوجته توجب وتهدي وتعزم وتكلم وتروح لهم وهم مطنشينها وهاينينها وحارقينها هذا بعد ظلم
يا يلزم كل طرف باحترام الاخر يا يخليهم كلهم على راحتهم
والزوجة مو ملزومة فيهم اذا مايحبونها ولا يحترمونها




البر مو استعباد
البر مودة ورحمة ورعاية
وظلم الزوجة واهانتها وحرمانها من حقوقها هذا معصية تخالف ماجاء في كتاب الله وسنة رسوله
ولا طاعة لمخلوق في معصية الخالق




واللي تقول غير كذا تروح لأي شيخ وتسأله وتجي تفتينا
الام لها حق والزوجة لها حق ولازم الرجال يفصل ويكون عنده شخصية ومايظلم احد على حساب احد
واذا شاف مافيه ود بين زوجته واهله مافيه داعي يجبرهم على بعض لأن هذا يزيدهم كره
ربنا زي ما أمر بالأشياء وضع لكل شي حد ..




الدفاع المستميت راح يجي اما من وحدة ربي اكرمها بحمولة طيبة يخافون الله فيها
او من بنت ماجربت
او من وحدة زوجة اخوها ظالمة وماتخاف الله








ارجو قراءة لموضوع جيدا قبل التعليق
واعتذر عن الرد على كل وحدة تفتقد ادب الحوار