يعني بنتك ما دخلت تمهيدي ؟ هذا حلاة التمهيدي حتى الطفل نفسه يتهيأ شوي مع الروتين وترك البيت
عموما انا ضد الضرب توها ياقلبي هي واذا ضربتيها عشان تداوم انت جالسة تكرهينها فيها زيادة
روحي معها وقولي بصرامة وبصوت مو عالي لكن ثابت وعينك في عينها : لازم تروحين للمدرسة عشان تعرف انه امر غير مطروح للنقاش او التردد
وروحي معها زيادة اليوم وخليها تصيح بدون ما تضربينها لكن تجاهليها تماما وهي تبكي ولا تتنرفزين حتى
واذا متنرفزة بيني انك تتكلمين بهدوء واضغطي على نفسك خليها تشوفك ما عندك أي مشاعر لا سلبية ولا ايجابية
ولا تتكلمين عنها قدامها ابدا
امسكي جوالك او سولفي مع احد واذا تكلمت معك ردي عليها بهدوء ولا تطلبين منها تروح عنك طنشيها تماما
ثم غيري مكانك بس تشوفينها لاهيه وابعدي عنها خمس دقايق وبس تبدا تدورك اطلعي وكانك ما انتبهتي انها تدورك وعينك على الجوال ولا مبالية بتجي تسالك وين رحتي
قولي هنا وطنشيها
وكل شوي سويها وزيدي الوقت بين البعد عنها مره جيبي معاك اكل من المقصف وقولي رايحه المقصف ومره قولي رايحه الحمام ومره لا تردين
كل هذا وانت هادية تماما ومتجاهلة عصبيتها وبكاءها
وممكن تختارين مكان فيه اطفال يلعبون وكذا لانه اسبوع تمهيدي بتلاقين اماكن توسع صدورهم
ثم في اخر الدوام خليها اطول وقت الين ينتهي الوقت واطلعي كمان في وجهها وبيني ان الوضع عادي وكان اللي يصير مافيه أي خوف او انك قاصدة
وامسكي يدها وروحي معها للسيارة وسولفي مع زوجك وامدحي البنت والمدرسة وقولي الايجابيات والاشياء اللي لعبت فيها بدون مبالغة ترى الطفل ذكي ويفهم متى الام تبالغ او تحاول تضغط عليه
وارجعوا للبيت عادي وقولي لها بنروح اليوم بمناسبة انك صرتي اولى وكبرتي وانا سعيدة عشانك نشتري لك كذا وكذا ويكون اكثر شي تحبه ومروا واشترو ايس كريم وطلعة مناسبة لطفل
حسب قدرتك
وارجعوا للبيت وعشيها واقري لها قصة وحاولي تنام مبكره على المغرب او قبل العشاء لان قل النوم يأثر على نفسية الطفل بعد
والصباح قوميها بشويش وضحك وسوالف ولا تغصبينها على الاكل خليها تاكل شي بسيط او قليل او اللي تحبه معليش مشي لها
ولبسيها وكلما قالت ما ابغى المدرسة تجاهليها تماما واستمري في الجدول حقك معها وانت هاديه لا تتناقشين معها
اذا بكت او عاندت ارفعيها ولبسيها بهدوء بدون ضرب او عصبية
وجهزي شنطتها واطلعي معها للدوام واجلسي شوي ثم صدي اكثر يجي ساعة او ساعتين وثم مري من جنبها وابتسمي وصدي ثانية
ثم اخر الدوام خليك جنب الباب وقومي لها قبل تطلع وقولي هذاني جيت اخذك
وبكره بحطك وارجع اخذك ولميها وبوسيها بعقل مو بعاطفة زايده عشان ما تحس انها صاير شي غلط وتبكي وتخاف
ونفس الشي تجاهلي أي تصرف يدل على رفض المدرسة وكملي تعاملك معها على اساس انه شي مفروغ منه وبهدوء
ترى اعرف انه شي متعب لكن فكري انك بتلاقين نتيجة في النهاية
ومن بكرة خلاص يوديها ابوها وارجعي خذيها او انت وديها وارجعي خذيها حسب جدولكم
وافضل انك تاخذينها في اول الايام وتكونين عند البوابة قبل يطلعون لان ممكن تطلع للشارع تدوركم مع الخيل ياشقراء لانها مابعد استوعبت الوضع
الين تتعود انها تنتظر وكل يوم فهميها انها لازم تجلس جوا المدرسة تنتظرك لو تاخرتي ولا تطلع للشارع لانه غلط وخطير
والله يعينك سنة اولى اساس للنظام وتعويد الطفل على اساسيات المدرسة والخروج بدون اهله وغير هذا وذاك بس يبدا الجد والحفظ والكتابة يبغى لك برودة الثلج عشان توصلين للنتايج اللي ما تبان الا بعد فترة اذكر اني احس اني اكلم جدار مو طفلي اللي اعرفه اول الشهور وودي اطحنه واعضض فيه ههههههههه
وترى هالكلام اللي اقوله بعد اخطاء وقعت فيها في اول بيبي لي وللحين احس اني ام شريرة بس ما كان فيه احد يعلمني وكنت صغيرة وهي الاولى وصارت الطقة براسها
العقاب المناسب لها ؟؟
متابعة النقاش، صفحة 12