السلام عليكم
انا متزوجة من 7 سنين
وكان لزوجي سوابق قبل الزواج
ولما كشفتهم انقهرت وتهاوشت وصار يحلف لي انه مارجع لهم من اخذني ومستحيل يرجع لهم
المهم صراحة ماشفت له علاقات من تزوجته غير
خرابيط ماقبل الزواج
لين قبل 6 شهور
كذا فكرت افتش جواله و
كني حاسه
شفت بلاوي منه يواعد و يرسل صور عيالي ومسوي انه المسيكين ومحتاج حنان ومادري وشو
المهم قومت الدنيا ماقعدتها ويحلف لي انه ماوصل لمرحلة انه يطلع معهم ويدعي على نفسه وعياله لو كلامه كذب ان يصير بهم شي وهو صراحة يموت على عياله
والي قاهرني ان من حوالي سنة ونص وهو متواصل معهم والقهر الاكبر
بمرض بنتي جاها مرض 3 شهور صارت طريحة فراش شبه معاقه وانا متحسره عليها متت وحييت عليها اصيح ليل نهار و اطلرد بها من مستشفى لشيخ يقرا عليها وكل يوم اتصل عليه بما انه شغله بعيد عني
وانهار بالصياح واشكي له همي وهو عايش جو الحزن معي و بس اسكر يرجع لعلاقاته
المهم جرحتني خيانته لما كشفته اني وقتها انا كنت محتاجة لك اشد الحاجة وانت قاعد تلعب والمصيبة تبكي معي وتدعي ربك يشفي بنتك وانت تلعب باعراض الناس
طبعاً بعد ماكشفته وصارت مشكله كبيره معه قعدت اخوفه بربه وان اي شي يسويه مردوز لخواته وبناته
وهو ضل يتأسف ويحلف ماعاد يرجع انا صراحة مو مصدقته بداخلي لان قدر يكذب عليي سنه ونص يقول فيها مشغول اذا كلمته وهو قاعد يخون
والحين بيروح دورة لمدة 3 شهور ماقدر اروح معه ابداً
وصراحة ما اظمنه و ودي اختبره لا راح اتواصل معه برقم ثاني اشوف كان بيرجع لخرابيطه ولا
وبنفس الوقت ماودي اخاف يصدمني و يتواصل معي على اني وحده ثانيه
وكمان بنفس الوقت ابغى اتأكد هل هو قد كلمته وانه مايخون
والله خايفه انجرح وجرحي للحين ماطاب
طعم الخيانة علقم و موس عالق بالبلعوم مو عارفه اشكي لمن مابغى احد يشمت و صراحة احبه ماشفت منه الا كل خير يعني خيانته لي كانت زي الموت
ولا قادرة ابلعه و انساه 😔
بنات تكفون لاتدعون عليه وادعو له بالهداية و يسخره ربي لي و لعياله ويبعد عن الحرام
شاركي في النقاش
سجلي الدخول لإضافة تعليق.
التعليقات
32- لاحول ولا قوة الا بالله
الله يفرج همك ويسخره لك ويصلح حالكم. - شوفي حبيبتي تري للاسف ماينفع تراقبيه وتتعبي نفسك ..استودعيه الله وسوي واجباتك وقومي بحقوقه ..وهو الله وكيله ...انصحك جدا بحساب ناعمة الهاشمي وحساب الجوري وحساب عشتار كلها في الانستقرام ..حاولي تتعلمي كيف تجذبيه وتخليه ينساهم بنات الحرام ..وبعدين عندك فرصة زوجك مو موجود تعلمي كيف تجننيه واثقلي عليه ..انا عارفة انه صعب لكن اطبخيه على نار هااااااادية وراح تدعيلي ان شاء الله
- حبيبتي ماانصحك تختبرينه أساسا افضل حل حلفيه علي القران وبعياله انه مايرجع يخووون وفهميه انك باي وقت اذا اكتشفتي انه خاااان مابتسكتين بتطلبين الانفصال وبتفضحينه قدام الكل وعياله مابيشوفهم وهذا الشي كفيل انه يخليه يفكر بدال المره الف قبل لا يخوووووون
- طيب وإذا راقبتيه وش بتستفيدين؟؟ هل راح تتخذين موقف؟ ولا بس تجلسين تاكلين بنفسك وتفكرين وهو عارف أنه مهما سوا راح يحلف لك وتصدقين كله خوف من شماته ؟؟
أختي الحياة الزوجية قائمة على الثقة.. وإذا ثقتك فيه معدومة ماراح تعيشي مستقره وبأمان...
إذا ماراح تتخذين موقف وتحبينه فنصيحه لا تفتشين وراه لأن ماراح يتعب إلا أنت. - لا لا قد جربتي هذي الطريقة ومانفعت رجع مرة ثانية
مواضيع مشابهة
تابعي تجارب أخرى من هذا القسم.