السلام عليكم بنات
بختصر الموضوع
قبل فترة وفي يوم خميس لقيت رساله من اخت زوجي تقول انها راح تسير على اهلي معي بما ان امي خالتهاوتطلب مني اني اقول لزوجي نمرها بالسياره وناخذها معنا لبيت اهلي .. انا فرحت اننا بنجتمع ورحت اقول لزوجي اخبر زوجي .. اللي صار اني لقيته معصصصب مررره .. وللاسف تلفظ الفاظ مالها داعي .. انا ماغصبته يمرها انا بس عطيته خبرر .. ومره تنكد خاطري ليش يتعامل معي كذا وانا مالي دخل .. اتذكر بكيت وانا من النوع اذا بكيت خلاص يبين علي طول اليوم .. عيوني تنتفخ لان معي التهاب في الجيوب الانفيه .. ورحت قلت له انا ماراح اطلع اليوم لاهلي بقعد في بيتي ( انا وحده ما احب انكد على امي فلذلك قلت له اني ماراح اروح لاهلي ) اللي صار انه ثاااار علي قال تروحين غصب عنك علشان نمر اختي !!
يعني هو عصب علي بالبدايه بسبب موضوع المشوار واللحين رجع يقول بمر اختي يعني ماعنده مشكله !!
عصبت وقلت لو اروح لاهلي والله مانمر اختك انت نكدت علي بسبب هالمشوار خلاص خلك قد كلمتك
طلع من البيت وقال بروح لربعي وانتي الخسرانه اقعدي وانا بصراحه ماعاد تفرق معي ما ابغى اروح واهلي يشوفون وضعي وانكد عليهم
ارسلت لي اخته مره ثانيه تسالني متى نمرها ! قمت رديت عليها هلا كيفك ؟ كلمي فلان قولي له لانه برى البيت
وانا قلبي يتقطع نفسي يكون عندي سواق اطلع امرها ونروح بيت اهلي وننبسط ولا منة هالرجال
اللي صار قبل يومين عندنا مناسبه كبيره واجتمعنا .. انصدمت منها يابنات ماتبتسم لي ابد موب من عوايدها .. كنت جالسه مع اهلي ورحت عنيت لها هي وخواتها وجلست بجنبها قامت لفت وعطتني ظهرها بالكامل وهي جالسه عالكرسي.. موب بشكل مايل لا يابنات بشكل كااامل .. مررره حسييت باحرااااج .. قمت اراجع نفسي انا بإيش غلطت ؟ وش ذنبي انا اخوها يخطي علي وينكد يومي.. وفوق كذا تزعل علي لاني قلت لها كلميه .. واحيانا اقول ممكن موب بسبب هالسالفه !! طووول المناسبه وهي تتصدد عني بشكل ملفت وماتكلمني ابد وسلامها باااارد من دون كلام!!!
انا عاد حبيبه جدا جدا معها فانصدمت من معاملتها معي .. تخيلو احنا نظامنا اهل رجلي ساكنين بنفس العماره فوقي وانا لي مكان مستقل عنهم .. احيانا وانا مو موجوده تاخذ من زوجي المفتاح وتدخل بيتي تنام هي وزوجها فيه ! وانا حبيبه ماعمري قلت لها شي .. ولاعمرها يابنات قالت الله يحييك يازوجة اخوي تفضلي سيري علي في بيتي .. هي من النوع اللي مايحب تحمل المسؤوليه .. يعني ماعمري دخلت بيتها !!
تكفون انا احبها هي قبل ماتكون اخت زوجي هي بنت خالتي .. ياليت تعلموني كيف اتعامل معها !! لاني انصدمت منها صراحه
الشي الاخر سلفتي زوجة الاخ الكبير ماعمرها عزمتني في بيتها من سنييين الا مره وحده وكنت بروح لاهلي واعتذرت منها وبعدها ماكررت العزيمه .. واحيانا تاخذ استراحه وتعزم اهل رجلي كلهم ويكلمون زوجي يبغونه معهم من دوني .. يعني يبغوني اقعد بالبيت لحالي من الظهر الى الليل .. عموما انا اذا قابلتها اسولف معها عادي وابتسم بس ياليت ترشدوني ايش المعامله الانسب معها .. مع العلم انها دخلت بيتي كثييييير يعني ما اقصر دايم اعزمها وجتها فتره زوجها مسافر وما اقصر معها انا وزوجي بس لما شفت ماعاد فيه فايده منها ماعاد عزمتها .. عكس السلفه الاخرى مقدرتني وانا مقدرتها ..
انا من تالي من جد عرفت ان رضا الناس غايه لاتدرك فقويت علاقتي مع اهلي بقووه وخليتهم هم الاساس واغلب زياراتي لهم وبس .. لكن حركة اخت زوجي وصدها عني وحركاتها اوجعتني صراحه وقهرتني فابغى اسلوب اتعامل فيه مع هالناس اللي كذا عشان يحترموني غصب ابغى وحده فتهمه في هالامور تعلمني .. ما ابغى وحده تنصحني بهواش او مواجهه
شاركي في النقاش
سجلي الدخول لإضافة تعليق.
التعليقات
4- طيب ليه ماتكلمينها وتفهمين الموضوع يمكن انتي قلتي لها بصراخ وهي زعلت وفهمت الموضوع غلط
- معليش اختي الغلط راكبك
اول شي عساه يتلفظ لين يموت قوليله هذي الالفاظ قولها لاختك مو لي
ثاني شي ليش تبكين وتنكدين على نفسك قهرتي نفسك على الفاضي
واخته بالطقاق اللي يطقها ياتمروني يا ازعل
ولما قلك زوجك هيا نروح كان رحتي عشان اهلك مو عشانها هي
اما سلفتك طنشيها لاتفكرين فيها عساها تعووود
حبيبتي واضح من شخصيتك انك ضعيفه وطيبه لابعد حد
الحريم ماينفع فيهم الطيبه ينفع فيهم اعاملك مثل ماتعامليني
خلك قويه واتركي الطيبة والسذاجة اللي مالها داعي - اخت زوجك فهميها واعطيها السالفه كااامله زي ماكتبتيها هنا صراحه لو انا مكانها بفكر واقول اكيد ماتبغاني اروح معاها😏
- لو وقتها اعتذرتي منها لاي سبب وقلتي انكم ما راح تروحو افضل. الاكيد انه زعلانه منك علشان هالسبب. او ممكن فكرت انك رحتي وماقلتي لها او انك كنسلتي روحتك لانها معك.
والشي الثاني يااختي في ناس جد ماتحب المسئوليه او ما تحب تجيها ضيوف علشان كذا ما تعزم.
ويش رايك انا متزوجه دخلت السنه الرابعه وعمرها ما زارتني زوجه اخوي ولا قد عزمتها مو لشي بس بصراحه انا وزوجي موظفين وكثير مشغولين وزوجه اخوي من النوع اللي تنتقد وما يعجبها شي علشان كذا اعرفها بتعلق من وراي لاخوي وانا اساسا ساكنه بمكان مش عاجبني مؤقت لحد ما نخلص بيت العمر. حتى زوجي ينزعج من انتقاداتها وترمي مرات كلام يجرح مع اني اعرف انه ما تقصده بس برضو يزعل. فما تعرفين الناس ونواياهم الا اذا في مواقف سابقه.
مواضيع مشابهة
تابعي تجارب أخرى من هذا القسم.