تجمع الأمل (94) للمقدمات على عملية أطفال الأنابيب والمنتظرات نتيجة التحليل

نكمل......
طبعا رحنا يوم الترجيع وتكرر معي نفس الخطأ.. اكلت اكله دسمه الساعة 7 بالليل اليوم اللي قبله ونمت وصحيت شبعانة ورحت لهم بس شربت ماي عشان المثانة.. قالوا لنا تعالوا 2 الا ربع وننتظر الى الساعة 5 وزوجي صايم مسكين وانا جوعانة ماتسحرت لاني نويت افطر والدكتور وقت الرجيع قال لي وشفيك عليك حرارة من شدة برودة جسمي من الجوع.. وكنت اشكي له اني تألمت وتعبانة قال سلامات وفجأة الا وهو مخلص.. قال اول ثلاث ايام راحة تامة وباقي الايام حركة خفيفة وحللي بعد 12 يوم وكتب لي ادوية وراح.. بصراحة اخلاقه حلوة ليته بس هادي مو مستعجل💔
طبعا ع بالي زي عبيد بيخلوني مكاني نص ساعة.. فجأة جابوا الممرضات السرير النقال وقالوا تعالي هنا وبدون مساعدات.. انكسر خاطري على نفسي واضطريت اضغط واتقلب وبعدين لما وصلت الغرفة الثانية قالوا يلااا روحي السرير.. ياربي😰 من جد حزنت.. اضطريت ازحف على ركبي وجاء زوجي وانا ابكي.. قلت خلاص فشلت العملية لأنهم خلوني ازحف واتدحرج من سرير للثاني.. قال اللي الله كاتبه بيصير.. ونعم بالله...
ظليت نص ساعة ونزلوني الطواريء عشان المحلول.. واكلت اخيرا.. في الطواريء جابوا لي بطانيات وحطوا لي حاجة في المغذي تدفي جسمي.. ولما قضت الساعتين رجعنا الفندق وطبعا كل تنقلاتي على كرسي عجلات في المستشفى وفي الفندق لين طلعت غرفتي ارتحت ونمت..
ظلينا اربع ايام عشان السفر مايحرب علي.. امتنعت عن القهوة والشاهي وجميع المشروبات الساخنة والغازيات والبهارات الحارة والقرفة والزنجبيل والكاكاو.. شربت ماي كثيررر مرررة لدرجة اني كل ربع او نص ساعة اروح الحمام الله يكرمكم...
جاب لي زوجي عصيرات فرش ماعدا الاناناس وبصراحة ابتعدت عن الكوكتيل خفت يكون بينه اناناس.. ونايمة على ظهري تماما واصلي جالسة.. بعد اربعة ايام رجعنا الدمام وكان البيت درج طلعت حبة حبة وانا ادعي ربي واسمي عليهم..
سويت لي فراش بالصالة قبل لا اروح الرياض صرت اجلس عليه ما اروح الا للحمام.. اكل فواكه وخيار.. كل يوم افطر على بيض.. اشرب عصيرات طازجة.. وابتعدت عن التوتر قد ما اقدر.. تسبحت خامس يوم وتاسع يوم واليوم 13 وانا جالسة على كرسي.. بداية الايام جاني جفاف على بشرتي طبقة بيضاء وبعدها بذأ معي امساك فضيع.. حتى تحميلات جلسرين مانفعت معاه.. لحد ماوصف لي الدكتور دوفلاك الحمدلله..
كنت احس بألم لما انام على جنب او انثني او اتحرك.. ووقت الحمام.. اما لما اكون جالسة على ظهري ماحس بشي.. اول اسبوع كنت انام كثير مررررة والاسبوع الثاني ما انام كويس 😁


الحمدلله رب العالمين في اليوم 12 صحيت من الساعة 9 الصباح من القلق ورحت الساعة 1 الظهر اسوي تحليل قالوا لي بعد ساعتين.. رجعت البيت وزوجي راح يجيبه.. لما رجع ووراني الورقة على طول انصدمت وظليت ابكي كثير وجسمي يرجف ودخت ماتحملت صدمة الخبر.. لأنها اخر فرصة.. وكل مرة احلل ويطلع مافي حمل في المرات السابقة.. طبعا ندمت ع الفلم الهندي اللي جاني.. لأنه بالليل جاني ألم أحس فيه لما تفشل عملياتي.. مع نقط دم.. وقف قلبي وقلت اكيد هذي اقصر قصة فرح بالدنيا بس ساعات تهنيت بالخبر...😩


نمت على ظهري ورفعت رجولي والحمدلله خفت الآلام والدم وقف.. وألحين مستمرة معي نفس الأعراض بس أحيانا أوسوس ودي اعيد التحليل وزوجي رافض...
استودعتهم الله الذي لا تضيع ودائعه....
وأي سؤال ثاني منى حبيبتي اسألي.. وتوكلي على الله حق التوكل واحسني الظن فيه وتعلقي فيه وحده..

الله يجزاك خير أسلوبك وقصتك درس لنا الله لا يحرمك اجرنا وكيف زرعتي فينا التفاؤل الله ينور قلبك ويعطيك مايرضيك ويجعل في ايامك سعادة لا حد لها ويشفي زوجك ومايكون هذا اخر حمل لك وعقبال ماترسلين لنا إزعاج عيالك وحوستهم الله يبغلك ذاك اليوم اللي تضمينهم الى صدرك وكل من يتمنى وكل بنت من بنات التجمع الله يوفقهم ويبارك لهم في خطوة يمشون فيها ويكلل مساعيهم بالنجاح الله يبشركم بما يسركم ويكف عنكم مايضركم ويرزقكم حلالاً يكفيكم ويبعد عنكم كل شر يؤذيكم

هلا ريما فقدناك الله يبشرك بمايسرك ويجبر خاطرك ويحقق لك السعادة والرضا فالك الحمل باْذن الله المهم البركة في البويضات لا تفكرين بالعدد الله يبارك فيها ويجعلك تشوفين ضناك يارب بصحة وسلامة

الله يسعد قلبك يارب ويبشرك ان شاءالله بكل خير

الحمدلله دوبنا خلصنا ياربي لك الحمد تحسنت كثير زادني بس اليوم وبكره ابر والجمعه باذن الله التفجيريه
والاحد السحب وشكله بيرجع خامس يوم لانه قالي الخميس الترجيع
الله ييسرها لنا جميعا يارب
الله يستر مدري ايش بسوي بالعيد يعني اكون لي 5 ايام تقريبا مرجعه
الله يسهلها علينا من عندك

آمين