الدنياء تغيرت ولا نحنا الي تغيرنا

والله انا احب الجيران يعني على الاقل مو لآزم ارتباط ودوريات بس وقت ما نحس انفسنا طولنا عن بعض نجتمع المغرب على القهوه
بس للاسف جيراني حاولت اول ما سكنت أتعرف عليهم ماًلقيت قبول وكم مره حاولت ارسل لهم أطباق ما يفتحون الباب
خلاص كل واحد ينام على الجنب اللي يريحه

خليك بحالك أفضل لك .

الناس اعتزلوا الجيرة بسبب المشاكل والنسوان اللي تدخل كلام براس كل وحدة راتب زوجك كذا وخليه يجيب كذا وانتي ضعيفة غير الفتن والقصص اللي تحصل ؟؟

وكل شخص مختلف عن الأخر والنوايا صارت مختلفة وماحد يحب الخير للثاني والحسد صار بكثرة فاللي مايبقى يجتمع اتركيه وعيشي مع زوجك واهلك ابرك لك من الجيرة .

بعضهم من قدامك ملاك ومن وراك شيطان وهذا غالبية جمعات النسوان كلهن الله يصلحهم .




عالعموم انتي نواياك طيبة بس مو كل الناس تحب الخير والنفوس تغيرت والقلوب والغيرة والحسد موجودين فكل وحدة تشوف فلانه ماتنسب تروح لها ورجالهم يقولون لهم ماله داعي .




الحمدلله على كل حال اللي ما يبقى يجتمع يجلس بيبته واهم شيء انهم ما يزعجونك او مسببين ازعاج .

جيراننا مانسمع لهم صوت ابد حي كامل مانشوف غير سيارات برا البيوت ولا فيه صوت
ولما امي الله يطول بعمرها قالت لابوي اطلب الرجاجيل ارقام اهلهم وقت الصلاه لانها طقت ملت
وفعلا بس كلمتهم صارت كل وحده تقول انا انتظر احد يدق علي
ماراح ادق واسأل وهم ماسألو عني يعني طلعت السالفه مجاكر وغرور
والحين ازين من قبل لكن فعلا الزمن تغييييييير بين الاهل مو بس الجيران
والله العظيم عيال عمامي وخوالي يجتمعون لوحدهم ومانشوفهم غير بعزايم ومناسبات كبيره
اهم شي الاخلاق والعباده وحب الوطن وامك وابوك بخير وخلاص

اللي يسألون ليه الناس تغيرت تحمل عندها الانستجرام والسناب وهي بتعرف ياربي يوم يصورون اجتماعاتهم بالعيد ولما يسوون حفلاتهم ويوم يسوون عشاء تعالوا شوفوا وش حاطين ووش مو حاطين تحسين انك بالقصر الملكي ببريطانيا بدون مبالغه مع العلم اني الحمدلله كشخه لاتفكرون اني مو شايفه خير بس اللي بالانستقرام والسناب غير شي خيال بذخ بذخ وتكلف ومبالغه انا مو قاعده انتقدهم لا ابدا بس اشرحلكم ليه الناس ماصارت تحب احد يجيها لان صارت الوحده تطلع روحها عشان كم حرمه تزورها ولازم تتعب عشان ماتكون اقل من غيرها اشوف الوحده منهم بس عشان تسوي عشاء لازم الشمعدانات تعبي البيت هذا من غير كل زاويه فيها شمعه والورود الطبيعيه اشكال واحجام بكل زاويه بالبيت بوكيه طبيعي يكلف شي وشويات حنا لو جبنا بوكيه فيه 7 وردات دفعنا مبلغ وقدره اجل ذولي كم يدفعون ؟ وغير الصحون شي خرافي تلقين صحن الشوربه تحته صحنين بس للزينه والكشخه من غير السكاكين والملاعق حاطينها بمناديل واكسسوارات تقولين جابوا مهندسة ديكور تصمملهم طاوله العشا ماتصدقين ان هالحركات تطلع مننا حنا الله يرحم ايام الكيكه الاسفنجيه وبسكوت ماري بس النفوس كانت عالاقل نظيفه هذا غير صاحبة البيت عشان تستقبل الحريم تروح صالون اي نعم صالون مو عيب ولا غلط لكن بس نفهم الناس يوم يستغربون ليه الناس تغيرت من المبالغه والله . حتى لو راحوا شاليه تلقين يستأجرون من الشركات كراسي ولمبات ومخدات وطاوله عشا وعربيات فشار وعربيات اسكريم وعربيات غزل البنات واشياء تذهل هذا في الشاليه بس

تخيلوا كان عندي عرس ورحت الكوفيره واخترت تسريحه متوسطه لاهي فخمه ولا هي مره بسيطه قامت الفلبينيه تسالني قالت تبين التسريحه لحلفه ؟؟ انا انصدمت قلتلها لا عرس يعني متعوده الحريم يجون يسوون تساريح عشان بس حفلات وعشاء خلينا ساكتين بس

صااادقه والله
بذخ و مظاهر و الوحده تستقبل وتعزم عشان يذاع صيتها
بالحاره او عند العوايل ..
مدري مين مفهمهم ان الكشخه والواااو هو انك تبالغين بكل ما اوتيتي من قوه لقهوه او عزيمه
لابد من التغيير والتزيين لكن بالمعقووووول