الولادة الطبيعية

السلام عليكم ورحمة الله وبركاته
كيفكم أخواتي عساكن بصحة وسلامة
أمس تلقيت محاضرة من الإخصائية الولادة عن أعراض الولادة وكيف نستعد لها .. وبما انه هذا الحمل الأول لي أصراحه استفدت كثير وحبيت أفيد غيري
وحوائيات اللي مرت بهاذي التجاارب تفيدنا أكثر من واقع تجربتهن حتى نكون فصورة أكثر
أعراض البدائية للولادة :
أول شي الخفه : يعني البطن يكون نازل لتحت بعد ما كان متعلق لفوق والحامل تحس بخفه أكثر عن الشهور السابقه وهذا دليل على انه الجنين نازل تحت والولادة ان شاء الله قرب موعده
ثاني شي السداده : السداده عبارة عن مخاط او مثل زلال البيض مخلوط بدم يكون موجود في عنق الرحم ينزل لما يقترب موعد الولادة , فائدة هذه السداده انه يمنع البكتيريا انه توصل للجنين وسبحان الله ما تنزل هالسداده الا فنهاية الشهور الأخيره , النصيحة اللي نصحتني اياها الأخصائية هي لما تنزل هالسداده ننتظر لين يبدا اعراض الولاده لانه ما شرط من تنزل مباشرة اولد , لا ننتظر بعدنا وقت لين نحس بأعراض الطلق وممكن يتاخر لاسبوع
أخر شي وهو السائل الأمينوسي : وهو السائل الذي يحيط الجنين داخل الرحم , بعض الاحيان ينزل منا هالسائل بدون ما نحس باي ألم, فهاذي اللحظه لما نشوف انه السائل نزل وانا ما أحس باي الم لازم وحطن عليها عشر خطوط نروح لاقرب مستشفى واهم نقطة لازم نعرفها متى الوقت اللي نزل فيها هذا السائل يعني ساعه كم , الممرضات يحسبن الفتره اللي نزل فيها السائل لين ما وصلتي معاهن ثاني شي يعمل تخطيط قلب للجنين ويراقبنه وتجلسي فالمستشفى لين ما تولدي , طبعا السائل عباره عن ماي شفاف , بعض الأحيان يكون لونه أخضر وهذا خطير لانه يكون لا سمح الله الجنين متبرز فيه ويكون ملوث , وممكن يكون السائل مخلوط بدم وهذا ممكن لا سمح الله فيه جرح فالمشيمه , في كل الحالات لما ينزل السائل لازم نروح لاقرب مستشفى والممرضات راح يقومن باللازم
نجي للجد وهيالولادة
الولادة تمر بثلاث مراحل
اول مرحلة وهي بداية الطلق
طبعا اللي فهمته أنه فيه نوعين للطلق فيه طلق حقيقي وفيه طلق كاذب
الطلق الحقيقي هو اللي يكون الآلام مستمره وراء بعض وبين الألم والثاني الفارق تقريبا 5 دقايق ويكون الالم أكثر وأشد مع مرور الوقت , الشي الثاني فيه ألم شديد فالظهر وتحسي نفسج مب قادرة تتحركي ولا تمشي
الطلق الكاذب هو انج تحسي بألم وبعدها يتوقف لمدة ساعات وبعدها يرجع شويه وتوقف لمدة ساعات وهكذا
طبعا ليش نحس بهالألام ؟ علشان فهذيج اللحظة حوض الحامل يتوسع وينزل الجنين أكثر وتصير الولادة
فلما يصير طلق كاذب ننتظر شويه لانه بعده الرحم مب فاتح ممكن بس فاتح 2 سانتي , فننتظر شوية لين نحس فعلا ألم حقيقي مستمر وراء بعض ويزيد
لما يصير لج ألم حقيقي تروحي للمستشفى بتقيس لج الممرضة كم فاتح رحمج ممكن يكون 4 سانتي تقول لج اشربي ماي وفنفس الوقت تريد مثانتج تكون فاضيه , طيب كيف مثانتي تبيها تكون فاضيه وانا أشرب ؟؟!!
طبعا اذا كان رحمج فاتح 4 سانتي ممكن تساعدج الدكتورة وتروحي تفرغي فدورة المياة , أما في حالة فاتح من 5 وفوق فهنا خطير تروحي دورة المياة , في هالحالة أما الممرضات يجيبن لج طشت تفرغي فيه أو أنبوب أو تفرغي فوق السرير ويكون حاطين فيه قماش يمتص فيها السوائل .....
المرحلة الثانيه وهي خروج الجنين
هنا يوصل الرحم 10 سانتي , الممرضة راح تدخل ايدها وتتاكد راس الجنين تحت او لا , بعضهم يكون مايل يعني يكون نص راسه ظاهر ونصه لا , هنا تنام الحامل على جنب لفتره لين ما يتعدل وضع الجنين
لما يتعدل وضع الجنين نجي للحظة الولاده , تفك الحامل رجولها وتحط يدها تحت ركبها تاخذ نفس عميق وتزفر وتعيد المحاولة لين يطلع راس الجنين وتتوقف هنا للحظه , بتتاكد الممرضة اذا الحبل السري مب ملتف حول الرقبه أذا مب ملتف تكملي تاخذي نفس عميق وتزفري لين ما يطلع الجسم كامل وكذا تمت ولادة البيبي , في حالة البيبي صحته زينه وسليم فيوضع فوق صدر أمه أما في حالة انه فيه مشكلة لا سمح الله مباشرة ياخذنه الممرضات للدكتور او الدكتوره ليقوموا بالإجراءات اللازمة . طبعا نحن خوفنا من قص العجان .... طبعا العجان هي المسافه الفاصله ما بين المهبل والشرج .
متى يستدعى أنه يقص العجان !!!, لما يكون وزن البيبي ما شاء الله كبير أو عظلات حوض المرأة مشدودة يعني ما تمتط
الأخصائية نصحتني بداية ما أدخل التاسع أدهن منطقة المهبل من تحت بزيت الزيتون يوميا حتى يساعد على الولادة وبدون قص العجان
بعض الحريم ما عندهم مسافه ما بين المهبل والشرج فهنا يكون القص مايل
في لحظه الولادة يكون الألم شديد جدا لكن الممرضات راح يحطن كمام فيه بخاخ مخدر يساعد على تخفيف الألم
المرحلة الثالثه وهي خروج المشيمة
طبعا بعد ما يخرج البيبي يقل الألم وترتاحي شوي وتسترخي , ممكن المشيمة تنزل من نفسها من بعد ولادة الجنين من دقيقتين ل 5 دقايق وممكن تساعدج الممرضة لنزولها
وكذا الحمدلله خلصنا من الولادة الطبيعية اتمنى ما أكون نسيت حاجه
الله يتتم علي حملي وحمل جميع الحوائيات ويسهل علينا الولادة
أتمنى من المجربات يفيدنا أكثر في حالة مرن بهاذي المراحل أو لا
واذا فيه وحده عندها حاجه مفيده تفيدنا
وصلى الله وبارك على سيدنا محمد عليه أفضل الصلاة والسلام

30 تعليق 15,609 مشاهدة

شاركي في النقاش

سجلي الدخول لإضافة تعليق.

التعليقات

29
  1. @flower_20

    كل الكلام الي مذكور صحيح جدآ انا في حملي كنت من التعب اقول شكلي بولد بدري مادخل التاسع وامي تشوفني تقولي لسه بطنك فوق مانتي والده وكانت تجيني الالم الطلق من نهاية الثامن بس انه طلق كاذب وفي التاسع تنزل علي مويه رحت الطؤاري قالت عادي المويه عشانك قريب تولدي ونزل علي دم كانه قطع لونه بني وخيوط وقلت لها قالت عادي خلال اسبوع او اسبوعين تولدي خلال الشهر التاسع لاحظت انه بطني كل مالها تنزل اكثر اخر يوم في حملي رحت الممشى الصباح ولمن رجعت فيني طلق حسيت شي يسيل على رجولي واروح الحمام القى مويه نزلت بس مارحت المستشفى قلت خليني انام شوي احسن صحيت وراح الالم زعلت وجلست ابكي لاني طولت فالتاسع وخلصته لاحظت انه بطني مرهه نازززله تحت وفيه مسافة بين الصدر والبطن خمس اصابع قمت اكل تمر و اشرب قرفة وزنجبيل بعد ساعتين جاني طلق الولادة كيف عرفت ؟؟ عشانه منتظم الفرق بينه وبين الكاذب انه منتظم يششششد وبعدين يفك كل خمس دقائق والحمد لله ولدت وطلعت بنتي متبرزه في البطن وشاربه من المويه حطولها تنفس اصطناعي ولي في صدرها عشان يسحب المويه من الرئة اثر خياطة الجرح ماراح احس بالذنب كل ماشفته جلست في الحضانة اسبوع بعدين خرجت الحمد لله لاززززم المتابعة في الشهر التاسع انا كنت خايفة اروح واستنيت لين يجي الطلق من حاله الحمد لله على كل حال هذي تجربتي اتمنى اكون افدتك
  2. @am_ghyd_2017

    صاحبة الموضوع
    Flower 🌸
    كل الكلام الي مذكور صحيح جدآ انا في حملي كنت من التعب اقول شكلي بولد بدري مادخل التاسع وامي تشوفني تقولي لسه بطنك فوق مانتي والده وكانت تجيني الالم الطلق من نهاية الثامن بس انه طلق كاذب وفي التاسع تنزل علي مويه رحت الطؤاري قالت عادي المويه…
    يالله

    صدج لازم متابعة فالتاسع وخاصة للبكرية
    أهم شي الحمدلله على سلامتها وسلامتج
    ومشكورة على طرح تجربتج
  3. @fys_msthy

    ماشاءالله كفيتي و وفيتي بس حبيت اضيف مو شرط الكل يشوف افرازات او السدادة او دم او مويه
    انا في بكري ماشفت هالعلامات الفاصل كان الطلق كل 5 دقايق منتظم والمويه فكوها عند الولادة
    وما اذكر ان كنت خفيفه او لا الصراحة بس ااكد اللي قالته عضوة قبلي عن الفراغ بين الصدر والبطن بحوالي 5 اصابع واول كان الفرق 3 اصابع يعني تاكدت انها نزلت الحوض و ولادتي قريبه و بس

تابعي تجارب أخرى من هذا القسم.