المجتمع يسمع ولكن مايشوف هل أنتم منهم ؟!

السلام عليكم ورحمة الله وبركاته
مساكم وصباحكم نور ورضا من الله


يابنات انا انسانه تعلمت ماأصدق أي مخلوق
خاصة بأمور الزواج والخطبة وصداقة الناس حتى لو هم من الثقات


مثلاً تزوج قريب لنا قالت وحده لنا الله يعينكم عليها بخيله وفيها وفيها اكتشفنا بعد عشرة ١٣ عاماً انها كريمة جداً واكتشفنا من مواقف ان القائلة هي البخيلة


صديقتي فلان راعين مشاكل فيهم وقبيلة فلانية عندهم وراعين تشرهه فبعد معاشرتها تبين لي انها تخاف من العين وتحب تشرهه وتتدور مشاكل بأي وسيلة مع الجميع رغم انها تنتقد هالنوع من الناس


واحد من اقاربي تزوج وحده قالوا انها بسيطة ومتواضعه وخلوقه دخلت علينا رافعه خشمها مغرورة


بنت عمي مخربة بيوت اخوانها واهل زوجها وتقول أنا إنسانة مسالمة !!


جارتي تزوج اخو زوجها والناس قالوا بتكون سلفتك فلانة الفلاني تراها رافعه خشمها وتحس انها أميرة وهي معلمة تقول دخلت علينا لها ٨ سنوات مافي أطيب منها !
عمي تزوج قبل ١٥ سنة ايام مالناس هبو بالماركات والمجمعات قالوا ناس بيتزوج أنيقة وخبيرة ماركات وكشخخه والله البنت عادية جداً ومعترفه بنفسها اهم شي بساطة بدون تكلف بس للأمانه شخصيتها حبوبة وطيبة ومالها بالهياط
وتعلمو مو كل شي يتصدق واحرصوا من اخذ العلم من كذا شخص
مثلا بالخطوبه لاتسالي خالتها فقط اسالي مرة اخوها وعمها وخالها وعماتها
تعدد جهات يبين لك شخصية الشخص
من انغشت بأهل زوجها او زوجها او صديقتها او اقاربها
اذكرو المواقف لنا عشان نستفيد