(تجارب المطلقات) دعونا نتشارك بمعاناتنا واراءنا وتطلعاتنا لبناء مستقبل جديد

سمكة.. تسمحين لي أتلقف؟

أولا رد المستشار قمممة.. يعجبني الإنسان اللي يقدر شعورك ويتفهمه.. المقارنات بالزواج والطلاق فاااااشلة لسبب وجيه.. الله أختار الناس نفسيات وأمزجة وقدرات وطبايع وأرواح (قل الروح من أمر ربي) وبالتالي الشي اللي يعجب أختك مثلا يمكن أنت تكرهينه والانسان اللي تصبر عليه فلانة ماتواطنه ولاتتحمله علانة وهكذا..

الخلاصة يابنات.. لاتسمحون لأحد يلومكم ولا يحسسكم إنكم معدومات صبر ولا قليلات حيلة ولا ماعندكم حسن تدبير.. باختصار لو كان الإنسان اللي جالس يلومك على قرارك بنفس ظروفك وبنفس قدراتك وبنفس طاقتك وبنفس طبيعتك وقواك ماراح يآخذ إلا قرارك !

ثانيا.. سمكه أنتِ وش بتخسرين بتجربة الرجال مره ثانية؟؟ ايش أقصى شي ممكن يصير للتجربة؟؟ طلاق؟؟ وإذا.. مو شي جديد وأمر عادي وجربتيه قبل.. يعني ماراح تخسرين شي جديد..
ماأبي أشجعك على شي ماحبيتيه.. لكن فكري بأقصى ضرر منه.. وقيسي الوضع.. أنا أشوف التجربة لمدة سنة مثلا مقياس معقول.. حسيتي براحه وقبلتيه وتعدل هو معك وصار مساره حلو الحمدلله .. بتصيرين كسبتي بيت مستقر.. ولو لاسمح الله لقيتيه مثل ماهو أو حتى قلبك لازال (نافر) منه.. فالرجوع عن القرار بيدك.. وعيالك معك.. طبعا مو لازم تحبينه، لكن المهم ماتنفرين منه.. يعني حنا نبي قدر معقول يسمى (القبول) ..

ولاأوصيك بكثرة الدعاء هاليومين.. وصدقيني اللي بيصير هو الصحيح وهو الخيرة أياً ماكان.. :26:

.....

أناناسة ..

تعالي مافهمت (قهوة!
وأنتي دايماً قاطة مع الناس...)

يعني وشو ؟ :30:

^
^
يعني تغطسين وإذا أحد دعي لأحد هل هلالك وقلتي حتي أنا أبي...


بس ترا سمكة عندها عيال... وإذا رجعت له بمشاكل وغثا بتتدمر نفسيتهم... بعد هي ما قعدت ثلاث سنين لا معلقة ولا مطلقة علشان ترجع علي ما راحت عليه,,,

ليلاس

والله الحمد لله النفسية في العلالي والفضل لله سبحانه وتعالي... ثم قراءة سورتين والتبصر فيهما... يوسف وطه!

ام الزمردات

الله يوفقك ويعوضك بأحسن منه...

لا أنسنس.. لازم إذا هي بترجع ترجع بضمانات وشروط ويكون هو عارف إنه لو ماتعدل مافيه للحياة معه استمرار.. ولذلك الأفضل لو بترجع له تكلمه شخصيا وتضع النقاط على الحروف، يعني لاتترك الكلام للوساطات ولو كانوا ناس قراب.. محد فاهم لها قدها..
وأتوقع بكذا مافيه مشاكل.. كأنها داخلة على رجال جديد.. ارتاحت الحمدلله، مامشت تتركه وتستقل من جديد وتصير جربت الفرصة الأخيرة..

اسأل ربي يدبرها على الخير ويشرح صدرها له.. آمين

أنسنس أما الدعوات ماتتفوت خاصة بهالشهر الفضيل ماندري من مين ربي يقبلها وتفرج :26:

خواتي ما عدمتكم

الله يوفقكم ويرزقكم كل خير

احاول اجمع افكاري وارد عليكم

لا تنسونا من الدعاء

خذي وقتك سمكة.. ومو شرط تردين، المهم تصلين لقرار يريحك..

في نقطة فعلا مهمه.. هي كيف وضعك وأولادك الآن؟
تحسين إنكم مرتاحين..؟ يعني تجربة الرجوع لأبوهم ممكن تسبب قلق لحياة مستقرة تعيشونها الآن؟

شوفي مافي وضع مثالي بكل الأحوال.. مافي راحة مطلقة بالدنيا.. لكن في حال أريح أو أفضل من حال..

ممكن هذا يساعدك بالقياس بعد..
بمعنى قارني.. بين حياتكم الآن.. والحياة اللي كنتم أو متوقع تعيشونها بعد رجوعك له..

الله ييسر لك الخير.. حاسة بشعورك.. لأن لحظات القرارات الحاسمة خاصة إذا كنت بفترات طويلة تكون مرهقة نفسيا لأكبر حد..

الله يهيأ لك من أمرك رشدا ..