مذنبه مع اطفالي💔

السلام عليكم ورحمة الله
اخواتي اباخذ رايكم بشغله اسويها وحاسه بتإنيب ضمير منها
مادري هي غلط ولا انا اللي خايفه بزياده
عندي ثلاث اطفال الله يحفظهم اكبرهم ٧ سنوات واصغرهم سنتين ونص
انا تعودت هالعاده من هم صغار اذ صرت ماني فاضيه اقابلهم زي مثلاً بذاكر ولا اشتغل بالبيت ولا اذ حطيت القهوه لابوهم ونبي نروق ساعه بدون ازعاج ولا عندي اي شغله اقفل عليهم بغرفتهم واشغل لهم التلفزيون
احطهم ثلاثتهم مع بعض ماعمري قفلت على احد لحاله
بيتي صغير ثلاث غرف والصاله دايم مكان ضيوف وماخلي احد يجيها
وغرفتهم غالباً قطعة كنبه وتلفزيون معلق بالجدار وبس عشان انشغل براحتي و ماخاف عليهم من كهربا ولا شي
المشكله اولادي يحسسوني بالذنب لما يبكون ويرفضون ادخلهم غرفتهم
😭
احيان احسهم يتدلعون واحيان لا والله احس بالذنب
علماً اني لو خلصت شغلي طلعتهم عندي ولا اجلس عندهم انا
مو طول الوقت بالغرفه بس وقت ماكون مشغوله
خصوصاً ولدي الصغير يزعل مره اذ دخلتهم الغرفه
ومايقولون لها الا غرفة الحبس💔
لو اخلي الباب مفتوح مايسمعون كلامي يطلعون ويجون عندي بالمطبخ ويطفشوني عشان كذا اضطر اقفل عليهن
هل تصرفي غلط معاهم وله تأثير سلبي عليهم ولا انا بس قلبي معورني عليهم مع انه لنا سنين كذا ماتعودو للحين عليها كل ماقلت لهم غرفتكم قامو يبكون☹
انا ماعندي شغاله وادرس وابوهم دايم مشغول عنده عملين
وبالعافيه قادره اوفق بين شغل بيتي ودراستي وعيالي
الله يعافيكم اذ تصرفي غلط لاتضغطون علي بالردود وتجرحوني
لو تعرفون نفسيتي كيف تتاثر باي شي عن عيالي كان فهمتو موقفي😭