باخذ شنطتي واروح بيت اهلي يالحكيمات تكفون ادخلو

(أسعدي نفسك بنفسك) و مهما انتظرتي السعادة من أحد ماراح تسعدي،،

اولا لما نمر بمشكله ركزوا على المشكله ((سفر /بخل /شك/انتقادات/عصبيه))

ولاتركزوا على مشاعركم ((قهر/غضب/حزن/بكاء/نارمن جواتي/غبن))

ليش؟؟؟؟؟؟
علشان تقدرون تفكرون بعقل
وماتفكرون بعاطفه

لان التفكير بعقل غالبا يعطيك حلول صائبه وجيده بعكس التفكير بالعواطف يعطيك حلول مؤقته وعاطفيه وعشوائيه قد تزيد المشكله تعقيداً

اثناء المشاكل والحزن احذري تتخذي قرار احذري احذري احذري ليش؟؟؟؟؟
لانك ستندمين عليه بمجرد ماتهدئين وتروقين وبالخاص اشوف بلاوي اسألها ليش تصرفتي كذا تقول لانه قهرني
فتزيد الطين بله وبدل مانعالج المشكله نعالج الاخطاء التي ارتكبت بعد المشكله

سافر مع اصحابه(١)مع انه مو جديد يحب السفر ويسافر كثير
ماقال الا ليلة السفر(٢)
ماتعرفي اصحابه(٣)
مايحب تطلعين(٤)
حسيتي بغدر(٥)

طيب آخذها لك وحده وحده
وراح اكلمك ((بعقليته علشان تفهيم ليش صار كذا ))وحطي تحت عقليته الف خط
انسان يحب السفر وداااايم يسافر واكيد بهالدااايم اللي يسافر فيها يكون مشاكل مالها اول ولا آخر فهو صار يلجأ للصمت علشان المشاكل ويسوي كل شئ بسكات علشان ماتنكدي عليه من
(((منظوره هو )))انا مالي دخل علشان ماتنقز وحده وتقول انتي تدافعين عن الرجال
فقال ياولد جهز كل شئ ولاتتكلم الا ليلة السفر علشان مايصير لها مجال تنكد على اهلك ورح انبسط واستانس
فأنتي وحده من ثنتين
اما بتسكتي وتعاتبيه عتاب عام مثلا ماشاء الله الله يرزقنا مما رزقك وتضحكين وتودعينه وداع الحبيب لحبيبه لانك فكرتي وقلتي ماراح أستفيد شئ ليش انكد على نفسي وماراح اقدر اصرفه او أمنعه من هالروحه
فكبرتي عقلك واليوم تجهزين لك برنامج لمده شهرين قدام تستفيدي منها وتستمتعي وتسعدي نفسك(مثلا مشروع من البيت /زيارات وصلة رحم/طلعه مع الاهل اهتمام بالنفس اهتمام بتطوير شخصيتك .....الخ))

واما انك لما عرفتي شهقتي شهقه شفطتي كل الأكسجين ببيتك وانطلقتي عليه ماشاء الله آخر من يعلم وادري ان هالسفره تبغالها تجهيز اوراق وبسبور وغيره قبل بشهر تراني مليت من هالغموض وحسبي الله عليك حرام علينا حلال عليك الله لايوفقك ولا يهنيك ويالله مافيه شئ وقع على لسانك الا وقلتيه له وهو حط راسه ونام وانتي حتى النوم ماقدرتي من الغبن والقهر
وقام الصباح اخذ شنطته وطلع للوناسه وانتي تآكلي بنفسك وتشربي قهر وبكاااء

وبعدين؟؟؟؟؟؟؟
ايش نستفيد ؟؟؟؟؟؟
وللمعلوميه انا اقول هالكلام وانا زوجه زيكم وما اعيش ببرج عاجي ولا قصر بالمالديف ولافندق بسويسرا اقول هالكلام علشان صحتكم علشانكم تهموني علشاني احس انكم من جنسي علشان اي زوجه اتمنى لها تعيش بسلام مع نفسها قبل زوجها
ياحبيبتي سعادته بسفر ويسوي المستحيل لوناسته اثبت له ان سعادتي عمرها ماكانت معه
سعادتي مع ربي
سعادتي مع نفسي
سعادتي مع اولادي
سعادتي بهواياتي
ولاتتوقعي ان حزنك بيغير شئ بالعكس كل ماشاف ردة فعل قويه منك خطط على سفره احلى ليبتعد عن مشاكلك ونكدك بزعمه
متى تفهمون والله صوتي انبح وقلبي تقطع وانا اقول اسعدوا انفسكم لان بقدر ماتسعدينها تجذبيه لك وبقدر ماتحزنين وتنغبنين بقدر مايسعد نفسه بعيدا عنك
حبيت ادلي بدلوي اتمنى تتقبلون هالكلام من اخت محبه ومشفقه وتتمنى لكم الخير كما تتمناه لنفسها واحب الناس لها
محبتكم /موضي التميمي

قرات مشكلتك و احسست بقهرك لكن انا من راي الاخوات طنشيه .لا تعاتبيه على كل شيء هو يطلع لديرته اطلبي منه يحطك عند اهلك و لما يكمل سهر و صحبة يجي ياخ\ك على البيت و كدا تستانسي باهلك و ما تحسي انه مطنشك و ناسيك .نصيحتي لك خدي شنطتك و روحي ارتاحي ببيت اهلك و ابعدي عن التوتر و شوفي رد فعله.لكن لا تتصلي به كل شوية و مسالة انك كل شوية هدية له انسي مادام ليس فيخ مقابل معنوي و لا مادي .الله معك و سيفرجها .

ياعمري شكلك مضغوطة روحي لاهلك يومين غيري جو

الله يصلح الحال يارب

تبين نصيحتي كأخت حمدي ربك لايخون ولا يزني ولا راعي شراب ولا راعي بنات ذَا المهم وإذا علا الطلعه والله في بنات كثير وعندهم عيال ودايم عند اهلهم وحده اعرفها عندها بنات بالمتوسط كل سنه برمضان عند اَهلها من اول ماتزوجت وزوجها بالبيت لحاله ومو نفس الديره ومبسوطه ولا عليها وفيه غيرها كثير انتي افضل منهن حمدي ربك والعلاقة والله في شباب بالعشرين مايجي الا كل مره بشهر او مرتين ذي محلوله سوي له آكلات تزيد الرغبه روحي كم يوم عند اهلك ارتاحي ولا تخربي بيتك ترى زوجك افضل مليون مره من غيره