ألم الدورة؛ بعد إنتهائها بإسبوعين..

السلام عليكم و رحمة الله و بركاته.
أنا عضوة جديدة و ما قررت أسجل بهالمنتدى إلا يوم شفت كيف تفاعل العضوات مع المواضيع اللي يطرحونها البنات هنا و فعلاً واضح إن قلوبكم على بعض❤️.

أنا متزوجة من ثلاث سنين و ربي ما رزقني بأطفال الحمدلله على كل حال؛ عندي آلام الدورة الله يكرمكم شديدة جداً جداً للدرجة اللي يحصل فيها إغماء و مستشفى و أشياء كثير الله لا يجعلها لأحد منكم..
الدورة هالشهر و إنتوا بكرامة جاتني كالمعتاد ٧ أيام لكن آلامها كانت أقوى من قبل بكثييير و كمان كان عندي الدم و إنتوا بكرامة ينزل بشكل مو طبيعي "غزيرة"؛ كنت أغير باليوم كل نص ساعة!
خلصت ال٧ أيام و دخلت باليوم الثامن من الدورة لين اليوم ١٩ اللي هو اليوم؛ علماً إن كانت دورتي بتاريخ ٤/٦/٢٠١٧.
اليوم بالذات و لأول مرة في حياتي كلها فعلياً؛ حسيت بألم فظيع زي ألم الدورة بالضبط لكن متركز أكثر شيء في ظهري و جانبي الأيمن؛ مع إفرازات و إنتوا بكرامة كثيفة لونها أصفر مع نادراً بني فاتح..
الألم لا يُطاق و والله أحس إن الدورة حتنزل بأي لحظة مع إنو باقي لها تقريباً ١١ يوم! على موعد الدورة الجاي قصدي..
كان في ألم بصدري كمان قوي يروح و يجي؛ مع غثيان و لوعة تقريباً قبل يومين! ماني عارفة أيش حاصل لي و فعلاً ما قد حسيت بهالإشياء نهائياً من قبل!
كتبت هالموضوع لعل و عسى وحدة من العضوات جزاها الله ألف خير تكون فاهمة و تقول لي أيش صاير..

و لكم مني جزيل الشكر حبيباتي❤️.