معاناتي الداخليه بعد الطلاق .....!

صباح الخيرات
كل عام وانتم بخير 🌟
ابيكم تنصحوني من خبرتكم بالحياه ماعديتكم الا خواتي وحبيت افضفص لكم
انا يتيمه توفي الوالد الله يرحمه وانا صغيره بالابتدائي وماعندي اخوان بس بنات وولدت زي مايقولون من ( رحم المعاناه )
ماعندي اي سند بالدنيا غير الوالده الله يحفطها ويطول بعمرها الظروف اللي مريت فيها خلتني وحده قويه قياديه معتمده على نفسي درجه اولى وماحب اكلف او اطلب من احد مساعده تخرجت من الجامعه و تزوجت ولد خالي زوجني اياه ولي امري (بعد ابوي ) استمر الزواج هذا سنه ونص بدون اطفال وتطلقت لانه كان جدا استفزازي يقول انتي مالك والي يعني ماعندك سند ومستخف فيني ، ليته عاد على هالكلام كان شخص كويس لا العكس سيى جدا تحملت كل شي لين مسكت عليه حبوب مخدرات وعلمتها ولي امري عاد رفض بالبدايه يطلقني قال انا شاريك وخلاص تبت لكن انا رفضت نهائي اعتذاره وتطلقت بدون مشاكل الحمدلله يعني بحكم انا قرايب ماوصلت للمحاكم
بعد الطلاق شفت الاغلب يشفق علي لاني يتيمه وبرضوا بنفس الوقت مستغربين اني ماتاثرت بالطلاق ابدا ً توقعوا اني اتاثر واسكر على نفسي ولا اطلع للناس بالعكس عشت حياتي طبيعيه زي ماكنت قبل الطلاق
لكن ياخواتي بالنفس شي مايعلم فيها الا الله وهالشي ابدا مابينته لاي مخلوق صح اني ماندمت ابدا ابدا على الطلاق لكن احس ماراح اتزوج واحد كفو وكل ماشوف المتزوجات المرتاحات اقول ليش حظي كذا ؟!!! واحس عمري راح عمري 29
هاجسي صار الزواج واني اكون اسره وكل ماتمر فتره اقول ماجاني احد اقول شكلي باصير كذا طول عمري وحيده مع اني والله الحمدلله ماناقصني شي جامعيه والحمدلله الكل يشهد باخلاقي واحنا تربينا ببيئه الوالده الله يحفظها ناس ملتزمين
احس بعد الطلاق صارت حياتي مبنيه ع الانتظار !!!!!
وش رايكم بقصتي وظروفي ابي نصيحه لي توجيه احكوا لي قصص اذ عندكم من مجتمعاتكم الله يحقق لكم خيرات الدنيا والاخره 💙💙