(1) ⭐️تبشاير يوليو واغسطس ⭐️ (1)

البنات اللي يقولون ما عندنا بواد ولاده ...
البوادر تجي بلحظه وبدون مقدمات ...
سبحان الله انا نمت وانا مهمومه ومحتاره من ولادتي قيصري ولا طبيعي ... قمت الساعه 11 باليل وانا بالمستشفى صليت ودعيت الله يفرجها علي واستخرته يختار لي الافضل ...
ودعيته ان كان الولاده الطبيعيه فيها خير لي ولودي تيسرها لي من عنده وبدون طلق صناعي ... ونمت


و والله يا بنات ما صحاني الساعه ثلاث ونص باليل الا الم الطلق واقول بنفسي لا مو معقول طلق ورجعت نمت ويصحيني الفجر نفس الالم .. واطنش واقوم اصلي الفجر وارجع سريري واتصل على امي قالت هو طلق وتجيني الممرضات ويحطون لي التخطيط قالو مافي طلق مدام ... حطموني


قلت بنفسي والله انه طلق انا جربته واعرفه ... المهم الساعه سته الصباح نزل معي دم وبعدها تأكدت انها ولاده


خفت وارتعبت واتصلت على زوجي قلت الان تجي وتقابل الدكتور وتقوله قيصري قبل لا يقوى علي الطلق
وجاء الدكتور الساعه 7 الصباح استشاري قلي هاه وش اخترتي قلت له قيصري وانا بموت من الم الطلق ...جابو الاوراق ووقعوني على القيصري
الا بدخلت زوجي وامي علي قال خلاص قررتي قيصري قلت وقع وخلصني قيصري ووقع زوجي وهو ماهو مقتنع وقلي ليش استعجلتي ...
بنفس اللحظه دخلت الدكتوره المناوبه قالت تخليني افحصك قلت لها ليش وانا خلاص قيصري .. جلست تقنعني بالطبيعي وانها تفحص وتفتح الرحم
فحصتني قالت فاتح واحد سانتي خليني افك الربط وانزلك للولاده ... وجاتني الممرضه وقالت مدام وجع يوم بالطبيعي ولا اربع شهور قيصري
انا هنا اتألم من الطلق وخايفه على ولدي ... و زوجي برا الغرفه واقف مع استشارين واحد مصري والثاني تونسي ... المصري يقنعه قيصري والتونسي يقنعه طبيعي

وامي تطالع فيني وساكته ... واشوي وهي تقرب مني قالت والله يا بنتي اني البارح اوترت قبل لا انام ودعيت الله انه يجيك كلق طليعي وتولدي طبيعي ...وانا ام وقلبي مطني عليك انك تولدي طبيعي
هنا انا كأني تطمنت شوي ومتردظه بنفس الوقت ... دخل علي مره ثانيه زوجي والاستشاري التونسي .. قلي شوفي انا كلمت زوجك ان اللي بوضعك انا مستحيل اولدها قيصري لان كل امورها تمام وتقدر تولد طبيعي ...
لكن انا لاني مقدر ان هالطفل جاكم بعد سنين سمحت لك بالقيصري تقديرا لخوفك على طفلك ... بس لو حابه تولدي طبيعي وخايفه على الكفل لا تخافي حنا بناخذ كل احتياطاتنا في حال حصل اي شي مفاجئ ندخل العمليات ..وبنكون كلنا معاك بأذن الله
قلت خلاص طبيعي .... وشالوني غرفة الولاده وانا داخله بالكرسي والالم بيذبحني قابلت الاستشاري المصري وجلس يكلمني ويقولي ما تخافي ربنا معاك وانا هنا والكل جاهز وماخذ احتياطاته ... وربنا يفرحك بولدك


حسيت براحه بعد كلامه ولما دخلت غرفة الولاده لقيت طاقم ينتظرني ممرضات والدكتوره المشرغه علي والمناوبه والاستشارين واقفين كلهم ...ويعلمون بعض بخالتي ووضعي
حسيت ان كل قسم الولاده عرفوني وعرفو ان اللي معي ولد واسمه عمر قبل لا ينولد 😂😂😂
المهم حطوني واول ما فكت الربط قالت ما شاء الله مفتوح 2سانتي هذا الياعه تسعه تقريبا ...
وابتدا الالم وانا اتقلب على السرير وجهاز التخطيط علي وكل شوي تدخل دكتوره تطمني وتقيس جلست لين الظهر قالو اربعه سانتي ...
و زوجي كل شوي يتصل هو وامي على قسم الولاده واسمعهم يقولون لهم لسى
والساعه خمسه العصر قالت سبعه سانتي هنا انا خلاص تعبت انتهيت حسيت اني توهقت بالولاده الطبيعيه وانها شي فوق قدراتي وصرت ادعي كل ما حسيت بضيقه ان ربي يهونها علي ويحفظ لي ولدي
والاستشارين كل شوي ينادون على الدكتوره من وراء الستاره وتقولهم لسى
الساعه سته قالو 8 سانتي واتصل زوجي على جوالي ورديت بس قلت له ادعيلي لسى ما ولدت
وهنا بديت افرح سوي ان الرحم خلاص فتح مع ان الالم زاد وقالت 9 سانتي ... انا هنا بديت اصرخ مع كل طلقه تجي والدكتوره تقولي لا تدفي لسى لما اقولك ...بدو الممرضات يجتمعون والدكتوره تتجهز

واول ما دكتوره شافتني ... قالت اسمعيني كويس عشان لا تتعبي ولا تتعبي ولدك ...اول ما تجيك الطلقه والألم اكتمي نفسك على تحت ودفي بقوه ولا تقطعي دف ... وصارت تقول يالله يالله اول ما اقولك
وجاتني الطلقه وانا كاتمه وصابره واحاول ما اصرخ وصارت تقولي برافو ويشجعوني هيا والممرضات انه خلاص الراس طلع وفجأه انقطع نفسي ورجع الطفل ...
و كلمتني الدكتوره مره ثانيه ...قالت لا تقطعين نفسك مره ثانيه لا تتعبين الولد وتضعفين نبضه ... بس قالت لي هالكلمتين حسيت انها مسكتني من ايدي اللي توجعني ...
وجاتني الطلقه مره ثانيه ودفعت وحاولت اني ما اقطع نفسي وصارو يشحعوني واول ما حسيت ان نفسي انقطع قالت الدكتوره شوي وخلاص لا تقطعين تحمست وقلت يارب ونطت ممرضه فوق كرشتي وصارت تنزل على تخت وساعدتني ...وحسيته خرج زي الحلم
وشفته على بطني حطوه وانا بين حلم و واقع بين مصدقه ومو مصدقه وحسيت اني بدوامه والدنيا تلف فيني
ولما استوعبت صرت اقولها ليش ما يبكي انفجعت ...
شويه واسمعه يصرخ انا هنا انهرت صار هو يبكي وانا اصرخ وابكي وجاتني حاله هستيريه من بكى واابكي واحمد الله انه طيب والدكتوره تبشر الاستشاري والاستشاري يتصل ويبشر وصارت الفرحه معبيه المكان
واتصل زوجي على جوالي ....و بنفس منتهي رديت قلت له ولدت قلي انتي بخير قلت المهم عمر بخير ... قلي الف شكر واسمع امي تزغرط عنده واسمع صوت جاراتي وصحبتي واخته فرحانين
وبعدها صارت الدكتوره تخيط ...وقالت لي الحمدلله انك ما سويتي قيصري لان صار معي نزيف ولو قيصري كنت راح احتاج نقل دم
والحمدلله خرجت من غرفة الولاده الساعه 11 ونصف
واستقبلني زوجي وامي بالزغاريط والكل فرحان وانا بحالة ذهول وراحه ان ىبي حفظ لي ولدي

والحمدلله انتهت رحله الحمل والولاده وربي يسرها لي
ويارب تتيسر لكم جميعا

ياعمري دمعه عيني من قصتك الحمدالله والف شكر له ماافي من احلى من ذي التجربه يارب ارزق كل ام يارب سهل لنا يارب

قصتك ملهمه وايجابية ربي يسعدك وين الباقي نبغى قصص اجابيه🎉🎉🎉