زوجي وخواتي يقولون عني مسكينه ؟ رايكم

الله يسعد لي مساكم
ياخواتي انا باحط هنا مشكلتي واتمنى تكونون الحكم بيننا او تعطوني انا او خواتي نصيحه صدقوني راح نسمع لكم
المهم مشكلتي انا واخواتي ثنتين هم نفس بعض بالاطباع وانا غير عنهم ودايما تصير مشاكل بسبب اختلافنا
انا باقولكم وانتم شوفوا مين الصح بينا وتراهم معاي يتابعون الموضوع
خواتي الثنتين صراحه طيبات بحدودوثقيلات واجتماعيات بالحد المعقول اذ طلبهم احد مساعده يقولون بنشوف ظروفنا وتجي مشاكل مع ازواجهم مايعلمون الناس
انا صراحه خفيفه ماني ثقيله ومره مره طيبه يقولون لي ساذجه طيبتك واحب اساعد الناس اذ احد طلب مني مساعده على طول اقول ايه وانا مدري اقدر او لا !!
كذا احس اني ارتاح وخواتي يقولون هو لوجه الله او تبينهم يمدحونك ؟!! وانا بصراحه ماعمري فكرت وش هدفي احس براحه اذ ساعدت الناس وماتحمل احد يكرهني او يفهمني غلط لان اذ انفهمت غلط كثير ابرر للناس تصرفاتي حتى زوجي احيانا تصير مشكله بسيطه اقعد ابرر له تصرفي
واكثر من مره اسمع كلمه انتي مسكينه وتركضين وراء الناس من زوجي وخواتي
واذ جيت يابنات زياره لاهلي هوشات عند تصرفاتي لاني اقعد اعلمهم بتصرفات خوات زوجي يقولون انتي غبيه تراهم يقصدون كذا وكذا ! واذ حللت الموضوع يطلع فعلا كلامهم صح
ملاحظه بس عشان تفهمون وضعي تراي انا ماني غبيه ومافهم يعني بالعكس ذكيه مره بالدراسه بس صدمتني وحده من صديقاتي مره قالت لي تر الذكي بالدراسه غبي بالحياه 💔 صدمتني صراحه على بالها انا غبيه وانا والله بس مره ركزت على سالفه وحدها قالتها لي عن زوجها عرفت انها تكذب علي لاني ربطت كلامها بكلام قالته لي قبل يعني ماني غبيه ليه قالت لي كذا
وبالنسبه لخوات زوجي يقولون عني انتي مره طيبه وعلى نياتك ونحسك ماتكرهين احد احسهم يحسوني مخفه مدري ليه هالشي حسيته بعد كلام خواتي وتحليلهم لتصرفاتي معهم اخر موقف زوجي قال بيجيب جدته عندي تسكن قلت الله يحييها هي مره كبيره بالسن مره عجزت اقول لا وخواتي عاد انقهروا وقالوا انتي مانتي مكلوفه فيها وشوفي كلام غيرنا عشان كذا قلت باكتب باششوف نصايحكم وردودكم
ابي رايكم ونصايحكم تهمني لاني اثق ان هنا بنات فاهمات ومثقفات وحكيمات بالرد ابي تعليقكم على الموضوع بكل صراحه وانا وخواتي راح نتقبل اي كلام بصدر رحب الله يسعد من ترد بهذي الصفحه ويجعل لها من اسعد خلقه 🌷🌷