طلعت مع اهلي وخالاتي وبناتهم في سهرة باستراحة اليوم وشفت بنت خالتي اللي توها طالعه من النفاس (هالحين لها شهرين ) والده ومع ذلك ماراحت لبيت زوجها فقلت لها: ليش قالت حكايتي حكاية تعالوا اسمعوها:
هي عندها اربع بنات وخالتها(ام زوجها)زعلانة بالحيل كل مرة تنتظر الولد يجي وماجاء وفي المرة الاخيرة اللي حملت فيها بنت خالتي قالت خالتها لولدها: شف حلف علي اذا جابت حرمتك هالمرة بنت
( كمخه) تحرم علي بيتك حتى اموت؟؟؟؟( المسكين تقل بيده العيال) المهم مرت الايام والشهور وولدت
بنت خالتي وجابت البنت الخامسة طبعا زوجها تذكر حلف امه وشال هم وشلون بيعلمها بأنه جته بنت جلس يومين ماعلم أمه بعدين فكر يقول لأخوه يتوسط له عند أمه وراح أخوه لأمه وقال لها: تراكي انتي بحلفك هذا تعترضين على قدر الله وماترضين باللي كتبه وانتي مؤمنه وفاهمه واخوي ماله ذنب
بأنه يجيه ولد ولابنت ولو المسأله على كيف الواحد كان كل واحد طب واختار اللي يبغى لكن هذي حكمة من الله واستطاع الاخ انه يقنع أمه أنها تعدل عن حلفها بأنها ماتدخل بيت أخوه مادامت حيه
واخيرا اقتنعت لكن قالت عندي شرط ؟؟
خلاص رضيت على اخوك وبأدخل بيته بشرط يسمي بنته ( كمخه) اظنكم تعرفون وش معنى كمخه؟؟
فراح الاخو يعلم أخوه برأي أمه طبعا الزوج فرح أنه أمه هونت عن حلفها بعدم دخول بيته وراح وبشر حرمته وقال لها شرط أمه بنت خالتي زعلت واعترضت على الاسم وقالت : والله مااسمي بنتي هالاسم
فقال لها زوجها: شوفي نسميها باسم زين بشهادة الميلاد بس بين العايلة وعند أمي اسمها( كمخه) بنت خالتي رفضت الفكرة كلها وقالت: أصلا بتعرف بين الناس بهذا الاسم وانا ماأرضى بهذا الشيء.. المسكين الزوج احتار بين أمه وزوجته ولايدري من يرضي بهم؟؟ يبغى رضا أمه وبنفس الوقت
مايزعل زوجته وهي الى هالحين عند اهلها ماراحت لبيتها والبنت مابعد سموها ؟؟
واذكر مرة عزمتنا بنت خالتي في بيتها وانا كنت حامل وكانت خالتها موجودة فقالت لي: الله يستر لايصير اللي في بطنك (كمخه) بس الله لايكثرهن ولا يوفقهن هالكمخ ؟؟ :(
الموضوع مغلق