مستجدات قصتي أرجو الدخول 😢

كتبت بداية قصتي في موضوع سابق
https://www.hawaaworld.com/لا_...


واللي حصل بعدها إن زوجي ارسل رسالة يعتذر وكلم واحد من إخواني وطلب منه إني أرجع ورجعت ..
جلس يومين زين ثم رجعت ريمة لعادتها القديمة لا احترام ولا تقدير ولا اهتمام ولا أداء لحقوقي كزوجة .. يعني لو يشوفني ميتة من التعب مستحيل يحن علي أو يوديني أتعالج .. كله على أهلي ..
صبرت وقلت يمكن أكسبه بالطيب وأهديت وشريت وطبخت واهتميت وبلا فايدة .. الاستفزاز مستمر والتهديد بالطلاق مستمر والمنع من الإنجاب ! هذا اللي غبني يا بنات انه يقول مكتفي بعيالي ! طيب وانا؟ أنا ما عندي ولا طفل وتزوجت ابي أكون أم!
الزبدة انا صابرة وأقول الله غالب على أمره لو أراد لي حمل بأحمل غصب عنه. فجأة صارت تجيني آلام وأتوجع قدّامه وهو يقول يمكنك حامل ! وانا مستبعدة وما وداني مستشفى وبيوم شد الالم معي لدرجة قمت ابكي وطلبته يوديني وعيا وطلع وخلاني وودوني أهلي وتنومت وهو والله ولا حتى سأل برسالة
عاتبته قال انتي نكدية وارجعي بيتك ويهدد ويتوعد .. رفضت وقلت بأقعد عند اهلي يهتمون فيني لا أموت عندك ما دريت عني .. تحسبوه عاد جاء يزورني يتطمن شي! لا وبعد اسبوعينً مقاطعني ارسل لي لا ترجعين ماني متشفق عليكء!! ثم ارسل يقول باطلقك ما تصلحين!
عقب عرفت إن حملي فسد والدكتورة قالت بسبب حالتك النفسية واجهادك كان مفروض تجي ونحطك على مسيلات دم
هنا انهرت بكاء وقهر .! هو كان حاس وعارف إني حامل ولا اهتم لأنه ما يبي طفلي وانا زي الهبلة مدري
وانا طالعة من الدكتورة ارسلت له لأول مرة طلق ما ابيك يكفي ما جا منك .. قعد يتويقح ويقول ما جلستي عندي شي عشان اسوي لك شي! أنكر الضرب والإهانات والطرد والكلام الجارح وقال ماني مطلق
وتهاوشت معه وغلط على أهلي ورحت وريتها اخوي وقلت له صار معي كذا كذا وخسرت حملي بسببه
راح أخوي جلده جلد وانا الحين ميته قهر ما ودي دخلت اخوي بمشكلة
اخوي عصبي مرة
شوروا علي ي بنات وش اسوي
تتوقعون بيطلق عقب ما انطق ؟
ولا بيحاول يرجعني ولا ايش!!