انا صح انا غلط انا كييف اتصرف والله انه هذا الابتلاء..

عندي بنت عمرها 14... قسم بالله احترت كيف اربيها وكيف اتصرف معها... كلامها معي منافخ ورفع صوت ولا تساعدني الا بالغصب وبعد ما ترفع ضغطي.. ولا اقدر اعتمد عليها بأي شي .. صار لي معها موقف قسم بالله اني بكييييت إلى أن قلت بس... اليوم الفجر تجهزت على اساس اروح السوق انا وهي واختها واخوها الكبير مع السواق حقنا.. قلت لها جهزي اختك رفضت قلت ما حتروحين الا اذا جهزتيها قالت والله لاروح ونشوف مين رأيه اللي يمشي.. طبعا انا على اساس انها اكيد حتعتذر وتجي تقول لي خلاص اخر فرصه ووووو المهم تجهزنا خلاص ولما جيت اروح للسياره قلت لها طبعا ما حتروحي بما انك شايفه الموضوع تحدي بيننا طبعا كل هذا وانا في بالي حتعتذر.. ركبنا انا وهي السياره واقول لها باقي مصره انك بتمشي غصب عني قالت ايوه طبعا ممكن اني اتجاهلها ونروح وكان شي لم يكن لكن انا ما ابغى تتعود تمشي رأيها قلت لها انزلي وارجعي البيت قالت ما ابغى ارجع قلت ارجعي طول ما انتي ماخذه الموضوع تحدي وفرض رأي ما تمشي.. وهي تقول والله اروح وإذا ما رحت ما احد حيروح... نزلتها بالقوه ومشيت و اختها الصغيره اللي عمرها 8سنوات نزلت وراها قالت لأختها يا غبيه لا تنزلين روحي غصب.. قلت انا ما فيه شي غصب على الأم ومشيت... طبعا ابوها كل هذا كان نايم و في نص الطريق اتصل ابوها ارجعوا لأنها راحت له تشتكي وكذا ... قلت له يا ابن الحلال بنتك ماخذه الموضوع عناد وفرض رأي وانا بس ابغى اادبها وحكيت له الموضوع . وقلت لابوها ماني رايحه للسوق باروح مشوار قريب اخذ أغراض لي وارجع.. عشان بس اادبها واعلمها أن الأم ما فيه معها فرض رأي وكذا... زوجي أصر الا ترجعي.. وولدي الكبير كان معي قال لي يا أمي لا ترجعي لازم تعمل لك حساب ثاني مره وابوي مصيره حيسكت وينام... لكن انا ما حبيت اسبب مشاكل ورجعت قلت لابوها الموضوع بالتفصيل وبرضه أصر على رأيه ترجعوا يعني ترجعوا اقول له كذا البنت ما حتتادب ولا تتربى وتشوف انها فرضت رأيها برضه مصر... ورجعت انا عشان ما ابغى مشاكل وأساس انا ما لي غرض بالسوق بما انها البنت مَو معي... لما رجعت البيت حصلتها واقفه مع ابوها ونظرتها لي يا بنات زي نظره التحدي والانتصار وكذا تحط عيونها فيني وهي مبتسمه حسيت اني صغيررره قدامها.. دخلت على البيت وقلت لها كان فيكي انك تعتذري وينتهي الموضوع ولكن انتي سويتي فيها فرض رأي.. لكن بما انك تسوي كذا ما لي دخل فيكي خلاص انا خلصت كل اغراضي انا واخوانك وانتي خلاص ابوك معك واعتبري امك ميته من هذه اللحظه... قلت كذا من قهري وصدمتي بموقفهاورجعت غرفتي وجلست ابكي مقهوره من حركتها... رايكم با بنات انا بالغت أو انا ماعرفت اربي أو ايش