مراحل البحث عن عريس ..قصتي الواقعيه

نور
وين موضوعتس حق التميز يمدحونه دورته مالقيته

بعيد عن طريقه سرد القصه بما فيها تشويق وطريقه جميله طريقه تنزلين أجزء وتاخر عشان التشويق صارت بيخه للاسف انا او غيري ملينا من كثر ماتفتح الصفحه وننتظر التكمله
معلش انا صريحه كثر التشويق قلب ممل

يلا يانور اكتبيها كلها اليوم ودنا نعرف النهاية

تابع
الجزء ( 5 )
بعد ماتركت البحث عن عريس عن طريق النت والدخول الي موقع ( زواج....)
ريحت مده من الزمن ووقفت جميع نشاطاتي المتهوره في البحث عن عريس ..( استراحة المحارب ) ..
ونشغلت في حياتي ..بس فيني الحاح شيطاني يقول ابحثي ولاتستسلمين
كنت اتكلم مع وحده ملتزمه عرفتها من قريب
عرفت موضوعي ومعاناتي
قالت ليش ماتكلمين خطاب رجل يكون ملتزم وعاقل
وتراه اعرف واقرب للرجال.. مجتمعه رجالي
صكت الفكره في راسي ولمعت عيون كالذئب
وقلت من وين اجيب رقم خطاب رجل قالت ابشري الرقم عندي ..
رجعت الابتسامه تشق وجهي من الاذن الي الاذن
حتى وصلت للمخيخ والحبل الشوكي
قلت ما اعرف كيف اكلمه ..ما حصل وان كلمة خطاب رجل..قال قولي اخطب لأختي
هزيت راسي وانا اتخيل نفسي لابسه شرعتي وامشي مثل الناقه بين المعازيم واتربع على الكوشه المزينه بالورود واجمل الزغاريت ..على انغام زفت العروسه
صحيت من حلمي على صوتها سجلي رقم الخطاب
قلت ابشري اسجله بقلبي قبل جوالي
اخذت الرقم وسجلته
وجلست يوم افكر وانظم افكاري وارتب كلامي
الرجال ذكي بيلقطها وهي طايره ويقول خلي عني اختك انتي اللي تبين تعرسين وش مواصفاتك
اتصلت عليه وانا ابلع ريقي ومتوتره ...رد علي قلت انت ابو فلان وتشتغل خطاب.. قال نعم ارسلي موصفاتك وبعدين كلميني
ما انتظر اقول انا ام فلان وبخطب لاختي كل مخططاتي راحت في مهب الريح
ارسل لي صحيفه طويله عريضه في الواتس على جوالي
الاسم العمر .....الجنس ...الطول ...الوزن ..الون ..العمل ...مطلقه او بكر....الاصل والقبيله ...ووووو
باقي يقول العلامات الفارقه
لون الدم وحجم المخ وطول السان وعدد الاسنان
عبيت الصحيفه حقته وارسلتها له
وصلحت نفسي ثقيله ما ابي اتصل على طول
جلست يومين طالعه من قلبي ولا نمت ولا ارتحت وجاء اليوم الموعود
اتصلت عليه انا ام فلان اللي كلمتك وارسلت لك مواصفات اختي قال ماشفتها
طيب شوفها يا ادمي انا جالسه احترق وانت ابرد ما عندك
قال الان اقراها واتصل عليك انتظرته على نار
اتصل ودق قلبي دق دق ونشف ريقي
قال اسمعي يا اختي انا اخذ 4000 الالف على الخطبه
2000 مقدم قبل اي شي و 2000 عند كتابة العقد
قلت في نفسي خذ المهر كله بس اشوف العقد واكحل عيوني فيه ..وواقع عليها بيدي الكريمه موافقه موافقه بالمليون
واسمع باذني زوجتك ابنتي ..قبلت تزوجيها ...على الصداق المسمى بيننا
شكلي بنجلط وادخل العنايه المركزه
سبب الحاله صدمه عصبيه حاده نتيجت فرحه شديده ماتحملها المخ وطق
عطاني حسابه وحولت له 2000 وانا مبسوطه الدعوه فيها عريس محدش ياكلها بساهل..
بعد التحويل كلمني وقال عنده واحد ساكن بعيد
متزوج ورجال عاقل وسبب زواجه مهو مرتاح في حياته
وراعي دين يدور الستر والعفاف
قلت جيبه لي انا عفاف وسعاد وسميحه وبركات
قال بكلم الرجال وارد عليك ..انتظرته يرد
مر يوم يومين ايام ما رد .. اتصلت عليه قلت وين الخاطب اللي كلمتني عنه... قال كلمته وقال بشوف وبعدها اتصل عليه ولايرد علي
قلت في نفسي شكله ارتاح في حياته وصارت حياته ورديه بعد ماكلمه عني صار وجهي عليه خير وبركه
او فقد الذاكره وهذا المرجح عندي ..
قال عندي واحد من عائله معروفه وجيد واصله طيب
انا بتزوجه او بذبحه واحطه مفطح
مايهم عائلته المعروفه اهم شي الرجال في راسه زواج
او اذا قلت له عن اختي يسوي نفسه ميت
قال والله مدري
جلس فتره مختفي ورجع اتصل وقال الرجال بطل عن الزواج مع انه كان ناوي يتزوج
عرفت انه عمل نفسه ميت
قال اصبري لين يجيني واحد غيره
قلت خير وشكلي ماني شايفه من ورا وجهك الخير
طول ما اتصل علي
اتصلت عليه وقلت ماصار شي قال لا والله
بس اصبري اسأل اللي عندي اسمع اصوات الرجال حواليه
قال ها يا ابو فلان ماودك في العرس
قام يضحك لا والله يارجال عساني اسلم من اللي عندي
قال فكر بدل الحرمه معي على التلفون
ولا انت يا ابو فلان قام يضحك
قال ودي بس الامور مهي مضبوطه وضحك الجميع
قال اصبري الين راس واحد منهم
والله انت اللي يبي من يلين جلدك بخيزرانه
حسيت كأني ارقوز بينهم وحزت في نفسي
قلت انا طلبتك تدور لاختي عن زوج مهو تغصب اللي عندك تزوجهم على حريمهم
وجالس تطقطق على انت وياهم
قال اسف ما اقصد واصبري وان شاء الله خير
قفلت معي وطبلت طبولي من القهر
ولا عاد اتصلت عليه لقيته كل ماجلس فتره اتصل علي ونفس الكلام يعيده عندي وعندي ولا شفت شي
قلت له اطلع من نفوخي ما عاد ابي عرس ولا عريس
من طرفك ولا عاد تتصل وتسبب لي احراج مع اهلي
قال ابشري وبخصوص فلوسك اللي حولتيها علي ياليت تصبرين علي ادبرها لك عندي ديون والتزمات وسيارتي خربانه
مدري اضحك او اصف جنبه ونصيح مع بعض
قلت محللتك لاترجع الفلوس وابي دعواتك لي
ورتحت من القلق والصداع اللي جابه لي
وقفلت على الخطابات والخطابين بسلاسل والاقفال ورميتها في البحر
وتركت البحث عن عريس
لكن الحاجه لزوج وتكوين اسره وانجاب الاطفال ماتركوني ارتاح في حياتي
كنت اتجاهل رغبتي واحارب تفكيري حتى بان علي الهم الحزن واقترحت على صديقه اروح ارقي نفسي عند شيخ راقي
يمكن سبب تاخر زواجي ورفض الخطاب لي
عين او حسد او سحر او مس من الجان
عجبني الاقتراح وفتح علي باب جديد للبحث عن عريس
ونطلقت اطرق ابواب الرقيه والرقاة
يتبع

كملي