انصحك من قلب ...
لاتصارحين احد . ولا تعلمين احد . انتي انسانه ضعيفه ينضحك عليك بكلمتين . كنتي بغربه وانسان سكران ماهزك الخوف واتصلتي ع امه او اهله وفضحتيه عندهم بالعكس طبطبتي عليه ورجع مره ثانيه يشرب بكل اريحيه .
انتي انسانه ضعيفه وتفكيرك كل بريحته ولاعت كبدك من الريحه . اللي مثلك اصلا مهي يم الريحه يم المصيبه اللي طبت على راسها .
انتي انسانه ضعيفه قريتي ان فيه بنات . شفتي بحث عن مسكر . ولقيتي واقي . ويوم حلف لك بديتي تسكتين وتساومين نفسك ع التصديق .
انتي انسانه صعيفه وهو عارف ضعفك . لذلك قام يطلع ايجابيات عشان تكون دافع لاستمرارك معه . والسبب ان له ايجابيات ماتستغنين عنها .
انتي انسانه صعيفه . كل مافتح لك الله باب وشفتي بلاوي زوجك .غضيتي طرفك ولفيتي عنها وقلتي حلف لي وانا سكتت عنه .
اللي مثلك . ماتفك حالها لذلك لاتعلمين احد من اهلك واقعدي واسكتي ولا تقولين ماراح اصبر والله غير تصبرين وتسكتين اللي صبرك عقب شوفته سكران بيصبرك ع ريحته اللي غثتك .... لان ردة فعلك ع شي عظيم كانت ايجابيه عجل شلون ردة فعلك لاشياء يكون مقابلها ان له ايجابيات وصار زين معك !
ونصيحه لاتفتحين ع نفسك باب اكبر منك .لانك ضعيفه . لاتواجهين زوجك ولا تناقشينه لان الضعيف اذا تقوّى كارثه يمكن زوجك يقتلك او يسوي فيك شي . خلك ع وضعك وسكوتك وعيشي ببيتك واستمتعي بايجابياته القليله .
خليك عايشه بالايجابيات اللي نطرتيها عشر سنوات . وعلى ريحته قولي له تسبح ياحبيبي قبل تنام معي .
لانك ضعيفه ولا زال عندك امل فيه . مع ان المدمن الامل فيه ضايع الا ان يشاء الله . وي ليتك تنتبهين لعيالك وتربينهم صح وتدعين لهم . وتقولين لزوجك طلب واحد. انه يحترم صورته كأب ولا يدش عليكم سكران .
هذا اللي استشفيته من قصتك وسكوتك .لاتقولين نظرة الاهل للمطلقه . القويه اذا خافت ع نفسها واطفالها تدافع عن حياتها وتشوف الف حل وحل وتفتح الف باب و باب . لكن انتي ضعيفه كنتي تسكتين وترضين اذا حلف لك واقنعك بكم كلمه . عمرالطلاق ماكان عيب ولا كان شي دوني لدرجة الصبر ع سكران باي لحظه يدشش عليك اخوياك .
على فكره . قريبتي متزوجه انسان نفس وضع زوجك وبيوم من الايام عصب عليها الظاهر كان شارب . تخيلي وهو مسرع فتح باب السياره وحذفها .وطاحت الرصيف وانسلخ خدها نسال الله العافيه والسلامه . ولا اتخذت اي موقف وبالعكس كملت حياتها واستمرت تجيب اطفال . وعاشت معاه وتبررله . فيه حريم سبحان الله الله معطيهم طاقة تحمل عجيبه وتفكير بسيط وسلام داخلي .يعني عادي تعيش باي وضع مقابل اكل وعيالها عندها .
وبعد بقولك ،، بيوم من الايام اخذ بنتها معه وهو سكران ومعه خويه . وقريبتي تصيح نادت اخوه جاء اخذ بنتها منهم وتهاوش معه وصار زوجها وهو سكران يتلفظ ع اخوه بابشع كلام ممكن ينسمع والحياه ماشيه وهالموقف مسحته ذاكرة الايام من تفكيرها وصارت تبحث له عن شوي ايجابيات تقتنع فيها وتعيش .
ولاتزعلين من كلامي . لكن والله ثم والله اني قلت لك اللي يمليه عليه ضميري . واللي حسيته من كتابتك . وارجع مره ثانيه اقولك ترى المستشار مؤتمن . وانتي استشرتينا وهذا رايي ،
الله يوفقك وييسر امرك
يليت إلى عندها رأي تعطيني وكأنها هي صاحبه المشكله
متابعة النقاش، صفحة 11
