جعلوني خائنه ...للعبره فقط
متابعة النقاش، صفحة 9
شاركي في النقاش
سجلي الدخول لإضافة تعليق.
التعليقات
90ايـــمـــي مفروض المشرفات يحذفون المواضيع المجزأه والي عندها موضوع طويل تكتبه بالوورد واذا خلصت نسخته هنا
ايه التهريج ده..؟؟؟؟ لو هى انسانة فعلا محترمة كانت قالت لزوجها من الاول وماخبتش عنه حاجة مش تسيب الرجل ده يعمل فيها ده كله وهى مش صداه وكمان عندها ولد......لا لالا انا لا اعتقد ان فيه انسانة محترمة حتى لو كانت فى قمة سذاجتها انها تعمل كده- اي و الله
انا اللي ابلشت نفسي قاعده انقل لكم القصه .......مع انها و الله باسلوبي و انا قاعده اكتبها بناءا على طلب صاحبه القصه لانها قالت لي ابي كل البنات يعتبرون من اللي جرا لي ....
المهم اللي صار يوم دش زوجها و شافها ويا الرجال بالغرفه شي عجيب
زوجها انصدم و من الصدمه ما قدر يسوي لي شي ...الرجال الثاني بحكم انه متمرس على ها المواقف يمكن ...ركض بسرعه ناحيه الباب ....و طلع من باب المطبخ اللي متعود يدش منه و ركب سيارته و حرك بسرعه ....
فما امداهم حتى يتعرفون عليه
زوجها في ذاك الوقت تقول قعد على الارض يبكي بقوة ...من هول الصدمه اللي عاشها المسكين ...
اشلون زوجته ام ولده الي مدلعها اخر دلعها ماتمنها على بيته و على شرفه و على حياته تخون الثقه و المسؤوليه بالشكل هذا ...................
شيسوي فيها ...شيسوي بنفسه ....باجر كل الناس يقولون ايه هذا اللي زوجته سوت .....و ياشرون عليه
و الشي هذا صعب جداااا في مجتمعاتنا المغلقه
بكى ولدها و فزت شالته من سريره ...للاشاره يمكن كان عمر ولدها بالسنه و نص تقريبا ...
المهم يوم شالته حضنته و قعدت تبكي بعد ....جان يقوم زوجها ...سحبها من شعرها للغرفه الثانيه ...و خذا منها الولد قال انتي ما تستحقين تلمسين ولدي ...و لا شمدريني يمكن مو ولدي بعد ...
جان يطقها طق ....طق ....طق مو طبيعي كسر وجهها تكسير ............
و شالها و سيدا ركبها بالسياره و سافر فيها لمنطقتهم ....يوم وصلوا مر بيت اهله عطاهم الولد ووداها لبيت اهلها ...و دش قطها قدام ابوها قال له ترى بنتك لقيتها ويا واحد بالبيت و لولا انها بنت عمي جان ذبحتها ...و انا جبتها لك تصرف فيها .......
عاد ابوها رجال كبير ..من الشيبان اللي اتعرفونهم اول
من هول الصدمه يقول يا ريتني ما كان عندي بنت ....يا ريتني مت قبل لا اشوف الشي هذا ...انا يا الرجال المحترم و اشلون اتصير سمعتي بين الناس ....
هي ما عرفت شنو تقول و اشلون اتدافع عن نفسها ...........و شنو رح تقول ...عرفته بالنت ؟
كانت البدايه اني ناويه خير ؟
مو انا الظالمه انا المظلومه ؟
ضاع الكلام و ضاع كل شي و تشتت الاسره .............و ما بقا لها شي
المهم من باجر جا زوجها و قال تراني ابطلقها بس ابيها تخلع نفسها عشان ما يكون لها اي حقوق اتطالب فيهم بعدين
و فعلا تطلقت طلاق خلع ..يعني انها هي اللي خالعه نفسها منه
و خذا الولد عند امه اتربيه و قال يا ويلج لو بس اشوفج بالمنطقه اللي حنا ساكنين فيها اذبحج ...
و مالج اي شي عندي ..............
قعدت ببيت اهلها نفس الكلبه عزكم الله ...ابوها رفض انها تذخل البيت و تقعد وياهم ...سكنوها بغرفه بره البيت كانت مخزن لهم ...و انقطعت عن الناس ...
بس امها اتجيب لها الاكل و خلاص ..................
مرة سنه و هي ببيت اهلها ......و طبعا زوجها اللي يصير ولد عمها ما قال شي عن السالفه خوفا من انه ينفضح بعد وياها و يضحكون عليه و اتصير معياره له و لولده بعده ..فسكت
بس انه حاول يعرف من الشخص اللي كان يجي زوجته و فعلا طلع الفاتورة مالت تلفون البيت ..و اتضح انه كان يكلمها من جوال ..يوم دور الرقم طلع ما عليه بيانات ..الشي اللي زاد من استغرابه ...
حسبي الله و نعم الوكيل ...............
لو انها الت له من اول كان ممكن يطقها يزفها ..يزعل يوم يومين بس ما تهون عليه زوجته و ام عياله ...بس انها تذخله للبيت و اتمارس وياه الفعل المحرم هذا شي ثاني حتى اسمها ما يبي يسمعه ...
و الغريب في الامر .....تقدم لها واحد من اهلهم
هو ما يدري عن السالفه ليش تطلقت ....
كان مفكر انها مشاكل عائليه و خلاص ....و البنت توها صغيره و من عايله و محترمه حتى انها ما تطلع للشارع و عادي لو تزوجها ...و البلا انه ما يدري شنو السالفه
دز اهله يخطبونها ....و فعلا خطبوها من اهلها
الابو قال اي و الله فرصه نفتك منها و يمكن تتعدل حالها و تعيش حياتها
ووافقوا على الرجااال ..وبدوا يستعدون للزواج ...طلعوها من المخزن اللي كانت عايشه فيه و انتقلت لبيت الاهل ..بس شرط انها ما تقعد وياهم كلللش ..اتسكر غرفتها عليها و يجيبون لها اكلها و شربها و خلاص
و فعلا ملجت على زوجها الثاني ...
كانت تتمنى ان الله يتمم عليها و تبتدي حياه جديده ما حد يعرفها و لا حد ينبش في ماضيها ...بس كذبه صغيره كانت السبب في حرمانها من الفرحه هاذي
و الكذبه ان اخت زوجها الجديد سالتها سؤال معقول و طبيعي : انتي ليش تطلقتي من زوجج الاولاني ؟
هي ما عرفت شنو اتجاوب و تلعثمت ...فجاوبت امها بدالها ..قالت من بعد ما جابت بنتي ولدها الرجال سوا حادث و صار عاجز جنسيا ...فهو تعقد من النقطه هاذي و قام يطقها و يعذبها ...و حنا رحنا جبنا بنتنا منه .................
كان ممكن الكلام هذا يتنسي و ما حد يدقق فيه ...بس الاخت الملقوفه راحت علمت اخوها اللي هو المعرس ...
بعد مده بسيطه قبل العرس ....واجه اخو زوج عروسته الاولاني يعني اخو الرجال اللي كانت متزوجته ..و قال له تراك معزوم عندي عرسي يوم الفلاني
عاد ساله عن الاحوال و اشلونكم و اشلون الاهل و اشلون اخوك فلان
قال و الله بخير عاد اليوم الا تجينا ترى تمايم ولده ...............
الجال انقرص الشون يقولون عاجز و تمايم ولده اليوم ؟
قال له هو اشلون ....انا سمعت انه مسوي حادث و تعب فيه
قال له الاخ اي حادث ...الحمد لله اخوي ما فيه شي ............
الرجال قال له شف تراني اللي رح اعرس عليها مرته الاوليه ...و هي قالت لنا انه مسوي حادث
اخو لرجال ملقوف ..قال له انحش ..لا توهق نفسك تراها مي صاحيه و اخوي خلعها خلع ...و ترا فيها بلا احرص ..........................
المهم هو راح للمره و قال خلاص ماني متزوج و هاذي ورقتج
تخيلوا الصدمه ...توها استانست لقت رجال من خيره الرجاجيل و قالت الحمد لله الحين احد رح يسترني و انصدمت تفركشت السالفه
ابوها زاد الطين بله ...انتي مو نافعه بشي ..ما حد يبيج ما جبتي لنا الا الهم و الغم ...سودتي وجهينا سود الله وجهج..............................
ن بعد السالفه هاذي تسكرت كل الابواب بوجهها و كل يوم تتذكر وليدها الصغير و تبكي بحرقه ما تدري عن اخباره و لا تقدر اتشوفه ...كل يوم ينحرق قلبها عليه الف مره .........
قلت لو وحده ثانيه مكانج جان انتحرت ...........
قالت ليش انا ما فكرت انتحر ؟
كرهت نفسي و كرهت دنيتي ...عذاب ربي يمكن اهون من العذاب اللي كنت عايشه فيه ....
المهم
من بعد السالفه هاذي قعدت ببيت اهلها تعد الايام عسى الله يرسل لها احد يخلصها من الهوان اللي عايشه فيه ...هي مو مفكره نفسها انها خاينه تقول لا انا كنت مغصوبه على الشي هذا و انا مظلوومه ...
و الله استجاب لدعائها ..و رزقها برجال بس المشكل انه مو بالسعوديه ...هو سعودي بس عسكري بالجيش الكويتي ...
و اعتبروه اهلها طوق النجاه من ناحيه رح يستر على البنت
و من ناحيه ثانيه رح ياخذا لمكان بعيد و ما رح يشوفونها .....................
و زوجوه برغم انه من مو قبلي ...و متزوج زوجه بالكويت و عنده عيال
مهرها كان قليل جدا و مع ذلك ما حد اعترض ...كيف يعترضون و هم بس يبون يتخلصون منها
طبعا لا عرس و لا اي شي ..بس سووا لها عشا خاص بالبيت ...
و سافرت وياه للكويت
يوم جت للكويت اكتشفت انه ساكن بمسكن شعبي ...يعني بالمناطق الخاصه بالبدون و المجندين الغير الكويتين
و البيوت هاذي للي ما يعرفونها ..تتكون من غرفتين و ثاله و حوش و حمام و مطبخ و ديوانيه بره - و المسكن هذا تتقاسمه ويا زوجته و عياله الخمسه ...طبعا ما كانت لها غرفه كانت تام ويا العيال بغرفتهم و لا جت ليلتها راحت نامت عنده بغرف النوم و ززوجته الاوليه نامت ويا عيالها
فهمتوا اشلون يعني بالدور ...ههههههه امحق زواج
هذا غير انها كانت اتخذم بالبيت و تشتغل ويا زوجته
و الله زوجها ما كان مقصر وياها ...هو رجال طيب و حتى مرته ما سوت لها شي ..يعني ما عاملتها نفس ما هو معروف اتعامل الجاره جارتها ....
ربما حتى الزوجه الاولى كانت تعبانه من زوجها و طلباته اللي ما تنتهي و من عيالها ..و كان ودها على وحده تتحمل المسؤوليه وياها ................
و عاشت وياه سنتين كامله ...وداها فيهم لزياره اهلها كذا مره ..و الغريب ان اهلها استقبلوها و رحبوا فيها عادي ..حتى اخوانها ما قالوا شي - للحين السالفه عاديه جدااو هي راضيه بعيشتها ...
بس المشكل زوجها قال حنا لا جينا للسعوديه ...ليش ما تشوفين ولدج ؟؟
قالت لا انا تري خالعه نفسي و ما لي حق اطالب اني اشوفه ...
زوجها شهم قال خلاص تبيني اروح اكلم ابو الولد و اترجاه يخليني اجيب لج ولدج اتشوفينه ...
قالت لا و الله انا ما ابي اشوفه انا الحين تعودت اني مو شايفته و اخاف لا شفته احن ..و قلبي يتقطع عليه و بعدها ما اقدر اعيش الا و هو وياي .........
الرجال اقتنع بالكذبه و فعلا لا جوا السعوديه ما يقول لها اي شي ...........
و استمرت حياتها رتيبه جدااا و عاديه جداا نفس اي وحده ...و جابت بنتين ...
زوجها يوم شاف البيت ضاق عليهم الاوليه و عيالها و الثانيه اللي قاعده اتجيب عيال بعد ...راح اجر لها شقه و سكنها فيها ..............
و المره ما شاء الله تابت عقب السالفه هاذي و صارت مطوعه ...لا و بعدقامت اتحضر محاضرات دينيه في مسجد المنطقه ............
و انا واجهتها بالمسجد ...خلال رمضان ..و عزمتها لبيتي كذا مره ...و كنا تكلمنا في الموضوع على اساس قلت لها انا ادش النت ...قالت احرصي من النت تراه اتصير منه مشاكل ...
و قالت انا بقول لج قصه وحده و انتي تابعيني
و قالت لي القصه هاذي ...و الله انها تحكي و انا ابكي ...ما عرفت انقل لكم وقائع القصه نفس ما تقولها هي ...صدج حييييييييل مؤثره
هي قالت القصه قصه وحده اعرفها ............انا شكيت انها قصتها لانها اتعرف ادق التفاصيل الي ما يعرفهم الا احد عاش القصه عن قرب ..خصوصا هي تقول مالي خوات ...
المهم بعد مده اتصلت علي و قالت شفتي القصه الي قلت لج تراها قصتي ...و ابيج تنشرينها بالنت عشان يعتبرون منها البنات ....
و انا نشرتها باسلوبي ..و اتمنى تنقلونها لمواقع ثانيه عشان اتصير عبره ...
و سلامتكم - تنبيه يحتاجه الكثير عزيزتي
دمتم جميعا بأفضل حال
مواضيع مشابهة
تابعي تجارب أخرى من هذا القسم.