تجمع مطبقات برنامج اندلسيه دودي لعلاج التوحد

عزيزاتي اخباركم بالنسبه للتمارين طبقتها اليوم الاول بس كيف التدليك ماعرفت كيف ادلك وجه بنتي.. وبالنسبه للعب الاعبها كثير بس اتعب يعني عادي اطبق التمارين بلعب معها واخذ فتره راحه.😔لاني صايره طول اليوم العب معها بعد مااخلص شغلي فأحس اني مرهقه ربي يعينا... فيدوني جزاكم الله خير

صباح الخير ع الجميع..
سارة ونعناعه والبقيه والله مافيني اتذكر اللي سالو لكن حجاوب اللي اقدر عليه..
سارة توكلي ع الله زعلك وتعبك وضيقتك وفجعتك على بنتك ماراح تسوي لها شي..
لازم تؤمنين بالله عز وجل وان هذا شي من رب العالمين وتؤجرين عليه.. تسلحي يالايمان والصبر والعزيمة وتأكدي ان ربي رايد هذا الشي لخير عنده كثير لك الحمد لله اللي هداك لبرنامج اندلوسية وللقروب الرائع هذا اسال الله العظيم رب العرش العظيم ان يشفيها شفاء لا يغادر سقما واطفالنا واطفال المسليمن..
شوفي ي قلبي.. لا تتركين ولا تفوتين اي فرصة لصالح بنتك.. خلي شغل البيت ع جنب محد ميت من كثر النظافة بنتك اولى.. ابدي بالتدريبات بعد كل صلاة تقريبا خمس دقايق ابديها بحب وسعادة ووناسة ومتعة واحمدي الله ع كل حضن تحضنك بقووة بحي ودفا وحنان كل صحكة كل تفاعل كل تطور كل شي نعمه وبركة من رب العالمين..
بالنسية التدليك للوجه بشكل دوائر ع الخدود كنك تقولين مين يااااكل هالخدوود هممم هممم وبشكل دوائر وكذا..


الاخت اتوقع نعناعه.. ماشاءالله تبارك الله انا عحزت اتخطى تمارين الكرات في المرحلة الثانية هل اتخطاها؟ وابدى في الثالثة؟
بالنسبة للانتكاسات ورجوع الصفات التكرارية حترجع عادي وحتروح مع الوقت بس تكثيف التمارين والتدليك والصبر بحوله وقوته قادر على كل شي سبحانه..
طيب ليش الصفات التكرارية هذي؟ عشانه عنده مشكلة حسية يعني حواسه غير مشبعه ف التدليك والضغط ع المفاصل يخفف منها
تمارين التركيز ب اشياء بسيطه تساعدهم في التكامل الحسي وايصا لازم لهم تكامل وظيفي اقرو عنه وتفرجو ع يوتيوبات حتستفيدو
طيب نجي نسوي معاهم كذا تمرين موجود في البيت.. يساعدهم ع التركيز وماراح يتطورو الا لمن يزيد عندهم التركيز والادراك..
اولا.. خيط او حبل الشوز تكرمون نختار حلقات خرز كبير جدا مايدخل للفم ميداليات المفاتيح هذيك الملونه ازرق احمر.. الخ يدخلهم بطرييقة النظم في الخيط او حبل الشوز مع التشجيع والتعزيز له
ثانيا اعواد اذان او اسنان تكبينها والطفل يلمهم حبه حبه عود عود ويرجعهم علبتهم
ثالثا مكعبات او كور ارميهم في الغرفه وجيبي بوكس وخلييه يلمهم او يلقطهم از يجمعهم حبه حبه بتفاعل وصحك وتشجيع
رابعا الحزم والحزم والشدة وتدريبات الجلوس والانتظار وعدم الاندفاعية بفعل ادوار او انتظار الدور نجلس ثلاثه او انا وهو واقول دوري دورك واعد قدامه لين الثلاثه وازيد العدد كل مرة هذا يخليه ينتظر دوره ويقلل من الاندفاعية
خلييه يلم المناديل العلب القراطيس ويرميهم في الزباله تكرمون
خليه يلم اطباق ملاعق السفرة ويوديها المجلى او طاولة الطعام..
خليه يعبي معاك اي شي يتعبى في المطبخ فول ليمون اسود أعواد قرفه اكياس الشاهي الخ
النظر او التواصل البصري امسكي خدوده وكلميه مره مرتين ثلاث ناديه مليون مره ادخلي عالمه لمن يغني العبي معاه العاب تفاعليه تذكرون لمن كنا نسوي حلقه فس ساحة المدرسة وندور ونغني فتاحية ي ورده وكذا سويها معاه وعرفيه ب اجزاء وجهه والحواس..
طبعا لااخفيكم اني موجوعة من جوى وفيني خوف وضيقة..
لكن لمن اشوف تفاعلها وتطورها واني عطيتها من وقتي وعوضتها اللي نقصها احمد ربي..
علاقتي بربي زادت ولله الحمد ماافوت وتر ولا ضحى الا ماندر اسأل الله ان يتوب علي
حفظت سور نن من القران صمت النوافل والست ولله الحمد ادعووو الله وابكي واناجيه واشكي اليه هو اعلم بضعفي وقل حيلتي وهو من رحمني بطفل سليم عقليا وجسديا والله لو تروحو المراكز تعرفو ان اللي ربي اعطانا نعمممممة والله اني اسجد شكر من هوول ما اشووف له الحمد والشكر والله يشفيهم ويعافيهم يااكريم..
ايش كماان ماحكيت عنه هو انا بقيت شي اصلاا هع هع
ايواا بالنسبة للسيارة والتعلق فيها اخفييييهااا تماما وتجاهليه ولاكنك تسمعين او تفهمين ايش يبكي منه لان التعلق من صفات التوحد وراح تضعف عضلاته مثل ماكانو متعلقين ب الشاشات الحمد لله ماصارت تتعلق بشي مثل اول ولا يهمها لان تدريبات التركيز رااائعة البزل والدبابيس اللي يغرزها في الفلين اشياء دقيقه بس تساعد على التكامل الحسي عندهم..
وبس سلاامتكم وتعيشوون ويارب تفرحنا بشفاهم وعافيتهم يااكريم...

ياقلبي كفيتي ووفيتي وربي يرزقك اضعاف اضعاف ماتتمني ويشفي مريضك ومرضانا والمسلمين اجمعين يارررب واعذريني سوال اخير بالنسبه للخروج بعد المغرب علشان اخذ لي اغراض وهيك سوالف هل هالشي ياثر على سير البرنامج؟ جزاك الله خير وربي يعطيك ليرضيك

اللهم امييين امييين امييين واياك وجميع المسلمين..
بالعكس في الخروج كملي التمارين حوار مساج ضغط ع اليدين والاصابع في السيارة
سولفي معاها ذوقيها أطعمه لو رايحه سوبر ماركت من الطازج جبنه مالحه زيتون مربى بالملعقه عرفتي وريها الاشياء خليها تمشية وتوسعة صدر مو زي اول خناق ولا هي فاهمه شي ونخاف تفشلنا وتكسفنا عند الناس
هو المفروض ماناخذهم مكان عام الان الا بعد مايتشبعون من النزهه ويعرفون قوانين الخروج بس انا استغل هالشي هاتي العربيه اجلس في العربيه اسكت اتفرج.. يعني اعطيها اوامر اقطع لها خبزة او فطيرة من مخبز الماركت يعني احسسها انو هيا معانا اوديها الخضار والفواكه مو لازم تكون برفسووره وتعرف كل شب بس لازم تعرف وتتعرف ع واقعنا والاشياء المحيطه بنا تتعرف ع الصابون والشامبو والموية والاكل... الخ
ع فكرة حتشوفون نظرات الناس والاستغراب يقولون ايش فيها اتجننت هي وبنتها.. طنششششي ما اشوف في العالم الا انا وبنتي محد همني ولا يهمني لان ما حتخلصي من نظراتهم ولا كلامهم والناس فااااضيه ورايقه وماعندي وقت اضيعه معاهم اكثر من قبل... وسلامتكم وتعيشوون.. ويارب ابشركم وتبشروني بشفاهم وعافيتهم ياارب. وهو على ذلك قديير

ام دودي الله يسعدك انا نينا وليس نعناعه هههههههه ضحكتيني اضحك الله سنك
بالنسبة للسيارات اخفيتها كلها من يومين ويارب يبطل تعلق بأي شي يضره
بالنسبه للمرحله الثانيه انا الحين دخلتها.. جلست حوالي ٢٠ يوم بالمرحله الاولى
ومن المره اللي فاتت لما كنت في المرحله الثانيه ماحب لعبه الكرات اخوه اللي اكبر واللي اصغر ينبسطوا عليها ويبغو يلعبوها الا هو يطفش منها بسرعه وخصوصا لما اقول مقاطع
فصرت اقول مقاطع لها معنى صار نوعا ما احسن بس برضه يقاوم بعض الاحيان
يعني مثلا كلمه بابا الكوره الاولى با والثانيه با وبعدين اقول بابا هيييييه كأنه عملنا انجاز هههه وهكذا اختار كلمات بسيطه مثل دوده او اسماء اخوانه او اسماء حيوانات اي شي يعرفه كلمات بسيطه تأدي الغرض ونخليها مقاطع
ولما يرفض يلعبها أسوي نفسي نونو يبكي عشان يرضى يجي يلعب ههههههه.. ربنا يعين ويسهل علينا عسير
هو ناطق بس ماكان يعرف يكون جمله من كلمتين وكان مخزونه اللغوي ضعيف يكرر بس نفس الكلام كل يوم نفس الاسئله ..
الحمدلله تحسن بس لسه مو نفس اللي في عمره ..الله يفتحله
وينطق ويطلق السنتهم ويوسع مداركهم وفهمهم
وكمان ولدي يحب الروتين يعني مثلا القصص يحب اكرر له نفس القصه اذا حبها كم مره نحكي نفس القصه
بالنسبه لبنتك اذا اغلب التمارين تقلدك الحمدلله كويس.. هي ا.ريما كانت تقول كل ماقلد تمارين اكثر كل ماكان افضل واهم شي تحسي الطفل واعي بجهازه النطقي وواعي بحركاته وانو قادر انو يقلدك
وحلوه تمارين التركيز اللي قلتيها
انا جبت اعواد اسنان وعندي علبه بهارات فاضيه غطاها فيه فتحات صغيره وصرت اخليه يدخل الاعواد من الفتحات
وحجيب فلين وحخليه يغرس الدبابيس فيها ان شاءالله
بس هل فيه فكره معينه ؟يعني مثلا فكرت ارسم حاجه ويحط الدبابيس ع خط الرسمه مثلا مربع او مثلث 🔻 او اكتب حرف مثلا وهو يحط الدبابيس عليها
وكمان شفت مقطع في تويتر كيف تعملي دوده بالورق وبعدين تنفخيها بالمصاصه وتتحرك الدوده مررره حلوه لتمرين النفخ
واخيرا
اشملوا اولادنا في دعواتكم والله يتقبل منا جميعا ويفرحنا فيهم