الله يحفظ أولادنا وأولادكم وأولاد المسلمين ✨
تذكرت موقف أخواتي ياعمري عليهم
كانوا ثنتين نايمين في بيت أهلي مع عيالهم
ولما جاء الصبح حطوا الفطور للصغار
وكل وحدة انشغلت تجهز أغراضها وعيالها
لأن فيه عزيمة الظهر (كان الوقت شتاء)
وفجأة جت بنت أختي تقول ماندري وين فلان وفلان
ارتاعوا أهلي وجلس البيت كله يدور عليهم
كانت أعمارهم ٤ سنوات
وكان وقت صلاة الجمعة ومافيه أحد من الرجال كلهم راحوا المسجد
ولبست أختي عباتها تدورهم وتصيح مالقتهم بشارع أهلي
ورجعت البيت وأختي الثانية تصيح
ويدعون ويستغفرون
وأمي حبيبتي والشغالات يدورون بالسطح والغرف والمخازن مالقوهم
قامت أمي الله يجزاها الجنّة لبست عباتها
وراحت تدور بالشارع وأبعدت وتنادي بصوت عالي عليهم
يافلان يافلان
وفجأة شافها ولد يسوق سيارة بهدوء ويدور
وجاء عند أمي
قال تدورين شي ياخالة؟
قالت ماشفت ولدين صغار
قال : إلا إلا أنا طلعت أصلي الجمعة وشفت ولدين صغار يدورون بالشارع ورجعتهم بيتنا وجلست أدور بسيارتي أشوف وين أهلهم
من الروعة ركبت أمي معه وداها بيتهم في الشارع اللي وراء أهلي
ولقت عيال أخواتي الله يصلحهم يلعبون عند الباب وماسكهم ولد ثاني
ونزلت أمي بسرعة حظنتهم وتدعي لهالولدين ورجعوها البيت
وأخواتي يوم شافوهم على طول سجدوا شكر
طلعوا عيال أخواتي فتحوا باب الشارع وجلسوا يركضون وأبعدوا مرة ومادلوا البيت 😭
ومن بعدها لازم تقفل بيبان أهلي بالمفاتيح وكل وحدة معها مفتاح
وكل واحد يطلع نحرصه يقفل الباب بعده ..
والحمد لله اللحين كبروا أعمارهم ١١
وكان درس أن الواحد أيضًا يحرص كل يوم يقول الأذكار على عياله ويستودعهم الله ..
فهاوة الحريم وضياع عيالهم...اسدحوا لنا مواقف ضياع عيالكم
متابعة النقاش، صفحة 20