السلام عليكم
طبعا مثل ما شايفين أنا عضوة جديدة , لكن حبيت أنقل لكم تجربتي في انزال وزني .
صحيح اني ما وصلت للمثالي لكن الحمد الله اعتبر سويت انجاز في تنزيل 33 كيلو .
طريقتي كانت صحية جدا وقدرت أنزل فيها وزني بشكل زين ولله الحمد
غيرت عادتي السيئة في اختيار الأكل :
الرز بدل الصحن اللي ما ادري كم ملعقة كنت أكل , صار الحين = أربع ملاعق بغض النظر عن إن الرز كبسة أو رزأبيض أو برياني او غيره .
الخبز والتوست الأبيض = خبر بر + توست نخالة والكمية محدودة في اليوم
الزيوت = زيت الزيتون فقط وبكمية قليلة
الحلويات = بسكويت النخالة + أي نوع من البسكويتات قليلة السعرات واكتفي بقطعة أو بنص باليوم وآحيانا ما اخذها .
الزبادي والأجبان والقشطة والمربى و اللبنة والحليب = كلها لايت
اللحوم بكل أنوعها بيضاء وحمراء = بديت أعرف كيف اختار لها طريقة صحية ومفيدة وقليلة السعرات
البيض = صرت اعرف اسوي اطبق دايتية عليه لان يعتبر وجبة اساسية صباحية على الأقل 3 مرات بالأسبوع .
قدرت وجبة الفطور جدا وفهمت معنى أنك تتعشى بدري وشي خفيف .
قدرت معنى أنك تأكل أكل صحي على شكل الهرم الغذائي ثم يجي عقب كم يوم تتناول وجبة خارج الهرم الغذائي لكن بكمية معقولة لا افراط ولا تفريط
قدرت الرياضة ولله الحمد الله لي 3 شهور ونصف امارس الرياضة وانقطاعي عنها كان بفترات محدودة ولظروف خارجة عن اراداتي
فهمت ان المعدة سبحان ربي اللي خلقها عشان تهضم الأكل لا عشان نضرها ونجمع فيها ونجيب المرض :09:
محدثتكم جابت طفلين بعملية قيصرية , صحيح كان في فرق بالعمر بينهم الا ان الوزن كان في ازدياد , وعاد لكم تتخيلون وحدة عمرها 28 سنة وكذا وزنها زايد على عكس بنات سني شي يجيب الاحباط فعلا
قبل حملي بطفلي الاول كان وزني 62 طبعا مو وزني الاصلي كان ايضا طالع لان وزني لما تزوجت كان 48 و طولي 160 , وبعد الحمل والولادة واثناء تربيته وصل وزني إلى 77 وظليت ماسكة عليه بدون أهمية في تنزيل وزني , عقبها حملت بولدي الثاني وكان وزني وقتها أقل من 77 لان وحامي كان متعب لكن بالثلاث شهور الاولى نزل وزني إلى 66 يعني طيحت 10 كيلو لاني كنت ما اكل واستفرغ الله يكرمكم , بعدها بالاشهر الاخيرة وصلت 78 و ولدت وكنت وارضع ابني طبيعي , وانا وزني كل ماله ويطلع ويطلع إلى أن وصلت 83 كيلو , الا اني ما اخذت الموضوع بجدية الا قبل 3 شهور ونصف من الآن وصار وزني ماشاء الله تبارك الله 58 كيلو , كنت ألبس مقاس 18 اليوم ألبس 10 وإن شاء الله العقبة البس 8 :eek:
وهذا صورة للجينز والتيشرت اللي كنت البسه في البيت اصلا فشلانة من زوجي شلون قدر يتحملني بهالشكل :( تكفون بنات اذكروا الله
تصدقون أن الجسم الصحي والحلو يخلي المرأة تكون متهيئة وكاشخة على طول لزوجها لان عندها ثقة في جسمها , حتى تحب تجدد في لبسها ماتحتار ولا تتعب وهي تحوس بالسوق , وبالمناسبات ودها تكون الأجمل والابهى وهذا مايصير الا لكان جسمها متناسق و طبيعي
طبعا غير الكلام اللي قلته فوق عن الأكل . فأنا كنت أكل مكرونة بمقدار صحن صغير وفيها كل اللي ابيه ماعدا الزيت و صلصلة استبدلها بصلصة بيتية من الطماطم الطازج
وكنت أشرب عصيرات طازجة وبعض المرات لو اشتهيت مرتين كل أسبوع عبوة دايت من أي نوع
وللحقيقة ما كنت أجامل كثير بزواراتي واجتماعتي الا إني اتذوق في بعض المرات لكن اقلل كمية الوجبة اللي بعدها وغير اني ارص على نفسي بالرياضة .
وايضا ما انسى اخذ حبوب الفيتامين وكنت اهتم بشعري كثيرررر من خلطات وزيوت .
أما عن المشرويات العشبية فكانت فقط الزنجبيل والليمون وغيره ماكات يشغلني ولا يهمني
طبعا سويت لي جدول بالبيت مشيت عليه من الهرم الغذائي
وماقصرت معاي المدربة في النادي ساعدتني الله يجزيها خير لإن فعلا وجودها كان حافز وكانت تشد علي بالرياضة
وأكل صحي + رياضة = جسم صحي .
حبيت اذكر تجربتي يمكن تفيد وأي سؤال أنا حاضرة وادعوا لي الله يخليكم :26: