السلام عليكم خواتي بنات امي حواء
شحالكم الغاليات؟
والله اشتقت لكم وااااااااايد
صراحة انا مداومة بالمنتدى بس من زمان ما شاركت بموضوع يديد
لكن اليوم يبت فكرة
تخليج تكبرين بنظر زوجج
الكل منا يعرف انج متى اكرمت اهل زوجج
زوجج ابد ماراح ينسى لج هذا المعروف وتكبرين بنظره كل يوم
لو بهديه لأمه وابوه وخواته واخوانه
غالياتي انتم في غنى عن التوجيه ولكن تذكرة وتجديد
انا صراحة ساكنه مع اهل زوجي
واشاركهم احزانهم وافراحهم
والحمد لله حمدا كثيرا اني علاقتي معاهم الحمد لله ولا بد من الثغرات لكن الحمد لله نتعامل معاها بكل حكمة
بعد هذي المقدمة الطويلة بدخل في الوضوع
انا احب من فترة لفترة اسوي مفاجآت لأهل زوجي اسعدهم فيها واسعد زوجي بعد برضاه عني وهذا يكفيني
لإانا بخبركم على مجموعة افكار اسويها لأهل زوجي اتمنى اني انفعكم انتوا بعد مع اهلكم واوزواجكم
الفكرة الاولى
ليلة شواء
غالياتي
انا اولا طبعت دعوة لأهل زوجي اني عازمتهم للعشاء في الخارج، وانا عارفة انهم يحبون الشوي وحطيت بطاقات الدعوة على مخدة سرير كل واحد.
الصبح الكل سألني وين بتعزمينا.. قلت لهم بتشوفون بس انتظروا
خبرت زوجي وقلت له الوالدة "عمتي" تقول روح السوق واشتري لنا 3 كيلو لحم عجل قطع تكه للشواء، ودجاج، وذرة وكستناء للشوي.. وعطيته فلوس من عندي وسار هو بدون ما يسأل
وكان هذا من الصبح سرح زوجي والكل نام بعد صلاة الفجر وينشون الساعة 10 الصبح وزوجي سرح من الصبح
جاب الاغراض واشتغلت انا بالمطبخ وتبلت اللحم والدجاج وخشيتهم بالفرن ولذرة والكستناء خشيتها بالثلاجة
بعد الغدا قلت لهم انتوا جاهزين للعشاء؟ قالوا نعم بس وين
قلت لهم بنشوي اليوم برع بسوي لكم جو ماحصل.. وطبعا هذي الايام ماشاء الله الجو جدا راااااااااااائع
والكل استانس
بحكم بيتنا الحمد لله وماشاء الله كبير من بعد صلاة المغرب رحت المطبخ وجهزت عدة الشوي والفحم والدجاج واللحم والبصل والطاطم والذرة والكستناء وسويت السلطة وطرشت زوجي يشتري لنا الخبز الافغاني وبعدين يساعدني بالشوي
جهزت القعده برع على مكان مرتفع وفرشت السجاد ويبت مخدات ومساند ووزعتها بكل مكان وجهزت عصاير والقهوة والشاي وناديتهم
اذن العشاء
صلينا الحريم جماعة برع والرجال بالمسجد
بعد الصلاة شغلت الكشافات وولعت كل الانوار بالبيت برع
وشغلت الرشاشات على الحشيش ورشيت الماي على الارض وغسلت البيت كله بسرعة
حق يتلطف الجو ويصير احلى
نزلنا العاب العيال من سيارات ودراجات وخليناهم يلعبون ونحن قاعدن على الدكة
وبدني نولع الفحم ونسيخ التكه والكباب والدجاج والذرة والبصل والطماطم ولفينا البطاطا والكستناء
وقعدنا نشوي، زوجي يهف الفحم ونحن نسيخ من وراه ونضحك وسوالف وهو كان كل شوي يطالعني ويضحك ومستنانس انه يشوف اهله مستانسين واشوف بعينه مثل اللمعه
واخت زوجي لها صوت حلو قعدت تنشد
وبعدين لعبنا مسابقات
وقعدنا لين الساعة 12
وبعد ما خلصنا وشربنا وواكلنا وحمدنا ربنا
عمتي قالت سوي لنا مثل خهاي القعدات 6 مرات بالاسبوع
الكل انفجر من الضحك
انا عاد :06:
ياويلي وياعيالي وريلي وانا كلنا يبالنا سبوح
خذيت عيالي فوق اسبحهم وقعد زوجي مع عمي وعمتي وخواته
الكل مستانس ويضحك
بعدين وصلتني الاخبار شو قالوا عني.
عمي مدحني وقال مشاء الله عليها حرمة ولدنا ماقصرت معانا
وعمتي تقول هي اعز عندي من بنتي
وريلي يسمع وانا فوق فاتحة الشباك واسمع اصواتهم
المهم عاد دخل ريلي كنت خلاص رقدت العيال
وكان طاير من الفرحة على هذي الليلة
وشكرني وقال انتي ما تتخيلين كم قدرج عندي..
صراحة ياجماعة اقولكم
هاي الكلمة كانت عندي احلى من الف هدية
فشوا رايكم بهاي الفكرة
وانتظروا افكار ثانية
كان ودي انزلها على العيد بس صلرت ظروف حكمتني
لكن العيد الكبير جاي على الابواب ان شاء الله فراح تفيدكم
وتزع حلكم في قلوب اهل ازواجكم
وتكبرون بنظر ازواجكم
بس ردوا علي
ابي اشوف ردوووود كثيرة وافكاركم بعد
حق نفرح قلوب الكل ويكون بميزان حسناتكم
موضوعي للكل يشارك به
وفي امان الكريم
مع افكار جديدة مني ومنكم
تشكريني على مروري
ههههههههههههه