وحشنى الملف دة

قربت اولد وجوزى هينزل بعد الولادة وهاقعد بقى في بيتى

ومش هينفع اعتمد لا على ماما ولا حماتى في الاكل فعايزة افكار لحاجات احطها في الفريزر وتتعمل في ثوانى عشان مش هاقرد اقف كتير ومش هاكون قادرة اساسا

طبعا في حاجات في دماغى

يعني فراخ متقطعة ومتبلة وفي الفريزر وساعتها هاطلعها واحطها في الفرن مع رز او عيش وبطاطس
وبانيه وبفتيك ولحمة بنفس الطريقة

وفكرت اعمل مكرونة بشاميل

وكفتة اجهزها متبلة وكله وفي الفريزر وبعدين على الفرن

بس حاسة ان كل الاكل دة شبه بعضه

قولوا لى افكار تانية

و الشوربات برضه لو عندكم افكار لتفريزها وتبقى حلوة ولا لا

عارفة انه سؤال مكرر بس معلش

مى

تقومى بالسلامة ان شاء الله انتى والبيبي

بصى انا بجمد شوربة اللحمة وبطلعها اسوى بيها رز بسمتى بالخضار(بسلة جزر ) بيبقى حلو ومغذى حتى لو اتاكل لوحدة وممكن جنبة حاجة بانية او كفتة

وشوربة العدس بعمل حلة كبيرة واضربها فى الخلاط واقسمها فى الكياس فى الفريزر مبططة (اى حاجة فى اكياس فى الفريزر خليها مبططة بتاخد حجم اقل فى التخزين ولما تخرج بتفك اسرع)

وبعدين كل يومين اطلع كيس ومعلقة سمن فى حلة ومعاها فص توم وشيو شعرية وشوية كمون يقدحوا اقوم حطة الكيس وشوية مية واوطى علية بتبقى طازة ورائعة


السبانخ بغسلها واقطعها واحمر بصلة مبشورة وفص توم وشوية طماطم او صلصة تتسبك واحط عليها السبانخ المتقطعة واقلب شوية تتبدل بس

واوزعها فى اكياس فى الفريزر ولما تيجى تعمليها اغلى شوية شوربة وسقطى الكيس فيه وسبية يستوى (بس السبانخ بتحب شوربة قليلة مش كتير)

الفاصويل البيضا واللوبيا ممكن تنقعيهم وتسلقيهم وبرضه فى اكياس فى الفريزر

تعملى التسبيكة و شوربة وتغلى وتحطى عليها كيس لوبيا مسلوقة او فاصوليا بيضا مسلوقة

التسبيكة نفسها اعملي كمية وقسميها فى اكياس وفى الفريزر

وشوربة اللحمة برضة مش بتغير كتير فى الفريزر وخاصة لو هاتطبخى بيها فممكن كل ماتتبخى اليومين دول تاخى شوية شوربة وحتيتين لحمة وتحطيهم فى كيس فى الفريزر


يبقى ان شاء الله بعد ما تولدى تتطعى كيس شوربة وكيس تسبيكة تحطيهم على النار يغلوا غلوة تضيفى كيس سبانخ او لوبيا او فاصوليا او تقطعى بطاطستين وترميهم فيها وخلاص


لو افتكرت حاجة تانية هاقولك


ماتنسيش تفتكرينى بدعوة حلوة وقت الولادة ولبناتى سلمى ويمنى وخاصة الاخيرة دى يمنى ربنا يشفيها احسن على طول عيانة حبيبتى الحمد لله :)

اهم حاجة حكاية التسبيكة دى اعملى كمية وخزنيها اكياس اكياس على قد الطبخة والخضار مقدور عليه

فى اى سوق دلوقتى او خضاراتى تطلبى الخضار اللى انتى عايزاة يجيلك متنضف ومتقطع ده فيه ستات فى السوق يا بنتى قاعدين على الارض معاهم موبيلات وتكلميهم تطلبنى منها تجهزلك بسلة خضار مشكل لشوربة الخضار اى حاجة عايزاها تعملهالك


دون معاها نمرة واحدة بتجهز الخضار بالتليفون وتجيبهولك وزيوده قالت تعرف واحدة فى 6 اكتوبر برضه

ماتقلقيش ربنا يسهلها ان شاء الله

لو ليكى فى الكيك وبيحبوه عندك اعملى كيكة فى صنية مستطيلة كبيرة عندك وقطعيها مربعات وكل مجموعة لفيهم بفويل وحطيهم فى كيس كويس عشان مايلقطوش ريحة وكل فترة طلعى كيس يفك او فى الميكرويف ييبقى زى الطازة بالظبط

نفس الحكاية البيتزا لو فيكى نفس دلوقتى :)

ميميس--- جزاك الله كل خير بس و ربنا يقومك بالسلامة و يرزقك بطفل سليم معافي و أمانه عليكي تدعي لواحد قريب ليا بس يهمني قوي إن ربنا يتم شفاه و يكون سليم من أي مرض هو إسمه أبو وليد

طبعا بالنسبة للأكلات علشان ولادتك ما شاء الله روشانا قالت حاجات كتير و مفيدة
ممكن أقترح عليكي لو ليكي في المحشي تشيليه جاهز في الفريزر ( أنا عرفه هو متعب أد أيه و إنتي حامل بس في ناس ممكن تعمله )
و كمان القرنبيط ممكن تجيبية و تشيليه في الفريزر و هو مسلوق سلق بسيط
و الفول أنا علي طول بدمسه و أشيله في الفريزر
و طبعا التتبيلات بتاعة البانية تكوني مجهزها علي طول
و ربنا يعينك يارب

بالنسبة بقي لموضوع الخميرة الفورية -----أنا كنت بشوف منال العالم بضيف الخميرة الفورية و تشتغل علي طول حتي الوصفه اللي عملت بيها البيتزا بتاعة أبله دينا و مش فيها إني أسيب العجينه علشان تخمر ،،،، يبقي أيه ؟؟؟ بعد كده أسيبها تتخمر و هيبقي أيه الفرق بينها و بين الخميرة التانية ؟؟؟؟؟؟؟؟؟؟؟؟؟؟؟

في سؤال تاني يا بنات بس مستعجل جدا علشان انا بحضر اكل بكرة دلوقتي
سلقت الفراخ بعد ما غسلتها بملح و خل لكن بعد السلق لقيت في الدم وانا بحط الشوكة فيها هو المفروض إني هعمل لها خلطة و احطها في الفرن تنشف اعمل أيه في موضوع الدم ده ؟؟؟