مانقول غير الله يعين ويرشدنا للصواب ياالهندية ..

أنا من هنا مفقوعة مرارتي من التدخلات البسيطة الصغيرة مرة .. كيف لما ارجع ..

شكلي افقد الوعي الين نلاقي لنا شقة وبعدين اصحى الاقي تعب الـ 8 والا 9 سنين تربية راح في هبة ريح ..

تعرفي انا لما اروح شهر زيارة انحف من الهم (صحيح اني ابغى انحف بس مو من المرض والهموم) من جد انحف مع اني اكل اكتر من العادة اكون مرة مشتهية الاكل واطيح فيه ..

ولما رحنا 3 شهور هده من جد حسيتها بروفة للرجعة لاننا كنا راح ننتظر شهر واذا ماجات الفيزا مانرجع امريكا خلاص ..

الله يدبر امورنا من عنده ياشيخة ويقدرنا على الصبر ..

ابغى اقولك على بنتك شي يساعد .. تعرفي لما يقعدوا الحريم مع بعض وتجي سيرة فلان طلب مني وفلانة طلبت مني ومايستحوا وعيب عليهم يطلبوا ..قعدي بنتك تسمع حتى تعرف انك ماتخترعيلها مبررات ..

لانه فعلاً عيب تطلب من احد ..

انا تقريباً اولادي فاهمين هدا الشي بس احسهم مايتحرجوا من خالاتهم وعماتهم .. لكن اذا قربت الرجعة راح انبه عليهم ان شاء الله .. لاني اخدت منك خبرة خلاص ..

الله لايحرمنا منك يا قمورة .. وربي يسهلها عليك ويطيع لك الصعاب ويحقق مناك ومنانا في مجمتع افضل ..

حمرة الورد
هلا بك اختي
و موضوع انك تنفقدين الوعي لين تحصلي بيت فلا ان شاء الله ما عليك شر .. اصلا هذه من الاشياء الي تندمت اني فكرت فيها كثير .. بجلستي قبل البيت ما تضايقك من تصرفات عيالي يمكن لاننا تونا جايين و لسه ما تأقلمو و يمكن كانت فتره استكشاف بالنسبه لهم و لسه ما اقتنعو بالي يشوفونه ما ادري لكن ما وجهتني مشكله كبيره لما كنت ساكنه مع اهلي وجهتني مشاكل ثانيه بس ما تخص الاطفال يمكن ذكرتها قبل ..
اما موضوع اني اخليها تسمع الحريم و هم يتكلمون .. من قالك اني اشوفها اصلا لما اكون عند احد .. يعني الناس الي ما امون عليهم ما اخذ اطفالي معي و في بيت اعمامها و لا خوالها ما اشوفها لانه تلعب مع الاطفال و الاطفال يجلسون في مكان مختلف عن الي احنا نجلس فيه فا ما اقدر اطبق الفكره لكن انا اقولها دائما و الحمد لله هي في تحسن بس التحسن بطيئ .
مشكوره اختي على مرورك و اهتمامك

الله يعينك يا الهندية مشاكل ماتخلص ..

تعرفي كمان حكاية يجلسوا مع بعض في غرفة تانية سبب مشاكل .. ياما صارت مشاكل بينا ونحنا صغار بسبب انه مافي كبير يراقبنا ..

وهنا نفس الشي صارت مشاكل بين بعض الاخوات وكانت قعدة البنات في غرفة لوحدهم من اول العوامل المؤججة للمشكلة ..

ومرة كان عندي عزيمة وحطيت الصغار فوق والحريم تحت قاموا دخلوا غرفة المكتب وراحوا على النت وواحد منهم سوا بحث عن صور إباحية ..

ولو اعدد ما اخلص .. المهم كوني حريصة انك تتفقدي الوضع كل ماقدرت درءًا للمشاكل..

حمرة الورد
الله يعينا يعني سلامه مامن سلامه
الله يستر
لا المكان الي الاطفال يجلسون فيه لا فيه تلفزيون و لا حاسب هم يجلسون في صاله مفتوحه و الخدامات يجلسون معهم و البنات يلعبون في مكان مختلف عن الاولاد .. الاولاد يلعبون بالحوش عادتا .. و انا احاول اكلم بنتي و اعطيها نصائح كثير قبل لا نطلع من البيت و دائما اقول اذا شكيتي انه فيه شي ممكن يكون غلط تعالي اسئليني في اذني علشان ما تنحرجين او الاطفال يقلون انك تعلمين امك و انا راح اعطيك الحل بصوت هادي و ما فيه احد راح يعرف .. البدايه كانت صعبه لانها كل خمس دقايق صارت تجي لي بس بعدين تعودت و كل فتره تقل جياتها .. بس ودي دائما تحس انه انا حولها و انه اذا فيه اي استفسار انا موجوده و اني ما انشغل عنها بالسوالف ابدا .. دائما احاول اكرر لها انه هي اهم شي عندي .. و الله يستر و اقدر ارجع الامور لنصابها و يرجع طبع بنتي مثل اول قبل السعوديه .. و ان كنت ماني متأكده انه الحل الافضل .. يعني انها تكون مثاليه زياده اخاف بعدين تصير معقده .. و بصراحه دائما افكر فيها .. هل ممكن البنت لا سمح الله يكون عندها كبت من الي تشوفه و تسمعه و ما تقدر ترد عليه .. و الله اخاف لاسمح الله يصير فيه نتيجه عكسيه في فتره المراهقه الي فيها الواحد ما يقدر يتحكم بشي ..
مشكوره اختي على المتابعه

تبغي نصيحتي ..دوري عن عوائل المبتعثين .. وحاولي تختاري لها صاحبات من بناتهم لانهم مروا بنفس الظروف وعندك اللغة طبعاً ..

شي تاني سبحان الله عندي نفس احساسك ويمكن بزيادة لانه بنتي كبرت واخوها اكبر منها وبدأوا فعلاً يشوفوا الفرق وينتبهوا له ..