سعدت جدا بردك عليا بس ممكن اعلق على شىء وهو ان الصفات النادره التى تكون فى الرجل هو مش كتر الغيره على مراته وحبسها فى البيت ولا الخناق عليها فى الرايحه والجايه بالعكس انا اسميه عدم ثقه فيها ولا فى تصرفاتها الرجل الذى يحب هو المفروض يخاف على حبيبته سواء كان متزوجها ام مجرد حبيبه من انها تضيع من يده ويحاول بشتى الطرق ان يكسبها ولكن من كلامك عنه حاسه انه بيعاقبك على شىء هايف اى واحده فى موقفك كان لازم تقوله يعنى ايه نكون اخوات هل فى اخوات بيتزوجوا (معاذ الله) هو مش خسران شىء هو عنده زوجته ياخذ منها اى شىء فى اى وقت !!!! وانت اين حقك عنده هذا كلام فارغ لا يرضى عنه الدين ولا اى انسان لديه عقل وهو بيستخف بيكى بطريقه غريبه انا مشفتهاش فى حياتى بس افضل شىء ليكى الان هو التوكل على الله ومشاركه اختك فى الشركه فهذا سوف يجعلك بعيده عن السجن الى حابسك فيه حتى وان كنت حره فى الخروج هو سجن نفسى رهيب مقيدك بعواطفك تجاهه عارف انك بتحبيه وهو بيستغل ده ياختى فكرى بعقلك شويه هل فى شىء رابطك بيه ؟ لا تقولى الحب . الحب اطهر من كده الحب لايهين كرامة الذى يحب انا ادوس على قلبى ولا اهين كرامتى وكبريائى حتى من اعز انسان فى حياتى الحمد الله انك لا يوجد لديك اطفال منه علشان تعملى كل ده ولا معندكيش المال الذى يعيشك انت افضل من نساء كثيره فلماذا اتضحيه من اجله لعلمك هو بعيد عنك مش علشان انجرحت كرامته من كلامك معه ولكن اعتقد انه مش عايزك فى الوقت الحالى (هل تفهمين ذلك ) يعنى تحبى وقت ما يحن لكى تكونى تحت اشارته ووقت ما(يرميكى ) تكونى تحت امره !!!!!!!لا لا لا لا لا
اياك لعلمك مش هاتكسبى قلبه ابدا الرجل لا يحب المرأه السلبيه وايضا لا يحب المرأة المتسلطه ولكن اعتقد ان المرأه ذات الشخصيه المستقله والتى تعرف من قيمه نفسها هى التى يحترمها زوجها او الرجل بشكل عام
فأين انت من ذلك انت تعيشين فى بلد اوروبى وتحبسين نفسك مثل واحده لا تعرف اى شىء من الدنيا سوى بيتها وزوجها واولادها فقط ولا تقرأ عن اى شىء يفدها من ناحيه العلم والثقافه تنمى بيه عقلها على الاقل!!!!فياختى جربى طريقتك ويستحسن عدم الرد على المكالمات لمده معينه تكونى على الاقل اسست الشركه ووقفت على قدميك مره اخرى واعلم ان كل شىء البدايه صعب ولكن لما الامور تتعدل ستجدى اغلب الاشياءسهله وياريت عدم مشاركه اهلك له مره اخرى والقيام بمطالبه مالهم مره اخرى وبألحاح هذه المره علشان بس يعرف قيمتك وانه سوف يخسر بفقدك واخيرا فكرى فى مراته شويه لو كنت مكانها تعملى ايه ؟؟؟؟؟؟
انا عن نفسى لا ارضى من زوجى ان يتزوج على!!!! ولا ارضى ان اكون زوجه ثانيه واخرب بيت من زوجه واطفال حتى وان رضى هو بذلك ففكرى جيدا واتركى العواطف جانبا وربنا معاك

هاى يا ابتسام
مرسي جدا يا حبيبتى على ردك السريع وانا فعلا هحاول اعمل كده ويا اما يرجع زى زمان يا اما تكون النهايه لانها فعلا مش عيشه اللى انا عايشاها اما عن الفلوس فانا هكون اصيله معاه ومش هطلبها دلوقتى لانى عارفه انه معهوش منها ولا تعريفه وهستنى لاخر السنه زى ما اتفقنا ..
اما عن مراته فانا كونت زمان بقول برضه مستحيل اقبل ابدا انى اكون زوجه تانيه بس انا كونت فعلا حبيته جداااااااااااا وكان قدامى حاجه من الاتنين يا اغلط معاه ودى حاجه تقتلنى من جوه او انننا نتجوز وصدقينى يا ابتسام لو قولت لك ان مراته مهملاه جداااااااا وده مش من كلامه انما انا دخلت بيتهم وقعدت معاها كتير حقيقي هو ليه حق في انه يعمل علاقات لانها بتتهرب منه في حقوقه الزوجيه وكمان مهمله جدا في بيتها باللرغم انها لاتعمل ومهمله في تربيه بناتها ومهمله في نفسها .
وخلينا على اتصال يا ابتسام انا سعيده بمعرفتك باى حبيبتى

احب اشكركم جميعا على وقفتكم جنبي وانا عملت بنصايحكم وقولت له امبارح انه يا اما يبطل يقوللى اخوات واصحاب ويرجع يتعامل معايا زى زمان باحترام زمان وحب زمان يا اما نبقي اخوات واصحاب بس المره دى بجد وبطريقتى انا ومش بطريقته مش بالكلام وبس انما بالفعل والتصرفات وقولت له فكر كويس قبل ما ترد علشان المره دى قرار نهائي وانا مش هرجع فيه خالص فرد عليا بكل بساطه انا مش هعرف اتعامل معاكى تانى فقولت له اوكى اتفقنا بس احنا ولا اخوات ولا اصحاب ولا عايزه اسمع صوتك تانى وورقتى توصلنى الاسبوع ده ومش عايزه اشوفك خالص ومن فضلك متبعتليش رسايل على الموبيل ولا تكلمنى في التليفون لانى في كلا الحالات مش هرد عليك فقاللى اتفقنا قولت له اوكى اسيبك لشغلك فقاللى بس انا حاسس انك زعلانه انتى زعلانه ليه قولت له انا مش زعلانه قاللى لا انت زعلانه قولت له انا ندمانه مش زعلانه ندمانه انى عرفتك وانى اتجوزتك وانى ضيعت سنين معاك انا طلعت حماره واضحك عليا فقاللى يعنى ايه اضحك عليكى انا عايز افهم ازاى فقولت له وانا مش عايزه اتكلم معاك خالص مليش نفس اتكلم معاك الموضوع انتهى فقاللى ده انا اموت لو معرفتش تقصدى ايه بكلمه اضحك عليا فقولت له ده شئ ميهمنيش وانا قولت لك انى مش عايزه اتكلم معاك ولا اسمع صوتك بعد كده وافهم كلامى باى اسلوب يعجبك انا متفرقيش معايا خلاص فقاللى انتى كده بتكررى نفس كلامك انى بستغلك وانى عرفتك علشان فلوسك بس باسلوب ظريف روحت قولت له ما انا قولت لك افهم اللى تفهمه انا مش عايزه اتكلم وقولت له باى وقفلت بسرعه لانى مكونتش عايزه ابكى قدامه وقومت من قدام الكمبيوتر وانا مش شايفه قدامى من كتر دموعي وبعد ساعه لقيته بعت لى رساله على الموبيل بيقوللى ربنا ميحرمناش من بعض باى شكل من الاشكال..
ممكن حد منكم يقوللى هو عايز ايه بالضبط وعايز يوصلنى لايه؟؟
انا عن نفسي فكرت وقولت يمكن هو عايز يأكد لى انه مش عرفينى علشان الفلوس وعلشان كده بينهى معايا وهو معاه الفلوس يعنى بمعنى تانى لو علشان الفلوس كونت فضلت معاكى علشان اشغل الفلوس اكتر واكتر لانى اتذكر انه مره قاللى انه شخصيتى لما حد ياخد عنى فكره غلط لازم اخليه يغير الفكره دى عنى خالص.. فهل يا ترى هو ده قصده معايا ولا قصده ايه؟؟؟
افيدونى فانا في حاجه الى رأيكم

اس ..أس ..السلامو عليكو وحشتيني يا وحشه وغصب عني ..والله أتمنى المشكله تنحل هنا حتى لو المشكله مشكلتي أحب آسمع كل الحلول والأختيارات وكل البنات بما فيهم أنا اتفقنا أن أنتي لازم تكوني قويه وتحددي مصيرك طيب لو أنا خطأ أفروديت لأ ولا ابتسام يعني الحل ده طبيعي وتلقائي ...بس والله طلعتي جدعه ...وأخيرا ..عملتيها وخدتي موقف برافو عليكي بس ليه البكي حيرجع أنا عارفه حيرجع مش قلت لك الراجل تروحي يمين ييجي شمال ..حيرجع بس بدون حلول وليس وعود ما ينفعش لازم فيه واحد اتنين تلاته يعمل أتنين مايعملش تلاته ما ينفعش يعملهم كلهم وخليك على موقفك وما تضعفيش أدامه ولايكون تبكي ....لأنه حيرجع للموال تاني هو بيطبق اتغدى بيها قبل ما بتعشى بي يعني ...هو عارف انه غلطان بس يقول لك أنتي الول غلطانه علشان تنسي الغلط اللي هو عمله وعلى فكره ده عند كل الرجاله بس حددي مطالبك في ورقه أنتي عايزه أيه ناقصك أيه علشان تكوني مستقره وسعيده وطالبي بيها وما تقوليش مستحيل حيعمل لازم يعمل حقك بالشرع والقانون .....وخليكي كده ما تضعفيش وأن ما عملش بس حيعمل خلاص كل واحد في طريق ...وعايزه أخبار حلوه

بسم الله الرحمن الرحيم
عزيزتى المصريه ترددت كثيرا قبل ان اكتب لكى وذلك لعدم قدرتى على فهم طريقه تفكير زوجك واخيرا توصلت الى شىء وهو انه يحاول ان يستلذ بتعذيبك واعتقد انه يتعمد ذلك ويتركك بالشهور وهو متأكد انك تتعذبين بفراقه عنك ويظهر ذلك عندما تبكى وتستعطفيه ان تريه وان يحضر لكى لكن فى اخر مكالمه بينكم قمت بعمليه اكبر من يتخيلهاوهو التهديد بتركه والطلاق وهذا اعتقد لم يخطط له ولهذا قبل ان يقفل معك قال لك انك زعلانه وبيسأل كمان لماذا (استهبال) اى انه بيجر معاك ناعم تانى وكمان بيحاول باسلوبه القديم انه بيأخذ عليك فى كل كلمه ويحاول يطلع فيها اى غلطه ولو كانت غير مقصوده وهذا ما حدث عندما كرر انك تقولى انه تزوجك طمعا فى فلوسك!!!!!! اما عن سؤالك الاخير فاعتقد انه غير ذلك اى زوج هذا الذى يفارق زوجته بالشهور علشان يعمل فلوس ليثبتلهاانه مش طمعان فيها!!!!!!!!!
تبرير غير منطقى تفتكرى ليه هو مش بيعمل مع مراته الاولى مثل مايعمل معاك هل يقدر ان يتركها معلقه هكذا لا هى متزوجه ولا مطلقه؟؟؟؟
اعتقد انه يستلذ بتعذيبك لاكثر من سبب ممكن لعقده عنده ممكن لانه شخصيته فى البيت اضعف من ان يثبت رجولته فيتصرف معك باسلوب اعنف من ان يمارسه لو استطاع فى بيته
وممكن يكون معتقد انك ضعيفه للغايه وانك بمفردك لا يستطيع احد ان يردعه بأفعاله معك؟؟؟
اسباب كثيره حاولى ان تجدى السبب الرئيسى وحدك فقط يمكن ان يجدها ولذلك اقول لكى لاتتصلى به نهائى واتركيه واذا طالت المده اتركيه لماذ لا تقومى انت باجرآت الطلاق اعتقد انه طبق فى مصر الان ولاتعتقدى انك لن تستطيعى ذلك انت اقوى من ذلك واقوى منه حيث ظروفك احسن بكثير منه وكمان لايوجد اطفال علشان تتنازلى عن كرامتك وكبريائك هكذا اجعلى شخصيتك قويه مش بالصوت العالى ولكن بالافعال الجاده مع عدم التنازل عن الكرامه التى هى من المفروض من كرامته والله معك