الدنيا مظلمه بويهي وانا بعدي ماتميت 21:( منو يقدر يساعدني؟

السلام عليكم ..

هذي اول مره لي اشارك في هالمنتدى و كلي ثقه انه الخوات ماراح يخيبون ضني و راح يساعدوني ..


مشكلتي اني مخطوبه لشخص يحبني حب فوق الخيال ..

لما تقدملي اهلي رفضوه لأسباب معينه لكن هوه تخطا الموانع هذي واهلي وافقوا عليه اخيرا ..

بعد الموافقه صارتله ظروف ولازم يسافر علاج مع والدته الله يشافيها..

يعني بسبب هالظرف كل شي مخططينله تأجل وزواجنا تأجل و طبعا انا مقدره ظروفه لكن مو هذي المشكله ..


المشكله انه بدا يتغير علي و صار يتأثر من حجي اصدقاءه خصوصا اقرب صديق له كان يبي وحده و اول ما اهلها رفضوه كره البنت و تعقد وراح اخذ وحده ثانيه..

فهذا الصديق مأثر على خطيبي وايد .. مع انه خطيبي اهلي موافقين عليه و امورنا ماشيه خلاص و ناطرين يرجع من السفر و نتزوج..

لكن هالصديق يحاول يغير تفكيره ويحاول انه ينصحه يتزوج وحده ثانيه والسبب عقدته اللي قلتلكم عنها ..

خطيبي يحبني و انا متأكده انه مايقدر يعيش بدوني اوو على الاقل شي صعب راح يكون له .. لكن اخر فتره صار يحاول يجرحني يعني مثلا ..

انا متينه شوي :( لكن والله و ماحلف بربي جذب انه الكل يتكلم عن جمالي و جمال اخلاقي بس عيبي اني متينه و حاليا اتبع نظام رجيم وانشالله بضعف.. لكن هو صار يتعمد يلمحلي انه البنات صايره اجسامهم حلوه و انتي شوفي قريب نتزوج و ماضعفتي:(

او يقعد يقارن بيني و بين زوجة صديقه المعقد و يحسسني اني انا مافيني صفاة الزوجه الصحيحه و انه هذيك صح و انا غلط:(
و يحسسني انه انا دايما غلط والبنات الثانيين صح:(

هالشي يحز بالخاطر .. مع العلم اني متعلمه و شهادتي اعلى منه و الحمدالله شكلي الكل يتكلم عنه و اخلاقي الكل يمدح فيهم و مسويني مثال لبنات العايله ..

و اقرب انسان لي شوفوا شنو يقول عني:( و السبب صديقه اللي يبي يخرب حياتنا

والله مادري شقولكم بنات بس ساعات احس اني رخيصه يوم يقولي هالكلام وانا ساكته و ماقدر ارد عليه .. مو لاني ماعرف ارد بس اخلاقي ماتسمحلي اني ارد على امور جذي خصوصا انه ادري اني احسن من اللي يتكلم عنهم و مافيني من الصفاة اللي يقولها :(

بس مو عارفه شسوي احس حياتي بتخترب و خايفه اتزوجه و ادفن نفسي بهالقرار .. و بيني و بينكم وصلت معاه مرحله مستحيل احد فينا يفكر انه يقدر يعيش بدون الثاني يعني خلاص هذا شي صار غصبن عني و عنه من رب العالمين ..


ساعات اقول يمكن نفسيته تعبانه عشان والدته و مو لاقي احد يتحمل و يطلع اعصابه عليه غيري ..

و ساعات اقول انه مل مني لاني اهتم فيه وايد وايد وايد فوق ما تتصورون يعني هذا و احنا بعدنا ما سكنا في بيت واحد انا جذي مهتمه فيه .. عيل لو نسكن في بيت واحد شيصير؟؟؟ بسويه ملك..

بس اهوه مايقدر خصوصا هالايام و كله يشوف اني مو قاعده اسوي شي مع اني حارقه نفسي عشان راحته والله شاهد على كلامي ..

و لو يوم واحد تاخرت في شي معين يحسسني كأني ماسوي شي بالمره و يشره علي .. مع انه اهوه نسا حتى الكلمه الطيبه شلون يطلعها من قلبه :(

يعني بالعربي ياخذ و يستنزف طل طاقتي بس مايعطي ..

و لو عطا ما احس انه من قلبه يعني يسوي روحه يهتم او يسأل عني بس ما احس انه نفس قبل ...

مادري هذا بسبب ظروف اللي يمر فيها ؟ لو بسبب ملله من اهتمامي الزايد ..

صار حتى ماله نفس لو اكلمه بنااااااات راح اين والله مادري شسوي معاه

ابعد عنه يعاتبني و يشره علي يقول ماتسئلين ولا تدرين عني ..

اقرب يمه يقط نقزات بمعنى انه انتي ماتعطيني فجه و 24 ساعه تبيني معاج ..

شسوي؟؟؟؟؟؟؟؟؟


من كثر ما انا تعبانه افكر اني اقوله افسخ الخطوبه و كل واحد يروح بطريجه دام انه في البدايه مو عارف يقدرني او على الاقل يجاملني :(


والمصيبه الاكبر انه صديقه بادي يخوفه مني يقوله مرتك حلوه ومثقفه ومتعلمه باجر تركب فوق راسك وتسويك خاتم بصبعها .. والله يا بنات انا مسالمه و ماعندي سوالف جذي و اقل كلمه على طول ابجي و احط في قلبي لكن صديقه لاحس مخه
و غيران مادري ليش و يبي يوخر عني

يقوله لا تمدحها وايد عشان لا تغتر و تشوف حالها عليك و ماتقدر عليها بعدين فصار بس يحبط فيني و يأذيني بطريقة جرحه وكلامه الي مافي احساس..

ويقوله حب وحده مقبوله احسن من انك تحب وحده وايد حلوه و باجر اقل شي تسوي لها بتقول طلقني و الف من يتمناني .. هذا كلام ينقال بالذمه :(

اشكي حق منو .. لو تعدلنا و تسنعنا صارو يخافون منه و لو اهملننا نفسنا صرنا مانسوى و يدورون غيرنا شسويييييييييييييييي الله يخليكم قولولي شسوي والله احبه و مو هاين علي اصدمه و اقوله مابيك لانه ادري اللي يقوله هذا من تأثير صديقه و ضغط وكل شي بس انا بعد بشر و تعبت و مو عارفه شسوي وشلون اصحي من اللي اهوه فيه ؟؟؟؟


دلوني الله يخليكم و كثر ماتبون نصحوني و كثرو حجي والله بنات انا محتاجتكم


شلون اتصرف مع انسان اعتبره حياتي و بدونها ما اعيش بس يوم ايلي يحبني و مايقدر يفارقني .. و يوم ثاني ايلي انسان متغير و مو طايقني ..

يعني شسوي لو اذاني و بعدها يالي ولا كأنه في شي و لا كأنه قايل شي يجرح و يكلمني عادي و يخطط حق زيارتي له لما يسافر بحجة انه مايقدر على بعدي فتره طويله
ينييييت خلاااااااااص ماقدر افكر
والله حرام اللي يصيرلي :(