cute moon @cute_moon_1
محررة ذهبية
تجربة شاب مع السمنة وكيف نحف ، ادخلو وخذو جرعة حماسة
الشي اللي يعرفونه الدببه كلهم انهم لازم يلقون نغزات من هنا وهناك مثل يادب ..
اوالى متى وانت كذا ..او انتبه لنفسك وغيره من الكلام اللي كنت ماالقي له بال بحكم اني متعود ,هذا الكلام
يصير خارج البيت
اما داخله فامي عدوة الرجيم الاولى تكره شي اسمه رجيم ..حطت الغدا تبينا كلنا حولها الله يحفظها ,يعني البيئه داخل
البيت تهيئ الواحد فوق انه مهمل نفسه انه يزيد ويزيد بهالشحوم ,
انا بذاك الوقت ماافكر ارقى الميزان ..ولا اقربه ..
وبعد مااحب اشوف نفسي بالمرايه اللي تطلع الجسم كامل ..
كانت لي تجارب كثيره وكلها باءت بالفشل خذوا عندكم :
مره من المرات شفت واحد من الزملاء نحف سألته الحقني برجيمك قالي ابد اول يوم زبادي
وثاني يوم مدري ايش وووو ..
المهم قلت مابدهاش ورحت وشريت زبادي 6 حبات وقلت في نفسي : لازم مااكل الزبادي الا وقت الغدا
وقلت لامي اني متغدي برا ..جاء وقت الغدا لفيت حبتين زبادي ينقالك حتى تشبعني , ورقيت على بالي بروح لغرفتي
ولا امي توها ناكبه الغدا قالت ياوليدي تعال ابد لقمه ورح ...تعرف لي ..هي قالت ولا ماقالت الا واطيح في هالكبسه
طيحه لاطحت قبلها ولا بعدها ..الزبادي الباقي كلته مع التميس والفول خخخخخخ..
ومره ثانيه قلت اسمع ياصادم لااازم تنوع بالرجيم وكذا لاتحكر نفسك على برتقال ولا زبادي ولاكرفس ..
رحت وشريت اشياء دايت اشكال وانواع ..الخبزالفرنسي والنخاله وو..ولبن منزوع الدسم وشوكلاته ووو..
ينقالك بشكل حتى ماامل ..
رحت ودخلتها غرفتي بس هالمره صملت يوم كامل ..وعقبها والله ان الخبز
وانتم بكرامه عفًــن ورجعت زي ماكنت ..
في ردهات الزمن شار علي واحد من اخوياي اني ادخل نادي
صحي ....جازت لي الفكره مع انها كانت
في بالي من زمان بس هالمره كانت غير بالعاده تخيلوا كنت اسوي رجيم ابو يوم او ابو لحظه ..ولا ارقى الميزان
بس هالمره قلت لازم ياصادم انك ترقى ..وتعرف وين ارضك وين سماك ..
حاولت وحاولت لين رقيت
حطيت على 90 شوي الا والميزان يقول ويييييييين ياعم ..قلت نحط على95 ونفس الكلام ..لييين وصلت
108 ..
ماتخيلت ابدا ان وزني بيطلع كذا صح انا دب بس مو لذي الدرجه ضاق صدري .
وقلت شف ياصادم ماراح تدخل النادي الا وانت تحت الميه ..فشيله تدخل ووزنك كذا ..
عزمت هالمره من جد ورحت شريت تفاح اخضر وبرتقال وجح والذي منه ..والحمدلله اسبوع نزلت
فيه 5 كيلو والثاني نفس الشي رغم المضايقات والمساعي الحثيثه من امي لابطال هالرجيم ..
قلت يمه عاجبك جسمي كذا يرج رج ..ماتشوفيني ..وووو طبعا هالكلام كله عقب ماشفت وزني ..
وزي ماقلت لكم نزلت بالاسبوع الثاني خمسه ..ورحت وشريت ملابس وسجلت بالنادي وانا مبسوووووط
من قدي وزني 98 ..
المهم قابلت المدرب وقال لي لازم تقرن الرياضه بالرجيم ومن هالكلام ..عطاني رجيم يضيق الصدر
ملعقتين رز مسلوق وووو ..
ماعجبني الرجيم بتاتا قلت له اني مقرر اشترك بدايت سنتر (طبعا اكذب عليه )..
استمريت على رجيمي السابق بس خليت فيه يوم مفتوح ..اربع ايام ..واليوم الخامس احدد فيه وجبه اكل اللي ابي
والله اني مااترك شي مااكله ابرد حرتي صح ..صرت انقص 3.5 بالاسبوع ..
وكل مانقص وزني قلت الكيلوات اللي انزلها ...
المهم وصلت الى ثلاثه وثمانين وتركت النادي وعشت فتره نقاهه
على اني مااتعدى الخمسه وثمانين وشلت بعض العادات الشينه اللي مالها لزمه وصرت اكل وجبه وحده باليوم ..
اول لما امر من المهباج او البقاله اوعربه ذره او كريسبي ...لازم اخذ من عندهم اللحين قللت من هذي كثيييير ..
انتم لازم تعرفون وش كنت اسوي بقول لكم مثال بسيييط ..
وانا داخل السوق في وحده من المرات ..مريت بعربه ذره شريت من عنده سلاش اكبر حجم ...جازلي رحت
وشريت النوع الثاني كمان اكبر حجم ينقال لك بذوقه >> اقطع ام الذواقه اللي تعرفها ياشيخ ..
وغيرها من العادات الغلط اللي كانت تتكرر يوميا بدون ماالقي ادنى اهتمام لوزني ..
وبعد صرت اكثر من شرب المويه اذا اشتهيت ببسي ولا غيره ..اشرب مويه ..
ياناااااااااس المويه والله تخليكم تفكرون انا اتكلم عن اللي يبون ينقصون اوزانهم ..بعض الاحيان ودكم تاكلون شي معين
او تشتهون شي بين يدينكم وغيره من المواقف اللي من الطبيعي انكم تمرون فيها..جربوا اشربوا كاس مويه كبييير ..
او كاسين ..المويه ماراح تشبعك بس راح تخليك تفكر ..اذا اللي بتسوينه صح او غلط خصوصا اذا كنت متبعه رجيم ..
وكنت على وشك تخربينه ...
لما تركت بعض العادات الغلط اللي كنت اسويها ..نقص وزني لما وصل تسعه وسبعين ..انا انبسطت لما شفت وزني كذا
بس برضوا انا من يوم فكرت انزل وزني وانا حاسب حساب الترهلات ..وكنت خايف منها لاني شفت كذا واحد يعاني
منها ..
سجلت بالنادي مره ثانيه وكل مره يصير لي هدف لازم اوصل له ..وهالمره كان هدفي 72 والمحفز تيشيرت
غالي شفته وقلت ابد مالك الا اذا وصلت لها الوزن انك تشتريها حلال زلال .. والحمدلله وصلت للي ابيه ..
وانا ماشي على الرجيم اللي قد قلته لكم ..اربع ايام والخامس مفتوح ..
في اليوم المفتوح اااااكل أكل ماتتخيلونه طبعا في العشا بس ...مثلا اذا طلبوا الشباب من البطريق
لازم 2 ببسي ..و2همبرجر وبطاطس اكبر حجم ..
او اذا رحت لتشيليز او فدركرز اوغيره اوحتى طبخ امي اااااااااااكل الين يطلع من خشمي ..قلت لكم ابرد حرة هالاربع
ايام ..وانا طول هالايام افكر باليوم المفتوح واهوجس فيه ..بس يطلع للاكل طعم اوووووووف لذيييييييذ..
واتجنب طبعا حتى باليوم المفتوح انه مايكون قريب لوقت النوم ..
مشيت على هالرجيم الى ان وصلت للوزن اللي كنت مااحلم ولا كنت افكر فيه اللي هو 60 ..وكل هالكلام خلا ل
سبع شهور ..
لازم تراعون ان الاكل مايكون قريب لوقت النوم ..ولاتنسون المويه كثروا منها قد ماتقدرون والله الله بالرياضه
وحاولو تحطون لانفسكم اشياء تحفزكم ..وتساااعدكم ..
منقوووول للإفاادة ماشاء الله عليه اسلوبه حلو والله يوفقه :)
31
14K
يلزم عليك تسجيل الدخول أولًا لكتابة تعليق.
هو كان ياكل اربع ايام فواكه واليوم الخامس مفتوح صح انا فهمت كذا ةيلعب رياضه ويشرب ماي اذا جاع وماياكل قبل النوم شي حلو مبروك ع نزوله وصموده وان شاء الله ان حنا نصير مثله وننحف
الصفحة الأخيرة
وعقبالنا ياربي
يعطيك العافية يالغلا موضوع يحمس من جد ^_^