تجربتي مع رجيم الصيام (لايطوفكم في شوال)

السلام عليكم ورحمة الله وبركاته

تقبل الله طاعتكم وعيدكم مبارك ولو انها جت متاخره شوي في رابع ايام العيد

السنه اللي طافت سويت اكثر من رجيم بديتها بنظام اتكنز وعقبها ريحت وبعدين اخذت اكثر من رجيم من القسم اذكر منهم رجيم طالب الشمري مال كاكاو السنكيرز لاني اموت بالحلو

المهم قبل الرجيمات كان وزني 64 كيلو مع اني قبل اذا زدت كلش كلش 62
وبعد الرجيمات صار وزني 58 وبان على جسمي وارتحت نفسيا واكثر رجيم أثر علي ايجابيا نظام اتكنز

بس لاني ملوله واحب الحلو خرتها بالعطله وماوزنت

وبرمضان خرتها اكثر وطلعتلي كرشه تجيب المرض كل من شافني قال حامل لاخصر لارشاقه وسمنت من فوق مع اني اصلا ضعيفه من فوق وسمنتي تتركز بالوسط ( بس والله مو بطه وهالشي واضح من وزني :( )

المهم قلت الحق نفسي قبل العيد ودشيت القسم ونسخت اكثر من رجيم منهم رجيم محمد ربيعه وطالب الشمري

وفضلت رجيم محمد لان فيه حلو وفيه اكل اكثر مع انه متشدد حسب مااعرف

المهم بديت فيه من السبت اللي قبل العيد للاربعا اللي قبل العيد بليله

ومع اني خربطت وكنت اغش واكل حلو وكبه وازيد الكميات

بس النتيجه مذهله

نزلت كيلوين وبان على جسمي وكرشتي خفت حيل ولبست التنوره بكل ثقه

هذا وانا غاشه عيل لو ماغشيت جان صرت مانيكان :D

المهم اني خرتها من اول ايام العيد بحلويات العيد مع اني امس واليوم تغديت نفس فطور رمضان

المهم جدامكم فرصه انكم تضعفون في الست ايام من شوال وقضاء الدين

وانا بصوم 12 يوم ( 6 قضاء و 6 شوال )

ان شاء الله الايام الجايه لان عندي ظروف الحين

اللي حابه تبلش معاي حياها الله واللي حابه تبلش من الحين ياليت تكتب النتايج

ولاتصيرون مثلي ملقوفه كل شوي اوزن

المهم هذا النظام اخذته من القسم بس والله نسيت اي موضوع والشكر موصول لصاحبة الموضوع

والنظام واضح مايحتاج اي سؤال ,, لاني احيانا انشغل وانسى ارد على الاسئله

بس نصيحه طبقوه ,, انتو صايمين صايمين شخسرانين اذاطبقتوه

وهذا النظام نسخته مثل ماهو من جهازي

*****

وقت الفطور : 1 - 3 تمرات مع ماء
ثم القيام لصلاة المغرب
ثم كوب شوربه خضار أو كوب عدس
+ كوب سلطة أو تبولة أو فتوش
+ ربع دجاجة مسلوقة أو مشوية
+ 4 - 5 ملاعق أكل هريس أو تشريبة أو جريش أو رز أو 2 توست أسمر


بعد التراويح : 1 قطعة حلو أو "1 حبة قطايف "
+ 1 حبة فاكهة أو عصير

السحور : صحن سلاطة + كوب لبن أو روب + 1 حبة فاكهة

*****

ملاحظات من عندي تصلح لكل انواع الرجيمات (طبقتها بالنظام) :

1- شرب شاي اخضر كوبين باليوم بدون سكر ( صدقوني مو مر )
2- تناول 2 كبسولة مسحوق الاناناس ( مكمل غذائي) ماله اي اضرار ( من غير صيام ناخذ 3 كبسولات)
3- شرب ماي واجد ( من لتر ونص الى 2 لتر )
4- العصير يكون ( حبة كيوي + عصير اناناس كي دي دي او اي نوع طبيعي بالخلاط )
5- الفاكهه تكون اناناس او كيوي او جريب فروت او تفاح
6- اللبن او الروب يكون قليل الدسم او خالي الدسم





اتمنى مايكون الموضوع مخالف بس من فرحتي بالنتيجه قلت الا اشارك اخواتي الفرحه والحق عليهم قبل لايصومون ,, حتى قسم التصميم مادشيته واول مافتحت الكمبيوتر على طول هني

بانتظاركم :27: