*×* تجمع الرشيقات بالتخفيف + حساب السعرات الحرارية *×* (مدة الموضوع شهر من تاريخه)

السلام عليكم و رحمة الله و بركاته

خواتي الغاليات .... حبيت افتح الموضوع للتشجيع ....

طبعا اول مره بحياتي من بعد هالرجيمات القاسيه فكرت اني اسوي تخفيف + حساب السعرات الحرارية

ملليت من كثر الرجيمات بدون فايده و نرجع مثل ما كنا

انامن فترة سويت الرجيم الكيميائي الصراحه وايد حلو و نقصت 6 كيلو

بس رجعتهم لاني خبصت عدل

يبالي كف واااحد يخليني افكر بنفسي شوي :16:

من امس و انا افكر ماشي غير التخفيف و السعرات ,,,,

و الحمد لله انا اصوم يوم و افطر يوم اول شي لله سبحانه و تعالى و نكسب فيه أجر

و ثاني شي للتخفيف ,,,,, و طبعا اللي يبدأ وياي انا بادية من اليوم ,,,ناكل كل شي من اكل البيت

او تسوون الكم آكلات خاصه للرجيم براحتكم ....... بس لا للرجيم القاسي اللي ما يي وراه غير الاحباط

المهم التقليل و طبعا لازم تخلون الوجبات على 3

1 . فطور الملوووك

2. غدااء الامراااء

3 . عشا الفقراااء

و هذي مواضيع راح تفيدكم ان شاء الله ........

الاخت الغاليه دلع سنفورة

http://forum.hawaaworld.com/showthread.php?t=1088747

الاخت الغاليه صديقتكم

http://forum.hawaaworld.com/showthread.php?t=1068648

كل واحد يسوي تخفيف بالطريقه اللي تعيبه

و نسيت اقول الكم انا بحاول اشرب مرتين شاي اخضر + يانسون + نعناع + نص ليمونه ... و يمكن اضيف له مرامية

انا استخدم ليبتون وايد حلو و يطلع حامض مع الليمون روعه


و طبعا مسويه لي جيك ماي مسافي الكبير

عصير يتكون من :

زنجبيل طازج مبشور + اعواد قرفه ..... احطهم بدبة المسافي الكبيرة لين يتشرب في الماي و ياخذ طعمه

تقربا اخليه من ساعه لــ ساعه و نص و ابدا اشرب منه مثل اي عصير باي وقت

طبعا معروف و بقوة حاااارق للشحوم بتشوفون النتيجه المبهرة بعد شهر لابطن و لا شحوم ان شاء الله تعالى

بس شرط لازم تخلصون الماي في اليوم و اليوم الثاني تعيدونه يعني لا تستخدمونه حق يومين فهمتوا:D

و هذا جيك الماي مالي


و بالنسبه للرياضه براحتكم نحن بهالموضوع مب ملتزمين بشي ..
عن نفسي الرياضه بسويها بعد 15 يوم تقريبا .. بس على آلة صغيرة مثل ركوب الدرج ان شاء الله يوم بشتريها

بصورها الكم ,,,,, لاني مااعرف اسمها ,,,,,

و لا تنسون تهتمون فبشرتكم و شعركم عشان تطلعون بعد شهرين نيو لوك ....

و بالنسبه للوزن ....... انا عقيت الميزان ماابي استخدمه اييب الاحباط رحت السوق اشتريت لي
بدلة حلوة رقيقه كيوت مقاس M و انا الحينه البس XL

طبعا بو الشباب استغرب من البدله مقاس صغير في العربه سالني هذي حق اختج الصغيره
لا تعليييييق خخخخخخخخ:35:
قلت له هي و انا سكت عنه عشان يتفاجأ فيني لابستنه بعد شهرين نقول 3 اشهر مب مشكله المهم نضعف و نكون رشيقات .. أولا حق رب العالمين يعني نصلي و نحن خفاف
و ثاني شي حق بو الشباب عشان نسر ناظرية باللوك اليديد ......
يلا يا بنات منو تحط ايدها بيدي طبعا انا ماراح اوزن لين بعد شهر او شهرين المهم ما يهمني الميزان
انا بقايس بالملابس و هذا احسن شي ........

اسمحولي طولت بالرمسه ...... بس ملينا ماشي اراده ان شاء الله التخفيف بييب فايده

و توكلوا على الله يا بنات لين متى و غيرنا يضحك علينا

دبابه ..... شاحنه .... دبوووة ...... برميل ........ درام .......... الـــــخ من المسميات خخخخ

بسم الله و توكلنا على الله من هاليوم انا بديت

و كان فطوري :

كوب عصير زنجبيل و قرفه

بعده بشوي
4 توست أسمر مع مسحة جبنة فلاديفيا لايت
كوب عصير برتقال
و بعدها شربت شاي اخضر + يانسون و نعناع

و طبعا لاني بدولة اوروبيه فالوقت عندنا يختلف و بعد شوي عندنا غدا
الفرق بيننا 3 ساعات بالضبط

التوست الاسمر الواحد +++++++> 85,6
4 توست = 342,4
كوب عصير برتقال طازج ++++++++ > 90 ( 200 ml )
المجموع = 432,4

و ان شاء الله بكتب يومياتي يوميا