هههههه اهم ششي اني شبكت وششسسمه الولد ينرحم

ههههههههه
ربي يسعدك ضحكتيني وآنا تعبآنه


كملللي ربي يعآفييك

كان اليوم اربعاء .. والجو شتاء وممطر وجو عال العال وطلعت اسهر مع العيال في الاستراحه ومبسوطين .. ومانغص علي الا اتصال من اخوي ابراهيم " جنايات " .. الساعه 12
يالله عساه خير .. وش تبي هذي ..!
*آلو .. سليطين تكفى هات من الصيدليه حفايظ لشربات خلصت حفايظها ..
*يابراهيم الله يهديك شربات بقره ام سبع سنين ؟؟ لالحين تلبس حفايظ ؟؟ تروح الحمام
*اقول جبها الحين ولا والله اصحي ابوي الحين واعلمه اني شايفه اليوم وانت جايبني في سيارتك سكار تحت المرتبه ..
* رميت جوالي ورحت بسرعه للسياره افتش ؟؟ لايكون احد حاطها في سيارتي ولا متبليني ..
ومالقيت شي ..
سكار يامعفنه ؟؟ سكار ؟
قولي اسمه زين اول .. بعدين قسم بالله ماعمري شلت سكار في سيارتي ولا شربته ..
خفت تلبسني التهمه .. ورحت اشتري لبنتها حفايظ ..
************

دخلت البيت الساعه 1 .. لقيتهم مجتمعين في المجلس على غير العاده .. وابوي نايم في غرفته .
خير .. شفيكم جالسين هنا ..؟!
قالت ( عَدَلات ) .. هذي امي عدلات .. تحب تعدل بيننا ماعندها احد أعز من احد كلنا سوى ..
المهم قالت مجتمعين على خير .. تعال اجلس ..
ورميت الحفايظ قريب من " جنايات " .. وقالت أي أي جنبي جنبي ومسكت جنبها ؟؟؟
رجفتها امي .. قالت والله لو حنا عميان يابنيتي والله ماجتس ولا هيب لمتس .. قومي وتعدلي بس خلينا نعرف نحتسي ..
ضحكت براهيم وقالت قسم بالله امزح يمه <-- تخاف من امي
قالت امي منهي له هالحفايظ ؟؟ قلت لشربات ؟ قالت براهيم انا قايلة له يجيبها عشان يجي ونكلمه بالموضوع لو قلنا تعال بنكلمك ماجا .. وقسم هذي خطة فتكات ..
( والتفت جنايات على فتكات وخافت وتوزت ورى امي ) ..
خطه مخيسه يافت فت .. أجل حفايظ هاه ؟
************

قالت امي : بنحاتسيك بس رح غير ملابسك وحول .. معاد الا خير
رقيت فوق وغيرت ملابسي ورجعت .. وانا داخل المجلس الا " عنايات " مقابلتني طالعه من المجلس .. وامعطها مع شوشتها وارجعها المجلس .. أدري تبي تروح تفتش مخابيي .. ماعندها وقت ..!
( انا ودي افهم بس لو حصلت في مخباتي ولاعه ولا دخان ولا حزام ناسف ولا حتى سارق شغالة خالتي المغربية الزينه .. وش بتسوي ؟؟ ) .. شكل مافيه الا حل من اثنين .. اما افصل ثياب بدون مخابي ولا اصير البس تنوره .. وارتاح . مهيب حاله ..
************

جلست وتمددت .. وقالت هاتوا ماعندكم .. خير ان شاء الله
جبت بتتكلم اختي ابراهيم بحكم انها الكبيره : وسكتها قلت اوص بس والتفت لأمي قلت كان الموضوع مهم لاتخلينها تبدا .. دوري احد ثاني تراها بتجيب العيد من اول حرفين وبطلع فوق ..
قالت امي انثبري ياجنايات شوي .. خلي همسات تحتسي ..
همسات كانت هايمه في جو ثاني ماهي معانا .. وجالسه تداعب خصلات شعرها .. وتطالع في السقف وتغني بشويش .. ومسكينه مادرت الا راجفتها " ابراهيم "
وانتبهت الرومنسية .. وتنحنحت .. احم .. احم
شف سليطين وانا اختك .. ( لو قالت هالجمله " براهيم " رجفتها .. ماتركب ابد ) ..
انا قلت لأمي اني شفت بنت عمة زوجي .. صراحه بنت ماتمنيتها الا لك .. وانت تثق في ذوقي ؟ قلت ايه طبعاً ( برضو لو قالت هالجمله جنايات ذبحتها ) ..
وهي لسه متخرجه من كلية الطب .. تخصصها طب اسنان ..
قلت : بس انا خريج هندسه .. ؟ <--- صراحه مدري وش دخل هالجمله ..
نطت " ابراهيم " وقالت شف انا خريجة اقتصاد منزلي وزوجي ضابط ..
صراحه انقهرت ودي اطقها .. لو ماهو ضابط كان مسجون وماعاش معك لالحين .. لو بيدي ماعطيك شهادة مهني وقسم نجاره ويخب ..
وحامت كبدي صراحه قلت منيب متكلم وهي هنا .. خلوها تروح ولا بروح انا ..
************

عصبت عدلات .. امي
وكرشتها .. وقالت جنايات خلاص بنطم منيب متكلمه ..
ولمحت احد رافع اصبعه ؟ فت فت .. طابه في صحن حلا وتمسح خشتها .. اكيد طابخه شي في راسها ..
وش عندك ؟ فتفوته ؟ ( تسوي نفسها مؤدبه نكايةً في جنايات ) ..
وقالت : شف يخوي .. انا اشوف انها مناسبه وانا شايفتها في عرس همسات لكن ماكنا ندري هي متزوجه ولا لا .. بس انت لازم اول توافق .. بعد ماتوافق تخطب .. بعد الخطبه انا بدبر لك خطه تكلمها وتقابلها.. بعد وتجلس معها تشوف هي مناسبه ولا .. لا ..
قلت طيب ماينفع اقابلها قبل الخطبه ؟
نطت ابراهيم للمره الزليون .. وقالت : والله ابلغ الهيئه .. هذي بنت الناس مهيب من الشارع ..!!
صراحه حسيت انها قالت شي صح .. من النوادر اللي احترم فيها رايها .. ولو كنت امزح ..
طبعاً " عنايات " ساكته وجالسه تفكر .. فيه زبون بيطير من يدها الحين .. انا بتزوج خلاص شلون بتفتش مخابيي ؟ اخاف بعد تدبر لها فتفت خطه وتفتشني وانا مع زوجتي ؟ تسويها ..
************

صراحه ماجاز لي الموضوع لإني شايل فكرة الزواج من راسي .. ولا بعد شبعت من العزوبيه ..
قلت خير ان شاء الله نكمل بعدين انا تعبت ابي انام .. وقالت امي لاتنام الا لين صليت الفجر بيذن الحين ..
ورقيت غرفتي وريحت شوي .. بعدين رحت لغرفة " عنايات " وحطيت ثوبي .. حسيت لو مافتشت ثوبي بتجيها جلطه .. وبعد شوي جت وشافت ثوبي في غرفتها .. وجابته وهي زعلانه
وش جاب ثوبك غرفتي ؟؟ قلت عشان تفتشينه .. مثل كل يوم
وزعلت وقامت تصارخ ؟ انا منيب ملقوفه ؟ وش انت شايفني ؟؟ جالسه افتش جيوب الناس ؟؟
صراحه قفلت معي . نصابه قسم .. اختي واعرفها
بس صراحه خمتني بغيت اصدقها ..؟!
خذت الثوب ( وقلت في نفسي اوريك الحين في هالضفدعه ام عيون )
وانا اخذ منها الثوب قلت : طيب وين الولاعه اللي كانت في مخباي ؟؟
قالت والله ماخذت شي وماكان فيه ولاعه اصلاً ..
قلت يعني فتشتي مخابيي ؟؟
قالت ايه
قلت طيب تعالي اجلسي شوي ..
************

وجلسنا انا وياها .. وقلت لها : شوفي انا اخوك واكبر منك واعتبريني صديقك ( بس لاتطلبين كروت سوا وموبايلي ) هاها ؟ <-- سامجه صح .. وادري انك تفتشين مخابيي كل يوم .. بس ابي اعرف .. لو حصلتي مثلاً ولاعه او دخان او شي تعتبرينه مهوب زين .. بتعلمين امي ؟ قالت لا
طيب بتعلمين ابوي ؟ قالت لا
طيب فتكات ؟ لا .. طيب همسات ؟ لا .. لاتكون جنايات قالت لا ..
قلت طيب ليش تفتشين
قالت والله منيب معلمه على شي حتى لو شفت اي شي انت اخوي وبستر عليك ( الله يكملك بعقلك يابنتي ) وانا بعد اختك واكيد بتستر علي ؟ <-- لعبت علي .. مدري وش ناويه تسوي
بس انا وصديقتي لين جلسنا نتكلم بالتلفون ماعندنا سوالف .. هي تقولي وش لقت في مخباة اخوها وانا اقولها وش لقيت بمخباتك ..
قلت بس ؟ قالت بس .. وحلفت
قلت طيب مادام انك تعلمين خويتك وش لقيتي بمخباتي .. بصير احط رقمي كل يوم وعلميها بالرقم
*************

طبعاً جانا الأضا المستعجل .. الأخت براهيم وسمعت طرف الكلمه " الرقم " وقالت من اللي بتعلمينها برقمه ؟؟ ترى قسم ان عملتيها بالرقم وقبل تكمل صراحه حومت تسبدي ورجمتها بالمخده .. وحتى عنايات حامت تسبدها منها مع انها اختنا الكبيره ورجمتها بالمخده الثانيه .. اول مره انا اشوف ام وبنتها ام سبع سنين اعقل واركد منها .. الله يعين زوجها
اثاريها جايه تقول انزل ابوي ينتظرك تروح معه المسجد تصلون الفجر ..
************

واحنا طالعين من المسجد .. انا وابو ( شهاب ) .. ابوي ابو شهاب صراحه شكلين مابيحكي .. بنوب بنوب .. كلماته اوامر مطاعه .. انسان دوغري .. يحسبها في راسه ويقلبها يمين شمال بعدين يتخذ قرار نهائي واجب التنفيذ .. صراحه انا احبه .. واحترمه جداً ( بغض النظر انه اكبر مني ) بس انه فوق كذا .. ابوي <-- ياشيخ ؟ وانا ادعي الله انه مايدري عن سالفة الزواج ..
وفجأه قبل نوصل البيت .. قالي : كلمتك امك اليوم ؟
وضاق صدري وانقلب اول نهاري لتالي الليل وقلت خلصنا .. عز الله راحت عليك العزوبيه ياحبة عيني ..
وانا في هالهم والغم .. عاد السؤال : سليطين ؟؟ حاتستك امك اليوم ؟
ترى عندنا زوج اختك همسات بيتغدون .. قم مبكر وحول قبل يجي وانا ابوك ..
حسيت انه مكبوب علي مويه بارده وتشققت من الفرحه قلت ابششششرررررررررررررر بركد الساعه على 2
قال ثنتين في عينك .. وانا ابوك .. بكر بكر ..
************

دخلنا ليوم الخميس رسمياً ( ياشيخ ؟ ) .. ايوه ..
وجت الساعه 12 الظهر وصحيت ونزلت وصليت الظهر .. وجلست مع ابوي .. والساعه 1 ونص جا العريس ( ولد عم اللي مفترض تكون زوجة المستقبل ) .. وركزت عليه صراحه حسيت اني احبه مع اني ماهضمته من اول .. شايف نفسه وسيارته زينه ومرتبته زينه وشكله زين وسيم وغني .. طبعاً بعضكم بيقول يالاشهب تغار منه عشانه وسيم وغني .. لا ابداً .. <-- نصاب
وجلسنا نسولف ونتجاذب اطراف الحديث ومن هنا وهناك .. طبعاً انا على نياتي لالحين .. هاه .. لالحين .. بس رحت اجيب القهوه .. وقابلت فتكات وتغيرت النية 100%
وفتفت تعطيني القهوه .. قالت شوف .. شرايك باللي يخليك تشوف بنت عمه وبأمر وموافقه من زوج همسات ..
قلت شلون
آهاااا .. قلت لي شلون .. : ابيك تلمح له ان اسنانك تعبانه .. وانك رحت لكذا دكتور ولا نفع وسو نفسك تتألم ولما يجي الغدا لاتاكل ..!
قلت جوعان شلون ما آكل ؟
حسيتها بتنادي لي براهيم تطقني ..
قلت طيب طيب منيب ماكل .. وبعدين قالت : حاول تقوله ان ودك تروح لدكتوره بعد ماجربت الدكاتره ولا نفعوا .. وان معاد تثق في دكتور اسنان بعد مالعبوا في اسنانك .. واكيد بيقولك وقتها انا بنت عمي طبيبة اسنان .. وبيقولك تروح لها
صراحه اقنعتني .. شكلها من صحت من النوم وهي غاطه خشتها في الدله لين طلعت هالخطه الفتاكه

دخلت بالقهوه .. وصبيت فنجال لابوي وفنجال لزوج همسات .. وماصبيت لي .. احتريه يسأل ليش ماتتقهوى .. واحتريه ؟؟ وبرضو احتريه ؟؟ وماسأل
وجالس يسولف مع ابوي .. وخذت تمره وقبل احطها في فمي .. رجعتها .. وشافني
بس .. طاح في الشبكه بيسألني الحين ليش ماكلتها ..
وماسأل ..
وخذت تمره ثانيه .. وقبل احطها في فمي .. رجعتها .. والتفت وقال ليش ماكلتها ( وتشققت من الفرحه ... اخيرررررراً سألني ) .. وقبل اجاوب نط ابو شهاب ( ابوي ) وقال : اصلاً هو ماياكل تمر .. بس يخربهن وينطلهن .. الله يصلحه بس ..
طارت عيوني ايش هالحظ ؟؟
************

جهز الغدا .. ورحنا نتغدا وجلست مقابله .. وبعد ماسموا انا ما كلت .. وطلع ذوق الولد ولما انتبه سألني ..سليطين ليه ماكلت .. وعلى طول جاوبت قبل ينط ابو شهاب وقلت آآآآآآي .. آآآآي وحطيت يدي على خدي ( مايمديك تخرب يابو شهاب هاهاها ) .. قال شفيك سلامات ؟ قلت اسناني لها فتره متعبتني ..
ابو شهاب مايخلي عادته .. قال : تلقاه من هالككاو ماخرب ضروسهم الا الككاو ؟؟ حسيت اني " شربات " .. ؟
قال زوج همسات .. شفيها اسنانك ؟ ( بدت تغمز السناره )
قلت مدري صراحه رحت كذا دكتور اللي يقول لازم خلع واللي يقول تركيب واللي يقول مافيه شي .. احترت ياخي احترت معاد اثق في هالدكاتره ابد ..
قال : انا اعرف طبيب اسنان مجربه وماضنك رحت له واكيد بترتاح معاه ..
( صراحه بغيت اتكنبس من الفرحه و ماودي يسكت .. بدا لسانه ينقط عسل ) ..
قلت على يدك ياخوي .. تكفى
قال : شفت المجمع الطبي اللي جنب بيتنا ؟
قلت ايه معروف .. قال : فيه هناك طبيب هندي .. شايب بس وحده بوحده
صراحه مع احترامي لهمسات .. بغيت اصكه بصحن السلطه ..!!
قلت له .. ياخي رحت له .. وماقدر يعالجني وقال لازم عمليه ؟؟ لا لا مايصلح مجربه اعرفه زين <-- نصاب
قال صراحه شكلك جربت كل اطباء الاسنان .. لكن انا عندي بنت عم ( هو قالها ولا ماقالها .. وقبل يكمل اغمى علي ) ..
ييييييييييسسسسس اول مره احس ان ودي اودي فتكات كليتها كل يوم قبل الساعه 7 ولا عاد آآخرها ابداً ابداً .. ( طموح مخيس ) ..
وصحيت من الاغماءه المؤقته وهو يتكلم .. ويوصف لي العياده .. وانا خذت الوصف ولا ماخذته .. سحبت عليه وعلى ابو شهاب وهم يتغدون وطرت لغرفتي فوق ..
************

وبعد حركة القذافي ( إلى الأمام ، إلى الأمام ) وانا ارقى الدرج .. بديت ارتب جدولي .. يبي لي اروح الحلاق ( الله يعين على الزحمه عنده .. المشكله حافظ كل المجلات اللي عنده من كثر مانتظر دايم ) .. وبعدين بمر محل عطاره اشتري صابون ابو عنز اسلخ به جلدي ( للمناسبات الهامه ) .. وامر بقاله اشتري علوك .. وصيدليه آخذ بخاخ الفم ( عشان ماتنصرع وهي تكشف علي ) .. ومرطب شفايف .. يووووووووه عسى يمديني اليوم بس ..
وانا في عز هالحوسه .. تدخل همسات غرفتي بتسألني عن زوجها ورايي فيه ..؟ يوووووه وش تبي ذي .. فاضيه هالحقنه ؟! .. مشغول الحين مشغول .. وانا طالع من الغرفه بروح ابدا اخلص اشغالي الا في وجهي الأخت براهيم .. قلت هلا هلا بالقمر هلا بالطش والرش .. يازين هالوجه ياربي لاتحرمني منه ..
صراحه ماكنت في حاله طبيعيه .. لما وصلت السياره تذكرت اني كرشت همسات .. وهليت ورحبت بجنايات ؟؟
جلست اطالع عيوني في المرايه لايكون جايني شي ؟ او صابني شي .. عما الوان مثلاً ؟ مافرقت بين همسات وبراهيم ؟؟
************
وانا بطلع من البيت الا بيطلع معي .. والتخمت قالي : مارديت لي ؟ تبي اخذ لك موعد عند الدكتوره ( جمالات ) ..
قلت هاه .. جمالات ..؟
قال عادي عادي شكلك ماتبي دكتوره تبي دكتور هاهاها عادي وانا اخوك ..
بغيت اطب في بطنه .. قلت لا لا يخوي ابي احد اثق فيه وكويس انها تقرب لك ..
<---
قال خلاص بكلمها اخذ لك موعد .. قلت لا لا لا .. انت قل لهمسات تكلمها وتاخذ منها الموعد انت لاتكلمها ..
<--- بدا يغار
ورحت لمشاويري .. وعلى آخر مشوار .. اتصلت همسات
اول مره احب رقم جوالها وودي احفره في طبلون السياره .. يارب يكون الموعد اليوم يارب ماتروح الحلاقه ورسمة السكسوكه هدر .. يارب يارب ..

وتفاجأت ان الصوت مهوب صوت همسات ؟ صوت رجال اعرفه ..
الوووووووووو وينننننننك فيه ..؟
براهيم .. صوت براهيم ... وراك تكلمين بجوال همسات ؟ وش تبين يالعله اخلصي .
جوالي ياسليطين بطاريته خربت .. ابي تجيب بطاريه وانت جاي ..
صرحه ودي اجيب لها بطارية سياره ..( سياره ؟؟ ماتنفع يالله بطارية طياره ) واشبك الاشتراك في اذنيها لين تذن ..
************
رجعت البيت .. ورقيت غرفتي وسحبت السيفون اول شي بعدين تروشت ( بصابون ابو عنز ) .. وبعد ماخلصت رحت اصلي المغرب ورجعت غرفتي .. وشوي الا دخلت علي فتكات .. وهمسات
طبعاً همسات كلمها زوجها وطارت عيونها شلون جت السالفه هالشكل .. لكن من لطف الله انها كانت تكلم زوجها وفتكات لحالها عندها .. وشرحت لها السالفه فتكات الخطيره ..
طبعاً اقول من لطف الله لإن لو جنايات سمعتها وعرفت السالفه كان لفقت لي قضية ابتزاز ومادري الا محمل في جمس الهيئه .. وطبعاً عنايات لو درت بتعلم جنايات لإنها نصابه .. ماصدقتها انا هذيك المره ..
وكلمت همسات .. جمالات وهي عندي .. وبعد السلام والسوالف قالت لها السالفه ورحبت الدكتوره جمالات .. والتفتوا علي صراحه خدودي حمرت يمكن عشر ثواني بس ومسرع رجعت تشهب .. شكل صابون ابو عنز طلع الوصخ اللي معشش في جلدة خدودي من 18 سنه ( عمري الحقيقي )
<--- كمل كمل بس
وبعد ماسكرت الخط منها قالت لي هي في العياده الحين وبتقفل الساعه 9 ونص .. يلا نروح ..
بعد مانططت على السرير واهتز برستيجي عندهم شوي .. رجعت بستوعب وش قالت .. كأني سمعتها تقول ( يلا نروح ) ..!!
قلت نعم ؟؟ قالت يلا نروح ؟؟
قلت يامال الريح اللي ماتستريح .. وين بتطسين ؟؟؟
بروح لحالي مابي احد .. وعصبت صراحه
وقالت خلاص خلاص بس مهيب زينه ترى تروح لحالك وزوجي قايلي اروح معك .. يعني ضنك بيخليك تدخل على بنت عمه لحالك ؟
قلت ايه طبيعي انا مريض عادي مثل اي واحد ..
قالت لااااااا هي عيادتها نسائيه .. وفيها قسم رجالي .. وبتجي تكشف عليك في القسم الرجالي هالمره بس ..
قلت اهااااااااااااااااااا .. ( كبرت بعيني جموله ) <-- بدا يدلعها
قلت طيب تروحين انتي لحالك ؟؟ قالت مايخالف .. يلا مشينا
************
وقلت لفت فت .. دبري خطه نصرف فيها براهيم .. اكيد بتسألنا وين بتروحون ؟
قالت عوووووووووووولم .. ماعليك بس رح انت .. وتوي معطيها ظهري وتزغرط ؟ لولولولولولويش ؟
يا الله .. معاد فيه شي اسمه سر في هالبيت ..!
وطلعنا انا وهمسات .. ورحنا
وصلنا العياده قبل تقفل بربع ساعه .. طبعاً همسات يبي لها ساعه تنزل من السياره وساعه تمسمس نقابها وتعدل عبايتها وساعتين تمشي .. حامت تسبدي وتليتها مع عبايتها واسرعنا ودخلنا المبنى .. واتصلت عليها وقالت ترى حنا تحت .. انا واخوي سلطان <-- يدي برقبتها لو قالت سليطين بزنطها ..
قالت خلاص تعالي عندي العياده بس فيه مريضه اخلص منها وخلي سلطان ينتظر في عيادة الرجال ..
ودخلت عيادة الرجال .. طليت في العياده لقيت طبيب مصري فاصخ البالطو ويضف اغراضه ( جواله ومفتاحه ومفك عجل وصاموله ودريل ) بيمشي وشكله ضايق صدره محد جاه اليوم .. ورحت وجلست .. وطلعت منديل وحطيته في فمي كأن ضرسي وارم عشان تضبط الخطه .. الممرضه فلبينيه تحسبني زبون لما شافتني.. دخلت للدكتور وقالت له .. وطلع وهو يلبس البالطو الابيض من جديد كأنه محصل كنز ؟ ..
اهلاً اهلاً يافندم .. اتفضل ..
قلت لا معليش انا انتظر اختي في عيادة النساء ..
قال .. ازاااي ياباشا دنتا خدك مورم خالص .. تعالا ماتدفعش حاقه دلوئتي بس خليني اشوفك ..
قلت ياخي منديل منديل وطلعت المنديل وطلع لونه احمر ؟ كنت ماكل علك فراوله وشارب شاني عشان يحمر لساني وبراطمي ..
قال ياسااااااااتر .. دنتا عربية نص نئل عامله حادسه فـ بؤك يراقل ..
قلت ياخي علك قسم بالله علك وشاني مهوب دم ....
************
دخلت معه العياده وجلسني على الكرسي ولبسني الصداريه .. ( كأنه بيأكلني سيريلاك ) ولبس النظاره والكشاف والقفازات وشغل الدريل .. ودخل اصابعه ( الاصبع الواحد كأنه يد بزر ) وقام يحرك شمال ويمين وفوق تحت بغى يشق فمي .. وتوه بيبدا الا جت الممرضه قالت دكتور دكتور هادا زبون دكتوره جمالات ..
وقفلت معه وقال .. يادي القمالات .. دي مصيبه .. يا أخي حتى الرقاله مكوشه عليهم .. مش معئوله كيدا .. عاوز زبون ياناس .. عاوز اشتغل ..
ورفسته وشلت الصداريه اللي حاطها ورحت المرايه وعدلت الغتره وصكيت الازارير .. احم احم
شوي الا دخلت الممرضه وقالت الدكتوره بتجي هنا تكشف ..خلاص دكتور انتا بتروح .. روح
وضف اغراضه من جديد وانا اساعده اضفضف اغراضه واحط بمخابيه .. لين طس ..

وشوي .. الا دخلت
هي دخلت ولا مادخلت ..
هي جت ولا ماجت ..
هو انا شفتها ولاا ماشفتها ..
حسيت بدوخه .. اول مره اشوف بنت صدقيه .. ومر شريط سريع في بالي يسترجع كل البنات اللي شفتهم في حياتي .. طبعاً اولهم نزلاء عنبر تسعه وكتيبة الاعدام اللي عندي في البيت .. طلعوا عندها رجاجيل .. مهوب رجاجيل وبس الا بلطجية نظام .. حرس ثوري .. قوات امن خاصه اللي ياكلون سحالي وضفادع وعقارب .. كل شي الا انهم بنات ..
وقالت : السلام عليكم ..
قلت : عليكم السلام ورحمة الله وبركاته .. هلا والله
قالت : تفضل على الكرسي ..
قلت اي كرسي ؟
ونغزني همسات ( من اليوم وطالع بخاطبهم بصيغة المذكر واضمهم لاختهم الكبيره براهيم ) ..
قلت آها .. طيب طيب .. وجلست على الكرسي وتمددت ..
وجلست على يساري .. وقائد الثوره العقيد مقدم نقيب همسات على يميني واقف ..!! كأنها ماسكه خفاره على سجين ؟
وفتحت فمي وحطت المثبت .. وصار فمي مفتوح
وقالت : وش تشكي منه .. اي سن يعورك ؟
وانا فاتح فمي ماقدر اتكلم ..
وتعيد السؤال وهي لبست القفازات ودخلت اصبعها في فمي ( فرق بين اصبع الشكولاته هذا وبين اصبع الديناميت اللي قبل شوي ) .. وتكرر السؤال .. اي سن يعورك .. وين تحس بالألم ..
وانا فاتح فمي ماقدر اتكلم ..!!
وينغزني العقيد ركن خفير همسات يبيني اتكلم ؟؟ وطلعت الجوال وجلست اكتب مسج لهمسات وارسلته لها .. وقرت المسج وقالت للدكتوره :
دكتوره جمالات يقول ماقدر اتكلم وانا فاتح فمي وحاطه فيه المثبت ..
وضحكت
قالت اسفه اسفه .. آخر الدوام وتعبانه ومصدعه .. سوري سليطين ..
صراحه انا ما اسعدني شي كثر ما اسعدني تناحتها هذي وحركة الغباوه اللي سوتها .. حسيت اننا قريبين من بعض بهالحركه .. صراحه مابي وحده ذكيه مره تقعد لي ع الحبه ونص ..
************

استغليت هالفرصه اللي جتني على طبق من ذهب قبل تكشف علي وانفضح .. وقلت خلاص خلاص دكتوره جمالات خلينا نجي في وقت ثاني تكونين رايقه ونشيطه .. الألم راح الحمدلله وكلمي اختي همسات عطيها الموعد الجديد .. ..
قالت خلاص بس بكتب لك مسكن لو رجع لك الألم تاخذه .. قلت طيب طيب ( ماتدري ان شوفتها بس تساوي مفعول عشر كراتين بنادول )
وودعتنا لين الاصنصر .. ونزلت مع العريف جندي همسات .. والفرحه مش سايعاني .. قلبت كياني بعد ماكنت رافض فكرة الزواج ..
واحنا طالعين من المبنى .. لمحت جمس هيئه
وانا شفته ولا ماشفته بس .. وافصخ نعالي ( لابس زبيريه ) واعظ ثوبي واحط رجلي وهمسات متنحه ماتشوف الا غبرتي .. وانا مقهور وابرطم بيني وبين نفسي .. اكيد براهيم هي اللي بلغت .. لابوتس يابنت الكـ ... !! استغفر الله بس .. تلقى فت فت كعت لها بالسالفه ..
واركب السياره وتوي بحرك انحاش واتذكر همسات ياعلتين ..
وامشي بشويش وانا مطفي النور .. واشوف جمس الهيئه سوى يوتيرن وراح بعيد ..؟!
صراحه مدري ليه خفت .. مع انه طول عمري ماشي سيده ؟ واللي معي اختي ؟؟ بس خاف تقول ماعرفه .. خواتي واعرفهن يجحدون زي سلامو عليكم ..
وصلت عند همسات وركبت السياره .. قالت اكيد اكيد رحت تركض تجيب السياره ماتبيني امشي كثير .. ؟؟
ياروحي يالرومنسيه شايفتني الطبل زوجها ؟؟ وش اصكها به هذي ..
واحنا بالطريق قلت لها اسمعي .. لما تكلمك جمالات حاولي تاخذين الموعد الصباح ..
قالت : الصباح ؟؟؟ محد يقدر يروح معاك الصباح ..
قلت ( في نفسي ) : هذا عز الطلب يابقره .. وشوله اقولك الصباح اجل .. مابي احد يروح معي
واردفت قائله : الصباح انا في العمل وعنايات في المدرسه وفتكات في الكليه .. مافيه الا جنايات
وكعيت فراااااامل وصكت جبهتها في قزاز السياره الأمامي .. وقلت وشووووووووووو ؟؟؟؟؟؟؟؟؟ هاااااااااااااااااه ....!!!
لاااااااااااااااااااااااااااااااا لالالالالا ... خلاص خلاص خذي الموعد اي وقت
ان شالله يجي معي ابوها ولا اخوها بس تكفين إلا جنايات
************

رجعنا البيت .. ونزلت البطاطس والخس والجزر والبقدونس .. ( نسيت اقول واحنا بالطريق طلبت همسات محل ورد تبي تفاجئ زوجها لما يجي ياخذها ) .. بس طقتني الهواجيس وقعدت افكر في " جمالات " ولاشعورياً كان يخالط شعوري شي فيه زرع .. مويه ... تراب .. ريحته زينه ..؟! بس ناسي انها قالت ورد .. ولا حسيت نفسي انا وياها الا بسوق الخضار .. قالت ياخي ابي محل ورد مهوب سوق خضار ؟ قلت مايخالف مادام وصلنا خليني اتقضى للبيت فرصه وبجيب لتس كم كيلو جزر وبطاطس وباميا .. خلي عنتس الورد وهالخرابيط بيشمها ويرميها .. خساير على الفاضي .. ( طبعاً وقتها فكرت انه لازم الزياره الثانيه لجمالات لازم اخذ معي ورده
وعقب مادخلنا البيت .. كأني هايم واطير بجناحين وطاقتني الهواجيس وارقى الدرج درجه درجه .. ( بالعاده اخذ ثلاث درجات بخطوه وحده ) صاير كنغر .. ودخلت لغرفتي على طووووووول .. ورميت نفسي على السرير تسدحت وتبطحت بملابسي وكل ابو شيي .. وقلت آآآآآآآآآآآآه .. آآآآآآآآآآآآه .. بعدين صارت أأأي أي .. وشوي وقلبت صياح ووجع في الظهر وتحت الظهر ؟ انا احسبني خاق وكذا .. بس اللي صار اني رميت نفسي على السرير وهو مليان " معاليق ملابس " الحديد ،، امي الله يهديها رتبت ملابسي ونست تشيل المعاليق او تحسبني بسهر برا و كانت بترجع وتشيلها ..! عاد بعض المعاليق فيها حديد " ناتق " .. لكن الحمدلله كان الجو شتا ولابس جاكيت وتحت ثوب صوف وتحت الثوب بجامه وبعدين انا ..
وجت الطعنات خفيفه الحمدلله
************

حسيت مالي مزاج اطلع من البيت .. الساعه 12 ومالي خلق استراحه .. غيرت ملابسي وانسدحت ومادريت الا في سابع نومه ..
احلى نومه في حياتي ، احلام ورديه ووجه جموله مالي البالونه حقت الحلم حقي .. وفجأه الساعه 11 الا ربع صباح الجمعه زلزال عندي في الغرفه وقصف عشوائي وإصابات بعضها خطيره وبعضها سطحيه بسيطه ..
طبعاً اختي براهيم .. جايه تصحيني للصلاة عشان اوديها بعد الصلاة لبيت زوجها لإنه بيرجع ..
وشف عاد من بعد وجه جموله يطلع لك وجه جنايات ..
بالضبط كأنك قاعد تشوف فلم القبله الفرنسية حق ميغ رايان ومنسجم على روعة وكمية الرومانسيه في الفلم وفجأه يجي واحد يغير القناة مباراة على قناة السودان بين الهلال وام درمان .. والمباراة في الليل ونص الكشافات طافيه ..
استعدت للصلاة ونزلت 11 وربع وطلعت مع ابوي بالسياره للجامع .. وطبعاً مصحيتني جنايات وش بتوقعون مزاجي ؟؟ صح .. معفن ..
وانا لما ادخل المسجد ينشرح صدري ويتعدل مزاجي .. بس هالمره غير .. جت خطبة الجمعه على كيف كيفي .. عن الزواج
وكان خطيب الجامع الله يجزاه خير كل خطبته عن الزواج وتحصين المسلم والاشياء الحلوه هذي .. وهو يخطب جلست اطالع ابوي كل شوي اتأكد انه مركز في الخطبه عشان لما نطلع تزمينة يفتح معي الموضوع ..
وصلينا وطلعنا وركبنا السياره انا وابو شهاب واروح مع طريق طويل عشان نبطي في السياره .. مع ان البيت ثلاث دقايق بس .. لكن ماتمدي يفاتحني بالموضوع ..
وانا امشي بشويش احتريه يفاتحني بموضوع العرس .. ومطنش ؟ يابو الشباب ؟ احتس .. ومطنش ..
قلت مابدهاتش ابدا انا
قلت لابوي .. يبه الشيخ اليوم في خطبته قال حديث للرسول صلى الله عليه وسلم " من استطاع منكم الباءة فليتزوج وإن لم يستطع فعليه بالصوم فأنه وجاء " او كما قال صلى الله عليه وسلم ..
وش معنى الباءه ؟
قال : ياولدي عليك بالصوم احصن لك .. ولا الباءه مانتب حولها ..
صراحه .. صراحه .. وقتها بغيت اوقف واقوله معليش انت ابوي واحترمك وكذا بس لو سمحت انزل وطقها رجليه للبيت ..
صراحه مدري منين القاها .. من هالاربع خوات اللي رقيتهم صراحه من عنبر 6 ( اجرام خفيف ) لعنبر 9 ( مسجل خطر ) .. ولا من ابوي .. بجرب مع امي هي مقتنعه وبتقنعه ..

+++++++++
نكمل بعدين ؟؟ نكمل بعدين طيب
صراحه طويله السالفه ويبي لها موضوع جديد ..