بعد اسبوع من كل الاحداث اللي صارت .. اشتغل " شغل " الحريم ..
عاد عارفين شغل " الحريم " .. رتبوا كل شي .. وقالولي رح لحالك قابل ابوها أول
قلت بس .. اقابله واقابل ابوه ..
وكلمت ابوها وخذت منه موعد يوم الخميس ..
ورحت لحالي يوم الخميس " المغرب " .. وقابلني ابوها ورحب فيني
وعرفته بنفسي وشهادتي وشغلي وكل شي حتى منصور وكمومه وسالم وراسه علمته عنهم ..
وقلت : يشرفني ويسعدني اطلب يد بنتك .. المدام المصون يارا ..
قال الآنسه يارا .. قلت ايوه ايوه .. معليش ياعمو انا مرتبك شوي ..
مسوي ولد كيوت وواثق من نفسي حيل ..
قال ياولدي اصبر لين تشوفها ... بعدين اطلب ..
"بغيت اقول شايفها وباغي اطلعها بس عجل علينا .. "
قلت والله ياعمو اكيد تشبه لك ومايحتاج اشوفها .. الكتاب مبين من عنوانه ..
" وجلس يطالع وجهه في مراية الطاوله " .. كنه صدقني ؟
قال ياولدي ولو انها تشبهني وكأنك شفتها يوم شفتني .. لكن من حقك تشوفها ..
الشرع يحلل لك تشوفها قبل .. خلني اروح اناديها ..
وراح يناديها وبغيت الحقه ببياله ..
لو انها تشبه له كان زادوا العوانس .. حبه ..
***************

وشوي .. الا دخلت .. يا ربي ياربي .. ارتبكت ارتبكت
جتني النفاضه .. ومع الربكه طاحت عيني على ابوها وقلت يعععععععع ..
بس اشوى حفظت مكانه ومعاد التفت عليه ..
وش هالقطعه اللي دخلت .. ابيها ابيها ابيها ..
جلست ادور قلم في مخباي ورقه شي .. ودي ارقم ودي ارقم ..
مقدر اصبر لين العرس ..
هذي ازين من اللي شفتها في العياده .. ام بالطو وحجاب ووجه مشهب ..
وش هالزين اللي اقبل وش هالوجه يشع نور وش هالشعر الحرير وش هالمشيه ياربييييييه وش هاللبس الخقق ..
وشلون وافقت تاخذني ( مستهين بنفسي ) ..
( صراحه البنت يوم الشوفه الشرعيه .. ودك تصورها وتحتفظ بالصوره
لإنه بعد شهر من الزواج بيطلع لك شكل ثاني .. وقتها طلع الصوره واقعد ذلها
وقل لعبتي علي .. ابي حقي ) يمكن ترجع لك شي من المهر ..
<------ تفكير حضرمي
ومعها طوفرية فيها كاسين عصير .. ( واضح انه عصير الربيع ) .. من طعمه
ويوم قربت صراحه مسكت المزهريه اللي جنبي .. خفت تكب علي الطوفريه ..
بصكها بجبهتها هي وابوها ..
اعرف هالحركات تكبها علي وبعدين يقولون افصخ ثوبك نغسله ومن هالكلام ثمن
يصوروني بفنيله وصروال وبعدين يبتزوني ويطلبون فلوس ..
<------ انطم وكمل تكفى ..
وهي تقدم لي العصير .. قلت اجلسي . قالت طيب بس اعطي ابوي العصير ..
قلت زلبيه زلبيه لاتعطينه وجه .. خليه يفهمها ويروح ..
قالت بدلع .. لـئـه .. بابا ..
قلت الله ياخذه هالعله .. روحي عطيه يطفح وتعالي ..
وابتسمت ابتسامه خلتني ادوخ وأكب على نفسي العصير ..
وصرخت لاشعورياً لااااااااااااااااااااا كلش الا التفصيخ .. رجاءاً خلونا محترمين .. دخلنا بالمعروف نطلع بالمعروف ..
وجلسوا يطالعوني مستغربين ومندهشين وغير مستوعبين ..
وحسيت اني جبت العيد .. وش هالكلام اللي قلته ؟؟
وشلون ارقع شلون ارقع .. بس بس بس .. وقلت :
شفت ياعمي .. هالكلام اللي ماله داعي خلونا محترمين ودخلنا بالمعروف
ونطلع بالمعروف ..
ترى ان شاء الله ماراح تسمعه مني .. وبنتك بحطها جوا قلبي وتحرسها عيوني ..
وخق الابو مع هالكلام .. والبنت تشققت واستحت وطلعت من المجلس ..
***************

صراحه يوم طلعت .. معاد التفت لأبوها ..
مابي اشوف وجهه عقبها .. ابي اعيش اللحظه بكل تفاصيلها الجميله ..
ولا ابي صورتها تغيب عني ..
وجلست متشقق واعيش اللحظه ..
واسمح واحد يتنح نح .. بس مزلبه ..
وانا مستمتع باللحظه وقبل ذروة اللحظه ..
قال : بننتظر ردك ياسلطان عشان نسأل عنك ..
رديت عليه وانا معطيه كتفي .. صراحه مابي اشوف وجهه .. يكفي انه خرب لحظتي ..
قلت لا ياعمي ردي جاهز الحين .. بس ابيك تواعدني يوم اجي مع ابوي نخطبها رسمي ..
قال ياولدي ناظرني لاتستحي .. ماشاء الله على التربيه .. ناظرني وانا عمك ..
قلت معليش ياعمي مستحي لاتحرجني .. ( وش هالنشبه ) ..
قال خلاص بنسأل عنك اول ان شالله ( شغل مخابرات السعوديين ) وبشوف وقت مناسب .. ونعطيك خبر ان شاء الله ..
قلت زين ياعمي .. انا استأذنك الحين وارجوك خليك قاعد انا ادل الطريق..
بس رد بي وقام معي .. قلت اجل امش قدامي ( مابي اشوف وجهه ) ..
مشى قدامي .. صراحه كنت ناوي اطل جوا البيت .. اشوفها ثانيه ..
وسأل عني ( المحقق كونان ).. وحدد لنا موعد ..
***************

جا الموعد ..
ورحت مع ابوي واكبر اعمامي واكبر خوالي .. نخطبها ..
واحنا جالسين كنت مستحي ومرتبك ولو توقف ذبانه على خشمي ماقلت لها شي .. من الحيا
وهم يتكلمون ويسولفون ويخطبون .. كنت افكر باشياء واجد .. وقطع تفكيري
كلام ابوها لما قال : اسمحوا لنا في الملكه والزواج تكون بعد ست شهور .. اخوانها بيخلصون
دراستهم برا بعد ست شهور وبيجون الصيفيه ..
قال ابوي مايخالف امرك من سعه .. ( وش اللي امرك من سعه يبه ؟ عشانك متزوج وفالها ؟؟ ) ..
قهرني بالطلب هذا وقهرني ابوي يوم وافق
وجلست افكر شلون بشوفها هالفتره الطويله شلون بكلمها شلون وشلون ومية شلون ..
صراحه قلت بكلم ابوها .. بعدين قلت لا شينه .. خلني اكلمها عادي بدون مايدري ابوها ..
وان حصل طلعتها ( تفكير سربوت ) الله يلعن بليس الحقير ..
يبيني اطلعها قبل الملكه .. اصبر طيب لين اضمن اكلمها ياواطي ( من حيث المبدأ ماعندي مانع ) ..
بعدين قلت اخاف تسوق الدلال والثقل بعد ماضمنت الخطبه وتقول ماقدر اكلمك الا بعد الملكه ..
اعرف حركات البنات .. بس مايمديها خخخ <-- ياكافشهم يا أنا ؟
وانا في عز هالتفكير ومابعد وصلت لحل .. قاموا بيطلعون ..
قلت الاااااااا بكلم ابوها واللي يصير يصير ..
ويوم طلعوا جلست شوي وقلت ابيك ياعمي بكلمه لو سمحت .. قال تفضل ..
قلت والله انا مستحي من هالطلب لكن انت عارف ودي اتعرف اكثر على يارا وتتعرف علي ..
وست شهور فتره طويله ودي انجز فيها اشياء لنا ولازم اخذ رايها وتكون دايم في الصوره ..
قال تكلم ياولدي وش تبي .. قلت ابي اكلمها لو ماعندك مانع ..
قال عادي كلمها ..
قلت لا ياخي مهوب عادي ..؟!
<------ وش يبي ذا
( صراحه قهرني وافق على طول وانا متعب نفسي بالتفكير )
و تشجعت وقلت خلني اشاوره بعد .. اني اطلعها معي ..
يوووووه تذكرت .. عيب .. ياسليطين ياوقح ياحقير ياسافل يامنحط ( ضميري كلماته سوقيه ) ..
ومن هاليوم .. صرت اكلمها .. وتكلمني
في احد المكالمات .. كنا نسولف عن طقوس كل واحد فينا وش يحب وش مايحب يسوي ..
قالت .. انا اول ما اصحى من النوم احب اشرب كوب كوفي .. واسمع فيروز ..
وانت ..!!
قلت انا اول ماصحى احب اسحب السيفون ..
صراحه قلت خلني اكون صريح من البدايه .. لايكون مخططه على السيفون ..
واللي اوله شرط .. آخره نور ..
***************

تكلمنا انا ويارا في كل شي .. واي شي ..
واتفقنا على كل شئ.. ماعدا شئ واحد ..
كانت يارا تفضل ان نستقل في بيت ونبدأ حياتنا الزوجيه باستقلالية تامه ..وهذا من حقها ..
وكانت تردد ان ابوها مقتدر وعنده شركه عقاريه وبإمكانه يساعدنا ..
طبعاً انا " سعودي مهايطي " .. رفضت الفكره شكلاً ومضموناً ..
غير اني شاورت سالم وقال عساااااااك سااااالم .. لايكتب عليك شيكات بكره ويجرجرك
في الاقسام والمحاكم .. لين زعلت بنته ..
" سالم عنده مكتب تحصيل اموال " .. وعنده خبره في هالاشياء " اقسام ومحاكم " وتخليص جمركي ..
وسمعت كلامه ..
كانت اغلب المكالمات طوال 6 أشهر .. اقنعها ان بيتنا احسن من ان نستأجر ونضيع مبالغ نحتاج نجمعها
عشان نبني أو نشتري بيت ملك ..
كانت وجهة نظري أن بيتنا كبير .. والدور الثاني كان فيه جناحين..
كل جناح غرفتين ووبوفيه ودورة مياه وصاله يرمح فيها النمل ( مترين * متر ونص )..
لما يجونا عيال يلعبون فيها كوره ( عشان اكبر الصاله بنظرها ) ..
ولو فتحنا الجناحين على بعض اربع غرف ودورتين مياه .. وش تبين بعد ؟
ماحنا حمل ايجارات خاصه انها نار ومولعه ..
بس هي ماتبي تسكن عند " حموله " ..
وقلت لها ان امي وخواتي يحبونك وبترتاحين معاهم ..!
بس كانت متردده بكفرة السكن عند حموله ..
قلت خلاص انتي اجلسي ثلاث شهور تجربه ..
وان ماعجبتك " الحموله " نطلب استبدالهم ولا نرجعهم مكتب الاستقدام ؟؟؟؟
ولا شرايك اتسلف لك حموله مافيها الا شغالتهم بس ؟؟ والباقي متوفين في حادث ..!!
***************

وبعد اخذ ورد معاها طوال الـ 6 شهور .. اقنعتها ..
وزادت ( عشان تثبت انها مقتنعه 100%) انها بتساعدني بجزء من راتبها
حتى نجمع مبلغ ونشتري او نبني بيت ...
تكلمنا عن شهر العسل ..
كنت احاول فيها نروح اوروبا ( ودي اشوف لندن وباريس وروما بس كنت ابي احد يجسرني ) ..
رفضت وقالت اوروبا كلها رايحه لها مع ماما و بابا ..؟! ( طبعاً احد شروطي انها ماتقول ماما وبابا ) ..
يمه .. يبه .. ايه .. بابا ماما لا .. لاتسمعها خالتي " شبكات " تقول ماما بابا وتسوينا مضحكه في الـ BB..
قلت طيب نروح امريكا ؟
قالت لا حبيبي .. انا رايحه عند اخواني وشايفه كل هالأماكن ..
وانا ابغى دبي عشان فيه مؤتمر مدعوه فيه لازم احضره ويوافق شهر العسل
ويكون عصفورين بحجر .. شهر عسل وحضور المؤتمر ..
قلت طيب مو مشكله .. دبي دبي .. بس نروح مكه وبعدين نكمل في جده .. واتفقنا
وجا موعد الزواج ..
كانت فت فت وهمسات وعنيات يبون العرس في قاعة " نياره " ..
وانا وجهة نظري اني لو بعتهم كلهم بالبيت حقنا وفوقهم بيت خالتي شبكات وعيالها وونيت زوجها ..
ماجبنا قيمة الليله في القاعه ..
بس مابغيت اسطرهم عند ابوي ... وقلت لبراهيم وانتي شرايك ؟
وقبل تتكلم أو تقول حرف واحد بس .. قلت خلاص شكراً براهيم مشاركه جميله وصفقت لها .. وقمت

وحجزنا القاعه بـ 120 الف ..
وحضر الموعد الهام في حياتنا ..
الساعه 11 .. طلعت الغرفه حقت التصوير ..
وجلسنا نصور .. الفلبينيه طلع فيها الشيب ..
كل ماجت تصور نطت شربات بيننا ..
حومت تسبدي .. وربطتها بسلك .. ودخل براهيم وشافت بنتها مربوطه ..
بنتي بنتي بنتي يمه بنتي بنتي مربطينها يبون يذبحونها ..!!
قلت يابنت الحلال بهذلتنا ماعرفنا نصور ..؟
قالت الا الا تبون تموتون بنتي حرام عليكم خلوها تصور ..
قلت طيب طيب بنصورها خلاص بس اسكتي لاتفشلينا ..
قالت وانا بعد ابي اصور .. قلت طيب بنصورك تعالي
قالت لا ابي اصور انا وبنتي لحالنا ..
قلت طيب مايخالف .. قالت بقى شي ..
قلت اخلصي وخلصينا ؟!
قالت ابي ميتين اطق شوط في بنتي .. رضاوه
قلت ميتين ؟؟ شايفتني مطلع خويتي .. وش يجيب ميتين في جيب معرس ؟
خلاص خليهم يطقون في بنتك شوط وان بغيتي بعد وقت اضافي وبلنتيات مايخالف ..
وانا بعطيهم بس فكينا يالمومياء الفرعونيه .. لو ضحكتي تكسر وجهك من كثر المكاييج ..
ونزلت يارا .. وارتزت في الكوشه
وجا ابوها واخوانها عندي ومسكوا يدي ..
وكانوا بيدخلوني .. قلت لحظه لو سمحت انت وياه .. ( من زينهم رازين وجيههم ) ..
انا اهلي محافظين ويبونه عرس اسلامي ومابيكم تدخلون على محارمنا .. رجاءاً يعني ..
طبعاً انا كنت خايف عليهم لاتلبسهم " جنايات " قضية تحرش بالحريم الحاضرات ويتفركش عرسي ..
ماتسوى علينا دخلتهم ..
***************

وجو زفوني للعروس .. وجلست ع الكوشه ..
وكنت فاقد " عنايات " ..؟! ماكانت معهم ..
قلت لفت فت .. وين عنايات ؟؟
قالت من دخلنا هي وقفت عند الباب .. تفتش شناط الحريم مع السكيورتيه ..
يا الله .. يا الله ..
روحي اسحبيها من شعرها .. مهوب وقته ..
وجت ام يارا وخواتها عندنا في الكوشه وعطتني امي الخاتم البسها ..
وانا ماسك الخاتم .. تحركت وطاح مني ..
وجلسوا يدورونه ..
قالت جنايات : ترى هذي هذي هذي اللي خذته انا شايفتها هي اللي سرقته ( تأشر على ام العروس ) ..
واوطى رجلها اقولها اسكتي الله يفشلك .. هذي امها ..
والتفت على ام يارا وخواتها
وأشرت على جنايات .. قلت هذي تبعكم ؟ ترى مانعرفها مدري منهي تبعه ..
وشربات بنتها جالسه بيني وبين العروس تصور .. قالت : هذي امي ياخالو ..
وادزها على امها .. قلت ماعرفكم .. ماعرفكم ..
ولقينا الخاتم .. ولبستها ..
وقبل ماتجيب فينا العيد " جنايات " حطيت الباقي في حجر يارا وقلت تصرفي ..
وكنت مواعد شغالتنا " سفالات " اطق لها شوط في عرسي ..
لإنها مشترطه كل يوم تغسل السياره بمية ريال شهري واطق لها في عرسي ..
وجت قالت بابا فين سوط انا ؟؟
وش هالنشبه .. نسيت ..
طيب وش اسم عائلتس عشان يقولون كل الـ فلان خياله يازين السافله بينهم ؟
قالت انا اسم \ ماردياتي موبوتوبناني مودوبوتي ..
قلت هاه ؟؟..
شافتني متنح وتطلع اوراق من شنطتها ( وصل تحويل من بنك الراجحي )
مكتوب فيه اسمها .. وماعرفت اقراه صعب ..
قلت طيب خليهم يطقون في " سفالات" ؟ سهل ووش زينه
وجلست تصيح .. سليطين انت مواعدني تطق لي في عرسك ..
قلت طيب طيب هاتي الاقامه ..
وقلت لفت فت روحي للطقاقه وعطيها الاقامه وقولي تطق للشغاله شوط ..
اسمها مكتوب وان ماعرفت تقراه ولا مهوب واضح خليها تطق
في تاريخ الاقامه ولا اسم الكفيل ..
وفي الزفه والصوت عالي .. وحنا نمشي
مانسمع شي .. لكن سبحان الله الكلمه الشينه توصل ..
سمعت وحده من المعازيم تقول " يووووه هذا سليطين اللي متزوج ومطلق ثلاث مرات " ..
قالت اللي معها "لا وبعد هي متزوجه وعندها بزرين ومطلقه "..
يا الله على هالعالم .. يانصبهم نصباه .. يحضرون عشان يخربون .. هذي مهمتهم ..
بغيت افصخ العقال والاحقهم ..
بس مايمنع اني طالعت " يارا " من فوق لتحت ..
عشان اسجل موقف .. لو طلع كلامهم صدق ..!!
***************

وصلت الفندق الفجر .. والصباح رحلتنا ..
وتعبانين وفينا النوم وحالتنا حاله ..
بس وسوس بي بليس وفكرت بكلام الثنتين
قلت والله مانوم لين اشيك ..
وطلعنا المطار الصباح .. وصلنا دبي الظهر ..
وتمشينا ثلاث ايام .. في دبي ولفيناها
اليوم الرابع كان المؤتمر حق يارا ..
وكان موضوعه " الثوره التقنيه في طب الأسنان " ..
ومدته يوم وموعدين الأول الساعه تسعه الصباح ...
افطرنا في الاوتيل .. ونزلنا للقاعه .. ( طبعاً لازم اروح معها .. " محرم " ) ..
وجلسنا في القاعه وكان الحضور تقريباً 200 طبيب ومندوبين شركات أدويه ومعدات اسنان ..
والجلسات كلها مصوره وفيه شاشة عرض كبيره في القاعه ..
وبدت الجلسه بالانجليزي .. وانا كنت جايب معي جرايد وجالس اتصفح ..
فيه قطعة زيتونه نشبت بين اسناني .. بعد الفطور
وانا جالس مارتحت .. ومقصص اظافري عشان العرس مامداها تطلع ..
وادور عود ولا سلك .. مارتحت ابد ابد ..
على يساري يارا .. وعلى يميني عجوز اوروبيه حاطه شال .. وامعط منه خيط .. والتفت علي ..
واجلس اسلك .. اطلع هالقطعه ..
وشوي الا يارا تنغزني ؟
حسبتها شافتني .. قلت والله مابينا شي بس معطت هالخيط بنظف اسناني ..
قالت الشاشه طلعتك وانت تسلك اسنانك ؟؟
وش بيقولون عني الحين ؟ زوجها اسنانه خربانه ؟
قلت وش دراهم اني زوجك ؟؟ قولي ماعرفه
قالت انا معرفتك لهم انك زوجي ... شلون دخلت اجل ؟؟
قلت طيب طيب انا بتصرف ..
وطلبت الكلمه من رئيس المؤتمر .. وقالي تفضل ..؟!
قلت : " باللغه العربيه " عشان ماتفهم الاوروبيه : بعد سماعي لنصيحة السيده التي بجواري بتجربة استخدام السلك ..
( وأنا أأشر بعيوني على الأوروبيه عشان ماتنتبه لي وتشوفني ) ..
وجدت ان تنظيف الاسنان بواسطة السلك
قد تؤدي إلى إيذاء اللثه .. لذلك انا متشوق لرؤية اكتشافاتكم القيمه ..
وانا بجلس عقب كلمتي .. ضاع الخيط ..
والتفت على الاوروبيه بمعط من شالها خيط .. وشافتني .
وناظرتني نظرات .. يطلع من عيونها شرار ..
قالت WHAAAAT ??
اثاريها حاطه سماعه صغيره .. وتسمع الترجمه .. بس مغطيه الشال ..
وقالت كلمه مهي حلوه .. بس عديتها عشان معي عوائل ..
*****************

خلص الجزء الأول من المؤتمر الساعه 11 وقالوا نستأنف الجزء الأخير الساعه 4 العصر ..
وطلعنا السويت ننام وصحينا 3 وتغدينا ..
وبعد الغدا "رحت افرش اسناني واسلكها لايصير لي مثل ماصار الصباح " ..
ولما نزلنا للقاعه .. حصلناهم مكتملين ..
وكان رئيس المؤتمر يقول اننا بنعمل تجارب الآن على بعض الأجهزه والمعدات المتطوره ..
ولما شافني قال مستر سلطان .. بليز
قلت آمر يابو ؟
قال انت الصباح تبرعت وعملت تجربه .. نتمنى الآن ان تتبرع لتجربة بعض الأجهزه ..
قلت عادي.. من عنوني ( ابي اكبر في عين يارا ) ..
لما شافتني الاوروبيه اللي معطت خيط من شالها ووهقتها الصباح افقت . فرحت الحماره وتشققت
ورفعت يدها قالت لو سمحت يادكتور ممكن انا اكون اول وحده تقدم بحثها ..؟!
وطارت عيوني غير مصدق مايحدث .. شكلها ناويه على شي بنت اللذينا ..
جت وجابت جهازها وقعدت تشرح للحضور ..
"هذا جهاز متطور يعمل بالليزر اثناء تنظيف الأسنان المتسوسه ولا نحتاج لوضع بنج لإننا لانحتاجه
بوجود هذا الليزر فهو يقوم بمفعول البنج والتنظيف في آن واحد .. وفيه ذبذبات تجعل المريض يغني
بصوت عالي من شدة الهدوء وانعدام الألم "
حسيت انها نصابه .. ونغزني قلبي .. خاصه مع جملتها الأخيره ؟ ماصدقتها
اغني وانا اصلح ضروسي ؟؟؟
واجتمع الحضور حولي وانا جالس في كرسي " الاسنان " واللي مايقدر يشوف لايف ..
قعد يشوف من الشاشه ..
وشغلت الدريل الصغير اللي يحفر السن وينظفه
زززززززززززززززززززز ( الصوت يروح ويجي ) سووها معي يلا
و ماشوف ليزر اشتغل ؟؟! ..
وبعد مافتحت فمي وحطوا المثبت .. خذت لفه على اسناني كلها فوق وتحت .. وهي تطالعني وتسوي ..
وجلست تحفر ؟؟ وين البنج وين الليزر ؟؟؟ يابنت الكـ ..؟!
وقامت تحفر بين الاسنان .. والوجع وصل قمة راسي ..
وجلست اقول آآآآآآآآآآآآآآآآآآ ... آآآآآآآآآآآآآآآآآآآآ ... آآآآآآآآآآآآآآآآآآآ ...
وماقدر اتكلم .. ؟؟
وجلست اغير نغمة الـ آآآآآآآآآآآآآآ آآآآآآآآ مره ارفع الصوت ومره اخفض الصوت ..
قالت وهي تضحك " ارأيتم .. بدأ الآن يستمتع بالغناء " ...
قلت مابدهاش .. بصيح صراحه معاد اقدر
وقمت اصيح .. آآآآآآآآآآآآآآآ أهئ أهئ أهئ ..آآآآآآآآآآآآآآآ
ابي دموعي تنزل وتنتبه هالسبهه يارا .. او احد ثاني ..
قالت "يا إلهي .. انظروا كم هذا الرجل عاطفي .. انه يبكي من شدة التأثر بالغناء " ..؟!
وقمت اشاهق .. هـء هـء هـء
ولما خلصت .. وفكوا المثبت .. قعدت اصيح واااااااء .. اهئ اهئ اهئ ..
وكل اللي حولي من الحضور جلسوا يناظرون يارا ..
بعضهم مشبك يديه وضامها لصدره ومميل راسه ويطالع يارا مثل اللي يقول :
"ياحظك بهالزوج العاطفي .. كم نحسدك عليه "..؟!
وبعضهم يرفع لها ابهامه .. ذا مان از فيري نايس ..
ويارا تطالعني وهي متشققه ومبسوطه منهم ..
وقالت .. حبيبييييي الجهاز فضيع فضيع لازم اشتريه للعياده ..
ياربييييييه .. وش اسوي بهالكمخه .. وش اطقها به ؟
مقدر اتكلم ولا فيني حيل .. واشاهق عقب الصياح
قلت رقوني فوق .. مقدر امشي ..
ونادوا اثنين من عمال الفندق .. ومسكوني واحد يميني والثاني شمال وشالوني ..
وهم يسحبوني .. التفت على الحضور .. ودي اقول كلمه واسوي حركه مهيب زينه ..
بس خنقتني العبره يوم شفتهم ( منكسره عيني ) ماقدرت احكي ..

بعد اسبوعين في دبي وجده ومكه .. رجعنا الرياض ..
كان في استقبالنا اهلها.. واهلي ..
بعد السلام والحمدلله ع السلامه .. وهالشكليات ..
تطاقوا.. من نركب معه ..
اهلها قالوا معنا ..
واهلي قالوا معنا ..
وجلسنا في صالة المطار .. ابوها يحلف وابوي يحلف
وامها تقول لجنايات طلبتك ياللحيه الغانمه خليهم يركبون معنا ..
وتطاقت معها .. انا لحيه ياعجوز قريح ..
وانا ويارا ننتظر وتعبانين .. وزادت المسأله عن حدها
وصار الكل يحلف .. والله مايركبون الا معنا .. هأو .. مشي خشتس
والله مايركبون الا معنا حنا ..
( وبدت الالفاظ الشوارعيه ) .. تزيد
وفيه مصري كان جاي من رحلة على الخطوط المصريه ..
جا بيننا وقال .. ياقماعه ماتستهدوا بالله بئه وتشفولكوا حل
الراقل يروح مع اهلو والبت تروح مع اهلها .. وخلصونا بئه .. ورانا شغل
صراحه عجبتني زوجته ردت عليه .. لا ياحنفي انا مش معاك المرا دي
دا قوحا اولى بلحم تورو .. ماياخودها الراقل ويركبوا تكس ..
ورد عليها زوجها .. بس ياوليه .. ماتتدخليش في اللي ملكشي فيه ..
طيب انت وش دخلك اساساً يابن الكلـ ـ..؟ قهرني صراحه بس منيب في حاله ..
بس والله فكره .. قلت لهم نركب ليموزين طيب والحقونا ؟؟ وعيوا ..
وشوي شوي يتجمعون الناس .. وكل ماطولنا تجمعوا اكثر ..
وتجمعوا العالم حوالينا .. اللي بيسافر وعطل رحلته واللي جاي يودع واللي جاي
يستقبل وسواقين ليموزين المطار تركوا السرا وجو ..
وموظفين المطار صاروا ينظمون الجمهور .. عالم عالم .. امم في هالمطار ..
وامتلت الصاله والعالم تتفرج ..
ولاعاد نسمع اصواتنا .. من هالعالم
اللي يقول لا لا خلوهم يرحون مع اهل الرجال ..
واللي تقول لا خلوهم يروحون مع اهل الحرمه ..
ومع هالجو الصاخب .. كل شوي جايه رحله .. في الصاله الدوليه ..
اما هنديه واما اندونيسيه واوروبيه وكل دول العالم .. ويتجمعون ..
وغصت الصاله وتعطلت الرحلات ..
وجو أمن المطار وحطوا علينا دائره بحواجز ولفوا عليها شريط ..
كنها حلبة مصارعه .. وانا واهلي وهي واهلها داخل هالدائره ..
والناس تتفرج حوالينا .. انقسموا قسمين .. ناس تقول اهل الرجال وناس تقول اهل الحرمه
ويصرخ واحد من بعيد .. " تصووووووويت .. تصووووووووويت "
ورددوا العالم وراه .. تصووووووووووويت نبغى تصووووووويت
واتفقوا نسوي تصويت .. ووزعوا اوراق .. مكتوب فيها :
الاسم : ، الجنسيه : .. وسؤال
هل تؤيد ذهاب العريسين مع : 1- اهل الزوج ، 2- اهل الزوجه
بكل اللغات ..
وجابوا أمن المطار صناديق الاقتراع .. وحطوا الحريم جهه والرجال جهه
ومسكوا العالم سرا يحطون اوراقهم
وبعد ست ساعات .. اكتمل التصويت
وجا وقت النتايج ..
والكل ينتظر .. ويترقب ..
اللي فارش سجاده ويدعي واللي جواله ماسكت يسألونه عن النتيجه ..
واللي صديقه متصل عليه وهو في الطياره يسأله وش صار : من بيروحون معه ؟
وفجأه .. تنحنح مذيع الرحلات ..
وساد الصمت .. والهدوء عم ارجاء المطار ..
والطيارات طفوا المحركات ..
واعلن مذيع الرحلات على المايك حق المطار
نتيجة التصويت ..