عظمة في البلعوم كيف اطلعها؟!! أوجب ولا أشتري كرامتي وراحتي

السلام عليكم بنات حوا..

في موضوع عجزت ألقى له تصريف في راسي..
وحبيت آخذ آرائكم وأشوف شبتقولون؟!!

مع اني احس لو كتبت السالفه والقصة كاملة
بتكون آرائكم وبالإجماع أني أطنشها

القصة ومافيها..

زوجي عنده عم .. والعم هذا صديقة وقريب منه
وقبل لانتزوج كان وياه أغلب وقته ..

مشكلتي تكمن مع زوجة هالعم.. أنا للأمانه مب متأذيه
منها بشكل دائم لأني ما أصادفها ولله الحمد ..!!

ولكن سبحان الله كل ما اصادفها عندها أسلوب
خارق في الاستفزاز.. انا هذا كله ما يهمني!!


مب هذي سالفتنا ..

أنا قبل لا أتزوج كتبت لكم موضوع عن بدايتها
معاي!! وقلتلكم وشوفوا موضوعي ..

القديم عشان تكونون في الصورة
http://forum.hawaaworld.com/showthread.php?t=293575


في موضوعي القديم كنت أشتكي لكم وكنت مستغربه هذي كيف توصفني
لزوجها!! .. بس بعد ما هديت "كعادتي" قلت يالله يمكن هي شايفه الموضوع
من منظار ثاني وكان قصدها انها تبربر مع زوجها لأنه موضوع خطبة فلان
اللي هو زوجي الحالي .. حدث مهم بالنسبه لهم ....... يمكن المسكينه غفلت


يا ريت الأمور وقفت عند هالحد.. كل ما اتذكر هالموضوع
احس بغصه.. بس يا رب اني ما اتحاسب على اللي سوته
يارب انت عالم وعارف انه مالي ذنب .......

يوم العرس
دشيت وقعدت على الكوشة والعرس ماشي ميه ميه والكل مستمتع
والكل فرحان .. والبنات يرقصون .. للحين الأجواء كلها جميلة.. وممتعه
مرت يمكن ربع ساعه مادري.. ماوعيت إلا وحده واقفه وماسكه بأيدها
كاميرا وتصور !! وأنا اتسائل هذي منو؟ واقلب في راسي احنا حالنا حال
أي زواج قايلين التصوير الشخصي ممنوع!! المهم واقفه اتبسملي
وتأشرلي ابتسمي .. عشان تصور ..

وياريت كفتها هالحركة .. شوي واختفت ..راحت ركض للباب وتقول للمعرس
يالله دش. ولازالوا البنات يرقصون على الكوشة.. وزوجي يقولها لا ما بدش
لين يكلموني أهلها يقولون دش!! وهي تقوله لا لا دش خلااااااااص!!! مادري
شاللي دار او كيف اقنعته لأنه على اتفاقه ما اهلي انه ما يدش لين تقوله اختي


ماوعينا إلا المعرس وأبوه داشين!!!! فجأه بدون سابق إنذار!!!!!

حريم اخواني والبنات مساكين ركض كل وحده تتغطى .. والكل متفاجيء
يعني انا ما مداني اقعد على الكوشة وايد من صديقاتي ما سلموا علي
للحين ... حفلة العرس تدرون تعتبر شبه منتهيه من يدش المعرس..
ماعلييييييييييينا هذا كله طوفته انا عروس حزتها وماكانت عندي القدرة
او الوعي اني اركز على كل هالأمور ..

على بالكم انتهينا؟ لاصبروا المسلسل مستمر


الدخلة
ليلة الدخلة اللي ما تنساها أي عروس!
زفونا اهلنا لغرفتنا بالفندق الكل باركلنا على السريع
ودشيت انا الغرفة على أساس اخوانه بيباركون له
على السريع وبيروحون!!..

قعدت مرت ربع ساعه.. نص ساعه!! يوه؟ قاعده بروحي
محد طل علي!! أقوم ابدل؟ أنتظر هذا يدش شو الترتيب
ماعرفت شسالفه؟؟؟!!! طبعاً هو sweet وانا في الغرفه
وهو في الصالة!! وما اسمع غير صوته وصوت وحده
يقرقون ساعه!! طبعاً منو هالوحدة ما يحتاي أقولكم!!


وصلت حدي وأدق على اختي قلتلها تعالي اللحين اقعدي
عندنا احنا قاعدين!! وهاتي امي وخالتي وكل اللي تقدرين
تيبينه من العايله!! ويوا والأخت هذيك ذلفت ... وقعدت عندهم
بس القهر ما طولوا كنت أبغي احسسه انها حركة قلة ذوووووووووق
انك تطنش عروسك في ليلة دخلتها وتسولف مع مرة عمك !!!

ما انتهينا ......

برجع اكمل لكم القصة.... تعبت :(