السمنه والحلبه
وللحم والمرق ووالخضار والفواكه والشوربات والبيض والاجبان والاكل الصحي هو اللى يرد الوحده عافيتها باذن الله

اهم شيء في النفاس انها ماتجلس جوعانة ..
احنا عندنا التمر معجون بحب الرشاد وحبة البركة
اللحم والمرق والسلطات والفواكه مهمة
قهوة القشر وقهوة السكر الاحمر حلوة للنفاس عموما اشياء دافية وكمان اليانسون عشان الغازات
كثري من الفلفل الاسود في أكلك لانو يساعد على التضييق
وتبعدين عن الملوخية و البامية

موضوع مهم وفعلا الحبة الحمراء مهمه لكل نفاس

وهذى طريقتهاا

اول شي المقادير

لتر ونص حليب طازج + 2ونصف فنجان حبة الحمرا منظف ومغسول ومودن لمدة ساعة + سكر حسب الرغبة + 2 ونص ملعقة كاسترد+ هيل وزعفران و



نصب الحليب في الجدر

وعقب الكاسترد بس لاتخلون الحليب يسخن لا على طول حطو الكاسترد والسكر على حسب رغبتكم مع الخلط المستمر

ويوم بيدا يسخن نحط حبة الحمراء


ونخلطها زين


وعقب انحط الهيل والزعفران


وتخلينهم اشوي وتخاطينهم ووبس مايبالها شي غير اتصبينها بالدلة وتقدميينها ..
http://*****************.com/alfrasha32/thread1533335/

موضوع جا بوقته
انا قاعده اكتب وصفات سهله لاني باتنفس لوحدي
مره شايله هم ماعندي قدره ماديه اني اشتري من المطاعم و لا من الطباخات اسعارهم نااار

انا افكر اخذ براد كبير او ثلاجه او ترمس كلن على مايسميه
ابي اخذ من الكبار الستيل المخططه تايقر والصبح اسوي فيه حليب بزنجبيل واشرب منه لين بعد الظهر
وبعدين اسوي قشر للعصريه ومابعدها

ثاني فكره
باشتري كرتون تمر ب70 ريال الامين مره حلوو وبافضي نصه واحطه بدون نوى
لاني احس المعجون فيه طعم مايعجبني
هذا انا بيدي اوخر النوى و اخليه عندي اذا بسوي عصيده جاهز يكون


ثالث فكره
باكور تمر للعشره الاولى بحلبه وماش
وعلبه ثانيه للعشره الثانيه بماش وحبه سودا
وعلبه ثالثه للعشر الثالثه بماش لوحده
وعلبه رابعه للعشر الاخيره بفلفل ابيض و رشاد
واحطهم بالفريزر بالثامن نهايته
ولما اولد انزل العلبه الي استخدمها بالثلاجه واحمسه بالمكارويف وارش عليه سمنه و اكله مع قشر

وفككره كمان
باحمس كيس بر
وكيس باخليه زي ماهو
البر محموس عشان اسوي فيه حنيني سريع عالصاج مايتعبني يكون كل شي جاهز بس اخلطهم عالنار


وفكره
اشتري من البوفيات كبده بشكل يوم و يوم لا مفيده وترجع دمك الصحن ب12 او 14 ريال اهم شي العشر الاولى
بقيه نفاسك خدي بالاسبوع مره تكفي


المرق
جهزيله في اكياس صغار بهار مخلوط فلفل اسود وابيض و ماش مطحون وحلبه حطي باكياس صغيره لكل عشره ايام


واعصري طماطم كثيره كرتون ووزعيه باكياس لحم لكل طبخه شي بسيط بس يعني اكياس لحم صغيره عشان تسوين فيه ايدامات او سمك خصوصا بعد 15 يوم للي عندها عيال غالبا بتطبخ قيكون كل شي مريح لك


فكره
خذي صحون وكاسات وملاعق وشوك وسكاكين و صواني قصدير وبلاستيك لفتره النفاس خصوصا الي عندها اطفال
جدا بتشيل عنك


استاجري شغاله اذا عندك قدره ماديه
اذا زي حالتي جيبي بعد كل 7 ايام جيبيها بميه تغسل لك المطبخ والبيت والحمامات وتكنس وترتب وتروح
وان شالله ماتحتاجينها الا بالغسيل وهالاشياء لانها صعبه عليك

نصيحه
خذي بنفاسك جرجير يوممياااااا
جدا مفيد للرحم و للدم ومايحتاج شغل
حلي زوجك يغسل لك حزمه وحطيها عندك وكلي كل شوي منها

خلي جنبك جرجير وموز و عنب و تفاح خس كليها
كلها اشياء ماتخرب و تقدرين تاكلينها باي وقت خصوصا اذا مافيه احد يسوسيلك شي بين الوجبات وكلها مفييييييييييييييده جدااا لك


ايضا
خذي دفتر ابو 80 من السادس
وابداي اكتبي وصفات سهله لزوجك بطريقه نقاط لان الرجال مايفهمون ضعي وضعي
حطي اولا وثانيا افضل وسهلي له
مثلا الحنيني سهل واليضا العريكه السريعه وهي خبزه بر عادي علميه عليها من قبل حتى حلوه مع االحليب
وايضا تسوين فيها العريكه السريعه خديها و يفتتها و يصب عليها سمنه وعسل وحبه سودا وايضا تمر ويخلطها وبس
سهههله مررره ومفيده

الزنجببيل حلو مع الحليب بالايام الولى ال15
خذي كميه وقشريه وابشريه و ووزعيه بعلب صغيره بلاستيك زي الي مع الكبسه فيها سلطه حاره
وفرزنيه يصير كل علبه تكفي ترمس حليب يوميا


خذيلك
غلايه وخليها بطاوله جنبك
وخذي علب صغار وحطيها بدرج الطاوله او تحت السرير
حطي علب صغار حليب و سكر و فلفل اسود وفلفل ابيض
وكمان قشر عادي ماينغلي وحطي عليه نانخه قريبه
و كمان يانسون ولازهورات
كلها عادي حطين مويه مغلي بالعكس تحتفظ بخواصها افضل من الغلي
واكواب الورقيه حقه القهوه
عشان اذا جعتي وماقدرتي تقومين تسوين لك كاس وانتي بمكانك


انصحكم وانصح نفسي لاتجوعين ابد وكلي اكل مفيد بال15 الاولى بتقدرين تنفعين نفسك ببقيه نفسك
والا بتقعدين عظامك تعورك وحالتك حاله
كلي اكل مفيييييييييييييد وفيه كل العناصر واحرصي عالاعشاب والمشروبات الساخنه
والمرق بلحمه لازززززززززززم في العشر الاولى اقل شي لازم بروتينات لازم
وكلي خضار و فواكه ولا تجوعين
ولا تتعرضين للبرد اشتري سروال دافي طويل واشتري طربوش صوف للبيت و شال لو جوك حريم وخليك دايم متدفيه


حطيلك علبه عسل مخلوطه بحبه سوده و بذره كتان

وهاذي روابط استفدت منها
بس ابفى منكم تدعولي بالهدايه وربي يرزقني طفله جميله وذكيه وباره بي ومتعافيه

بنات تكفون بغيت أكل للنفاس

اكله نفاس


جدول أكل النفاس من مجهودي الشخصي


اكل نفاس

وهذا البحث كملي عليه
https://www.google.com.sa/search?q=اكل+للنفاس+site:forum.hawaaworld.com&safe=active&hl=ar&ei=8oyLUtXOMoWshQe9zoHQBg&start=30&sa=N&biw=1366&bih=666

اهم شي النفسيه لازم تكون الوحده تضبط نفسيتها من العصبيه والزعل