سحر وهي قاعدة صوب ابوها:" سلامات يبه ماتشوف شر."
بنظرات كلها رجــاء وأمل:" سحر قولي لي وش كنتي تسوين هناك..؟"
سحر بإبتسامة هادئة ودافئة:" صدقني يبه ماكنت اسوي شي غير ان صديقتي كانت متصلة واضطريت اروح لها هناك بس ماكانت هناك العنوان غلط اللي عطتني اياه..!!"
بوفيصل:" يعني ماكنتي تسوين شي هناك؟"
سحر:" افاااااا عليك يبه انا بنتك لاتحاتيني.." كانت كل كلمة تجذب فيها تحس بإنها سهم بقلبها وخصوصاً ان الثقة اللي منحوها اياها مو بمحلها..!!
العنود:" زين يبه خلنا الحين من هالسالفة انت شخبارك؟"
بوفيصل:" بخير دامكم حوووالي."
سحر:" ياالله يبه شد حيلك نبيك تطلع لنا بالسلامة.."
بوفيصل:" ان شاءالله."
العنود:" اقوول يبه ، ليش ماترد امي البيت..؟"
بوفيصل:" لاااا.."
العنود:" ليش يبه انت واحنا بحاجة لها.."
بوفيصل واللي يحس بآلام بصدره كل ماتضايق:" خلاص يابنيتي اللي ينكسر مايتصلح ، وانا امج طلقتها من قبل طلقتين وهذي الثالثة ومافيها رجعه ابد.."
حسوا ثنتينهم بصدمة يوم سمعوه يقول جذي ، بإستغراب سألته سحر:" يعني انت مطلقنها من قبل يبه؟؟"
بوفيصل:" ايه.. يابناتي فكوها سيرة انا تعبان ومابي شي يتعبني اكثر."
سحر:" ان شاااءالله على امرك.."
العنود طالعت سحر بضيق وحست ان حياتهم خلاص تفككت بعد هالطلاق ، قعدت على الكنبة تفكر بأمها وبعيشتها الجديدة..
سحر:" عنوود قومي فتحي الباب في احد قاعد يدقه."
قامت بسرعه وفتحته:" ياهلا ومرحبااا تفضلووا.."
كان بومحمد وعياله جايين يزورون بوفيصل .. بومحمد:" شخبارج العنود ؟ ابوج بخير؟"
العنود:" أي بخير تفضلوا.. حياكم داخل."
دخلوا يشوفون بوفيصل ويسلمون عليه ويتشكرون له بالسلامة ، محمد ظل واقف عند الباب لأنه ماكان يتوقع يشوف سحر بعد هالاشهر كلها..كان هذا اول لقاء لهم بعد اللي صار..!!
طلعت بعد ماسلمت على بومحمد وراحت تقعد ويااختها ، مرّت من صوبه حتى من غير ماترفع راسها واطالعه.. محمد واخوانه حسوا بتغيير كبير بسحر وخصوصاً شكلها الخارجي اللي صدمهم اول ماشافوها ثلاثتهم..!!

بعد ربع ساعه تقريباً وصل فيصل المستشفى ودخل لحجرة ابوه يشوفه ، لكنه تفاجأ يوم شاف بومحمد وعياله هناك ، كانت وياه نجلاء وحامله وياها بوكيه ورد لعمها..واول مادخل عليهم وياها ظل واقف يطالعهم بنظرات كلها الم وضياااع.
وبتردد:" السلام عليكم."
ردوا عليه السلام وظلوا ساكتين يترقبون اللي بصير .. وبصوت رقيق وهادئ:" الحمدالله على السلامة عمي."
احمد كان وده يقوووم ويكفخها، هي وفيصل على وقاحتهم...اما بوفيصل فكان مقهور ومتضايق من تواجد فيصل وزوجته ، حسّ ان الضغط بدأ يرتفع عليه وفجأة قعد يصارخ عليه:" اطلع بره ,, مابي اشوووفك رقعة وجهك هني طلعوووا بره انت وياها طلعوا بره.."
حس فيصل بغيظ وقهر ، ونفس الشعور كان يتراود نجلاء اللي مااستحملت تشوف عمها يطردهم بهالطريقة ورمت بوكيه الورد على الارض وطلعت...!! كان تصرفها جداً وقح.. كانت هذي نظرة سيف واحمد لها..!!
وقام بومحمد ومحمد يهدأون بوفيصل علشان ماينفعل وترجع له النوبه مرة ثانية، اما فيصل فكان واقف مكانه ويحاول يقول شي لكن ماقدر..
احمد وسيف قاموا يطلعون فيصل بره قبل لاتدهور حالة ابوووه وتصير سالفة جديدة..

بعد ماطلع فيصل ونجلاء من المستشفى..
نجلاء:" انا على آخر الزمن انطرد..!! وحضرتك ساكت.."
فيصل بعصبية:" وش تبيني اقوله.. وش تبيني اسوي ، اللي فيني كافيني يانجلاء."
نجلاء:" اسمعني يافيصل من اليوم ورايح علاقتك بأبوك اقطعها مااعتقد ان فيه امل ترجعون مثل قبل ، واذا على خالتي تقدر تزورها بأي وقت تحب وخصوصاً انها تعيش بروحها الحين."
فيصل:" سكتي الحين واللي يرحم والديج.."
طالعته بقهر وقعدت تتأفف...كانت مقهورة ومتضايقة من عمها.. هذي المرة الثانية اللي يحرجها فيه ، كان ودها تاخذ فيصل وتهاجر من هالديرة بس علشان ينسى ماضيه اللي موراضي يفارقهم..!!

^^^^^^^^^^^^^^^^^^^^^^^^

بمركز الشرطة..

فهد مازال تحت تأثير هلوساااته وصراخة والشرطة تحاول تهدأه لكن مافيه فايدة:" انا ماسووويت شي ، انا ماسويت شي ، انا اخذت حقي ااايه حقي منه ، انا ذبحته ايه ايه ذبحته لأنه هو اللي ذبحني بالأول ، طعني بظهري ، لالااا انا ماسويت شي غلط ، انا بس اخذت حقي اسألوها..." وفجأة ركض صوب اخته وقعد يضرب فيها ويسبها:" يالحقيرة ياحيوانه تف عليج وعلى اشكالج ، انتي أي انتي كان المفروض اغسل دمج بيدي ."
لحقوااا عليه الشرطة قبل لايذبحها من الضرب.. وبعد ماقدروا يحبسونه بالحجز اخذوها يحققون وياها..
الضابط:" ابيج تقولين لي كل السالفة من بدايتها لنهايتها وبدون ماتغفلين عن أي معلومة."
هزت بالايجاب راسها والدموع مغرقة وجهها، وقعدت تروي للضابط كل القصة من البداية للنهاية..وبعد ماخلصت طالعها الضابط بعيون كلها حسرة:" ياحسافة والله تضيعون عمركم وسمعتكم وشرفكم بلحظات محرمة..تتعاقبون عليها في الدنيا قبل الآخرة.. انا ودي اعرف اهاليكم اللي مخلينكم على راحتكم وينهم؟ وين امج وابوج عنج ؟ والا حضرة اخوووج اللي مضيع عمره من سنين.. مااقول الا آآآخ على شباب هالزمن."
وبعد مااخذ اقوالها كلها اخذوها لمركز شرطة الآداب علشان تقضي بعض سنوات عمرها بهالمركز.. انتهت حياتها السعيدة من اللحظة اللي تعرفت فيها على سعود ، اما فهد انسجن لعدة تهم اولها حيازة مخدرات بالشقة ، وثانياً امتلاكة شقة للدعارة وهتك اعراض البنات ، وثالثاً جريمة قتل..!!
انتهت حياته وحياة اخته بأيده.. بعد ماكان غافل عن رب العالمين وناسي ان الدنيا دووووارة.
اما سعود فكان بالمستشفى على آخر رمق له بالحياة ، وبعد منتصف الليل ، وقفت نبضات سعود بعدما لقى جزاته..!! كانت نظرات الاشمئزاز والألم والحسرة بعيون كل الناس اللي درت بسالفتهم.. وفعلاً كانت هذي نهاية سعود وفهد اللي لعبوا بأعراض الناس ، فكانت نهاية سعود على ايد اعزّ اصدقائه ، كانت هذي آخر رحلة يسافرونها للآخرة وينالون جزائهم فيها..

^^^^^^^^^^^^^^^^^^^^^^^^
عبدالعزيز:" سحر ممكن تسمعيني لآخر مرة.."
سحر:" احنا مو انتهينا ياعبدالعزيز ليش متصل بعد."
عبدالعزيز:" سمعتي باللي صار لسعود وفهد واخته؟"
سحر:" سمعت والعياذ بالله ، لكن ياعبدالعزيز اللي سويته راح تتحاسب عليه ليش ماخليت عقاب رب العالمين ينزل عليهم..."
عبدالعزيز:" بدال ماتشكريني لأني ساعدتج وانقذت حياتج وسمعتج.. لكن ماعلينا هذي آخر مرة تسمعين فيها صوتي ، اتمنى انج دمرتي الأشرطة اللي عطيتج اياهم ، واتمنى تبدأين حياة جديدة.. قبل لااسكر الخط نسيت اسألج شخبار ميثة..؟"
سحر حست بألم يوم سمعت إسمها، وطاحت دمعة على خدها:" الله يرحمها ياعبدالعزيز ، ميثة ماتت من زمان أدعي لها بالرحمة.."
حسّ عبدالعزيز بصدمة يوم سمع الخبر ، ومن غير مايرد عليها سكر الخط وضااااااع للأبد..!!
سحر (( أيـــه ياعبدالعزيز الله يهديك ويصلح أمرك إن شاءالله.. ويهدينا اجمعين..))

وبعد مرور يومين كانت سحر تقرأ الجريدة ولفت انتباهها خبر غرق احد المواطنين في البحر.. حسّت بغصة يوم قرأت اسم الغريق وكان عبدالعزيز .. (( لاحول ولاقوة الابالله العلي العظيم ،، الله يرحمة ويحسن اليه ،، لاحول ولاقوة الابالله.. ))
العنود:" شفيج سرحاااانه؟"
سحر:" ابد قاعدة اقرأ الجريدة وقرأت خبر يضيق الخلق."
العنود:" ايييه قرأت الخبر ، يادافع البلاء تشوووفين بلاوي وايد هالايام الله يكفينا شرها."
سحر:" ان شاءالله.."

^^^^^^^^^^^^^^^^^^^^^^^^

نهاية الشهر..

بعد مانقل محمد كل اغراضة واغراض شوق واخوانها لبيتهم الجديد ، وتعاون ويااخوانه على زواجهم الجماعي ، اقاموا حفلة كبيــــرة دعوا فيها كل الناس اللي يحبونهم ويتمنون لهم الخير.. كانت حفلة زواجهم من أروع الحفلات ، ام محمد كانت بطير من الفرحة ، واخيراً بتفرح بعيالها وبتشووووف احفااادها عن قريب..
سمر:" ياالله ياخلووووود لوعتي جبدي."
خلود:" الحين الحين جاية ، بس اغطي شعري وبطلع..."
سمر:" زين بسرعه.."

وبالصالة..
ام محمد:" ياالله ياشيخة قبل لايوصلون المعازيم واحنا مارحنا.."
شيخة:" صبري شوي يمه عليّ ، والاتدرين روحي ركبي السيارة بس على ماأعدّل ثياب مازن..."
مازن بقهر:" يعني ماصارت الا على ثيابي تخترب الحين."
شيخة:" لاتحاتي الحين بصلحها..وبنمشي."
بدور:" اففففففففف ياالله يمه والله تعبت."
شيخة:" محد قالج وقفي روحي ركبي السيارة وياأمي."
سمر وخلود:" بدور ياالله تعالي وبعدين هم بلحقونا."
كانت هذي حالتهم كلهم ، حتى عبدالله كان كاشخ ومتعدل ، وهدى وهديل نفس الشي ، كانوا كلهم مثل نجوووم تلمع بالسماء..وبالحفل كان الكل سعيد ومستانس العنود ونوف وخلود وكل البنات ، الا شخص واحد كان قاعد بزاوية بعيدة يراقبهم بعيون كلها حسرة وألم.. سحر.. هي الانسانة الوحيدة اللي كانت قاعدة وتتحسف على كل فرحة بعيون اهلها..!! وبين ماهي سرحانة ودموعها بعيونها.. انتبهت على ايد شيخة ونجود والبنات من حولها.. وكل وحدة مرتسمة على شفاهها ابتســامة عريضة..
شيخة:" سحــر."
طالعتها بعيونها الحمرة:" خير؟؟"
شيخة:" ترى الفرحة ماراح تكمل الا وانتي ويانا وبينا ، ياالله قووومي تعااالي جدام خلينا نبدأ من جديد.."
حست سحر بغصة بحلقها موقادرة تصدق اللي تشوفه حولها كانت نظراتهم كلهم تدعوها للبدأ فعلاً من جديد.. قامت وحضنت شيخة ودموعها مغرقة وجهها ، ورمت بنفسها بحضن نجود اللي قعدت تصيح وياها..
سمر:" بسكم بتخربوون مكياجكم...!!"
سحر وايدها ترتجف من الفرحة:" صدقوووني موقادرة اعبر لكم عن أسفي ، ولااااني قادرة اوصف لكم الفرحة اللي بقلبي ، رديتوااا فيني الرووح."
وبسرعه بسرعه سحبووها وياهم بعد مامسحوا دموعهم ، وراحوا يقضووون باقي الحفل بوناسة وبدووون أي تكدير خاطر.. ولما وصلت شووق ودخلت وطبعاً وكالمعتاد كانت ملكة جمال الحفل بهذيك الليلة ، من دووون مقاااارنة بمريم ونورة اللي كانوا مثل النجوم حوالي شوووق..!! وبين ماشوق تسلم على اللي يباركون لها فوق المسرح ركبت سحر تسلم عليها بعدما دززوها البنات وخلوها غصب تركب وتبارك لها..
شوق حست بصاااعقة يوم شافت سحر ، كانت مفاجـأة كبيرة لها ، ابتسمت لها غصباً عنها كان محمد قاعد صوبها مندهش مومستوعب ان سحر هنــي.. لكن هالمرة نظرته لها كانت مختلفة تماماً لأنها طلعت من قبله وحياته للأبد..
سحر بتوتر وارتباك:" ادري مستغربة وجودي ، بس مدري مدري من وين أبدأ ، ويمكن موقته هالحجي ، انا آسفة على كل اللي سببته لج ، وانتي تستاهلين كل خير والف مبروك لج ولمحمد انتوا فعلاً تستاهلون بعض..!!"
من غير شعور سحبتها شوق لها وحضنتها ، لدرجة انها كانت بتصيح لولا تهديدات سمر ونكاتها من حولهم علشان لاادمع عيونها وتخرب مكياجها..
شوق:" ماتتصورين ياسحر شكثر كنت اتمنى نكون اصدقاء.. شرايج نبدأ صفحة جديدة؟؟؟"
سحر بإبتسامة سعيدة:" صفحة جديدة؟؟"
شوق:" ايه صفحة جديدة بعيد عن الحقد والكره ، مجرد حب وسعادة....."
حضنتها للمرة الثانية وقالت:" وهذي امنيتي ياشوووق."
محمد كان منصدم من الكلام اللي قاعد يسمعه والمنظر اللي قاعد يشوفه مو مصدق ان سحر الانسانة المغرورة المتكبرة تصير انسانة وديعه..!!!!! لكن سبحان مغير الاحوال من حال الى حال..!!

^^^^^^^^^^^^^^^^^^^^^^^^
وبعد نهاية أيام مريرة بالنسبة لعائلة بومحمد ، ابتدت حياة سعيدة من جديد بعد زواج محمد واحمد وسيف..وعاشت شوق ومحمد وخواتها في بيت واحد بعيد عن أي مشاكل ومعكرات..
بالنسبة لعبدالله مع بداية العام الدراسي الجديد رجع للمدرسة ، وطبعاً ماقصّر وكان يطلع دائماً من الاوائل..أما هدى فرجعت مرة ثانية لدراستها وقررت انها تبدأ حياتها من جديد بعد ماتطلقت من بوعمر اللي يعيش بااااقي عمره بالسجن وخسرت كل مستحقاتها لأنه كان مطالب بأموااال واجد لدرجة ان الحكومة صادرت كل املاكة ، وبعدها تطلقت منه زوجته الأولى اللي كانت تسب فيه وأدعي عليه ليل ونهار..
أما هديل بعد الظروف القاسية اللي مرت فيها قررت انها تكمل دراستها وتدخل الجامعه وماتفكر بالزواج الا بعد ماتخلص وتتوظف..!!

اما بيت بوفيصل..
ابوفيصل قرر انه يعيشة حياته وحداني يربي بناته وبس ، وطبعاً مانسى أم عياله فكان يرسل لها نهاية كل شهر مصروووف لها علشان تقدر تعيش باقي حياتها..
وأم فيصل كانت ولازالت انسانة متغطرسة رغم طلاقها ، لدرجة انها طردت اختها من البيت يوم زارتها بحجة انها جاية تتشمت عليها..!!
اما العنود فكانت مجتهدة بدراستها ، وقررت انها تساعد اختها في بناء حياتها من جديد ، رغم الغموض اللي يدور من حولها..
وسحر البنت المتكبرة المتغطرسة المغرورة ،واللي انكسرت بعد مرور الأيام اللي حطمت حياتها، سحر بدأت حياتها من جديد بعدما دفنت بداخلها سبب تعاستها للأبد..
كان فيه شباب وايد يتقدمون لها لكنها كانت ترفض لأنها متأكدة انها ماراح تلقى الانسان اللي يرضى فيها بعد اللي سوته.. لكن مع مرور الايام ومن ضمن اللي تقدموا لها ، جاها انسان كان يعرفها ويعرف كل شي عنها ، حست بصدمة في بداية الأمر ورفضت الإرتباط فيه ، لكن بعد اصرارة وقناعته بإنها تغيرت واقنعها بهالشي رضت فيه وتزوجته ، وفعلاً عاشت حياتها سعيدة وياها رغم معرفته بحقيقتها المُرّة..!!! اللي مازالت اطاردها في بعض الكوابيس والاحلام..!! ولكنها مازالت تجاهد بزوال هالكوابيس من راسها هي وزوجها.. وكما قال تعالى (( لايغير الله مابقومٍ حتى يغيروا مابأنفسهم ))..

أما فيصل فبعد ماسافر شهر العسل ( البصل ) ورجع من السفر حملت نجلاء وبعد مرور تسعة أشهر ولدت وجابت له ولد ولكن للأسف ... معــاق ... ومثل مايقولون حق المظلوم مايضيع ابداً.. كانت صدمة كبيرة لهم فرحته تبددت مع اول اشراقة امل له بإنه يكون أب..!!
واللي انهى هالأمل بشكل نهائي كلام الدكتور بإنه زوجته حتى لوحملت مرة ثانية راح تنجب اطفال معاقين بسبب بعض الجينات الوراثية في جسمها..!!
(( ان الله يمهل ولايهمل )) ونال فيصل عقاب رباني جزاء ظلمة وتحطيمة لحياة انسانة قضت وضحت بحياتها علشانه..!!

وفي بيت بومحمد..
سيف ونورة ينتظرون المولودة الجديدة بفاااارغ الصبر... حياتهم كانت سعيدة ولكن لاتخلوا من الخلافات العائلية ..
اما مريم واحمد فكانوا مأجلين فكرة الحمل لبعد سنة من الزواج تقريباً ، لإنشغال مريم بالدراسة والشغل..!!
أما خلود فمازالت على هبالها وهواشها ويااختها كل يوووم حتى ويااخوانها..!! لكنها تفوقت بدراستها هالسنة وطلعت الأولى على صفهم..
وسمر البنت اللي بغت تضيع عمرها خطبها حمد بعدما حسّ انه بيستخف لومااخذها طبعاً بعد ماكلمها وخلاها توعده انها تنسى الغلطة اللي بغت تقضي على حبه لها لكن لولا حبه الصادق والنقي ماقدر يتغلب على نقطة كره كانت ممكن تتكون في قلبه، وبعد خطبتهم لبعض وسعادة ماتنوصف كان في نهاية السنة الدراسية زواجهم..!!
أما نجود بعد رفض قاطع لفكرة الزواج انخطبت مرة ثانية وتزوجت واحد من ربع محمد انسان مؤمن ويخاف الله وله من الصفات اللي تتمناها أي انسانة ..!! وعاشت حياتها سعيدة خصوصاً بعد مرور أشهر من زواجها وحملها اللي فااااجئ الكل..!!
وكما قال المولى عزّ وجل (( ان الله يرزقُ من يشاء بغير حساب )).. وفعلاً صبرت ونالت ، وكان خبر حملها صاااعقة بالنسبة لفيصل ونجلاء وخالتها ام فيصل..!!

اما شيخة فلازالت تعاني ويامازن ودراسته وياالاعادات اللي عليه.. اما بدور فكانت تعاني بالجامعه وخصوصاً انهم قبلوها بتخصص ماتشتهيه ولاادانيه (( تربية انجليزي ))..!!!!!!

نرجع لشوووق ومحمد..
كانت حياة هالاثنين سمن على عسل ، حياة مثالية ، كانت تصيدهم بعض الخلافات الزوجية بس ماتوصل لحد لهواش.. كان محمد كل يوم بصلاته يحمد ربه ويشكره على النعمة اللي هو فيها.. ونفس الشي لشوق اللي مخليته يعيش بنعيـــم ، وبعد مادخلت شووق الجامعه وخلصت نصف الفصل الدراسي حملت وكانت سعادة خالتها ام محمد لاتوصف يوم دروا انها حامل.. اما محمد فطـــار من الفرحة ، وزادت فرحته اكثر يوم سمع الدكتور يقول لهم:" مبرووك المدام حامل بتووأم..!!!"
محمد:" احلف قوووول والله.."
الدكتور كان مصري ماكان فاهم وش قاعد يخربط محمد عليه، ودخل لشوق وقال لها:" موقايلج بنجيب درزن 6 بنات و 6 اولاد..!! "
وقعدوا يضحكون على بعض ويتمنون الصحة والسلامة لأولادهم..

وبعد مرور تسعة أشهر ، ولدت شوق وجابت بنت وولد ، البنت سموها ( عبير) ، والولد (جاسم). اما سيف فزوجته جابت بنت وسموها ( ريم) ..
وطبعاً تربع جسووم ولي العهد على العرش وكان الكل يحبه ويدلعه ، حتى عبير وريم كانوا البنات يدلعووونهم فووووق ماتتخيلون..!! تحدي بين الشباب والبنات..!!

اما ام محمد وابومحمد فكانوا يدعون لعيالهم بالسعادة ولأحفادهم بالتربية الصالحة والهداية..
وان الله يعطيهم طولة العمر ويشوفون احفادهم يكبرون من حولهم

هاذي كانت نهاية القصة
وآسفة على تعبكم معايا
ويارب تكون عجبتكم

ارجوا منكم كتابة التعليقات حول القصه لو سمحتم

تمت بحمد الله
وترى راح اكتب لكم قصه جديده
ايضا هنا
بس لسى اختي جالسه تألفها

مشكووووووووووووووووووووووووووووووووووووووووووووووووووووووووووووووووووووووووووووووووووررة
القصة خياااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااال
تسلم ايدك