يبنات ايش رايكم فى صالون ريما انا اتعامل معهم من سنه وسرت ما ارتاح الا هناك ميك اب عند خلود ولينا وذكرى اما بالنسبه للشعر عند سميه والا كامليا والا ردينه صدقونى ما راح تندمون عليهم لا نهم روووووووعه ...............

السلام عليكم

اخيرا لقيتكم يابنات جدة وين تروحون مني

مشالله وينكم ولا وحده ردت على موضوعي

عموما مافيه مشكلة

انا بسالكم عن الوهج رايكم بالتفصييييييييييييل يعني يتقنون رسم العيون؟؟

واش الاشياء المفروض اركز عليها يعني الرسمه ولا الالوان؟؟؟؟

واذا جبت صور من عندي تسوي مثلها ولا تصر على اللي تعرفه؟؟؟؟؟

ومن احسن وحده عندهم للميك اب عبير ولا حياة؟؟؟؟

الله يسعدكم اللي ترد علي لا تقولي روحي ريما مااقدر ابددددددددد

والف شكرررررر:26: :26:

السلام عليكم و رحمة الله وبركاته

مساء الخير للي عندهم ليل
وصباح الخير للي عندهم صباح

أول شي أقولكم إني عتباااانة كتير على بنات جدة
عشانهم مشمتين الناس فينا وماهم شادين حيلهم
كتير ... شدو حيلكم أنا أعرف بنات جدة ينشد بيهم الظهر ..

تاني شي أبغاكم ترحبو بي عشان دي أول مشاركة ليا بعد
ماغيرت إسمي من إسم إنجليزي لإسم عربي :) عشان
نبغا المنتدى يسير عربي 100 % .. وعموما هي أول
مشاركة فعلية.. بس كنت زبونة دائمة من زمااااااااااان .

تالت شي أستحملوني عشان أنا كلامي كتير:23: بس صدقوني
حأخدمكم كتير إن شاء الله بس أنا أحب أعطي التفاصيل عشان
لا أحد يحملني ولا يحمل في ذمتي أي كلام أنفهم غلط ....

نيجي للموضوع و للإستفسار حق الأخوات ويمكن ردي دا
يكون رد على أسئلة بنات كتيرين في مواضيع تانية..

نيجي لصالون كارمن 2 إللي في التحلية ..
بصراحة شوفت لهم عرايس كتيرين .. بس مافيهم شي وااااو
كلهم عاديين و أقل من عاديين .. بس هي عموما نصيب ..
بس أنا عن نفسي لو تسأليني أقولك ما أروح لهم غير للقص عشان
عندهم هناك وحدة فنااااانة .. أو للسشوار و أحط مناكير وأمشي ..
ومرة سويت عندهم ميك أب وشعر طلع شعري وااااااااااو عشان أنا
إللي أقترحت التسريحة وطلبتها طلب .. بس مكياجي كان
مفقع كأني ماكلة بوكس على عيني :23: وبعدين صلحتو بنفسي وجننتهم
ألين ما زبط .. بس عموما فيهم كم وحدة شغلهم طيب إذا قلتي لهم أبغا
ميك أب كلاسيك و أتشرطتي عليهم.. لكن لو ماقولتي يسوولك مكياج
تطلعي زي حقون أفلام الرعب رسماتهم عجيبة تفجع :o
و شوفي صور العرايس إللي حاطينها تحت عند محل العبايات ..
و عموما حسب ماشوفت إللي في غرفة العرايس دايما أريج ..
بس الصراحة الحلو فيهم إنهم يتصلو عليكي و يأكدو موعدك معاهم ..
ويحترمو موعدك كتييييييييير ..

نيجي للوهج .. و إللي الأخت وردة ذبلانة فحطت وهي تسألكم ولا أحد رد عليها
قالولي عنه كتييييييييير و إللي فيه متخصصة مكياج
فنانة هي مدام عبير صاحبة الصالون .. أنا بصراحة لفتني سعرهم ..
لأنو كل التانيين يقولو 3000 ريال وفوق .. لكن الوهج أرخص ..
(بانسبة لأنها تيجي القاعة طبعا ) ..
قالو والعهدة على الراوي ( حلوة الفصحى ) وفي ذمة إللي قالت
إنه مدام عبير فنااااااااااانة وتهتم كتير بعرايسها وبالذات عرايس
الملكة عشان تكون أول طلة لهم جناااااااااان .. وعلى كلام إللي مجربينها..
لمن روحت لهم .. لطعوني يمكن ساعة وربع وأنا أقولهم أبغا أشوف مدام
عبير أو وروني عرايسكم عشان أنا ما قد شوفت شغلكم وبدي أحجز عندكم
قالت لي طيب طيب طيب وطنااااااااااااااش .. بس الحق عشان ما أظلمهم
ماشاء الله تبارك الله الصالون كان زحمممممة فظيييييييييعة والله مافي محل
تمشي فيه .. المهم جلست يمكن ساعة ونص .. و فجأة جات وحدة تزعق في الجوال
وتزعق وتزعق و تزعق وتتضارب مع إللي معاها في الجوال .. سكتت وفضلت
أطالع وطبعا غصبا عني سامعة هي أيش بتقول .. طلعت الشغلة فيها سوء تفاهم
بينها وبين زبونة وخربطت لهم عروستهم وسارت قصتهم قصة والعروسة
محد صلحها :06: .. إللي فهمتو إنه مدام عبير أتداركت الموقف وطلعت
جري خلصت العرايس إللي في يدها وراحت على طول للعروسة المسكينة
يعني برضو أنقذتها .. أنا عارفة إني طولتها وهي قصيرة بس إللي أبغا أفهمكم هو
إني أنا ما أحب أحد يزعق قدامي , عشان كدة عصبت منهم و بصراحة خفت منهم
و سرت أتخيل نفسي مكان العروسة إللي محد صلحها وجسمي قشعر ..
وخرجت مدام عبير ولا قابلتها وبعدها خرجت أنا ولا شوفت عرايسهم ..
يعني ما أقدر أفيدكم كيف كان شكلهم ولا مكياجهم .. بس خلال إنتظاري شوفت
الناس العاديين إللي عاملين ميك أب فيهم كذا وحدة رسماتهم الصراحة حلوة
وفيهم شبه كتير من مكياج ريما .. والله أعلـــــــــــم ..

نيجي لريما .. وما أدراك ما ريما ...
أول شي مواعيدهم وتنسيقهم سيء .. و كل مالهم أسعارهم تسير
أغلى وخدماتهم وتعاملهم تسير أسوأ ..
أعطيكم مثال على دا الشي و أنا صادقة .. في العيد روحت لهم عشان
أسوي تسريحة على الرغم من إنه كان زحمة ( لاحظو في العيد ) ..
سشورو لي شعري وحطو لي موس وجل ولفوه برواقة وخلوني تحت السشوار
ألين نشف شعري وسوت لي شعري كاميليا .. وطلعت تسريحة جنااااااااااااان ..
وعجبت الكل .. و أخدت عليها 150 ريال ( أنا شعري تحت كتفي بشوية ) ..
وكنت شارية ورود بيضا غالية والله العظيم غالية الوردة الوحدة بـ 37 ريال
نتفت أوراق وحدة فيهم وقالت لي كدا حلو وحطتها في شعري ..
ولمن جيت أخد الباقي و أنا ماشية قالت لي : خليهم
عشان عندنا عروسة ماعندها إكسسوار وورودك حلوة !!!!!!!
أستغربت منها و أستحيت و أنحرجت وقلت لها تفداكي ..
و أعتقد ( إن بعض الظن إثم ) إنهم باعوها للعروسة التانية !!!
طيب يا حلوين ؟؟
روحت لهم آخر ذو القعدة ( قبل الإجازة وقبل الموسم )
وأنا حاجزة من أول ذو القعدة برضو عشان أسوي تسريحة
وميك أب .. يعني يومها كنت بدي أدلع نفسي شوية :27: كان موعدي
الساعة 7 بعد المغرب .. قلت يابنت لا يكون زحمة روحي ألحقي نفسك من بدري
روحت لهم الساعة 5 العصر .. قلت لها عندي موعد الساعة 7 بس جيت بدري
عشان أبغا أخلص بدري .. جلست تزعق عليا وتقول لي أنا عندي 15 عروسة
المفروض كنتي تيجي الساعة 12 الظهر !!!!!!!!!! قلت لها طيب عندي موعد معاكم
من قبل شهر وماحد أتصل عليا ولا خبرني !؟!؟؟!؟!؟!؟ جلست تتفلسف و أنا عصبت
ولا 15 عروسة ولا شي .. ماكان فيه غير عروستين وشوفتهم بعيني و برضو
( إن بعض الظن إثم ) !!!!!!
قلت لها خلاص أبغا تسريحة بسيطة وناعمة و أبغا كاميليا .. كلمت كاميليا قالت
لها لفي لها شعرها .. رحت ألف شعري و من غير سشوار ومن غير شي بسرعة
بسرعة لفلفت لي شعري وحطت شوية موس أقل من نص كف يدها على شعري
كله .. قلت لها أنا شعري يتفكك لازم تكتري الموس ولا راح يتفكك ..
طنشتني ولا كأني أتكلم ..
ولفت لفت لفت ألين سار راسي يوجعني
وكل شوية تلف لي بمقاس يعني مو كلهم نفس المقاس !!!!!
أنا أستغربت بس سكتت لأني كنت معصبة وبدي أخلص بسرعة ..
خلوني جالسة وصليت المغرب .... وصليت العشاء وصدعت وجاني غثيان
ولا فكو شعري ولا مكيجوني .. وأنا حاجزة عند لينا .. خلوني ألين الساعة 9
وبعدين قالت لي لينا عندها عروسة وبدها تروح برة !!!!!
وفي نفس الوقت كانو في مجموعة بنات صاحبات لينا و أرقامهم بعدي بكتير
واللللللللللللله العظيم دخلتهم قبلي و أخرتني عشان تخلص صاحباتها ..
يعني الشغلة كلها بالمحسوبية ... و إللي يعرفوهم يتوصو فيهم ..
المهم طلعت لينا قمت أنا عصبت وقلت لها خلاص مابدي أتمكيج خلصو شعري ..
وجلست على راس كاميليا وبرضو كانت بتمشي البنات إللي مكيجتهم لينا ..
قلت لها معليش أنا رقمي 13 و إنتو أرقامكم 37 -38 !!!! يعني معليش
دوري جا من قبلكم !!!!!!!!!!!
المهم عصبت وبرضو صلحت وحدة فيهم قبلي ويالطيف يارب كان في شعرها
شي غريب شككني !! خصوصا إني جيت وهي جالسة تحط للحرمة مكياج في راسها
زي مكياج الحواجب كأنها بتغطي شي !! لمن جا دوري كنت شاكة قلت لها معليش كاميليا
ممكن تغيري الفرش هادي أو تعقميها ؟؟؟ طالعت فيا من فوق لتحت وبدأت تمشط
شعري وأنا حطيت يدي على قلبي وقلت الله يستر .. وسوت لي تسريحة مرة بسيطة
و أقل من الأولانية ولمن جيت ادفع قالت لها كاميليا 180 ريال روحت أدفع للي
عند الإستقبالي لالالالالالالالالا شعرك طويل هاتي 280 ريال !!!!!!!!!!!!!!
وأنا أنصدمت أقول لها لا سشوار ولا معاملة ولا إسبراي ولا موس ولا مواعيد
ولاشي عدل وشعري ألين كتفي وتقولي 280 ريال وشعرك طويل ؟؟!!
أصرت على موقفها رميت لها الفلوس لأني ماحب المشاكل وكان دمي محروق
لكن في نفسي طلعت أقول أصلا أنا أحلق شعري بالموس ولا عاد أجيكم تاني ....
وطلعت الساعة 11 ونص في الليل !!
نيجي بالنسبة للحرمة إللي كانت بتسوي شعرها قبلي ...
بعد كم يوم لاحظت شعري يتساقط بشكل فظيع .. الحمدلله كان عندي
موعد مع دكتورة الجلدية أياميها .. وقلت لها شعري مرة يتساقط !!
حولتني على أخصائية شعر قالت لي ( عندك بداية ظهور ثعلبة أنتقلت
لك عدوى من إنك أستخدمتي مشط أحد مصاب !!!!!! :11: )
أنا كان حيغمى عليا .. وحكيتها عن إللي سار عند الصالون وقالت لي
من وصفك إللي كانت قبلك كان عندها ثعلبة !!!!!!!!!!
و إلى الآن أنا أتعالج والله ودفعت آلاف في العلاج عشان أسيطر
عالموضوع ونفسيتي تعبت وسار عندي تراجع في نمو الشعر من كتر
التساقط ... و المنطقة في راسي من قدام سار فيها فراغات واضحة
و أنا عروسة :06: وماني عارفة أيش أسوي .. ماخليت شي طبي
ولا شي طبيعي ماحطيتو في راسي ومافي فايدة :( ...
وماأقول غير الله لا يوفقك يا ريما يا قليلة الذمة والضمير !!
يعني لو كان عندهم شوية إهتمام بالنظافة ماكان سار كدة :( ..
مع إنه شغلهم في بعض عرايسهم يكون حلو بالذات الملكة .. لكن
عرايس الفرح يكونو كلهم شبه بعض !!!!!!!
و برضو .... الــلـــــــه أعــلـــــــــــــــــم

معليش أنا عارفة إنه كلامي كتير .. بس عشان أبرد قلوب إللي سألو
ووالله ماقلت غير إللي سار معايا و إنتو أدرى ..
وكمان عندي فكرة عن صالونات تانية .. ويلا نساعد بعض ..
وزي ماقلت في الأول والأخر الطلة من الله وكلها نصيب وحظوظ
بالذات الصور والمكياج .. أدعو ربنا نطلع عرايس حلوين يااااااارب

تحياتي ولا تزعلو مني ....

جـــداويـــــــــة

جداوية ردك يبرد القلب ان شاء الله البنات يستفيدوا

وماتشوفي شر بس أول مرة أعرف ان الثعلبة معدية!

السلام عليكم ورحمة الله وبركاته
شكرا أختي غالية على ردك
الله يسلمك يارب ولا يوقعك وقعة زي إللي وقعتها
وأهم شي ما دوختي و إنتي بتقرأي :o
وبالنسبة للثعلبة والله العظيم زي مابقولك إللي حصل
والحمدلله أنا ما جاتني الثعلبة نفسها بس أتعديت من البلاوي
إللي في راس الحرمة الله يشفيها و أثرت عليا ..
بس إللي حصل إنو سار عندي تساقط مخيف والله
ثم والله حتى لو بس تمرري يدك على راسي تلاقي الشعر
مكان ما يدك مرت كلو نزل في يدك والــــلــــــــــــــه
وحكة فظييييعة في فروة راسي .. ولحقت نفسي و أتعالجت
والحمدلله كتيييييييير أتحسنت الحمدلله مليون مرة كنا فين وسرنا فين
لكن التساقط أثر عليا وسوى فراغات في مناطق في راسي
وكله بسبب الوساخة حقت الصالون ولا غير كدة ماشاء الله
(((( كـــــــــــــــــــــــــــــان )))) شعري ما يشتكي من شي ..
وفجأة من بعد يوم ريما سار يطيح خصل خصل :06:
وأخصائية الشعر قالت هادي عدوى لا يمكن يسير فيكي كدة
بدون سبب .. خصوصا إني إنسانة حريصة جــدا ومافي أي
أحد يستخدم أغراضي أبـــــــــــــــــــــــــــــــــداًُ
والشي التاني إللي يأكد كلامي إني كنت أساسا بأعالج شعري
عند الأخصائية وكانت لها أكتر من 5 شهور عارفة وضع شعري
وحالته وهي من بعد الله إللي ساعدتني في علاجه وكانت بتتابعني
كل 4-6 أسابيع والحمدلله أتحسن وبدأت كتير من مشاكلي تخف ,
لأنو كانت عندي شوية مشاكل في شعري ..
وفجأة لقتني قربت أصلع :06:و شعري يطيييييييييييح بكترة ..
بس مشكلتي دحين إنو تساقط شعري الحمدلله خف كتير
بس باقي فراغات في فروة راسي شكلها بششششششع
والله عندي قرايب عجايز في الـ 70 و 80 و 90 شعورهم
أغزر و أقوى من شعري ماشاء الله :44:
وخصوصا من قدام يعني واضحة جدا و محرجة :(

عاد من قلة البخت مافي غير بلاوي :23: الحمدلله

تحياتي

جـــداويـــــــــة :23: