السلام عليكم ورحمة الله وبركاته

معليش أختي وردة ذبلانة ماشوفت رسالتك
غير بعد ما كتبت الرد .. أعذريني ..
وحأرد عليكي هنا عشان نفيد ونستفيد
أتمنى ما يضايقك هادا الشي :)
مع إنو إسمك قاهرني .. وإنتي عروسة
المفروض ما تكوني ذبلانة المفروض تكوني
أكتر وردة مفتحة في البلد :) ..

شوفي يا حبيبتي بالنسبة لمشغل فرحتي
أول شي هو إللي محله جنب الدار البيضاء ؟؟
إذا كان هو إللي تقصديه .. والله ماشوفت
له غير عروسة وحدة هي صاحبتي
كان فرحها في الدار البيضاء
وماتعرف المحل بس راحت له عشانه قريب من
الفندق .. بصراحة طلعوها حلوة يعني البنت شوية
عيونها مطبقة .. فتحولها هي وخلوها واسعة ..
وحطت لها روج يجنن .. بس طلعتها ونسيت تحط لها
مناكير :confused: تخيلي ؟؟
بس الحمدلله أتداركنا الموقف و دبرنا الموقف ..
وعدت الليلة على خير ..
بس بصراحة وقت الزفة ومع الإضاءة كان وجهها
منور زي القمر مع إنها البنت مو بيضاء ..
يعني بصراحة عجبني شغلها عالبنت هادي بالذات
بس ما قد شوفت لها عرايس تانيين ..
عشان كدة ما أقدر أفتيكي ..
ومين إللي مكيجها والله ما أعرف أيش إسمها ..
وحياة إللي في الوهج ما سمعت عنها غير من
هنا في المنتدى بصراحة عشان كدة ما أقدر
أفتيكي بس هي أتوقع سمعت إنها أتدربت على
يد مدام عبير يعني أكيد شغلها زيها ..
بس لا تجازفي أنزلي لها يوم ربوع ولا خميس
وشوفي شغلها .. و إذا ناسبتك خليها تسويلك
بروفة .. عشان بس تتطمني وقلبك يرتاح
وماتيجي يوم الفرح تزعلي وتتنكدي وتقولي ياريت
وياحبيبتي ولا إزعاج ولا شي بالعكس أنا أنبسط
من الردود .. و أنقههههههر من الطناش ..
عالأقل قد ما قعدت أفحط وأكتب عبروني :30:

تحياتي ..
جـــداويـــــــــة

السلام عليكم

مشكورة حبيبتي على ردك خذي راحتك عادي وعلى قولك الكل يستفيد

بس غريبه ماسعمتي عن حياه الا هنا!!!!!

مع ان اكثر من وحده نبهوني اختارها هي بالذات

اش رايك تسالي لي عنها اكثر يمكن تطلع ممتازه

بالنسبة لااقتراحك اني اروح بنفسي اسوي البروفه واحكم على شغلهم قبل لااحجزهم

مااعتقد اني اقدر لاني مو من جده يعني مستحيل اقدر اشوف شغلها الا قبل الزواج بكم يوم

عشان كذا فحطت وانا اسال اي وحده من جده عشان اتاكد

المشكلة انها مو معروفه كثير وسعرها زي ماقلتي ممتاز وخصوصا للمناطق البعيده عن جده مثل حالتي

طيب تعرفين كوفيره ثانيه شغلها تمام وتطلع الطايف؟؟؟

شكلنا بنقلب الموضوع شات

:26: :26:

السلام عليكم

والله يا جـــداويـــــــــة أستفدت منكِ الله يجزاكِ خير يارب ويسعدكِ والبنات اللي شاركوا في الموضوع ....
كنت حاطة أملي في الله ثم في ريما ؟؟ لكن خلاص بطلنا منها ...
طيب يابنات جدة دلوني على مشغل حلو وقريب من بيت أختي انا عندي مناسبة هناك..
وابغى أكون على سنغة عشرة ..
احنا تقريباً قريب من التحلية ..
يالله همتكم لااااااااتنطشوني اسوي مثل العضوات كخخخخخخخخخ:17:

السلام عليكم ورحمة الله وبركاته

أهلين بنوتات .. كيفكم ؟؟
أختي وردة مفتحة :)
والله ما سمعت عنها غير من هنا
لأنو إللي مدحت لي مدام عبير وحدة صاحبتها
يعني مو معقولة حتسيب صاحبتها وتمدح لي
وحدة غيرها !!!
بس عموما إذا روحت هناك مرة تانية إن شاء الله
أشمشم لك أخبارها :42: ..
وبالنسبة لأنك تيجي جدة يختي تعالي في الويك إند
قولي لأهلك بدي أنزل أشتري ملابس ولا قمصان نوم
ولا أي شي .. وتعالي جدة ربوع ولا خميس لأنك
تضمني إنو يكون عندهم عرايس وتكون مشرعتهم
فروحي وشوفي كيف شغلها ولو عجبك قوليلها
أنا أبغا أحجز عندك وموقعي في الطايف وأبغاكي تطلعي
لي و أديها عربون وخليها تسوي لك بروفة عالعينين
برسمتين مختلفتين حسب لون فستانك
ترى والله إنتي كدة ترتاحي .. بس لا تحجزي كدة
خبط لزق .. مو إنتي كدة ولا كدة لازم تنزلي جدة
عشان تدفعي لها العربون .. خلاص أنزلي يومين
وروحي من بعيد لبعيد أتفرجي ...
والله أنا عن نفسي ما قعدت ألف ولا أدور ..
لمن روحت قلت لها أنا صراحة سامعة عنكم
وبدي أشوف كيف شغلكم في العرايس لأني
بصراحة ما قد شوفت شغلكم فممكن توريني ولا لا ؟؟
الحرمة أنصدمت شوية من جرأتي وبعدين قالت لي
طيب طيب أتفضلي وشوية وتقابلك مدام عبير ..
بس عاد حكيتكم أيش إللي سار لمن روحت :( ..
وهما قالولي تعالي لها أحسن وسط الأسبوع تكون رايقة لك
وتسوي لك إللي تبغيه و بروفة وكل شي ..
وبالنسبة لطلعة الطايف يا حبيبتي كلهم يطلعو
ويسوو لك كل إللي تبغيه وزيادة وكلو بحسابو
بس فلوسهم مو طيبة :32: يعني أنا هنا في وسط
البلد وعروسة ملكة ( طبعا الملكة أرخص من الفرح )
وكلهم قالولي من 3000-3700-4000 وفوووووق
ويكون في علمك بدون ولا شي .. يعني بس مكياج
وتسريحة بدون توابع العروسة التانية !!!!
يختي والله حراااااااااااام .. عشان كدة شوفيني
جالسة أفحط بنفسي و أروح و أجي وأشوف الأسعار
كيف وكلهم زي مابأقولك من فوق الـ3 آلاف :( ..
بس زي ما بأقولك لازم تجي بنفسك لأنو ليس من سمع
كمن رأى .. عشان كدة لا تخاطري .. ولو خاطرتي وروحتي
لوحدة من إللي في الطايف اللللللللله يعينك لأنك معليش يعني
حيطلعوكي أراجوز و حتسيري تريقة معليش يعني لا تزعلي
مني بس كوافيرات الطايف معدومين .. بس إذا إنتي بتقولي
إنه فرحتي نفسها إللي كانت في جدة طلعت الطايف روحيلها
وشوفي .. يمكن يطلع شغلها طيب .. والــلــــــــــه يعينك ...

نيجي لأختي الأصيل ..
أول شي آميييييييييييين يارب على دعواتك ..
ونصيحة لوجه الله ما أبغا من وراها شي ..
إذا ملكتك ولا فرحك لا تروحي لريما لأنك حتنجلطي
وحتروحي فرحك وإنتي تتنفضي من القهر ولو كنتي
شوية حساسة زيي حتلاقي نفسك جالسة تبكي من
النرفزة والتعامل الزفت حقهم ..
لأنه أخلاقهم زفت ومواعيدهم أزفت و أسعارهم طين
******* وعلى فكرة يوم ماسارت الحكاية حقت ريما
كانت في وحدة قبلي والله العظيم جلست تبكي
أنا أستغربت قلت في نفسي أيشبها دي ؟؟
وجلست تبكي وتصرخ وتقول لهم أنا من الساعة 12 الظهر
هنا وإنتو محد فيكم راضي يعبرني أنا اليوم جواز أختي
وتبكييييي والكلام دا تقريبا كان بين الساعة 9-10في اليل
والله حزنت عليها ولمن لفتت نظر الناس وأنتبهو لها الناس
وماقدرو يسكتوها راحت الهبلة حقت الإستقبال هي
والدبة التانية المسؤولة عن المكياج وبسرعة بسرعة
دخلوها عند وحدة ومكيجوها وصلحوها وخرجت في أقل
من ساعة !!!!!!!!! يعني كان بإمكانهم يصلحوها من بدري
من ساعة ماجاتهم وما يحوجو نفسهم لهادا الموقف
لكن هما أندال يمشو معارفهم أول وهادي عشان مسكينة
وجالسة مؤدبة حرقو دمها ..
ويختي التحلية كلها كوافيرات لفي ودوري ونقي زي
ماتبغي عندك جمالك .. وجاك ديسانج .. والمقينة .. و98 ..
وكارمن 2 .. وكتييييييرييييييين ماني فاكرة أساميهم
طول ماإنتي ماشية في التحلية ماتشوفي غير صوالين ..
يعني من جد ما راح تتعبي أبدا في التحلية ..

أنا مشكلتي الوحيدة إني أبغا كوافيرة تجيني القاعة
لأنو أهلي مو سامحين لي أتصلح في الصالون نفسه
ولا لو كان كدة كنت من زمان أخترت أي وحدة ورسيت عليها
لكن أنا إللي مبهدلني إنو أسعارهم فوق الـ3آلاف ومن غير
ولا شي .. بس مكياج وتسريحة !!!!
يعني عالأقل لو قالت لي 3000 شاملة كل شي كنت أوافق
لأن الأشياء التانية لوحدها حتكلفني أكتر من 1000 ريال !!!

وتعالو يا بنات يا حلوين دحين أنا دوري إني أسأل ..
أبغا رأيكم في مصورات أسعارهم رخيصة فيديو وفوتوغرافي
وصورهم تكون طيبة وجيدة .. تعرفولي أحد ؟؟
لأن أقل شي لقيتو بـ4000 ريال ( ألبوم واحد صور+ فيديو بدون
مونتاج ) وكل ما تزيدي الصور ولا تبغي تسوي مونتاج ياخدو الفرق
وأنا بصراحة بأقولكم يعني هي ملكة !!!! وكل شي غالي
ونفسي أتصور صور حلوة وأسعارها طيبة بدون سرقة ولا نصب!!
لفيت ألين دخت وأنا لوحدي وماعندي أحد يجري معايا
يعني من جد أعصابي تعبت .. يعني كل مالي بألاقي أغلى
بس ما بألاقي أرخص !!!! أنا أبغا أقل من 3000 ريال ..
إذا في أحد مجرب ياريت تدلوني .. ونتناقش في الموضوع ..
يلا عاد لا تبخلو عليا .. ترى أنا ملفلفة جدة وتقدرو تسألوني
عن أي شي بس زي ما أنا كلامي كتير أبغاكم تساعدوني
وتتجاوبو معايا وأنا والله ما أبخل عليكم بشيء ..


تحياتي ..
جـــداويـــــــــة

جـــــداويــــــــــــه انا مالي حاجه , يعني داخله عرض بس احس انك فعلا بنت ذوووووق وتحبين الخير لغيرك زي ما تحبيه لنفسك..
ابغى اقول لكي اللــــــــــــــــــــــــــــه يوفقك وان شاءالله تطلعين احلى عرووووووس يا قمر... :26: