كلكم شاركوا ماهي أصعب حادثة مرت عليك لطفلك ؟؟؟

شو رايكم خواتي كل وحده مرت عليها حادثة صعبة والله سلم طفلها أو قريبها صغير من خطر محقق تذكرلنا إياها!!!!!
وبأبدا بنفسي :32:
أخر عيالي الله يسلمكم ويسلم عيالكم واخوانكم بنوته حلوه وفي يوم ماحد في البيت غيري معاها وهي متعودة من عمرها أربع سنين ونص تبارك الله تتحمم بروحها تحت رقابتي طبعا
وهذا اليوم كان عمرها خمس سنين ونص ودخلت تتسبح وعادة أسمح لها تملي البانيو مره في الأسبوع وكانت هي في الطابق الثاني وأنا في الأرضي وبيتنا صغير والحمام اللي هيه فيه عند رأس السلم يعني تسمع صوتي لي ناديت عليها وأنا عادة أنادي عليها كل عشر دقايق اطمن عليها وفي هذا اليوم ناديت اول مره ماردت وثاني مره ماردت قلت في نفسي أكيد الباب مسكر وماتسمع وهيه حبيبتي تحب المنجا وقمت وقطعت لها وحده ورحت اناديها عشان تطلع صار لها يمكن مادري نص ساعه وهيه متعوده ماتقفل الباب وتلعب بالألعاب في الماي
دقيت الباب شو تتوقعون لقيته مقفول طاح قلبي دقيت بقوه وأنا اصرخ :06:يمكن كل الفريج سمع صوتي الله يسامحني ولكن هيه ماترد بصراحه انا هذا كان اصعب موقف في حياتي كلها اسمع صوت الماء وماترد علي تيبس الدم في عروقي وحاولت افتح الباب بمفك ماانفتح لأول مره مع انه عادة ينفتح (تعرفون بيبان الحمامات مالها مفتاح بس تنقفل من داخل) وهنيه اختكم انهارت :29:وعادة ينشل تفكيري في هذي المواقف لكن مادري استجمعت قواي وقلت هيه اكيد ماتت لكن يمكن اقدر اسوي لها تنفس صناعي وانقذها
واتصلت بزوجي اللي كان في الحلاق مع الولدين وانا اصرخ وهو يقول بس فهميني شو السالفة وانا بصراحة مااقدر اتكلم بهدوء وكلامي مو مفهوم في التلفون المهم شال الولد نص راسه محلوق من تحت يد الحلاق وجا طيران مادري كيف وصل مع ان المحل وايد بعيد عن بيتنا
المهم وانا جذيه اصرخ مهستره رجعت احاول افتح الباب وهاذي المره فتح وياي
ودخلت واتخيلوا المنظر صوت الماء والستاره مسكره وافتح الستاره شوي شوي مثل افلام الرعب ولا أشوف جسمها متمدد في الماء بدون ولا حركة ومغمضه عينها حبيبة قلبي والماء مغطيها ماعدا الخشم والعين وشلتها على بالي ميته طبعا وانا عندي دسك وممنوعه من شيل شي ثجيل وهنيه تحول الحزن الى بكا وضحك وحمد لله :21:تحركت وصحت من النوم اتاري الشريره الصغيره نايمه في الماء
عاد أنا هنيه ايقنت بان الله اخذها ورجعها لي في لحظه :41:ماقدرت امسك نفسي وكنت اردد الحمد والشكر لك يارب مثل المجنونه وبقيت ايام كل ليله ابكي لما اذكر شكلها وفقدت توازني كاني امشي على الهوا
وسامحوني على الإطاله وقولوا لنا قصصكم مع اولادكم الله يخليهم