السلام عليكم :26:
انا لاحظت كثير يحطون تمارين والبعض مايستفيد منها
والي تقول سببتلي الم ولا طلعت لي عضل ?. ومالا نهايه
اولا لازم تعرفون التمرين كيف يتطبق صح
لأن أي غلطه ممكن تضرك او تعطيك نتيجه عكسيه!
ثانيا يابنات الstretching او التمدد او الشد هذا ضروري!
بعد ما تخلصين من اي تمرين تسوينه لانه يساعد على تمديد العضلات
فما تعضلين ويشد الجسم كمان ويبعد الالم
حتى لاحظوا اغلب الرياضين او في النوادي
بعد كل تمرين ايروبكس،رقص?.وكثير
يحرصون على تمرين الستريتشينق.
انا جبت لكم تمارين المعروفه وتمارين الشد الي افادتني صراحه وتمارين اخرى
نتايجها حلوه وكيف تضبطونها وكمان ايش مفروض تسوون بعد كل تمرين!
تمرين السكوات:
اول شي أنه يساعد في شد الفخذ وشد المؤخره ويوقفها
يرجعها للشكل الطبيعي واللي مافاد معها اكيد ماسوته بالطريقه الصحيحه.
هذي طريقة السكوات الصحيحه:
لازم يكون ظهرك مستقيم وتناظرين قدام وتنزلين كنك قاعده على كرسي
وااضح بالصوره واذا ماعرفتي لسه اكتبي طريقة السكوات الصحيحه
باليوتيوب لأن ترى لو غلطتي ممكن يأثر على ركبك
ولا مشاكل اخرى لا تستهينين فيه وفالتمارين الثانيه.
طبعا بعد ماتخلصين اول شي ريحي العضلات كيذا دقيقه بعدين ابدي بالستريتشينق!
هذه عدة حركات للشد بعد كل تمرين شوفوا مكتوب تحته
حق الفخذ وحق اليد وكذا تمرين كله مجمع في صوره وحده..
تمرين اليدين المروحة:
طبعا الكل منكم يعرف تمرين المروحه كثير هنا فالمنتدى
يستخدمونه لكن في انواع ثانيه يساعد في شد الترهل في الزنود
ويحسن شكلها وانصح باستخدام تمارين اخرى لليدين بعد بس المهم بعدها تمارين شد.
طريقة التمرين اول شي تسوين زي مافي الصوره تمدين يدك
وريحي كتفك ورقبتك مالهم دخل انتي بتشتغلين عاليد فقط
خلي كتفك ورقبتك مرتخين وابدي حركي يدينك بشكل دائري
10 على ورى و 10 على قدام .. او العدد الي تبين
بعد ماتخلصين من التمرين سواء المروحه او اي تمرين غيره
لازم تريحين شوي بعدين تسوين تمرين الشد !لتجنب الالم ولشد المنطقه بإذن الله.:2thmup:
هذا تمرين الشد حق اليد الي اسويه ..
تمرين لشد السيلوليت وللأرداف وصقلها:
طريقته لازم نفس مافي الصوره بالضبط يدينك زي كيذا
وظهرك مستقيم وترفعين رجلك زي الرسمه بسرعه وتنزلينها لتحت ببطئ.
يابنات وش اقولكم واو هالتمرين جد مره مفيد شفت نتايجه
على وحده اجنبيه كنت متابعتها بس بأسبوعين تغير شكل فخذها!
ايش كانت تسوي؟
اول شي كانت تسوي تمارين شد ستريتشينق
بعدين تسوي الحركه هذي زي مافي الصوره بالضبط لكل رجل 50 مره
هي تقول تسويها على 3 مراحل فاليوم يعني مثلا فالصباح والعصر والعشاء
المجموع اخر اليوم يكون 150 لكل رجل بس جد يابنات اسبوعين
وشفت النتيجه اردافها نحفت صار شكلها يجنن
وتقول لازم مهم بعدها تسوون مساج للمنطقه
وكمان تمرين شد يعني ببداية التمرين ونهايته.
انا اقول افضل المبتدئات يسون 50 مره فاليوم
بس ولو تعود الجسم تقدرون تزيدون التدريج احسن شي.
هذا الستريتشينق حق الافخاذ الاماميه فقط
بعد ماتمشين بعد ماترقصين بعد ماتسوين اي شي له دخل بالفخذ ..
ارتاحي شوي بعدين سوي تمرين الستريتشينق وبالصوره
الي حطيتها اول شي تلاقون عدة تمارين لشد الفخذ من كل الجهات.
تمرين شد الساق:
زي مانتم شايفين طبقوا نفس الصوره بالضبط
ولازم تسون التمرين هذا لمدة دقيقه كامله لكل رجل ..
او 30 ثانيه لكل رجل وتسون التمرين
مرتين عشان يكمل دقيقه لو ماتحملتوا دقيقه كامله.
اليوقا:
يابنات انصح فيها لو يومين بالاسبوع جدا جدا جدا
مفيده وتساعد في شدالجسم وتضبيطه وحتى ممكن تطولين
لأن كلها عباره عن تمدد و تمطط :biggrin: وكل ابو شي واسترخاء تريح العضلات.
يوم الراحه:
لو كنتم تسوون الرياضه العنيفه او التمارين المخصصه لمناطق معينه
في الجسم كل يوم انتبهوا لازم تحددون لكم يوم في الاسبوع راحه
عشان العضلات ترتاح!
التحديات الشهرية:
انصح فيها وبقوه جدول منظم وفي يوم راحه كل بعد 3 ايام وبكذا ترتاح عضلاتك
ويبدأ يأثر في جسمك التمرين حطيت لكم كذا تحديات رهيبه تشجع الواحد وسهله
ونتايجها سحريه اخر الشهر ان شاءالله..
تحدي السكوات انصح الي نحفوا وخلصوا يسونه
لان لو لقى دهون كثيره فمنطقة الفخذ ممكن تطلع لك عضله تحت المؤخره بشوي
هو اساسا يطلع عضله خفيفه حتى للنحيفه فمابالك مليانه؟ انتبهوا
تحدي السكوات لاحظوا يوم الراحه موجود!
وهذا تحدي للي تبغى شد البطن وتطلع لها ابز:
كيذا طريقته:
طبعا تنتبهون الرقبه تشوفون كيف شكلها تكون مستقيمه
يعني مو تنزلون راسكم لو رفعتو نفسكم لا خلوها مستقيمه
ومرتاحه وماتلمس الارض لمن ترجعون على ورى.
واخيرا ياجميلاتي هذه بعض الامور المهمه والضروريه
الي لازم نعرف عنها بالرياضه والي حابه تنحف
وبجسم مشدود بدون اي اخطار. والكلام هذا
مو من عندي هذا من عند احسن الرياضيين
ولأني شفت كثير هنا تمارين ومحد ذكر عن تمارين الشد او الستريتشينق
فهذا غلط تمارين الشد ضروريه بعد كل رياضه
وهي تساعد في عملية النحف والشد عموما.
الموضوع كل كلمه كتبتها وكله من مجهودي الشخصي
فا اسمح لو تبون تنقلون الموضوع للفائده بشرط تكتبون
منقول وماتحطون ان المجهود كان منكم في رب يحاسب فوق عرشه.!
وبالتوفيق حبايبي.. :heart:
سبحانك اللهم وبحمدك اشهد ان لا اله الا انت أستغفرك واتوب إليك