بريستون بارك...


الحديقة اللي وادني لها رجلي وصجني ولجني عندها وانه اتهبل وبها تسذا وتسذا والله ماشفت الا تسلابن تعاوى وشيبان وعجزن لابسين صراويل نص كم ويتمرنون الله يستر علينا....



حتى الكراسي مابه الا كراسين من عهد آرثر الأول...عاد وش أنت ياآرثر مدري والله بس اني شفت النصب التذكاري حق تأسيس الحديقة طلعت من عام 184ة...قلت حق انه تعبق بالتاريخ ...

حتى الثيّل حقها قديم وأصلي...شفتوا الانغليز؟؟؟


على طاري الأصالة...يوم انا جلسنا انا وابونا على كرسي الحديقة وانا اتحسس الخشب فعلا خشب موب اي خشب...وهو يقول هه انتبهي لايطالعتس احد يقول وش ذالمهبولة الي ماقد شافت كرسي...

قلت اي بالله ماقد شفت خشب تقادم عليه الزمن زي تسذا...يمكن يكون جالسن عليه أجيال ورا اجيال...جلست عليه الملكة فكتوريا همن ولدها همن بنت ولدها همن جت الحرب العالمية الاولى وجلس عليه هتلر وهملر يتهاوشون..


همن جوا البريطانيين وحرروا المدينة وجلسوا يرتاحون ويتقهوون...


عاد وانا اقول ذا لنفسي ماادري هي برايتن احتلوها الالمان ولالا ...المهم...


انه كرسي ينوء بأحمال التاريخ...لو كلمته لنطق...ولو استفسرته لأجاب...


واقعد اصور فيه ورجلي ياما مال يمين وياما مال يسار...وياذاك اني مملوح وطخة..

قلت يابوي لو انك مير مالبست شورت كان اهون شوي....انفهق بس بصور زي الناس ...

والمشكلة اني احسبني في دولة عربية ممنوع التصوير وكل ما مر احد وطيت الكاميرا ووزيتها بعباتي...


قال يابنت الحلال مالمتس احد ...صوري والا حطيها بشنطتس ...لاتقعدين تسذا تجيبين لنفستس شبهات...


المم رغم حلاوة المنظر في بريستون بارك الا اني ماارتحت...

كان فيه رجال وولده يلعبون كورة..انا كنت مبتسمة..ابونا ماكان في المود...مير يقعد يهاوشني ليه تبتسمين


قلت ابتسم في وجهك موب ابتسامتك في وجه اخيك صدقة؟؟؟

قال ايه بس انامنب اخوتس؟؟؟


انا دريت انه ناويها هوشة اليوم قلت اصير احسن منه...:)


الا هو يسوي فيها متسامح وسيفيلايز ...وتجي الكورة جنبنا ويجي الولد عاقدن حجاجه ويطالعني باستغراب واحد قروي من قاع الخبوب شايفن وحدة لابسة بنطلون..

وش تناظر يماال الفضيخ؟؟؟


الولد موب من كبره عمره ثمان سنين ...بس ليه مايقوله ابوه عيب تناظر الناس خصوصا الاجانب...

لمهم انا عطيته ابتسامة يفترض يبتسم عساه البلش...


المهم اخذ الكورة وهو شوي يرسل علي صاروخ....عساك للماذية من بزرن ماربوك اهلك...


وهو يبدا يهوش ابونا وشووووووووووله تطالعينه اصلا..


قلت هو يناظرني ...لايكون بس تبيني انزل راسي حياءً منه؟؟؟

قال لا..بس لاتفرّين الخشة على كل من هب ودب...قلت افاااااا ياذالعلم الرجال يغار من البزران ماعينّا خير..

المهم وهو يهبط شوي بعدما سكت وسفهته...مادريت الا تطير الكورة علينا جنب رجلي...

ان اماحركت ساكن...


الابو الي كان يلعب مع ولده قام يطالع فينا والولد جمد بمكانه...

يعني تصرف مضحك منهم ...جدا جدا مضحك...

يعني لاحنا اللي سوينا شي يخوف او يبين اننا مو متسامحين...

فليه خايفين انكم تجون تاخذون كورتكم؟؟؟


المهم ويقوم ابو الشباب وياخذ الكورة ويرسلها عليهم ركله محترفة (ابونا يعرف يلعب كورة)..

ويقول باعلى صوته:

نايس شوت...نايس شوت...


المهم ويقومون يطالعونه ذيك النظرات !!!!!!!!!!!!



حتى ثنكس ماقالوها...علما بأن الغالبية كيوت لما تكلمينهم او تسوين لهم معروف او شي ...


ذولا!!!!!!!!!!!!!!!!!!!!!!!


قلت انا منك لولدك ياذا الوجه الودر...الله لايذكرك ولايذكر ساعتك بالخير ياانغليزي افندي...

قم قم انت ونايس شوتك لاأشوتك انا هالمرة...

مابقى الا هي يسفهونا المتآمرين المستعمرين :)


وو....وعصبت بدورة ...وطبيت عليهم ...ومافكونا الا الناس...

وقالوا اهدي وتعوذي بالله من ابليس...ولولا ان انغليزيتن جت واستسمحت مني وقالت لي امسحيها بماي فيس واناخالتس والا كان فقعت وجهه..

تسيف انه حوّم تسبدي وشب مرّي؟؟؟


ورجعنا الفنتق وتهاوشنا ثاني...

ونمنا واحدن جنب الدريشة وواحدن جنب الباب...




:)يتبع...باتسر ان شالله...

السلام عليكم ورحمة الله

بدورة مذكراتك رووووعة رغم اني عانيت من اللغة العامية بس يعني من السياق كده بافهم الوضع العام وتصدقي اني فكرت اكتب مذكرات اول ما اروح على كندا اسجل انطباعاتي عن الاماكن والناس والمواقف اللي امر بيها ولقيتك عملتي اللي كنت بافكر فيه

استمري لان دي تجربة مفيدة جدا جدا والله يعيني على اللغة اللي بتكتبي بيها يختي وان شاء الله قريبا تقري مذكرات اسكندرانية في كندا
يا ريت لو تجمعي روابط الاجزاء الاولى في بداية كل جزء جديد وربنا يهون عليكي غربتك ويسعد ايامك يا رب

:hahaha:




أختي الكريمة ست الحسن فعلا الافلام والمسلسلات المصرية خلت كل العرب يعرفوا مصري كويس بس فيه لغة جديدة اسمها روش طحن منتشرة بين طلبة الجامعات والمدارس يمكن اكتب مذكراتي بيها

ويلاشدي حيلك اكتبي مذكراتك وهتكتسحي مذكرات الوليد بن طلال ان شاء الله :26:

حسبى الله عليج مت من الضحك
كملى كملى وانا اختج

:: :2thmup: :2thmup: :2thmup: