مشكلتي عادية بس زادت عن حدها !!!

السلام عليكم
حبيبتي .. هذه مريت بها او مازلت فيها خصوصا مع الناس الاغراب او اللي بشوفهم اول مرة وحتى الناس اللي انقطعت عنهم فترة طويلة لو قابلتهم بيحصل لي نفس الشي انطوي وماعرف احكي ولا ابدري راي في شي وان اتكلمت احس العالم كله بيسمع لي وفي نفس الوقت غير مهتم بموضوعي او منتظر مني غلطة او زلة ..
عموما .. بدأ يتلاشى الشعور تدريجيا بعد ماتزوجت واختلطت باهل زوجي واستنتجت شيء انه مو شرط الانسان ان كان عنده راي او وجهة نظر في شيء انه يقولها للغير يكفيه قناعته بصحة رايه وانه صح !
وحاولي انك ما تتكلفي في التخاطب مع الغير ولا تدخلي نفسك في مواضيع مانتي على دراية كامله بها واتكلمي بثقة في شيء يخصك انت او تجربة مرت بك وبالنسبة لأرائك ممكن تبديها بكل هدوء طالما انك واثقة من رايك واذا اعترضك انسان عادي تقبلي الموضوع ببساطة ولالالالا تندمي انك قلتي رايك
وعموما الحياة اخد وعطاء مو شرط تكوني صح على طول او خطا على طول
وبالنسبة للخجل فالحياء شيء جميل للمرأة وترى الناس ممكن يسموكي خجولة او متكبرة بس صدقيني في قرارة نفسهم يتمنو يكونو بنص حيائك وادبك

كتبت الرد مرتين .. :D

.. كلنا مرينا بهالشىء هذا .. وصدقينى مو بس انتى لكن الان لازم تبدأين من جديد..

بعطيك اشياء انا طبقتها على نفسى ..
اول شى لازم تكونين عارفه قيمة نفسك .. بمعنى ان انتى تكونين عارفه ان عندك القدرة على التغيير .. ولك اشياء ايجابية بنفسك وبشخصيتك .. وان لك دور فى اسرتك وبين اهلك .. يعنى دورى وابحثى عن ايجابياتك وراح تلاقين الكثير .. انتى انسانه ناجحه وطموحه والا ماوصلتى لمرحلة الجامعه .. هذى وحده من الايجابيات اللى لازم تعرفينها عن نفسك .. وغيرها الكثير
لان الواحد اذا عرف قيمة نفسه يلقى شجاعه وقوه فى مواجهة الغير .. ويلقى أنه قادر على تكوين صداقات .. وغيره
ابدأى بالزميله اللى تجلس بجانبك فى المحاضره .. القى التحية .. اسأليها عن احوالها .. ابدأى كل يوم بشىء جديد .. تكلمى عن اشيا مشتركة بينكم .. يعنى شوى شوى الى ان تتقربين منها .. اسـأليها عن المواد اللى مسجلتها .. استشيريها بالمواد اللى بتاخذيها يعنى اشركيها معك بالمواضيع المشتركه بينكم كطالبات .. او كبنات بشكل عام .. قبل بداية المحاضره بدقايق اسأليها عن متى تنام بالعاده او قولى والله البارحه ماقدرت انام قاعده افكر بالماده الفلانية او بالشغله الفلانية وبتلاقيها على طول تسألك .. وهكذا يبدا الحوار وانسى الارتباك وركزى بالكلام اللى تتكلمون فيه .. حاولى ماتكونين مرتبكه .. ومو شرط تتكلمين اغلب الوقت .. يعنى مره انتى تتكلمين ومره انتى تستمعين .. خليك مستمعه جيده ..
وخليك متابعه جيده لكل مايدور حولك من اهتمامات البنات اللى بعمرك .. ممكن تعطينها رقم موبايلك اذا وثقتى فيها .. وقولى اذا حبيتى تسألينى عن اى شى بالماده .. وهكذا ..

واهم شى تكلمى باشيا عامه .. يعنى لاتدخلين بالخصوصيات معها الا بعد فتره وبحدود .. لان الثقه العميا مهى زينه .. وتبقى الزميله زميله فقط .. الا اذا امتدت زمالتكم بعدها تكون صداقه وتعرفينها خلال المواقف اللى تدور بينكم اذا تستاهل الثقه او لا ..

حاولى اذا دخلتى مكان او قبل المحاضره بدقايق تسلمين بصوت واضح وناعم على الجميع .. وابتسمى بهدوء .. واذا اليوم جالسه جنبك فلانه .. واليوم الثانى جالسه مكان بعيد شوى سلمى عليها اشلونك شخبارك .. بس .. وحاولى تركزين على اسامى البنات .. يعنى حاولى تتعرفين على اساميهم .. علشان تسلمين عليهم باساميهم .. وهكذا بداية التعارف بين زميلاتك ..

واذا تكلمت وحده معك بسرعه بسرعه وتنتظر اجابتك خلى اجابتك هاديه وبكلمات بسيطه حتى لو كلمتين لانهم افضل من كلمات كثيره مو مرتبه .. المهم تكونين هاديه بالرد وواثقه ..
حاولى تقعدين قدام مرايه وتتكلمين والله تمرين روعه بس تدربى عليه شوى .. وبتتعودين بعدها انك تتكلمين عادى بدون خجل ..
خذى تنفس شهيق وزفير بهدوء طبعا بشكل غير واضح قبل لاتبدأين الكلام .. لان هالشىء يخليك هاديه وانتى تتكلمين او تبدأين كلام مع غيرك ..
لاتفكرين ان وجهك راح يصير احمر .. ركزى على الكلام .. فقط .. قولى انك بتنجحين بأن تتكلمين بثقه وبهدوء ولاتنتقدين نفسك دايم .. ولاتلومين نفسك .. عادى خليك مرتاحه وقولى هالشىء يصير لغيرى ولكثير من البنات .. لكنى قادره على السيطره على الموقف .. اتمنى لك التوفيق وابدأى شوى شوى وصدقينى بتلاقين الموضوع بيمشى طبيعى ..

وشىء اخير .. حلو انك تفكرين قبل اتخاذ قرارك .. واذا محتاره سوى ايجابيات وسلبيات للشىء اللى تبين تقررينه وخذى اللى فيه ايجابيات ... انتى اتخذى قرارك بنفسك بدون تردد
سويها مره وبتنجحين بإذن الله لكن المهم الثقه بقدراتك .. وانك تبدأين بالشىء مو تأجلينه ولاتبدين رايك ..
لازم يكون رايك واضح .. ويكون لك دور فى البيت وهذا بكتبه لك بعد شوى بصفحه ثانيه ..

يا رب أنا بعد أبا حل لهالأمر مش لي لزوجي....عذبني بهالطبع...

اذا تحبين يكون لك دور فى البيت .. لازم تهتمين لكل شخص فى البيت ..
الوالد و الوالده الله يحفظهم .. اخوانك ،، خواتك .. حتى الخادمه فى البيت لك علاقه معها ..

ممكن تخصصين لك وقت لكل شخص .. حتى لو دقايق باليوم الواحد ..
والدك .. صبحى عليه كل يوم قبل ماتروحين الجامعه وحبيه على راسه .. او بس كلمة صباح الخير اذا مو متعوده على بوسة الراس ..
بكمل لك بس انتظرينى بعد شوى راجعه انشاءالله