لايالينا :

[SIZE=5]((الجزء الحادي عشر (( لولو:يمة يمة باركي لي فاااااااااااااااااز الهلال.. ام محمد:الله يخلف على العقل... محمد:ما شاء الله شكلي باخذ اخبار الكورة منك.. لولو:افا عليك اخوي انا بالخدمة... محمد:ههههههههههههههههههههههه.. منتي صاحية.. لولو:من ناحية مني صاحية فهذي ما فيها كلام.. ام محمد:والله انك رجة.. لولو:مشكورة هذا شرف لي.. محمد:اقول لولو وش رايك تعطينا مقفاكي.. لولو:عيب اعطيكم مقفاي.. محمد:ههههههههههه..لا سامحين لك بس روحي... لولو:طيب وش رايكم انا اقعد عندكم.. ام محمد:اقول يا كثر هرجك يالله روحي.. لولو:طيب يمكن.. محمد اشر على المركة اللي جمبه بيرميها عليها... لولو قامت بسرعة تجري:اتوب والله اتوب... وخرجت لولو من عندهم.... ام محمد:أي يا محمد ونهايتكم.. محمد:ملزمة يمه نتكلم بهالسالفة.. ام محمد:اللحين بيصير لكم 3شهور وانت تقول نأجل السالفة..يعني بافهم لمتى بتبقون كذا.. لاهي مطلقة ولاهي معك..ولا انت مرتاح ولا شئ.. محمد:الله المستعان.. ام محمد:ما ابي الله المستعان.. محمد بابتسامة وعرف ان امه موصل حدها:الا يمة الله المستعان... ام محمد:اقصد نبي نتكلم اللحين..وتقرر اللحين.... محمد:يمة لا تضغطين عليّ.. ام محمد:3شهور لمتى قولي بس محمد:يمّه انا وهي اللحين نحاول نحل مشكلتنا بنفسنا واتفقنا ان محد يتدخل بالمشكله.. ام محمد:بس انا امك ولازم اعرف وش اللي يصير؟ محمد:يمّه هذا اتفاق بيننا وان شاء الله نحلها ويرجع كل شئ مثل ما هو.. ام محمد:اللحين ثلاث شهور وتقول لي بنحلها ما يصير يا ولدي لازم تستشير بالمشكله.. محمد:بس؟!! ام محمد:لا بس ولا شئ لازم تتكلم باعرف وش اللي صاير؟والله اني خايفه عليكم.. كل واحد ببيته وكل واحد موب راضي يعلم وش سالفتكم وصار لكم ثلاث شهور ولا اتحرك شئ.. محمد:خلاص يمه اوعدك ان مشكلتنا بتنحل.. ام محمد:يعني ما راح تعلمني؟ محمد:لا يمه موب القصد كذا بس.. ما يصير خاطرك الا طيب وكل شئ بينحل.. ام محمد:والله اني خايفه من هالبنت ومدري وش تاليها معك محمد:لا يمه والله انها طيبه وبتحبينها.. ام محمد:نشوف..قايله من زمان وارجع اعيدها بنت قبيلتك هي اللي تحفظك.. محمد:بدينا بالتعصب القبلي..النبي صلى الله عليه وسلم ام محمد:عليه الصلاة والسلام محمد:وصّى بالاخلاق والدين وقال((اظفر بذات الدين تربت يداك)) ام محمد:اللهم صلي على محمد..وقال((تخيروا نطفكم فإن العرق دسّاس)) محمد ابتسم وعرف ان امه ما ينضحك عليها بكم كلمه وقال:الله يصلح الحال.. ام محمد:آمين..اللحين ابترك بس مرة ثانية مو على كيفك وباعرف كل شئ..وترى حالتك مره مهيب عاجبتني.. محمد:ابشري يمّه..ما يصير الا اللي يرضيكِ.. وخرجت ام محمد عن محمد وقعد بالمجلس ورفع راسه يناظر بأثاث المجلس ويلف بنظره يمين ويسار.. نزل راسه محمد واخذ تنهيدة رجعت له لثلاث شهور ببيته هو ونهى..ورجع له الموقف اللي صار بينهم... محمد بعصبية بالغة:والنهاية؟ نهى بضعف وانكسار:طلقني وافتك مني.. محمد نزل ايدها بقوة:وانتي كل ما صار شئ جبتي طاري الطلاق..هذا هو الحل اللي عنك.. نهى نزلت راسها:محمد انا ما ابيك تتعذب معاي.. محمد:انتي اللي تجيبيين العذاب والا هو مو موجود.. نهى بدت تنزل دموعها وتحاول تقاوم:محمد انا قلتها لك من البداية.. انت عارف وضعي وهذا شئ مو بيدي وانا ما ابي اخسرك وبنفس الوقت اذا كان الطلاق هو الحل وهو اللي بيفرقنا عن بعض واحنا متراضيين ليش ما يصير؟ محمد هدت اعصابه شوي:طلاق انسيه لازم نلاقي حل.. نهى:محمد انت قبل ما تاخذني قلت انك راضي بي بكل عيوبي وانا متمسكة فيك على الاخر بس اذا حالتي هي اللي بتخلينا نتزاعل هذا الشئ ما يصير وانا كنت عايفه الزواج كله عشان ما انذل ولا احد يدعس على كرامتي..اهم شئ عندي كرامتي... محمد:ليش انا عمري هنتك او هنت اهلك او حاولت بس... نهى:ما اقصد انا زي كذا.. محمد:لا تقصدين.. نهى:والله ما اقصد..ولا عمرك سويتها وعشان كذا اقولك قبل ما يصير أي شئ ما يخلينا راضيين عن بعض نتطلق افضل شئ... محمد:رجعنا لسالفة الطلاق... نهى:طيب اقعد وارتاح وخلنا نهدى... محمد:وهذي قعده وش عندك... نهى نزلت راسها وقعدت تبكي..وسحبت منديل وقعدت تمسح وما حطت عينها بعين محمد.. محمد:ترى البكاء ما هو حل.. نهى:بالنسبة لي هذا هو الحل.. محمد:يا نهى انا ما ابي بكاء ابي حلول... نهى:طيب وش تبي مني؟ محمد:ابي اشياء كثيره مو شئ واحد... نهى بلعت لعابها وهي خايفه:طيب قول اللي عندك.. محمد:شوفي انا مو غشيم ينقص عليّ بكم كلمه وش سالفة اهلك ما تبين تروحين عندهم يوم جمعتهم وتروحين يوم ثاني... نهى سكتت ونزلت راسها ومسحت الدموع اللي نزلت وتكلمت:محمد انا باريحك واجاوبك عن كل شئ بس ما تتطنز علي وتراي صادقه بكل كلامي وسنة وشوي وانا ساكته عن الكل ما قلت ولا لاحد بس اللحين باقولك بكل شئ... محمد:يالله وانا اسمعك وعمري ما قلت لك اني ما ابيك تتكلمين.. نهى:انا داريه وعشان كذا(ما قاومت وصارت تصيح) محمد سكت وتركها على راحتها ما صدق انها تبي تسولف وتطلع اللي بقلبها لانها غامضه وما تتكلم وفرح انها تبي تتكلم وبيعرف اسرار كثيرة منها... نهى صارت تنحنح بتبعد الصيحه وهي خايفة من ردة فعل محمد... نهى:يا محمد انا ما احب اهلي واكرههم كره مو طبيعي.. محمد:ليـــــــــش؟؟؟؟؟ نهى:لانهم ما يحبوني.. محمد حس ان اللي قدامه من جد طفله يوم بدت تتكلم لانها دوم كتومه..وصار يعاملها معاملة الطفل.. محمد:وشلون عرفتي انهم ما يحبونك؟ نهى صارت تصيح..ومحمد ما يطالع فيها عشان تكمل كلامها... نهى:كلهم يتطنزون بي بالجمعات وحتى بزرانهم وانا ما اقدر ارد عليهم..وصرت اقعد بغرفتي وصاروا يجون عندي بغرفتي لانهم مهم حاطين قفل للباب.. محمد:قلة حيا..وليش ان شاء الله.. نهى:يقولون ما يصير البنت تقفل باب غرفتها..هذا خطر للبنت... محمد:الحمدلله على نعمة العقل... نهى:انا ما قلت ولا شئ على قراراتهم لان خواتي كلهم عادي بس انا ما يتركوني الحالي ولا يعطوني قفل لبابي ولا شئ.. قلت يمكن عشاني(ونزلت راسها زيادة ونزلت منها دموع)عشاني مريضة ويخافون عليّ... محمد ساكت وما يرد عليها... نهى:وزادتهم اذيتهم لي خصوصا بيت عمي مره ما يحبوني ويشيلون عيالهم من قدامي وانا اصيح واطلع لغرفتي..وصرت ما اقابلهم..بعدين... وصارت تصيح من كل قلبها ومحمد خاف لا يصير فيها شئ من هالصياح... محمد:نهى كملي والله انا معك واسمعك... نهى:يا محمد قالوا عني مجنونه واهلي يخافون على عيال الناس مني.. وتحسب هالخبر بس بيننا..لا طلع هالخبر للجيران وللناس كلها وحتى المدرسه..حتى المدرسه اللي هي كل وناستي فيها طلعت هالاشاعه..فصلت من الدراسه ودخلت بتحفيظ بعيده عن بيتنا وحفظت عشره اجزاء من المصحف باربع شهور واختبرت فيه وطلعت نسبتي97 محمد:ما شاء الله ولا تقولي ها.. خايفه احسدك (وابتسم) ابتسمت نهى وسط دموعها وسكتت ما تعرف تكمل والا لا.... محمد لا حظ سكوتها ويعرف انها من الاستحالة انها تكمل الحالها... محمد:أي يا نهى كملي.. نهى:يكفي ابتسمت ليش اضايقك... محمد انصدم من كلامها..وعرف ان نهى امنيتها الوحيدة انها تشوفني مبتسم بس ما رضي لنفسه هالشئ ويبي يطلع نهى من مشكلتها... محمد:وانا اهم شئ عندي ان نهى زوجتي تصير مبسوطه وتطلع كل اللي بقلبها لزوجها وبس والا ما تبين... نهى:لا شلون ما ابي بس... محمد:بس كملي... نزلت راسها نهى وكملت:دخلت دوره شهرين اعداد معلمات وتخرجت وخلوني مدرسة بالتحفيظ مرة استانست على قرارهم وحسيت بقيمتي وحسيت اني ممكن اخدم البنات وما علمت اهلي باني مدرسة وعلى بالهم اني طالبة واراجع حفظي بالتحفيظ... محمد:وليش ما تعلمينهم بالعكس اكيد بيفرحون؟ نهى:ما عندهم بنات يشتغلون ويعتبرونها منقصة للرجال محمد:منقصة للرجال؟!! نهى:أي..بنت وتشتغل... هذا اكبر عيب عندهم يعني الرجال ما يفلحون.. محمد:أي وش صار معك يا ابله.. نهى:وفي يوم بالتحفيظ انحرقت ثلاجتهم اللي بالمقصف وطلع حريق ودخان (نهى بكل براءة تحكي اللي بقلبها)واغمي علي وبعدها عرفت من وحدة ان حالة الخوف جتني وشافوني الطالبات والاداره يعني مو اغمي علي ..لا جاني اللي خايف منه...وفصلت من التحفيظ... محمد:الله يصلحكِ..طيب وبعدين.. نهى:التهيت بشغل البيت وسمعت من احد من اخواني يقول انه بيعرس واني بكون مصدر.. وصارت تصيح... محمد تدارك الموقف:وش صار؟ نهى:يقول بيوديني مستشفى المجانين(ورجعت تصيح) محمد:اعوذ بالله اكيد انهبل.. نهى:وردت حالتي الاولية وتعبت مرة وابوي اكّد لي انه بس يهذر.. محمد:طيب؟ نهى:وبس!! محمد:رجعنا للصامت..نهى هذي فرصتنا اللي كل واحد يتكلم فيها والله مي حاله بس نسكت ومثل ما وعدتك محد راح يعرف باللي صار بيننا ولا لهم احقية انهم يعرفون.. نهى:محمد انا ما اثق الا فيك..انت بس اللي فتحت له قلبي واتكلمت لا ابوي وامي ولا احد من اخواني واخاف يصير بي شئ اذا انت صرت مثلهم... محمد:لا ان شاء الله يا نهى انا نهى وانتي محمد ..هذا سر بيني وبين نفسي... نهى:يارب لا تحرمني منك... محمد:آمين بس كملي بعدك ما خلصتي.. نهى خرجت منها تنهيدة خوف وحزن على اللي فيها ولانها اول مرة تحكي اللي بها صارت خايفه مرة من النتايج....وكملت.. نهى:يعني حسيت بكل بساطه اني شخص غير مرغوب بالعائلة.. ابوي كل ما شافني احس بعيونه شايل همي.وامي تخاف اني افشلها بالمناسبات وبكل مكان وارتاحت يوم صرت ما احضر اجتماعاتهم.. اخواتي يعتبروني مثل الطفل عندهم واخواني ما يكلموني الا نادرا.. علمت نفسي الوحده واني اتعامل مع اللاشئ..لا كلام مع احد الا اذا اضطريت ولا اجلس معاهم..وما لقيت لي ونيس الا شيئين..الكتب وشغل البيت.. وصاروا هم همي الوحيد.. سكتت نهى ورفعت خصل شعرها اللي طاحت ومسحت دموعها.. والتمت شفايفها وعرفت انها راح تروح بدوامة صياح فقاومت هالصياح وعضت على شفايفها..وقدرت تقاوم... محمد ما نزل عينه من نهى وهو يشوفها وهي تتكلم يحس بشئ يقطع قلبه..معقوله نهى يصير فيها كل هذا ولا احد يحس بها ولا عمرها بيّنت انها مرت بصعوبات وصار يسمع بانصات وكل تفكيره بها وبمشكلتها... نهى:مرت سنة على اللي انا فيه..وانا احاول اتماشى مع الوضع اللي فرضته على نفسي...بس ما في فايده..لان وضعي الصحي تدهور وانا ما اعرف ان هالشئ بيتعبني..تفاجأت بابوي ذاك اليوم ينادي ويبيني اقعد وهو معصب مره من اخواني وانا ما دريت انه عصب على اهلي وهاوشهم لانهم تاركيني الحالي واشوفهم كلهم معصبين..ورجعت لوضعي السابق وبما ان ابوي برى البيت غالبا فما حس باللي يصير له... محمد:لاحول ولا قوة الا بالله....كملي يا نهى والله معك... نهى:اخر الترم اللي يوم جيتنا فيها عند اخوي..تعبت مره بسبب العزله والباقي تعرفه.. محمد رجع تذكر الموقف الي صار له بالبيت... قاعد بالملحق مع صاحبه عمر وقام عمر عنه وهو قعد ينتظره وسمع صوت قوي وصراخ قوي وصوت الصراخ عجيب وغريب وخرج ولقى بنت طايحه بالحوش وتصرخ وحالتها عجيبه..طلعت له بنت متحجبه وقالت له:الله يخليك بسرعه خلينا نوديها للمستشفى..بس صورة البنت ما فارقت عن باله وحده صغيره وتكون بهالحاله الصعبه.. محمد:انا ما اعرف اللي اني وديتك المستشفى... نهى:وديتني هناك واخذوني اخواني وردوني البيت وقعدت اسبوع وانا مرة تعبانة..ولا كأن صار شئ.. وسكتت نهى وهي ميتة من الفشيلة بتقعد تتكلم عن حالتها الصعبة.... محمد تدارك الموقف وقال بسرعه: بس يوم كنت عندك...قال الدكتور انك انتي اللي اهملتي روحك وعطاك نصايح وبعدين... نهى:وهذاك علمي فيه..اخواني فكروا انهم يودوني مستشفى الصحه النفسيه على طول لاني بنظرهم فشيلة بكل مكان.. بس ابوي رافض مره... محمد:وامك وينها عن اخوانك؟ نهى:امي ماتت؟ محمد:شلون ماتت؟وخالتي ام عمر؟ نهى:هذي مرة ابوي؟ محمد:وليش محد قالي ولا انتي ما قلت لي؟ نهى:مدري عنهم هم سكتوا وانا سكت محمد:شلون يعني؟ نهى:مدري!!!! محمد:شلون ما تدرين؟ نهى:كل اللي اعرفه اني انا من الحرمه الثانية وما جابت الا انا وكلهم ما يحبوني... محمد:اهــــــا!!!! نهى:وبس!!! محمد:شلون وبس؟كملي.. نهى:تعبت مره واضطروا انهم ينقلوني للمستشفى...ومن مستشفى لمستشفى وبما اني اهملت روحي او بالاصح ما اداوم على المراجعات واذا تعبت رحت للمستشفى ..فازدادت المشكلة وقال ما في امل من العلاج... محمد:شلون يعني؟ نهى وهي ترفع صوتها:يعني مريضه على طول والحبوب باستمرا آكلها والا بانهار واتعب اكثر.. محمد:طيب ما صار شئ...اللحين اول شئ وعرفت قصة تعبك الله ياخذ اللي كان السبب نهى:لا تدعي عليهم حرام.. محمد:حرام..حرام ندعي عليهم وهم سببوا لك كل هالألم وما تبين ادعي عليهم..الله لا يوفقهم ولا يسامحهم هذي حياة انسان..بس عشان منتي اختهم من امهم سوو لك كذا..حسبي الله على الظالم.. نهى:حرام عليك لا تدعي اخاف انا.. محمد:قلعه تقلعهم خليني ادعي عليهم عشان يعرفون الظلم وش عقابه. نهى:اخاف يا محمد والله اخاف.... محمد:اقـــــول... وانتبه لنهى... عيون حمره مرة ووجها بعد صار احمر وصارت ايدينها تتنافض...وبدت دموعها تنزل باستمرار؟وتناظر بمحمد وساكته ما تتكلم ولا كلمه...مسكها محمد من ايدها واول ما مسكها صرخت صرخة قوية..وعلى طول تركها محمد وخاف لا تجمع الجيران مثل المرة الماضية.. تركها ومحمد وصار منزل راسه لين هدت وسكتت من حالها وحمد ربه انها اهدى من المره الماضيه ولا صارت الحاله قوية مره... نهى:محمد والله مو بكيفي... اشر لها محمد على فمها وقال:ماله داعي هالكلام ... قام محمد وراح للمطبخ وجاب لها حبة وكاس ماء... شربت نهى وهي منزله عيونها بالارض ما تبي تحط عينها بعين محمد عشان ما تتفشل.. محمد:عرفنا اول شئ عن اهلك... باقي جيرانكم اللي ما تطيقونهم ولا تدانيين سيرتهم... نهى ابتسمت ابتسامه صفراء خاليه من أي تعبير عن اللي بداخلها:أي جيراننا محمد:ايه جيرانكم.. نهى:أي جيراننا محمد سكت وناظر بنهى ولاحظ انها ترمش عينها بسرعه وسكت ولا اتكلم ينتظر تعليق من نهى.. نهى ما زالت ترمش عينها واتنفضت ايدها وطاح الكوب منها وسكتت وناظرت بمحمد وضحكت.. محمد رد لها الابتسامه ويقول بنفسه:الله يستر... نهى:انت وش جايبك هنا؟ محمد منهبل:ابد باقعد عن نهى زوجتي.. نهى:وشو زوجتي ما زوجتي اطلع برى ولا اشوفك عجيب والله ما في احد الا انت... محمد:أي ما في الا اناوانتي.. نهى:واذا قتلتك عادي ما تعلم عليّ... محمد:انت وش تخربطين؟ نهى:مافي خرابيط ولا شئ انا حاده السكين من امس واليوم ناويه عليك اذبحك... محمد:نهى انا محمد...انا زوجك احبك... نهى:لا تقص علي بكم كلمه اعرفكم انتو يالرجال خونه.. محمد وهو صدق خايف:من اللي خانك؟ نهى:كل الرجال خانوني؟ وقفت نهى تبي تروح المطبخ بس وقفها محمد وما خلاها تمشي... محمد:نهى !!!! نهى:لا تناديني بنهى تراه اسم غثيث غيّر بدّل بالاسماء.. محمد:آمري تدللي وش تبين من الاسماء... نهى:عندك مثلا ذيب او ذياب او صقر او نمر اشياء كذا متوحشه... محمد:بس هاذي اسماء عيال؟ نهى:ومن قالك اني مني ولد.. ها(وبدت تعصب) محمد:نهى نهى:لا تناديني نهى لا شويتك بعد ما اقتلك... محمد مسك نهى من ايدينها وقعدها بالصالة غصبا عنها... نهى:والله انك اذكى مني بتقتلني قبل ما اقتلك... محمد:وشو اقتلك ما اقتلك؟نهى اهدي يا نهى.... ومسكها من ايدينها وقاعد يقري عليها آية الكرسي والفاتحه وما خلى اية متذكرها الا وقراها....بالبداية نهى ما كانت تستجيب لمحمد بس هدت وسكتت ونامت.... انقلب محمد على الجهه الثانيه ويحاول يمحي كل المواقف اللي صارت له مع نهى وما يبي يتذكرها..بس غصبا عنه ما يقدر ينام من كثر التفكير خصوصا اليوم يوم امه لزمت عليها الا انها تعرف..قام محمد وسكر نور الغرفه وحاول يرقد...ويتقلب يمين وشمال بس مره ما جاه نوم.. يحاول يبعد عنه صورة نهى والموقف الاخير اللي صار معاه..بس ما قدر ورجع له الموقف كأنه صار له تو موب قبل ثلاث شهور... عقب ما افاقت من النوبه العصبيه اللي صارت لها... محمد:ها نهى ان شاء الله مرتاحه.. نهى:انا وين؟ محمد:انتي بالصالة شكلك رايحه فيها من النوم(وابتسم) نهى:انا نمت!! محمد:أي نهى نمتي..وشبعتي نوم.. نهى:بسم الله..(وصارت تلتفت يمين ويسار) محمد:بس انا موجود.. نهى صارت ساكته..اما محمد اللي كان مقهور منها ومليان حقد على الشئ اللي صار منها وكان متفاجأ منها..راح كل شئ كعادتها اول ما تصحى من حالتها ينسى محمد اللي صار بينهم بس اللي صار بينهم هالمرة كان قوي مرة.. محمد:بتكملين نوم والا؟ نهى:لا ما ابي انام وكيف تخليني انام؟ محمد:اجل اذا جاك النوم اقولك اصحي لا تنامين.. نهى:لا اخاف اسويها.. محمد ابتسم وقال:وش اللي تسوينه ترى الحمّام قريب.. نهى:شلون!!! محمد:مدري عنك قلت يمكن ضيّعت مكان الحمّام؟ نهى:الله يعزّك.. محمد تسدح عن هالكلمه يموت بالاحترام والتقدير واللي ما لقاه الا من نهى..لانها بقوه تحترمه.. محمد:ويعزّك يارب.. نهى:محمد محمد:عيون محمد نهى استحت وسكتت.. محمد:رجعنا للصامت تكلمي.. نهى ابتسمت ببرود:انا بس تكلمت والا جبت شئ.. محمد:اللحين ليش ترجعين للسالفة.. نهى:يا محمد ضروري تقولي... محمد:ضروري.. نهى تتكلم بجدية:أي والله ضروري مرّه.. محمد:لا بس كان كلام ما صار ولا شئ... نهى:طـلقـني محمد:لا حوووول....انتي كل ساعه والثانيه تجيبين طاري الطلاق... نهى:يا محمد باختصار انا خطر عليك... محمد:شلون يعني؟ نهى:بما اني جبت سالفة الــــ(وسكتت عجزت تتكلم من الخوف وخايفه انها ترجع لها الحاله مرة ثانية وبنفس الوقت لازم تتكلم تخاف على محمد اكثر منها)... محمد:ما يحتاج تكملين... نهى:يا محمد الدكتور قالي اذا وصلتي لدرجة احب الناس لك بتقتلينه يعني وصلتي لاخطر حالاتي.. محمد:يخربط الدكتور... نهى:لا ما يخربط ما هو على كيفك..انا صدق اتمنى لك الخير والسعاده بس والله اني ما راح اجيب لك الا الفضايح والهم والنكد... محمد:بلا خربطه انتي بتتعالجين وانتهينا.... نهى :علاج ايش؟ محمد:من اللي فيك... تتعالجين وانتهينا... نهى:لو اول ممكن بس اللحين من ااستحالة من الاستحاااااااااالة..انت ما تفهم... محمد:الا افهم بس احنا ما كلمنا الدكتور وجربنا... نهى:انا مجنونه خلاص اللحين وصلت لمرحلة تخوف وابعد عنك وعن اهلك ازين لي وازين لك... محمد:يا نهى انا ما ابغى اتخلى عنك مثل ما اهلك تخلوا عنك..احنا عندنا املين..اول امل وهو الاول والاخير...بالله..الله كبير وعظيم وهو اللي نطلب منه كشف الضر..وثاني امل وهو الدكتور نروح له ونساله ونشوف اذا ما في أي حل ...الشئ اللي تبينه بيصير... نهى:يعني ملزّم على الدكتور... محمد:ملزّم وبقوه بعد... نهى:خلاص اروح مع تاكسي... محمد:وتروحين مع تاكسي ليش؟وانا وش وظيفتي... نهى:انا ما ابغاك تتفشل..افرض ان احد من المراجعين والا الدكاتره يعرفك... سكت ومحمد واقتنع بالكلام اللي قاعده تقوله نهى.... محمد:خلاص اللي تبينه بيصير... محمد:بس انا اللي باصير تاكسي... نهى:شلون؟؟!!! محمد:يعني انا بامثل اني تاكسي وانتي تركبين ورى واوصلك..تعرفين اني ما احب التكاسي... نهى قالت:اوكي.. اخذ تنهيدة محمد ووجع قلبه بقية الموقف لانه قهره وخلاه ما يقدر ينام..تقلب يمين وشمال وما جاه النوم..زهق من هالسدحه اللي لاهو نايم ولا قايم..شغل راديو الجوال وحط السماعه باذنه وحاول يتجاهل السالفة... بالصالة..جاي سلطان ومستانس على الاخر.. سلطان:يا هووووووووووووووووووووووووووووو ووو يا عااااااااااااااااااااااااااااا اااااااااااااااااااا ااااااااااااااااااالم يا نااااااااااااااااااااااااااااا اااااااااااااااااااا ااااااااااااااااااااس ويــــــــــــــــــــــنـــــ ــــــــــــــــــــ ــــــــــــــــــــــــــــــ ــــــــــكم.... لولو:الله يخلف على العقل... سلطان:وش اللي تقولين(وجا بيضربها) لولو:لا اعيد الكلام اللي تقوله امي لي... سلطان:أيه..دامك حافظه التهزيئ اليومي ورى ما تعقلين؟ لولو:الله يخلف على العقل... سلطان:اشتغلتي على الكلام المكرر.... لولو:الله يخلف على العقل... سلطان:اقول ضفي وجهك... وصار ينادي باعلى صوته.... يــــــاهووووووو...يــــانــــ ــــــــــــاس..يـــ ـــاعالـــــــــــــــــــم... .وينكم؟وينكم؟ ام محمد:هلا سلطان وش فيك تصارخ؟ جا سلطان وحب امه على راسها وحب ايدينها........سلطان:يمه بارك لي.... ام محمد:على وشو؟ سلطان:باركي يمه... لولو:الله يخلف على العقل... سلطان:تسكتين والا؟ لولو:الله يخلف عــ(وجا سلطان بيضربها..وراحت ورى امها)... ام محمد:مبروك... سلطان:الله يبارك بعمرك يا احلى ام بالدنيا..اليوم طلعت نتيجتي.... ام محمد:ما شاء الله بشــــــــــر... سلطان:وش يطلع من هالوجه؟ ام محمد:ان شاء الله ممتاز... سلطان:100%100...يمه ما راح تعبي على الفاضي... صارت تصيح ام محمد وجت تسلم على سلطان... ام محمد:ما شاء الله يا سلطان...الله يجعله وقايه من النار.... لولو متنحه ومي فاهمه السالفه:وش السالفه اللي عرفته انه ممتاز وميه بالميه بس بايش؟ سلطان:اخوك سلطان اختبر بالمصحف كا مل واخذت هالنتيجه... لولو:ما شاء الله مبروووووووك..كلولولولوولولوولو ليش... ام محمد:بس فضحتينا... لولو:يمممه خليني افرح والله انه شئ ما ينسكت عليه لازم افراح وزغاريد ورقص واستراحه وعزييييمه كبيره.... ام محمد:أي والله... سلطان:ابد احتفال بيننا وما ابي ولا احد يعرف... ام محمد:بس يا...(قاطعها سلطان) سلطان:يمه الله يخليكي هالشئ من زمان ببالي وما ابي ولا احد يعرفه وهذا شئ المفروض ما يطلع للناس... ام محمد:الله يبشرك بالخير واللي تبيه يصير..بس روح بشر اخوك محمد... سلطان:وينه؟ ام محمد:بالمجلس.... جا سلطان بيروح المجلس والا هذا عبدالله وابوه داخليين البيت ويروح يحب على راس ابوه ويبشره ويضمه ابوه وتنزل منه دمعه... لولو قامت تصيح اول مره تشوف دمعه تنزل من ابوها...وعبدالله متـنّـح على الاخر مو داري وش السالفه... ابو محمد ترك سلطان ومسك وجهه:الله يرفع قدرك يا ولدي.. سلطان حب يد ابوه:وقدرك ابوي..هذا بفضل الله ثم بفضلكم... ابو محمد:الله يوفقك ويرفع شانك بهالقرآن.. سلطان:آمين ويرفع شأنكم يارب..عسى الله يخليني البسكم تاج يوم القيامه..وهذا اقل شئ اسويه بحقكم... ام محمد بعد هي تصيح وماهي قادره تتكلم..جا ابو محمد بيحب راس سلطان بس سلطان ما رضي ومسك يد ابوه وحبها..وحب راسه.. لولو من كثر الصياح راحت للمغسله تغسل وجهها..مي قادره تشوف الموقف اللي صار بعايلتهم.. ويوم جت لقت ابوها وامها وسلطان قاعديين بالصالة..وسلطان يكلم ابوه... سلطان:أي الحمدلله ميه... ابو محمد:والله لو بس جيد جدا كان اكبر شرف لي... سلطان:ما ارضى بالقلييل..انا ميه وبس... ابو محمد:الله يرفع قدرك وييعطيك على قد نيتك.. سلطان:اللهم آميـــــــن... توه عبدالله يفهم السالفه وعرف وش سبب الفرح اللي بالعايله.... عبدالله:مبروك يا مطوع.. سلطان:الله يبارك فيك..عقبالك... عبدالله:مع اني داري لو افحط ما اجيبها بس هذا دعاء لازم اقول آميــــــن... ابتسم الكل على رد عبدالله..بس لولو ما قاومت تخش اللي بقلبها وانفعلت من الفرحه وقالت.. لولو:يا الله... اليوم الفرحه فرحتين فرحي بسلطان وفرحة فوز الهلال... ام محمد رمت عليها علبة المناديل.... وابو محمد قال:يا بنتي وش جاب سلطان لها الداجيين... لولو:ابوي حرام عليكم لاتقول عنهم داجيين... ابو محمد:الا داجيين وفاشليين بكل المجالات.. لولو:هم من ناحية فاشليين فهم فاشليين ما فلحوا الا بالكوره بس اقل شئ فلحوا بشئ مو مثل بعض الناس(وتناظر بعبود) ما فلحوا بشئ... عبود:اخص يا الدبه انا عبدالله تقارنييني فيهم..واذا الشئ اللي بافلح فيه هو الكوره خيبه تخيبني ما ابي هالفلاح... سلطان:تعجبني واحد صفر.. لولو:غلط واحد واحد... وجا عبود ولولو بيتهاوشون بس هذا محمد داخل عليهم..... محمد:ما شاء الله..وش هالاجتماع..اللهم اجعله اجتماعا مرحوما... لولو جت بتتكلم بس امها قرصتها تبي سلطان هو اللي يبشر اخوه..... سلطان:هات البشاره.. محمد ابتسم:بالاول بدك تخبرني.. سلطان:لا اول هات البشاره(يتميع ويقلد السوريين)... محمد:الي تبيه اخلص ضحكوا كلهم..محمد ما عنده وقت ما قدر يكمل هالتميّع... سلطان:ابشرك اليوم طلعت نتيجتي باختباري بالمصحف... محمد:ما شاء الله...بشر؟ سلطان:ابشرك ون هاندردن... محمد:الف الف مبروك والله وطلعت منت هيّن يا الهنيدل... سلطان ضحك وقال:كح كح وش هالغبار اللي جانا..والله انك طلعت داهيه.. لولو:بسرعه وش سالفه هنيدل..داريين انها معياره بس وش سبب التسميه... سلطان:هذي وش بيفكنا منها..الله يصلحك يا محمد.. لولو:لا تصرفون السالفه بسرعه الاجابه.. محمد:زمان كان هادي وحالته حاله وشكله كانه من الهنود اللي عند ابوي يشتغلون..عاد جمعناها والطلقنا هذا اللقب على الاخ الماثل امامكم... لولو:بارك الله فيك يا اخ العرب..هل تود ان اسكب لك قدحا من القهوى.. سلطان:قدح..ههههههههههههههه...ق ويه من وين تعلمتيها.,...لا تتفلسفين وتقوليين من الكوره.. لولو:هاهاهاي..لا من كتاب المطالعه ثالث ابتدائي.. عبود:الله واكبر على الدِقّه..وبالترم الثاني صح لولو:لا بين الترميين.. سلطان:يا ثقل دمك... لولو:لا تخليني ازعل منك وانت آخذ ممتاز.. ام محمد:اقول وش رايك تروحين تدقين على اختك وتقولين لها تجي... لولو:ابشررررررررررري.... واحتفلوا بهالليله اللي ما تنسي من أي شخص بهالعايله..جت ام رغد واستانسوا على الاخر ويوم درى عنها زوجها وعن المناسبه سمح لها تنام والوقت اللي بتجي فيه تجي..تجهزت عائلة لان للهدايا من اول ما اختبر وتوقعوا تكون نتيجه رائعة بس اندهشوا من هالنتيجه اللي محد وصل لها من قبل..وانهالت الهدايا على سلطان من العايله وكل واحد مفاجأته احلى من الثانيه..بس ما استعدوا للحفله بشكل كبير لان سلطان فاجئهم بخروج النتيجه بسرعه...سلطان استانس على الاخر وحس ان هالحب ما فيه أي نوع من الخيانه او أي نوع من التلاعب..حب طاهر صادق ما يخالطه أي نوع خبيث من الحب الغير طاهر..ودعى ربه انه مثل ما لم شملهم اليوم يلم شملهم بالجنّه... يالله يالله ناموا من التعب والفرحه اللي عجز أي واحد منهم يقطع عليهم فرحتهم ويقول لهم جا موعد النوم.. سلطان اصر عليهم انهم يناموا واجبرهم عشان يرتاحوا..وكل واحد نام وهو يفكر بهالحفله البسيطه اللي صارت بسرعه بدون تجهيز مسبق بس كانت احلى حفله صارت لهم... ام محمد على طول طرت له سالفة الزواج بس سلطان بسرعه اتدارك السالفه وصرررفها عشان ما يبتلش بهالسالفه.... عبود بدت علامات الكبر تبان فيه وصد عن الهواش مع لولو..وبدى يهتم بالدراسه اكثر من قبل واتخذ سلطان قدوه له... لولو ما تترك التعليقات الجميله المضحكه بهالحفله..مع انها تتعرض لتهزيئ وهواش بس ابو طبيع ما ييوز عن طبعه...واضافت لهم نكهه خاصه للحفله... ابو محمد ارتفع بعينه ولده اكثر من قبل وصار يفكر بمستقبل ولده اكثر من قبل.... ام محمد كل اللي شاغل بالها هو محمد ونهى..وسلطان متى بتزوجه.... سلطان برغم الالم والعذاب اللي صار له مع نهى والمشكلة ما زالت قائمة لكن عشان اخوه ما وضّح أي شئ وتماشى معهم.. ولا احد من عائلة ابو محمد يدري وش يصير ببيت ابو خالد وابو فيصل... ****************************** ***** دخل عادل وهو مستانس على الاخر..ويغني ويضحك ولا على باله.. عادل:مستني ايه تعال أولها بأى..وعيوني لك حبيبي متشوأه..سنين وايام باحلم بيوم اللأا..حرام نعيش وألوبنا متفرأه.. آمنة:ههههههه يا عيني عالطربان الولهان.. عادل:يووووه يا اني مستانس بشكل ما تتصورينه..اليوم مزاجي راااااااايق... آمنه:دوم ولا هو يوم...بس وش اللي مخليك تستانس على الاخر... عادل:اشياء كثيره..كثيييييييييره..وغمض عينه وتذكر اللي صار..وصار يضحك من قلبه... آمنه اول مره تشوف اخوها مستانس هالكثر وهي مستانسه اكيد لانه علاقتها بعادل اتعدلت وكل شئ بيصير لصالحها.... عادل لف جهة آمنه وقال:آمنه كيف لمياء؟ آمنه انصدمت من السؤال وخافت انه بيرجع لعقله ويسامحها وهي تروح فيها(تجاوبه وهي نصها خوف) :من أي ناحية عادل باستغراب:من كل النواحي... آمنه:مدري عنها ما تكلمنا ولاا تناظر فينا وعايشه هي اللي معطيتها وجه بس لمياء ما تكلمها عادل:ايش رايك فيها؟ آمنه:نعم!!!!!! عادل:اقول وش رايك فيها يعني احتمال اتزوجها لا تناظريني كذا... آمنه:تتزوجها وانت شايف بعينك اللي صار منها.. عادل:يا آمنه كبري عقلك شوي...مني متزوجها عشان سواد عيونها بس اقل شئ استفيد من هالزواج شئ.. آمنه:بس ابوي ما درى بالسالفه... عادل:اذا جا بنقوله السالفه..لازم يدري ويهزأها وبيحاسبها على اللي سوته..بعدين عادي اتزوجها وآخذ من وراها شئ.. آمنه:بس هي اكبر منك وبعدين وش اللي بتاخذه منها... عادل:حتى لو اكبر مني انا باتزوجها عشان فلوسها يعني باجيب لها غرفه او غرفتين واخليها تسكن فيها واخليها وانا اخذ من ورها فلوس واتزوج اللي ابيها..يعني اقل شئ ما احوس الين القى شغل. آمنه صدمت بنذالة اخوها وخافت مرة من هالشئ..يعني أي شئ ممكن تسويه او هو يسويه بس هالشئ صعبه..صعبه مره...سكتت وهي ثلاثة ارباعها وخوف من عقاب رب العالميين وبنفس الوقت ما قدرت ترد على اخوها وهي خايفه من هالخطوه.. عادل:شوفي يمكن يبارك لي الله بهالزواج واخفف دشره بس اني اتركها مستحيل.. آمنه:تتكلم من جد. عادل:لا امزح وش رايك يعني؟ آمنه اول مره تعترض بوجه اخوها:عادل ترى هالشئ حرام..هذي بنت عمك ومهما كان ما يصير تسوي هالشئ واذا انت فكرت كذا اجل الغريب ما نلومه.. عادل:لا يا شيخه فتحتي مجلس علم.. آمنه:لا مجلس علم ولا يحزنون..بس هالشئ جريمه كبيره والزواج مو لعبه تاخذ اللي تبي منه وبس..يا تاخذها بالمعروف والا بلاش..وهذا تفكيرك وابوها ما مات..اجل لو مات وش بتسوي.. عادل:بيصير هالشئ بسرعه ومن دون اعتراض من أي احد... آمنه:عادل خاف الله..هذي يتيمه..واذية اليتيم عقابها اشد من أي شخص ثاني... عادل سكت وحس بعظم الشئ اللي بيسويه بس مستحيل يتعرف عند احد انه غلطان او انه بيغلط عشان كذا ما بيّن لاخته أي تاثر بكلامها وقال لها... عادل:اقول وش رايك تسوين شاهي.. آمنه:بس اللي براسك لازم تنساه... عادل سوى نفسه مو مهتم للسالفه وقال:وحطي مع الشاهي نعناع طيّب.. عرفت آمنه ان ما فيه أي فايده من الكلام معاه وبنفس الوقت ما تبي تضغط عليه عشان ما يخرب الجسر اللي بنته بالموت... اما عادل كل ما يتذكر ان لمياء لها علاقه بخالد يزيد حقد عليها وعلى خالد ويتمنى لو ينتقم منهم الاثنيين بس كيف؟...هذا هو اللحين يفكر بانتقامات متتاليه يضر خالد حتى لو على حساب لمياء... >>في غرفة لمياء..توها صحت من النوم وهي ما تعرف الوقت..وكان كسلانه مره وما تبي تقوم بس خلاص ما في أي مجال انها تنام لها اكثر من 9ساعات نايمه..قامت من فراشها وطبقته ولبست جلالها عشان تروح الحمام..دخلت لحمام وخرجت منه وهي تشوف نظرات عادل اللي ما ترحم..بعد كل اللي سويته بعد لك عين تناظر بي باحتقار صدق من قال كذب الكذبة وصدقها..وصارت تدعي عليه بسرها...ودخلت الغرفه وسببت لها الام هالنظره الي تقهر..المذنب ينقهر من الناس اللي حوالينه ونظراتهم اللي ما ترحم..شلون المظلوم وتلاحقه هالنظرات..واللي قاهرها اكثر ان ابوها ماهم راضيين يخلونها تزوره.. صلت ركعتيين ودعت ربها انها تشوف ابوها وانه يسهل عليها زياره لابوها..وكل ما تذكرت فراس صارت تصيح..سمعت صوت باب البيت ينفتح اكيد راشد جا هذا وقت خروجه من الدوام ونقزت براسها فكره جهنميه وكعادتها خاليه من أي خوف او تردد... بس سمعت صوت فراس معاه وعلى طول ناداه عادل بس ما تحملت هالاذية من عادل راحت بكل قوة وشجاعة للصالة وعليها جلالها... لمياء يوم ناظرت بفراس دمعت عيونها كم لها ما شافت فراس..وهو فرحان بلبس الكاراتيه اللي لابسه وقاعد يستعرض على عيال عمه الحركات اللي تعلمها... لمياء:فروسي تعال ابيك شوي... ودخلت بسرعه لغرفتها تنتظر فراس يجي... بس عادل ناداه وخلاه يكمل حركات ومن الفرحه ان اللي حوالينه مبسوطيين ويشجعونه نسى اخته.. خرجت لمياء من غرفتها وهي مقهوره مره.. لمياء:فروسي تعال بسرعه ابغاك.. فراس:طيب اللحين اجي بس اكمل حركات... لمياء:تعال كلمني بعدين كمل حركاتك.. فراس:طيب وجا بيمشي بس عادل مسك فراس من طرف قميصه..لمياء ما تحملت الموقف ..جت لمياء وسحبت فراس بقوه ومشت وخلته يمشي قدامها ودخلت الغرفه وسكرت الباب...نزلت جلالها لمياء ومسكت فروسي وضمته لها... فراس مستغرب وش فيها اخته لمياء..ما هو عارف وش اللي يصير من وراه... لمياء:كذا يا فروسي تخليني ازعل منك... فراس:ليش تزعليين مني؟انا ما سويت شئ غلط... لمياء:الا سويت شئ غلط..ليش ما جتني وتسلم علي من متى عني ما جيتني... فراس ساكت ما يرد عليها وهو يناظر باخته لمياء اللي اول مره يشوفها تصيح وهو انهبل ما يدري وش فيها اخته... فراس:لمياء لا تبكي..خلاص كل يوم اسلم عليكي... لمياء انتبهت لنفسها وانقهرت لان عمرها ما بكيت قدام فراس مهما حصل ما تصيح ولا تظهر ضعفها قدامه عشان يصير قوي وضغطت على روحها وتكلمت:خلاص حبيبي كل يوم تجي وتسلم علي وتنام عندي بعد..ليش ما تنام عندي بعد.. فراس:انا رجال انام مع الرجال... لمياء:أي حبيبي انت رجال وانا حرمه الحالي انت رجالي لازم تنام عندي... فراس استنانس على الكلام اللي تقوله لمياء واكيد الكلام اللي يطلع من القلب يدخل بالقلب على طول.... فراس:خلاص انام عندك وتشوفين دروسي مثل قبل..والله مره ودي تشرحي لي رياضيات مثل اول اني صرت ما افهم... لمياء خافت على اخوها انه يرسب او ما يتوفق بدراسته وهو املها الوحيد ما تبي أي نقطة فشل تصير بحياته.... لمياء:خلاص روح جيب اغراضك وكتبك وكل شئ وتعال عندي.... فراس:بس اول شئ اكمل حركاتي عند العيال.... لمياء:خلاص فروسي روح عندهم..بس تعال بعدين.. وسكتت لمياء وحست بالاحراج اكثر من انها خايفه من هالشئ بس تشجعت وقالت:واذا رحت هناك نادي راشد..انا انتظره برى الغرفه.. راشد اكبر من عادل بس فيه اخوهم الكبير برى منطقتهم..ما صار مع لمياء أي احتكاك بس تحسه انسان محترم ويخاف الله..اللي مخوفها بالسالفه انه يطلع مثل عادل ويقهرها مثل ما قهرها عادل بس االلي شجعها عمره ما ناظرها بكره او ناظرها باحتقار كل اللي تشوفه بعينه نظرات احترام... فراس:انا جيت... عادل من غير نفس:وش عندك؟(انقهر من اللي صار وانه خرب كل تخطيطه) فراس:باسوي حركات.. عادل:انا ما قلت انك رجال وانك ما تدخل عند الحريم.. راشد:عادل تراها اخته وبعدين فراس صح رجال بس ما فيها شئ يجي عند بنات عمه..صح فراس.. فراس:ايه(وهو مستانس) عادل انقهر وخرج من البيت... فراس:ياربي محد بيشوف حركاتي الجديده... راشد:الا انا باشوفه يالله وريني... فراس:لا انت اختي تبيك... راشد بذهول:اختك؟ فراس بكل براءة:أي لمياء تبيك هناك بس ما قالت لي ليش؟ ابتسم راشد على براءة فراس وقام بتردد عند مدخل غرفتها...ولقاها هناك تنتظره... لمياء:آسفه على الازعاج... راشد نزل راسه:ما في أي ازعاج.. *********************** لمياء:لو سمحت انت مشغول اللحين... راشد:لا ما عندي شئ تامرين بشئ... لمياء حست بالانكسار وبغت تهون بس تشجعت لان ما في طريقه الا هو وحمدت ربها انه كلمها باحترام:عندي مشوار مهم مره...ابي اشوف ابوي صار لي مده ما شفته والله انهم ظلموني وانت تعال معاي بس اشوفه واسأل عن حالته و... قاطعها راشد لانه ما يحب يشوف احد يترجاه:خلاص كلمي احد البنات واطلعوا انا بالسياره... لمياء:الله يجزاك خير.. وراحت بسرعه لعايشه اللي ما تكلمها الا اذا بغت شئ:يالله عيوش وافق راشد يوديني... عيوش تعرف ان لمياء محتاجه احد وان ظروفها القاسيه هي اللي خلتها تقسى عليها وصديقتها اللي حزنانه مره على لمياء كانت تقولها استمري معاها وراح تحبك هي مسكينه وتحتاج احد بس كبريائها هو اللي خلاها انها تحس انها مي محتاجه لاحد.... عيوش:يالله انا بالبس عباتي... لمياء بتشقق من الوناسه:يالله..وراحت بسرعه تجهزت ولبست عباتها ودخلت على عيوش اللي توها تلبس المسفع... لمياء:يالله عيوش باطير انا... عيوش:ما شاء الله امداك تلبسين.. لمياء:لا تكثرين هرج بسرعه خلينا نروح.. راشد اللي ماهو راضي يصدق السالفه اللي صارت لمياء..طبعا امه ما قصرت راحت قالت له كل السالفه واي شئ يصير بالبيت امه تروح تقوله والا هو ما يهتم لها السوالف ولا يسأل عنه..واعجب باهتمام لمياء بابوها وانه رغم الظروف تبي تزور ابوها وراح بافكاره بعيد كيف كانوا ساكنيين ببيت واحد ولعبهم مع بعض وانهم تربوا ببيت واحد..يعني استحاله تكون لمياء مسويه هالشئ وعادل يعرفه متهور وشكاك باي شئ...وقطع عليه تفكيره يوم دخلت عيوش ولمياء السياره...وبنفس الوقت انهزت صورة لمياء غصبا عنه..مع انه مو مصدق السالفه بس شئ اقوى منه يصر عليه على هالتفكير الاعوج... راشد مؤدب وخلوق ولا يحب الهواش والخناق عكس اخوه عادل اللي ما ترك احد ما اتهاوش معاه وعادل من النوع الحقودي اللي ما ينسى أي سالفه لاي احد... دخلوا لمياء وعيوش السياره..وحرك راشد السياره... راشد يناظر قدام ويسال:عايشه انتي... عايشه:أي..(وترفع نفسها تعدل عباتها) شلون عرفتني؟... راشد:طولك ما شاء الله بتوصلين لنا يالرجال... عايشه:الله يسمع منك نفسي اصير العملاق الاخضر(ومسكت عباتها وترفعها على راسها).. راشد:العملاق مره وحده خلاص كافي طولك.. عايشه:لا ان شاء الله اصير اطول من كذا... راشد:لا عاد مو حلو الطول مره على البنات.. عايشه:ما باقي الا بنتيين بالمدرسه واصير اطول وحده...(ورجعت راسها على ورى).. راشد:لا اله الا الله... راشد صوته جهوري وثقيل وصوته معطيه هيبه...وحس ان لمياء ساكته وما تتكلم استحى وصار ما يتكلم.... اما عايشه ما تركت ولا شئ الا اتكلمت عنه..وهي بعد ربكه تتكلم وتتحرك كثير..وربشه على طول.. وبس تسال راشد عن المحلات والاشياء الجديده اللي فتحت...وراشد يرد عليها بكل ثقل وعلى قد السؤال تكون الاجابه.... لمياء دخلت بجو ثاني ولاهي منتبهه لسوالفهم..قلبها وتفكيرها معلق بابوها..شلون حالته وش بيصير له...فاق من الغيبوبة والا لا...كان بالها مشغول مره بابوها..وتذكرت اخر مره كانت مع ابوها والموقف اللي صار لها صارت تبكي..... وقف راشد عن المستشفى وركن السياره ونزل معاهم...لمياء قالت له عن غرفة ابوها وقالت له يسأل الدكتور عن حالة ابوها وهي وعيوش بيروحون لابوها.... لمياء كل ركن بالمستشفى يجيب لها كآبه وتتذكر اول ما جت المستشفى والحوسه اللي صارت لها والممرضه الي تهاوشت معاها...كل شئ بهالمستشفى يجيب لها الخوف والقلق من المستقبل.. >>بنفس الوقت خالد يحوس بالمستشفى يبي يدخل على منصور اللي حس بروحه بيموت لو ما شافه وطفش كل الموظفين والدكاتره عشان يشوف منصور بس ما في أي فايده وهو داخ من اللف والدوران..وابو خالد ما تركه كل شوي يدق وخايف اهل البيت يقومون ويدرون عن منصور وعن حالته ويصير فيهم شئ... ابو خالد:ها خالد فيه أي جديد.. خالد:لا والله هذاي احوس بالاقسام.. ابو خالد:واسامه؟ خالد:الى الان ما رد علي والا انا مكلمه... ابو خالد:كلمته وعلمته باللي صار.. خالد:ايه علمته وقال بيرد علي وان شاء الله نشوفه.. ابو خالد:طيب وش فيه ما رد... خالد:هو بيجي على المستشفى معه ورقة السماح بالزيارة وبندخل عن طريقه... ابو خالد:اذا دق عليك او جاك او صار أي شئ بلغني.. خالد:ابشر يبه... ابو خالد:فمان الرحمن.. خالد:فمان الكريم... ما امداه ينزل خالد جواله الا هذي لمياء تمشي من قدامه ورايحه جهة ابوها...خالد عرفها من شنطتها اللي ما غيّرتها.. ومشيتها لانها تمشي بسرعه شوي وحفظ هالمشيه من كثر ما يتقابلون بالمستشفى.. بس استغرب معاها بنت ورجل اول مره يشوفهم معها... وقف خالد ووده يسألها مية سؤال يدور براسه ويبي من يجاوبه بس ما يقدر ولا هو وقته... قعد على كرسيه والا هذا اسامة متصل عليه... اسامة:هلا خالد.. خالد:هلا بك..وينك يا رجال؟ اسامه:لا تاكلني انا بالاستقبال تعال عندي... خالد من الفرحه سكر بوجهه السماعه ونسى كل شئ يدور براسه وصار كل تفكيره بشوفة اخوه منصور..خالد يمشي مسرع وما يبي احد يعترض طريقه ووده يضرب أي احد يوقف بطريقه وهو ماشي دق على ابو خالد وبشره ان اسامه بالمستشفى عند الاستقبال... اسامه:هنا يابو الشباب... خالد:هلا..يالله بسرعه... اسامه:على وين؟ خالد:على منصور... اسامه:طيب شوي شوي علينا.... خالد:والله انك رايق... اسامه:انت اللي فاير دمك... خالد:من هنا نمشي... ويمشي اسامه مع خالد ويحاول يخليه يمشي بشويش بس مافي امل... اسامه:خالد... خالد:سم... اسامه:سم الله عدوك..محد معاك من الاهل... خالد:لا ان شاء الله يجون وقت ثاني بس انا وابوي هالمره.... اسامه:أي بس... خالد:امش انت بسرعه لاحقين على الزيارات... اسامه:خالد اكلمك وش فيك؟ خالد:تعرف اني من جد اشتقت لمنصور... اسامه:أي بس تدري يا خالد ان منصور مهوب مريض عادي خالد بتناحه:شلون يعني ؟ اسامه:يعني عليه قضية؟ خالد:والمطلوب؟ اسامه:كلم ابوك وامك يزورونهم هم اكثر اثنين لهم الاحقيه بهالزياره.. خالد:اكثر اثنين شلون يعني ما اقدر ادخل انا اسامه:اعذرني خالد..بس ما تقدر لاني انا سويت ترخيص للاب والام وهذا المسموح خالد:هذا اللي طلع معك.. اسامه:بعد ثلاث واسطات هذا المسموح.. خالد:ما قصرت يا اسامه واعذرنا ترى الاخلاق شينه بعد منصور.. اسامه:عاذرك ومار بنفس الحاله.. خالد:اجل بادق على الوالد.. اسامه:خذ راحتك... حاول خالد يكتم قهره وغيضه بسبب هالسالفه بس ما قدر وتعامل مع اسامه بجفاء..بس شئ غصب عنه..منصور بالنسبه له اكثر من اخ وما شاف منه الا اللي يرضيه وكان مشتاق له حيل وعارف انه مستحيل يكون مجرم.. ومنصور انسان محترم ويقدر اللي اكبر منه ويوم حصل له هالحادثه تجددت ذكريات خالد وما لقى الا اخ محترم ومقدر ويعرف يتعامل مع اللي اكبر منه.... خالد كلم ابوه وشرح له الوضع..وابو خالد كلم ام خالد وشرح لها الموضوع وقال لها ان ما فيه أي شئ بس ام خالد ما تترك عادتها قامت تصيح... انتهى خالد من المكالمه وجا عند اسامه... اسامه:كلمت الوالد.. خالد:ايه..واللحين بيجي هو والوالده... اسامه:طيب اللي يعطيك بشاره حلوه وش له.. خالد:تتطنز.. اسامه:ايه اتطنز..بكيفي.. خالد:والله انك رايق... اسامه:اسمع هي مخاطره بقوه..بس عشانك نجازف.. خالد:متأثر بشغلك مره..عشانك بالمباحث صار كلامك مجازفه ومخاطره.. اسامه:وما شفت شئ.. خالد:طيب وش البشاره اللي بهالوقت بتجي.. اسامه:انا لازم ادخل مع ابوك وامك.. خالد:نعم!!وشلون ياخذون راحتهم.. اسامه:هذي التعليمات لازم اكون معاهم... خالد:طيب وش دخل ذا بالبشاره.. اسامه:طبعا انت تصير اسامه وانا اصير خالد... خالد تعجب وتنح على الاخر:ما فهمت!!! اسامه:يعني انت المفتش وانا خالد ولدكم... خالد:الى الان ما استوعبت.. اسامه:العن ابو التناحه..اقصد انت ادخل بصفتك اسامه وانا بانتظر برى على اني خالد... خالد تنّح بقوة:ويرضون؟؟!!! اسامه:يا ابن الحلال هي شغل فبركه لا اقل ولا اكثر.. خالد:بقوة لايق مباحث.. اسامه:ترى هذي تهزيئة رقم خمس وسبعين بعد الألف.. خالد:ههههههههههههههههههههههههه ههه اسامه:هذا الوالد.. خالد:أي عن اذنك شوي... راح خالد لابوه وكلمه وفهمه سالفة الزيارة..ودخل ابو خالد وام خالد وخالد واسامه... خالد مسك امه ومثلت امه انها ما تقدر تمشي وابو خالد سوى روحه كبير بالسن ويالله يالله يمشي واسامه معه ورقة السماح بالدخول..نجحت العملية وخرج اسامه على انه خالد وخالد صار داخل.. ام خالد اول ما شافت منصور صارت تصيح..شكله ما يطمن واكثر شئ قهرها انه مغمى عليه ما يحس بوجودهم..وملفوف بالشاش وابر المغذي بكل مكان... ام خالد وهي تصيح:هذولي وش سوو فيه..حسبي الله عليهم... ابو خالد:يا ام خالد ادعي له بالشفا بدل هالصياح... ام خالد:حرام عليهم وش هالابر اللي بكل مكان...يا عمري عليك يا منصور..وراحت ام خالد عند منصور ومسكت يده وحضنتها وصارت تحبها وهي تصيح..وترجع يده مره ثانيه واذا مسكتها صارت تصيح..المسكينه شكلها يقطع القلب..والممرضه انهبلت وراحت نادت الدكتور... خالد:بس يمه ترى ما فيه الا العافيه... ام خالد:وين ما فيه الا العافيه..والابر بكل مكان والشاش مغطي على نص وجهه والشرطه بكل مكان...تكفون كلموهم خلوه يطلع.. ابو خالد:بيطلع ان شاء الله..هو بس مغمى عليه وان فاق من غيبوبته بيطلعونه..بس انتي ادعي له ولا تصيحيين... ام خالد سكتت عن الكلام بس دموعها تصب كل ما تشوف حالة ولدها وماهي قادر تسوي له شئ.. ابو خالد من صدمته بمنصور عجز عن التفكير وما توقع بيكون شكل منصور كذا واللي زودها بعد ام خالد اللي تصيح وما قدرت تسكت.... طلعوا من الغرفه وهم شبه منهاريين..ام خالد بحاله صعبه وخالد اللي تعود على هالمناظر بس يوم شاف اخوه كأنه انمحت كل صوره عالقه بذهنه الا صورة لؤي وام لؤي بالحادث ورجعت له كل لحظه مرت عليه..وحالة منصور مهيب بعيده عن لؤي.... وام خالد اللي مسيكينه ما تقدر تتحمل ودمعتها على عينها..ومنصور ولدها..اللي دايم معاها وما يتركها ما حست بقيمته الا يوم طاح..والمسيكينه ما تقدر تتحمل هالصدمه لو كانت بانسان ثاني شلون ولدها... رجعوا الثلاث بالبيت وكلن شايل همه بقلبه وكلن يحاول ما يكلم الثاني عشان لا يتخرعون اللي بالبيت...وابو خالد حرّص على ام خالد انها ما تجيب طاري حالة منصور للبنات وام فيصل... **************************** بنفس المكان وبقسم قريب من القسم اللي موجود فيه منصور كانت هناك لمياء طايره من الفرح وهي تحس انها بحلم ما هو علم....ابوها صحى وصار يتكلم معاها حالته افضل بكثير من قبل...وودها تطير تسوي أي شئ عشان تحس انها على ارض الواقع.... ابوها خرج من قسم الطوارئ وطلعوه للدور الثاني واحسن شئ سووه انه بغرفه الحاله.. لمياء:ها يابو لؤي شلونك؟ سعد:بخير دامني اشوف هالوجه... لمياء:الله لا يحرمني منك يا يبه...متى طلعت؟وكيف؟وشلون؟وليش محد علمني؟ سعد:شوي شوي اكلتيني بالاسئلة... لمياء:والله من شوقي لك..والله يبه اني اسعد انسانه... سعد:الله يتمم عليك هالسعاده..ابد مالي الا ساعه طالع وانتي ما شاء الله على طول جيتي... لمياء:الحمدلله على سلامتك يبه.. سعد:ولو انها جت متأخره بس الله يسلمك... لمياء تضحك من خاطرها ودها لو تحضن ابوها بس شئ ما اتعودت عليه ومستحيل تسويه ومن فرحتها نست راشد وعيوش ولا تدري وينهم.... سعد:اخبار فراس وليش ما جا معك؟ لمياء:ما دريت انك طلعت والا لو داريه كان جبت لك قهوه يحبها قلبك وجايبه تمر اخلاص وحنيني.. سعد:الله يصلحك يا لمياء اللحين وش يصبرني لبكره عن الحنيني... لمياء:لا بتصبر هذا حنيني مو حيا الله... سعد:أي والله..يا حلو ذيك الايام يوم تطبخها لنا امك وتجيبه على الصبح.. لمياء:الله يرحمها برحمته ويجمعنا معها بالفردوس الاعلى... سعد:اللهم آمين... وسكتوا فتره كل واحد يتأمل بالثاني..الاب الحنون اللي محتاج بنته بهالاوقات ووده يساعدها وهو يعرف ان محد عندها...والبنت المظلومه اللي تبي ابوها اكثر من قبل ومحتاجته لو بضعفه.. سعد:أي يا بنتي وينك فيه؟ لمياء عرفت ان ابوها يبي المختصر لحياتها عقب ما طاح بالمستشفى.... لمياء:ابد ببيت عمي قاعده انا وفراس..وما قصروا علينا بشئ...وخالد الله يجزاه خير كان كل يوم يجي المستشفى ويزورك ويطمن عليك وعن طريقه تبرعوا لك بالدم... سعد:الله يجزاه خير والله انه نشمي ورجال... والتفت سعد على لمياء يناظر بعيونه يشوف مستقبلها المجهول اللي خايف منه اكثر من قبل...وما لقى فرصه الا هالوقت يقوله للمياء... سعد:يا لمياء... لمياء:سم يبه... صــــــــــبــــــــــــــــــ ــــاح اللـــــــــــــــــــــيـــــ ــــــــــــــــــــ ل والا هذي عيوش داخله ومعها راشد... تغشت لمياء وابعدت عن ابوها شوي عشان راشد يدخل ويسلم على ابوها.... راشد:الحمدلله على السلامه يا عم وما تشوف شر... سعد:الله يسلمك..الشر ما يجيك.. عيوش:هلا والله بعمي تو ما نورت المستشفى...(ودق راشد عيوش من يدها يعني اسكتي)... سعد:وشو نوره كان من المستشفى ما نبيه.... سحبت لمياء عيوش:وين رحتوا... عيوش:رحنا وشرينا ورود وحلاو لعمو.. لمياء:مالها داعي الله يصلحكم... عيوش:والله راشد الي لزم عليّ.... وراشد والعم سعد اندمجوا مع بعض بالسوالف.. والتهت لمياء بعيوش اللي كل شئ تسوي له سالفه..حكت لها عن محل الورود وعن محل الحلاو...وكل شئ بالتفصيل الممل.... انتهت الزياره وراحوا راشد وعيوش ولمياء اصرت انها تقعد مع ابوها مرافق...وراشد ما قال شئ.. ومساكين ما دروا وش بيصير من ورى عادل وابوه.. *********************** صحى سلطان من النوم بس اليوم بالنسبه له غير عن كل يوم..يوم بيملاه نشاط وفرح وكل شئ يفرح قلبه..امس طلعت نتيجة اختباره وبعد الحفله المصغره اللي اهله سوها..حاس بروحه بيطير من الفرح..تعدى من الصاله والا اهله متجمعين وقاعديين ينتظرونه..دخل الحمام وبيجيهم بعد ما يصلي الضحى... لولو:عبود حط الكوره على اثنين ابلعب معاك.. عبود:ما عندنا بنات يلعبون كوره... لولو(تقلد عبود باستهزاء) :ما عندنا بنات يلعبون كوره عبود:يالله طسي ما في لعب.. لولو:من زينك والا من زين السوني حقك..وليته سوني2..1 وتنافخ عليّ..جيب الثاني وتعال تفشخر عليّ.. عبود:يمه سكتي بنتك..هذي تبيني اقوم عليها.. لولو:انا اختك اللي اكبر منك والمفروض تحترمني عبود:هههههههههههههههه.. لولو:وش فيك تضحك..اكيد تضحك على السوني ذا ايام جدي الله يرحمه... عبود:يقالك بتعصبيني..لعب ما فيه لو تفحطين... ام رغد:والله انكم رجه..الله يعينك يا يمه عليهم... ام محمد:آمين..الناس تكبر عيالهم الا عبود ولولو.. عبود:يمه لا تقولي عبود انا رجال قولي عبدالله... لولو:ههههههههههههههههههههههههه ه عبود:وش فيك تضحكين... لولو:لا ابد تذكرت نكته..اكيد اضحك عليك... عبود:قسم بالله ان قمت عليك لاموتك... لولو:ترى فيها قصاص.. ام محمد:لولو قومي عن اخوك... لولو:يا سلام ليش ما تقولين عبود قوم عن اختك... ام محمد:لولو ترى ما يصير لك شئ طيب.. لولو:والله كل ما اتهاوشنا انا وعبود حطيتوني انا الغطانه... ام محمد:اقول روحي قومي اخوك محمد ومري عل ابوك خليه يجي يتقهوى عندنا... <<هذا سلطان جاي يم الصاله وحب على راس امه:انا اقوم محمد... ام محمد:اجل انتي روحي نادي ابوك... لولو:يعني ما في مفر لازم هالمشوار.. ام محمد:انا وش الله بلاني بهالبنت عجّازه ما تبي الشغل ولا المشاوير.. لولو:يمه عشان تحسين بالتنوع بين بناتك مو مثل بعض.. ام محمد:لا والله ليتك مثل ام رغد.. ام رغد:وش دعوى عاد نسيتو ان اسمي لطيفه.. عبود:والله ام رغد احسن من لطوف... ام رغد:لا احنا البنات حتى لو اتزوجنا نبي الدلع مو مثلكم يالعيال... لولو:يا الله ودي احد يدلعني ويجيب لي هديه وما يرسلني ويخليني مثل الاميره.. ام محمد:عشم ابليس بالجنه..روحي بسرعه ونادي ابوك... لولو:حتى حلمي ما تخلوني اكمله..الله يزوجني وافتك.. ام محمد:ياربي يهالبنت ممسوح منها الحيا.... >>وعند محمد... دخل سلطان على محمد ولقاه داخل بجو ثاني ولا انتبه للي دخل... سلطان:السلام عليكم... محمد:......................... ..... سلطان:رد السلام واجب.. محمد:......................... . سلطان مسك دفتر كان على المكتب حق محمد ورماه على محمد.... محمد انهبل ما يدري وش اللي جاه ومن وين..وهو بحلم والا علم..ونقز من مكانه محمد:بسم الله وش ذا.. سلطان:هههههههههههههههههههههههه ه محمد:الله يقطع ابليسك..وش فيك وش اللي جاني... سلطان:وعليكم السلام... محمد:ليش انت سلمت... سلطان:أي سلمت وقعدت اسمع لك وانت تكتب قصايد بأميرة قلبك واندمجت ويوم وصلت لشئ قوي قلت يا ولد استح على وجهك خلاص الى هنا وبس.. صادفت كذبة سلطان ان محمد صدق كان يكتب اشعار بس بينه وبين نفسه وتخرع ظن ان كلام سلطان صدق وانه كان يتكلم... محمد:ما شاء الله وانت تسمع كل شئ.... سلطان:لا امزح عليك انت تصدق كل شئ... محمد:انا قلت ما امداك امس جايب نتيجة ختمك للقرآن واليوم تكذب... سلطان:والله قويه...انا عاهدت نفسي اني ما اكذب بالمزح مع انه قليل بس شئ اتعودت عليه وهبلت بكل العيال..بس الله يهديني انا لي فتره مبطل هالعاده بس انت الله يصلحك ضبطت الموقف لي واضطريت...ان شاء الله ربي ما ياخذنا ان نسينا... محمد:والله وقمت تحدث وش عندك يا الشيخ سلطان.. سلطان:تعال للصالة نبي نتقهوى.... محمد:ان شاء الله(وسكت محمد بعدين قرر انه يتكلم وقال) بس بعد القهوه ابي اتكلم معاك بموضوع... سلطان:خير ان شاء الله... محمد:خله بعد القهوه... سلطان:طيب.... ومسك سلطان يد محمد وورشد ايده على فوق وخلاه يوقف...وراحوا للصاله يتقهون مع بعض... ام رغد:يا حلاة هاللمه أي والله... سلطان:ترى نعلم رجلك وتروحين فيها... ام رغد:تهديد ذا والا وشو؟ سلطان:وش رايك انتي؟ لولو:تصدقون ان فيه ناس ما يشربون قهوه... سلطان:الله يالاكتشاف اللحين...مسويه انك عالمه... لولو:انت وش فيك قمت عليّ..اقصد مو بس ما يشربونها حتى ريحتها ما يحبونها وحده تقولي اذا سوو قهوه في البيت بجيني صداع من ريحتها... ام رغد:عادي كل واحد واللي اتعود عليه..اهل نجد تعودو على طباخهم وعلى كيفهم بالقهوه واهل الحجاز تعودو على طباخهم وحتى اهل الشرقيه والشمال والجنوب...وحتى بالقهوه كل منطقه لها طريقه تسويها وتعجبها وكل منطقه تفضل قهوتها... سلطان:والله يا احنا السعوديين حفله..جنوب وشمال وشرق وغرب ووسط..وكل واحد له لهجته وطباعه وعاداته... ام محمد:والله انا اول ما نعرف غير النجديين ولا نعرف الا عاداتنا وطبايعنا..اما اللحين ما شاء الله اللحين نعرف عن كل الديره ما شاء الله... محمد:يمه من سمعك وانتي تقولين ديره يقول السعوديه بس مدينه وحده مهيب مدن واجد... سلطان:تقدم العلم والتنكلوجيا هو اللي خلانا كديره وحده نعرف عن بعض وعن كل شئ وعن طبايع كل منطقه وعاداتها..و بدون لا نروح لنفس الديره ونفس المدينه... لولو وعبود صفروا وصفقوا وقالوا:اححححححححححححححححححححلى .... سلطان عجبته حركة التصفيق والتصفير مع بعض وصار يضحك منهم... لولو:العن ابو التكنولوجيا...والله منتب هين يا سلطان.... عبود:هو سبحان الله العلم والتكنولوجيا اصدقاء من هم صغار.... ام رغد:لا احد يسمع كلامكم بتشوهون صورة اخوكم سلطان... لولو:لا لاتخافين عليه عقب التكنولوجيا الكل بيحسده.... سلطان:هذا وانتي ما سمعتي المصطلحات الثانيه.... لولو:لا يكفيني تكنولوجيا ابحفظها وارددها لي شهر عشان ما انساها....وباكشخ بها عند البنات.. ابو محمد:خير يا عيال وش اللي صاير... ام محمد:تعال تقهوى..ما تعرف عيالك ورجتهم.... ابو محمد:اللحين باجي بس تعال يا سلطان ابغاك تشوف لي هالكتاب.... سلطان:ابشر يبه... وراح سلطان عند ابوه للمكتبه..... لولو:اشوى ما ناداني..... ام محمد:والله انك ما تستحين.... لولو:أي يمه على طاري الحيا ما دريتوا وش صار.... عبود ترك يد السوني واتحمس بالسالفه وام رغد تأكل بنتها رغد زبادي وتسمع ومحمد اللي كان مو معاهم انشد لهالسالفه لان طريقة لولو بالعرض كانت مشوقة... ام محمد:خير وش فيه.... لولو:الدنيا واقفه قاعده وانتو هنا ما تدرون عن شئ.... انا اعرف عن بيت خالتي ام فيصل خبريين وكل واحد اشد من الثاني... ام محمد:اعوذ بالله عسى صاير لهم شئ.... لولو:ايهييييي والله ما تدرون عن شئ.... ام رغد:تكلمي يا لولو خرعتينا.... لولو:اذا جا سلطان وابوي.... ام رغد:لولو امي على اعصابها قولي وش فيه...... لولو:اول شئ الجوهره انخطبت ما شاء الله من ولد عمها منصور وشكلهم وافقوا وتبي تصير الملكه بالاجازه... ام محمد:ما شاء الله...الله يوفقها ورى ما علمتني ام فيصل الله يصلحها... ام رغد:لولو متاكده من الخبر والا بس سالفه.... لولو:الا وحده من صديقاتي اختها صديقة جوهره... ام رغد:وافقوا والا ما تدرين.... دخل عليهم سلطان وليته ما دخل:وش عندكم وافق وما وافق... ام رغد:ولا شئ... محمد هنا انتبه على تصريف السالفه وان ام رغد ما تبي سلطان يعرف بشئ...وحز بخاطره لا يكون سلطان يبيها.... لولو:ما دريت تعال عشان تسمع الخبريين.... ام محمد:وش الثاني... لولو:أي يا عمري منصور خطيب جوهره.... سلطان من سمع خطيب الجوهره وهو عجز يستوعب السالفه واهله كلهم عادي كانهم سامعيين بالسالفه وكان شئ عادي يصير....وصار يناظر بام رغد بس ما لقى أي جواب.. ام محمد:لا حول ولا قوة الا بالله... سلطان:وش فيه؟ لولو:اقولك طبوا عليهم مدري مخدرات مدري ارهاب ومسكوهم الشرطه ومنصور بالمستشفى... سلطان:ومن متى هالكلام؟ لولو:توه ماله الا يوميين صديقتي يصيرون جيرانهم وهي اللي قالت لي.... محمد:واهل الحي كلهم يدرون عن منصور.... لولو:شكله ايه لانه كأني فهمت منها ان منصور جاي وقت المداهمه وصقعوه بالرصاص بس مايدرون من مين... محمد:لا حول ولا قوة الا بالله...قوم يا سلطان خلنا نروح لبيت خالتي ونستفسر عنهم...ونطمأن عليهم وعلى سالفة منصور... سلطان:يالله وانا باروح اخبر ابوي ونروح كلنا.... وقام محمد وسلطان وابو محمد وراحوا لبيت ابو فيصل.... لولو:والله تعجبني حركات الشهامه.... ام رغد:والله انك رايقه..امسكي رغد... لولو:هلا برغوده..هلا بقلبي.... وراحت ام محمد تتصل على ام فيصل وتتطمن على منصور واهله.... ونوره اختهم الصغيره ملتهيه بالعروسه اللي مسميتها ريمي على المغامره ولا تدري وش اللي يدور حوالينها....وعبودي يلعب بالسوني وكالعاده كوره.. ******************** سلمان:يمه يالله ما تبون تروحون لبيت ابو فيصل.... ام سلمان:الا بس حنان ما هي راضيه تجي... سلمان:وما عرفتي وش فيها... ام سلمان:لا والله مهيب راضيه تتكلم.... سلمان:خلاص انا اروح عندها واكلمها... ام سلمان:كلمها يمكن تسمع منك... وراح سلمان عند حنان ودق عليها الباب..... حنان:ميــــــــــــن؟ سلمان:انا الحرامي : )...انا سلمان خان... حنان:عاد سلمان خان مره وحده...قول شاروخان اخف شوي... وفتحت حنان لسلمان... سلمان:وش ناقصني انا عن سلمان والله ما يسوى ظفري... حنان:هو من ناحيه اخلاقيه حتى ظفرك كثير عليه... سلمان:يعني وشي ذي مدحه ودمج معها طنازه... حنان:استريح انت سعودي يكفي هالمفخره وهو هندي مصيره يشتغل عندنا زبّال... سلمان:قويه والله زبّال... حنان:هندي لا تحط مقامك بمقامه... سلمان:عاد ما كانك احتقرتيه مره.. حنان:احد قاله يصير ممثل.. سلمان:ههههههههههههههه سلمان حب يدخل بالموضوع على طول ولا كانه داري عن شئ.... سلمان:وينك ليش ما تجهزتي تبين تاخرينا.... حنان:لا منب رايحه... سلمان:يالله بلا دلع عشان ممرضه وراتبك زين اتدلعتي علينا.... حنان:اللي يسمعك وانت تطري الراتب يقول ذي طقة العشرة الاف..كلها سته الاف... سلمان:نعمه سته..احمدي ربك مو انا يا حول الف الا عشرة ريال.... حنان:طيب صير موظف وبتلاقي ازين من هالراتب... سلمان:شكلي باصير ممرض.... حنان:لا لاتصير والله متعب بعدين ما زالت شغله ماهي مشرفه بالنسبه للرجال وعار بالنسبه للحريم... سلمان:واحنا وش دخلنا بالناس اللي ما ترحم وتتكلم وهي قاعده على كرسي ومرتاحه....يا حنان والله لو سمعنا لكلام الناس ما سلمنا وكل واحد له رأيه..والله لو واحد فيهم محتاج كان ما قال اللي قاله...وبالعكس شجع على العلم والشغل باي وظيفه.... حنان:أي والله انك صادق..... ودخلت ليلى عليهم.... ليلى:يالله هذي ثالث مره يتصلون ويقولو ليش تأخرتو.... حنان:يتصلون والا تتصل.... سلمان:انا مالي دخل لا تناظروني : ) حنان:انا منب رايحه روحوا لا أأخركم... سلمان ما حب يضغط عليها وقال:هالمره لكن المره الجايه بتجين غصبا عنك.... حنان:ابشر.... وراحوا ام سلمان وسلمان وليلى واختهم اللي بالمتوسط رانيه... وخلود كانت محتاجه ليلى حيل اكثر من قبل تبيها تبي تحكي لها اللي صار تبي تفضفض لاحد وما عندها الا ليلى عشان كذا اصرت على ليلى انها تجي..... وخلود واهلها ما زالوا ببيت عمهم... حنان جتها حالة غريبه ما يدرون وش فيها جتها فتره ما تاكل معهم ولا تقعد معهم واتفاجأو كلهم بقرارها انها ما تبي تشتغل....وتبي تستقيل من وظيفتها حاولوا معها بكل الطرق بس ما في أي فايده... ولولا رحمة ربي ثم المستشفى اللي مره يبونها كان هي اللحين استقالت لكن المستشفى عطوها اجازه مفتوحه بدون راتب الين ترجع.... الكل مستغرب من حالتها والشئ اللي جاها..ومسيكينه ما تاخذ شئ من راتبها تحطه عند امها واللي يبي ياخذ منها ومعطيه امها كافة الحرية في التصرف براتبها واذا نقص عليهم أي شئ ياخذون من راتب حنان.... حنان انسانه عمليه تركت جانب المشاعر واهتمت بعايلتها اكثر من اللازم..ولانها مرت بظروف قاسيه وصحبه ماهي كويسه جتها صدمه من المجتمع وكرهت الصداقة وصارت تهتم بمواضيع الرجال واشتغلت واعتمدت على نفسها واللي ساعدها انه في ناس مثل تفكيرها.... رغم صرامتها وحدتها الا ان فيها طيبه محد يتخيلها تحب اخوانها وامها بشكل جنوني هذي هي عايلتها الماضيه وهذا هو متسقبلها هذا كان كل همها..تسعد اخوانها وتخفف عبأ ابوها تذاكر لهم تحفزهم وترغب فيهم طرق النجاح..... الكل مشى معها وسمع لها الا احمد اللي عجزت تسيطر عليه...عجزت تتغلب عليه وتغير افكاره لان صحبة احمد سيئة وكثيره والكثره تغلب القلة.... ********************* في بيت ابو فــــــــــــيــــــــــــــــ ـــــــــصــــــــــ ـــــــــــــــــــــــــل ابو فيصل:ها يام فيصل البيت ناقصه شئ تحتاجون شئ غير اللي كتبتوه بالورقه ترى بيقعدون عندنا اكثر من شهر... ام فيصل:لا ان شاء الله بس هذا اللي ناقصنا... ابو فيصل:اهم شئ لا يدرون انا بنقضي اغراض عشان ما يحسون بثقل... ام فيصل:ان شاء الله... ابو فيصل:وين الجوهره.... ام فيصل:تبيها... ابو فيصل:أي ناديها... ام فيصل:ابشر.. وراحت ام فيصل تنادي الجوهره اللي منهمكه تسمع لعهود وهي تسولف... عهود:المهم انا ونوف قلنا اللحين ندرس اقتصاد وتنظيم حفلات وما عمرنا سوينا لاهلنا حفلات.. خلود:أي يا حول بس فاضيين للنت والمنتديات... عهود:عاد اللي يسمعك تخلي لي مجال افتح..كل دقيتيين تكلمين ليلى... غادة:عذرا على المقاطعه بس منهي ليلى عشان ندخل جو بالهواش... جوري:هههههههههه...الله يرجك هذي بنت خالتهم... عهود:انا ونوف شرينا كل شئ مثل بعض واتقنا على كل الفقرات....و... ام فيصل:الجوهره كلمي ابوك... غادة:احلى يالمهمه واحنا وراه خالي زعلان مننا... جوري:حتى بابوي تبين تناقريني....المهم عهود لا تكملين السالفه الا اذا جيت..ثواني باكلم البابا(وتطالع بغادة وتضحك) واجي... غاده:مالت عليّ محد مسوي لي سالفه حتى بدر من يوم ما جينا ما ناداني ولا مره.... عهود+خلود:ههههههههههههههههههه جوري وغادة يحاولون يمزحون ويتناقرون عشان يخففون حدة التوتر والقلق اللي بخلود وعهود واول ما جو عهود وخلود ضاق خلقهم ولا كانوا يتكلمون..هم كانوا مستصعبين القعده ببيت عمهم ويوم دروا ان عمتهم بعد فيه..ضاق خلقهم على الاخر... بس غادة وجوري ما تركوهم وونسوهم على الاخر وعلى طول اندمجوا معاهم بس خلود ما اندمجت كثر عهود...عهود اندمجت بشكل خيالي مع غادة..مع انها بنت عمتها الا انها عمرها ما قعدت معاها هالقعده وبغرفه وحده وقومتهم واكلهم واحد... بيت ابو فيصل وسيع بس كل واحد يبي الثاني....الحريم يبون يكونون بغرفه وحده والبنات يبون يصيرون مع بعض والشباب بعد يبون يكونون بمكان واحد... جوري راحت عند ابوها...وقابلت بطريقها بدر ولد عمتها..وانصدمت ما توقعت كذا يكون شكله من زمان عنه...وهي بعد نازله بدون جلال تتستر فيه..استحت مره من شكلها وهي آخذه راحتها وهي تدري ان بالبيت عيال..وخافت بدر ينقد عليها والا احد شافها وهي بالشكل ذا..بس حمدت ربها ان بدر منهمك يصلح الفيديو حق فيصل..وصارت تضحك على فيصل ما يترك عوايده حتى الضيوف ما سلموا منه شغلهم...وطلعت بسرعه عند غادة.. غادة:قضيتوا... جوري:كله من عينك..تعالي معاي.... غادة:ليش؟ جوري:وانا نازله طحت ببدر.. غادة:آآخ يالقهر ليتني معاكِ عشان اشوف علبة الألوان اللي بوجهك... جوري:تطمني ما شافني بس انا اللي شفته... غادة:علينا(وتغمز لها).. جوري:اقول لا يكثر بس..تعالي معاي باكلم ابوي... غادة:عشان خالي والا انتي... جوري سحبت غاده من يدها ونزلت هي واياها بجلال واحد... غادة:والله انك مضحكه اللحين انا وانتي بجلال واحد الله يالزحمه... جوري:عادي اهم شئ الوجه ما يشوفونا... ونزلوا وجو بالصالة... غادة رفعت صوتها وتقلد العيال اذا جو بيدخلون البيت:يا بنت يا بنت... والتفت بدر على غادة ولقاها متغطيه بالجلال كان بيجي ويسحب منها الجلال بس حس ان الوضع غريب.... بدر:وش عندك.. غادة:طريق يا ولد...نبي نتعدى.... بدر:ما شاء الله كم راس.. غادة:عيب تسأل اعطينا مقفاك نبي نعدي نكلم خالي... جوري يالله يالله كاتمه الضحك..غادة وهي تتكلم وتقلد العيال شكلها يموت من الضحك...جوري كل ما زودتها غادة تقرصها وغادة تقول:آآييييي... فضيحه هالبنت.... بدر جا بيسلم على جوري بس ماهو متأكد هي جوري والا لا..وحس ماله داعي يسلم على أي احد طنش الموضوع وخرج برى الصاله مره وحده.... اما جوري ما صدقت انه خرج وعلى طول ابعدت الجلال عنها وضربت غادة... جوري:والله انك فضيحه وش ذا..والله عيب... غادة:يا بنت عادي..الدنيا فانيه... جوري:منتب صاحيه الله يعيين اللي بياخذك... غادة:لا تخافين باقعد على قلبك واخذ اخوك واناقرك.... جوري:اعوذ بالله ما لقيتي الا هالضعيف.لا ما ارضاها على اخوي... غادة:من زينك انتي واخوك انا قلت عشان ما في احد تقبل فيه وعشانه ولد خالي وما يهون علي خالي وخالتي يقعد بكبودهم عشان كذا بآخذه واستر عليه... جوري:يا الدبه صدق ما عندك سالفه..اللحين طلعتي فيصل قليل وما عنده سالفه ومسيكين وضعيف واحنا ما نبيه وانتي تبي تسترين عليه....اقول وخري عني باكلم ابوي... غادة:بكيفكم انا قدمت مساعده وانتو اللي رفضتوها... جوري تعرف ان المناقره مع غادة ما توصل لاي نتيجه وتبي تاخرها زياده عن ابوها....وراحت بسرعه عند ابوها...... وخرجت بسرعه للحوش وتلتفت يمين وشمال تدور على ابوها... ابو محمد ومحمد كانوا بالمجلس مع ابو فيصل وفيصل وبدر وابو خالد وخالد..وسلطان خرج يجيب له غرض من السياره ويجي..ويوم دخل البيت وبيدخل المجلس اتفاجأ بجوري اللي واقفه عند الباب وعلى طول نزل راسه...وجا بيمشي بس سمع صرخه خلته غصبا عنه يرفع راسه وعرف ان مصدر الصوت من عند جوري وان فيها شئ جا بسرعه لها وقف بعيد شوي عنها.. جوري التفت يمين وشمال ما شافت ابوها يوم جت بتدخل البيت والا تشوف سلطان داخل من البيت بسرعه نقزت الدرجة اللي عند باب المدخل وجت بتدخل بس التوت ومالت رجلها ميلة غريبة وطاحت وصرخت..رجلها التوت بقوة وطقت عظمتها وصارت ما تتحكم برجلها وطاحت غصبا عنها..... يوم جا سلطان لها صارت تبكي..ما تبي يجيها..تبكي من انه رجال غريب جايها اكثر من ان رجلها توجعها....وكل ما قرّب سلطان كل ما صارت تبكي وصارت تحاول تزفح تبي تدخل داخل البيت بالزحف ولا سلطان يجيها.... سلطان مسيكين ما يدري وش السالفه..هو يجي ويسعفها والا ينادي احد من محارمها واغتبشت الصوره عليه.. وما زالوا اثنينهم محتاسين كل واحد بوضعه..سلطان المسيكين مستحي لا يجي والموقف صعب لازم يسعفها يسوي أي شئ..وجوري اكبر شئ ان احد غريب يجي عندها او يمسكها..اقترب سلطان وجوري نزلت راسها تبكي وكل ما اقترب سلطان جوري تزيد بالبكا.. غادة اللي كانت بتطلع الدرج وسمعت صرخت لولو ورجعت جري على الباب وخرجت وشافت سلطان جاي مقترب ارتبشت هي بعد ودخلت داخل ومن العجله والربكه سكرت الباب..جوري كان كل املها بهالباب انها تزحف على ورى وتدخل جت غادة وخربت كل شئ بحركتها...سلطان جزم ونزل شماغه واعطاها اياها وراح لمجلس الرجال اللي كانوا بيطلعون يوم سمعوا الصرخه بس ما رضى لهم وخلى عم جوري وابوها هم اللي يطلعون.. اخذت جوري الشماغ وحطته على راسها وغطت شعرها..وجا ابوها شالها ودخلها الصاله.... جوري ميته من المستحى ويوم شافت ابوها زادت صياح ومنحرجه مره من هالموقف لصعب.... اما سلطان عقب هالموقف وكلام اخته لولو اللي ما يطمن صاير مختبص والدنيا تدور به..آخر شئ توقعه ان يصير موقف مثل ذا بينه وبين جوري وهو يعرف جوري لانها ما تغيرت مره عقب ما تغطت عنه.... نزلوا البنات عهود وخلود على الربشه اللي سمعوها بالصالة وغادة كانت بالصاله ما تدري وش تسوي عقب ما سكرت الباب واتفاجأت بخالها ابو فيصل اللي داخل بجوري...وجت ام فيصل وام خالد بدون جلال وكشفوا عن بعض والدنيا اختلطت عليهم ما يدرون هم يغطون والا يكشفون..وانحاست الدنيا عليهم عقب ما شافو جوري... خلود انتبهت للموقف اللي صاير والدنيا والحوسه اللي بين عمها وامها وراحت بسرعه جابت جلاليين لامها ومرة عمها ام فيصل..لان ابوها وعمها ابو فيصل موجوديين.... اما ام غادة اخوانها لا غطا ولا يحزنون وكلن حاسدها..طلعوا الرجال عشان تتطمن ام فيصل على جوري والبنات قعدوا عندها بالصاله...وابو فيصل طلب الاسعاف..بس خلود ما رضت وطلبت حنان انها تجي ولا رجال يجي ويسعف جوري...وجوري ودها تحب راس خلود على هالخدمه... اتصلت خلود على ليلى واضطروا انهم يرجعون البيت وكلموا حنان ووافقت على طوول وبسرعه تلبست وراحت معاهم... ***************************** لمياء تركت ابوها ينام وراحت للدكتور تسأل عن حالة ابوها والتطورات الي حصلت بحالته..واتطمنت عليه وعلى حالته اللي صارت افضل بكثير من اول..وأول شخص جا ببالها خالد.. بس ما عرفت شلون تبلغه او تكلمه واكيد اذا درى بحالة ابوها بيجي على طول..وعقب ما عادل سوى لهم سالفه هي وخالد عافت جيته وبطلت فكرة انها تخبره..وبعد لو احد جا من عيال عمها وخالد موجود بيثبتون كذبة عادل..وراحت للغرفة اللي مرقد فيها ابوها وقعدت عنده وابوها نايم.. وخرجت برى الغرفه عشان تكلم عيوش... لمياء:هلا عيوش.. عيوش:هلا بك يا قلبي.. لمياء:الله يسعدك باطلب منك طلب.. عيوش تسدحت من الفرح اول مره تكلمها لمياء بادب وحست ان خطتها هي وصديقتها نجحت وان لمياء بدت تستجيب... عيوش:آمري تدللي... لمياء:ما يامر عليك عدو بس ركبي الماء على النار واطلبي من راشد يجيني باسوي لابوي قهوه.. عيوش:ابشري اللحين اكلمه... لمياء:الله يسعدكم انتي وراشد والله اني متفشله منكم بس وش اسوي ما عندي احد.. عيوش:لا عادي..اكلمه وارد لك.. لمياء:الله يجزاك خير... ارتاحت لمياء لعيوش وحمدت ربها على شفاء ابوها وتحسن حالته....وناويه تجيب فراس للمستشفى عشان يسلم على ابوه... اتجهزت لمياء وحاطه ببالها وش الاشياء اللي بتجيبها من برى عشان تملا الغرفه ولا تحتاج لاحد او انها تشري من برى... العم سعد:ها يا بنتي ما نمتي... لمياء:صحيت من النوم... سعد:والله نمت من التعب والا مليت من النوم... لمياء:ان شاء الله كلها بس فتره وتطلع لنا ازين من الاول.. سعد:اللهم آمين... لمياء:يبه انا باروح البيت با جيب قهوه وبعض الاشياء واجي اللحين... سعد:طيب وبتروحين مع مين؟ لمياء:راشد ولد عمي بيجي هو وعيوش... سعد:الله يجزاهم خير.... دقت عيوش على لمياء وسلمت على ابوها وخرجت بسرعه وراحت معاهم لبيت عمها...دخلت لمياء البيت وبسرعه على المطبخ..لقت الابريق على النار والماء فايح حطت القهوه على الابريق وبسرعه راحت لغرفتها تاخذ لها اغراض وثياب وتحط لفراس ثياب وحطتها بشنطه متوسطه ونادت فراس وخلته يدخل يتسبح وراحت بهرت(يعني حطت هيل او هيل وزعفران)في الترمس.. وتجهزت وما با قي لها شئ الا اغراض بسيطه ببيت ابوها بتاخذ له ملابس لانها ما اخذت شئ من البيت وكلمت عيوش عشان تكلم راشد..وراشد حليله ما عنده أي مانع..اخذت كل الاغراض ولبست فراس الشماغ والعقال وحطت له عوده ولبست عباتها وعجلت بعيوش عشان تروح معاها لبيتهم عشان بتاخذ اغراض ابوها.. طلعت للصالة وراشد ينتظرهم بالسيارة بس جا ابوه من السفر وسلم عليه ودخل معاه داخل واول ما شاف لمياء صفقها كف بوجهها وطاحت على الارض ومسكها من طرف عباتها ورفعها وضربها مره ثانيه..وعادل وراه مبتسم لا حيا ولا حشيمه..جا من اللي يفرغ شحناته فيها ويطلع كل حرة خالد بلمياء..راشد انهبل من ابوه وما يدري وش السالفه.... لمياء:يا عم حرام عليك والله اني ما سويت شئ... ابو راشد:حرمت عليك العيشه..فضحتينا ولك عين تتكلمين وتردين وجايه بعد بتخرجين... لمياء:والله يا عمي اني ما سويت شئ.. ابو راشد:اقول ما جاك من الي يربيك زين..لاربيك واربي اللي رباكي... لمياء:ابوي متربي ازين تربيه وانا مثله... ابو راشد صفع لمياء صفعه ثانيه ونزل عقاله بيضربها بس جا راشد وفك لمياء من ابوه... راشد:يبه ما يصير..ما سمعت منها شئ بس سمعت من عادل.. عادل:يعني باكذب انا..اقولك انا شايفها بنفسي... راشد:وانت يا كثر كذبك.. عادل:لا يا شيخ يعني انت اللي مسوي فيها اخلاق... راشد طنّش عادل وهو يعرف ان الكلام ما منه فايده ورجع يكلم ابوه.. راشد:ابوي والله ما شفنا منها الا كل شئ طيب وبعدين احنا تربينا مع بعض وتربيتنا وحده... مستحيل يخرج منها هالشئ..واحنا ما سمعنا منها شئ بس سمعنا كلام عادل... ابو راشد:وعادل وش فيه رجال وكلمته تتصدق وهي بنت ما وراها رجال يراقبونها... راشد:يا ابوي لا تدافع عن عادل وانت اكثر واحد يدري عنه..هذا كذبه اكثر من صدقه وما عقب ىخر سالفه اللي بغى يورطنا وندخل السجن كلنا... ابو راشد حس صدق بالسالفه وكلام راشد منطقي خمسميه بالميه..بس كبريائه ما يسمح له انه يعتذر او انه يعفوا عنها بهالسهوله..واللي جننه اكثر انه عقب السالفه اللي كذبها عادل ونشر هالخبر ويوم درى انقهر مره ويوم درى انه بالوقت اللي كان بالمطار هي طلعت وراحت المستشفى جا معصب على الاخر ومولع منها..وكلام عادل يخلي الواحد ينقهر وينفعل ويولللع وغصبا عنه ينفعل.... اما عادل انقهر مره من راشد وكان يبي يتضارب مع راشد بس ابوه موجود ما يقدر يسويها.. اما لمياء دخلت غرفتها منهاره بعد ذا كله حتى عمها ما سلمت منه وما تدري عن راشد وعن دفاعها عنه وردت لها حالة البغضاء والقهر للعايله بكبرها وجتها حالة بكاء مستمر وما امداها تفرح بتحسن حالة ابوها وتندمت لو انها مخبره خالد كان جاب لها كل شئ وهي قاعده عند ابوها... راشد دخل لابوها يحاول يهديه ويفهمه السالفه ويحاول معاه انها تقعد عند ابوها..وان ابوها ماله الا كم ساعه فاق من غيبوبته..وابو راشد رافض مره وحده ومستصعب السالفه..بس راشد وراه يحاول فيه ويبين له اخطاء عادل الكثيره..وما زالوا يتناقشون بهالمشكله... ولمياء على نفس حالتها بكاء مستمر ممزوج بألم وقهر وظلم....وفراس عندها يصيح معاها وما يدري لمياء وش فيها بس اول مره يشوفها تبكي بهالشكل.... ********************* مشاري بحاله ثانيه غير عن الكل..فرحان بخطوبة اخته مريم وميت من الفرح وده يطير لانه نفس العريس اللي تمناه لاخته... ونوره اخته مستانسه عشان بتفتك من حشرة مريم ولقافتها بكل شئ..اما امهم مسيكينه اول واحد يتزوج من عيالها وشايله هم مريم مره وكل ما تتذكر انها بتروح عنهم بمدينه ثانيه تصيح ولا يسكتها الا مشاري... مشاري:مريوم تعالي بسرعه... مريم بحيا:وش فيك... مشاري:يا ناس على العرايس اقول هالحيا عند رجلك مو عندي انا اخوك... مريم مبتسمه:...................... مشاري:لا والله مصدقه انك عروسه مريم:هههههههههههههه مشاري:اشوى يعني تقدرين تتكلمين احسبك على الصامت... مريم:آمر تبي شئ... مشاري:أي تعالي صورت لك القصر تعالي شوفيه وقولي لي وش رايك فيه... مريم:يعني ملزمين يكون العرس كبير... مشاري:اللي يسمعك يقول بنعزم العالم كلها..هم معارفنا وبس... مريم:والله اني اشوف هالزواج ماله داعي خلاص رجال وبس... نوره:نعم نعم ...مالك شغل انا بافرح بهالزواج وارقص لك وازغرد واسوي كل شئ... مشاري:هي صادقه خلينا نفرح باول عروسه من عندنا... مريم:بكيفكم... مشاري:اصلا حتى مشعل يبي عرس كبير... مريم:دام مشعل يبي اجل براحتكم سوو اللي تبون... مشاري:اللحين انا اخوك وطول عمرنا مع بعض عطيتني طناش بقوه ومشعل ماله الا كم يوم صار يقر ب لك عطيتيه كامل الحرية في التصرف فيكِ... مريم:انت تاج راسي وانت اللي تبيه سويه بس اصلا العرس على اهل العريس يعني اذا هم يبون يسوون...احنا مالنا دخل.... مشاري:أي والله انك صادقه..اجل عطينا رايك بالقصر... اخذت نوره ومريم الجوال منه وصاروا يشوفون القصر..الصراحه جناااااااااااااااااااااان...مر ه حلو تنسيقه وجهة الحريم وجهة الرجال كان رااااااااائع بكل المقاييس...راقي لابعد الحدود... جت ام مشاري وشافت القصر وكلهم عجبهم بس ما لزموا عليه لانهم يعرفون قيمة استئجاره انها غاليه وقالوا أي شئ من العريس نقبله.... اتصل مشاري على العريس واتفق على الموعد وقاله عن راي اهله بكل شئ..مشعل استانس على البساطه وعدم التكاليف وانه القرار لاهل العريس اولا واخيرا...واعجب مره باخلاقهم وحس انه اختار الناس الصح.... مشاري فقد جوري فقده مهيب صاحيه..كان يحب يقعد معها بين فتره وفتره..ويحب يسولف معها ويتناقش معها بامور كثيره ويشوف شلون رايها فيه..ويحب يعرف منها كيف البنات وصلوا..ولاي تفكير وصل تفكيرهم..ويحب يعرف شلون يتعامل مع شريحة البنات الجدد...واتصل على جوري عشان بيجيها... مشاري:هلا والله بالقطوع... غادة ردت على جوال جوري تشوف الاسم (مش مش) توقعت وحده من صديقتها.... غادة:نعم!!! مشاري:جوري.. غادة:لا مشاري:هذا مو رقم جوري.. غادة ببلاهه:لا الجوهره.. جوري سحبت من غادة الجوال..فضحتها وقالت اسمها...وردت على الجوال... اما مشاري مات من الضحك وبالموت كلم جوري... جوري:وين الناس؟ مشاري:بالدنيا وينك انتي؟ جوري:انا هنا.. مشاري:اخبارك؟وعلومك؟يالله افتحي لي انا عند الباب... جوري:احلف عاد.. مشاري:وانتي يا حول ما تكذبين خبر.. جوري:اصلا لو تدري وش صار لي... مشاري:وش بك تهاوشتي انتي وفيصل... جوري:ليته كذا... مشاري:اجل وش فيك.. جوري:يا وليه تراني جدتك اللحين...وطايحه على السرير... مشاري:وش صار لك.... وحكت له جوري اللي صار بس بدون ذكر طاري لسلطان...مشاري مات من الضحك على جوري وخلاها تنقهر شوي وعلى طول راضاها واللحين بيجي عندها ويزورها.... *************************** خالد توه انسدح على السرير..خرج من عند الرجال وهو تعبان حيل ما نام الا ساعتيين قبل الفجر وراح بينام...بس قبل ما ينام اجتمع مع خواته عهود وخلود وقال لهم ان منصور ماهو متورط بشئ.. مروجيين المخدرات هم اللي دخلوا البيت والشرطه لاحقتهم وصار بينهم تبادل اطلاق نار وصابت منصور لانه توه موقف سيارته.. وما زال موجود عندهم عشان يتطمنون على صحته ويتاكدون انه مو من المروجيين...عهود وخلود تذكروا السالفه وصاحوا بس خالد كان شديد وما اعطاهم مجال انهم يصيحون.... خالد يوم درى ان حنان موجوده بالبيت حس بقلبه ينقبض ما يدري ليش وبيموت ويعرف وش سالفة حنان وليش استقالت وخاف انه ضايقها هو بزياراته او صار منه شئ ضايقها وما يدري وش فيها.. وصار مهتم بحنان يبي يعرف عنها أي شئ بس ما يدري يسأل مين.... تلحف زين وانقلب على جنبه اليمين ومسك جواله وبيحطه على الصامت الا دق جواله..وحس انه بالظلام مو شايف من الاسم وناظر زين والا فعلا لؤي يتصل بك)) مسمي لمياء لؤي.... خالد:نعم لمياء:خالد هي كلمتين ومني مكثره..ابشرك الوالد طلع من الطوارئ وهو بغرفة 210.. خالد عجز يستوعب الكلام الي قالته لمياء وبلا شعور قال:عيدي ما سمعت وش قلت... لمياء تخرعت وش يبي ذا ما يسمع...وعادت له الكلام واستوعب خالد الكلام اللي تقوله لمياء ومن الفرح طار من عينه النوم..جاته الفرصه لحده انه يسمع كلمة قوية وشافيه ترضي ضميره..ويرتاح عقبها وكلم ابوه وقال له عندي مشوار وراح للمستشفى.... >>راشد اقنع ابوه بكلام العقل والمنطق ووافق ابو راشد على ان لمياء تزوره وماتت من الوناسه وبسرعه تولمت واخذت معها فراس وقومته من النوم لانه نام من الطفش... وراحت لبيتهم واخذت ثياب ابوها وراحت على طول للمستشفى... اما عادل طلع برى البيت ومات من القهر وحس ان كل خططه المستقبليه بتفشل... وفي الـــمــــســــــــتــــــــــ ــــــــشـــــــــــ ــــــــــــــــــفـــــــــــ ـــــــــى العم سعد:يا ولدي ليش تعبت نفسك خالد:تعبك راحه يا عم..اهم شئ تكون راضي عننا.. العم سعد:يا ابن الحلال انا راضي عنك... خالد:ابيك يا عم تقولها من قلبك..تقول راضي عنك وعن لؤي... العم سعد:راضي عنك وعن لؤي..خدمتنا خدمه لا يمكن انساها وان شاء الله ربي يعوضك خير بهالقومه... خالد ارتاح نفسيا وجسديا وكل شئ حس بروحه نشيط..وان بظروفه الصعبه هو واخوه جاي مكن يبشره ببشارة خير...ارتياح العم سعد اكبر شئ عند خالد... خالد:ما سوينا الا الواجب... العم سعد:وشلون شغلك؟ خالد:ابد مثل ما انا عليه ما ت

[SIZE=5]((الجزء الحادي عشر (( لولو:يمة يمة باركي لي فاااااااااااااااااز الهلال.. ام محمد:الله...