و اخيرااااااااااااااااا نحفت ( تجربتي )/ قديم

بسم الله الرحمن الرحيم
و الصلاة و السلام على سيدنا محمد
السلاااااام عليكم
شو اخباركم يا بناااااات
بس ابي اعرفكم عن نفسي قبل لا ابدأ
انا يا بنات من سنة كنت سميييييينة و كنت ابي اسوي ريجيم فكنت ادخل هالمنتدى عشان ألقى الرجيم المناسب و يامااا سويت ريجيمات كثير و فشلت لكن في نفس الوقت استفدت كثير منكم
ياما قريت مواضيع و اشوف البنات يتكلمون كأنهم يتكلمون عني ( كأنهم يوصفون حالتي )
ضحكت على مواقفكم و دعيت من قلبي لأغلبكم و حبيتكم كلكم
الله يسعدكم و ينحفكم يااااااا رب
المهم راح ادخل في الموضوع و احكيلكم عن تجربتي و إن شاء الله تستفيدون منها
هذا يا بنات انا صارلي 3 شهور ماشية على هالنظام
اول مرة في حياتي امشي على رجيم بهالمدة انا حدي حدي يعني لو ضغطت على نفسي ( يعني على اساس البنت عندها إرادة ) اسبوعين بسسسسس لا اكثر ولا اقل ( هذا و انا ضاغطة على نفسي ) اما بالعادة فحدي يومين
يااااااا كثر الريجيمات اللي سويتها و ما خرب جسمي و خلاني اسمن غير الريجيمات القاسية اللي كنت اسويها
يعني انا اول مرة سويت رجيم السوائل لمدة 3 ايام و نحفت عليها لكن تعبببببتتت و بطلت بعدين سويت رجيم الغدا بسسس من غير عشاء اسبوعين جاني تخلف بعدين سويت رجيم السندويتشات لمدة اسبوع كرهت حيااااااتي و كثيييييييييير من الرجيمات الثانية بس هذول اللي نجحت فيهم
المهم قلت بلا رجيم بلا بطيخ و قلت راح اكل عااااااادي ما يهمني و صرت اكل و اكل و اكل و لا همني شي صرت اصرف فلوسي كلها في الحلويات
يعني في الأسبوع الواحد كان هذا اكلي:
4 ايس كريم ماجنوم
شيبسين كبار
علبة بيبسي كبيرة
ايس كريم عادي مع chocolate sauce
دوناتس (احيانا )
و حلويات مثل سنيكرز و كيندر بوينو
هذا غير الغدا و ال Fast Food و اشياء ثانية مالها داعي مثل الحلويات اللي تسويها امي و لو إخواني عندهم شي من هنا من هنا مافي ايييييي مانع
تخيلوا على هالنظام لمدة ستة شهور يمكن ( مو اكيد )
صرت فيييييل تدرون شو يعني فيل ( انا قبل هالأكل هذا كله كان وزني سبعين فلكم ان تتخيلوا شو كان وزني من بعد هالنظام )
اتذكر كان عندي بنطلون جينز كان شوي واسع و كنا رايحين نزور ناس على اساس البنت اللي هي انا تبي تتكشخ و ايش تبي تلبس جنز مع بدي
<<<<<< ثقة عمييااااااااااااء المهم لبست البنطلون و السحاب مو راضي يتسكر بالمووووت يلا سكرته ( كانت حرب عالمية ساعتها ) و رحت طبعا شكلي كان يقررررررررف مادري انا ليش لبسته ولا و فوق كل هذا كنت فرحانة بنفسي المهم و نحن عند الناس ابي اقعد مو قادرة البنطلون خنقني و مو قادرة اتنفس البنات قاعدين يكلموني و انا اصلا ولا سامعة كلمة من اللي يقولونه بعدين رحت الحمام ابي بس افكه عشان اتنفس شوي هنا يا بنات ساعتها اللي لاحظت فيها إني سمينة <<< صباح الخير و راحت الثقة بالنفس و صرت اشوف نفسي ابشع البنات اهملت نفسي بدرجة كبيييرة و جاني إكتئاب خلاني اسمن اكثر و اكثر و حياتي صارت مالها معنى و المشكلة صديقاتي كلهم رشيقات مافي اي وحدة منهم دبة ( ما شاء الله ) صرت ألبس ملابس واااااسعة و سودة عشان ما يبين شي شكلي ما كان حلو ابداااااا و طبعا عشان انا طويلة و عضامي شوي عريضة فصار شكلي ضخم ( غوريلا تتمشى في الشارع ههههههههه ) طبعا التعليقات صارت تطلع من الكل و كل من يشوفني يقول وييييييييه سمنانة اكثر عن اول و انا اسمع هالكلام و انزل على الأكل ما اخلي شي كان الأكل يريح نفسيتي لا و اقولكم عن شغلة صارت لي مرة امي كانت في السوق و رجعت للبيت فرحاااانة قلتلها "يمه شو فيج؟ " قالت " راح اقولج على شي يفرحج" قلتلها " شو هو؟ " قالت ( و يا ريتها ما قالت ) " لقيت محل حلو خاص للسمينات بس يعني نقدر نروح انا وياج نشتري ملابس " <<<< ههههه واثقة الوالدة مسكينة على نياتها انا هنا انصدمتتتت قلتلها " يمه بس انا مو سمينة" قعدت تناظرني بعدين قالت " لا والله؟ روحي شوفي نفسك بالمراية تراج ما تعتبرين من الرشيقات ألحين" والله العظيم زعلت كثيييييييير و كلامها كان فعلا صحيح قلت في نفسي انا قاعدة اضحك على منو؟ و صرت اقول خلاص بكرة على الأكيد في ريجيم و ثاني يوم ابطل و يتكرر نفس الموال لين ما فجأة ملابسي صارت ما تدخل عليي ( ملابسي الواسعة ) هني قلت بسسسسسسسسسس كافي يعني كافي راح تسوين ريجيم يعني راح تسوين ريجيم و قلت راح اختار ريجيم اللي اقدر امشي عليه فترة طويلة مو بس اسبوعين ادري إني طولت عليكم يا بنات بس انا ابي اقولكم عن كل شي عشان تتشجعون المهم اخترت رجيم المشاوي اللي هو اكل دجاج او لحم مشوي فقط مع خضار ( الخس و الطماطا ) و اشرب عصير بسسسسس ( هذا كان غداي ) و الفطور كان عصير بس و العشا كان عصير او نسكافيه او فواكه و طبعا الحلويات ممنوع و البيبسي و الغازيات ممنوع و الخبز و المعكرونة و الرز ممنوع يا بنات ما اقول لكم عن اول اسبوع كنت بمووووووووت من الجوع و مابي هالأكل ابي دسم و كل شوي اقول خلني ابطل و بكرة ابدا لكن بعدين اقول لأ كلها كم شهر و اخلص اكملهم بالطول ولا بالعرض و تجيني حالات كنت ابي ابكي فيها من الريجيم كأن احد ماسكني يقولي ممنوع الأكل فصرت اشغل اوقاتي بأشياء ثانية مثل الإنترنت ( ولو انه يجوع بس يضيع ساعات ) و بديت اقرأ مع إني ما كنت احب القرأة و صرت اكتب فكنت احاول اشغل وقتي بأي شي و اللي كان يساعدني الجامعة لأني انشغل فيها كثير طبعا في الشهر الأول تعبت كثيييييير و اهلي من النوع اللي ما يحبون اكل برة مادري ليش بهالشهر بالذااااااااااااااات صاروا يموتوا على شي اسمه مطاعم كل يوم بيتزا و كل شوي يجيبوا ايس كريم و انا اشوف و ابي اصييييييييح حقدت عليهم ( حقد بريء ههههه ) صرت كل ما اشوفهم ياكلون ادخل الغرفة عشان ما اضعف قدام الأكل و صرت اكل غداي بروحي في غرفتي عشان ما اشتهي اكلهم من بعد هالشهر انصدمت لأن ما تغير فيني ولاااااا شي و اسأل الكل اقولهم ضعفت يقولولي لأ ما تغيرتي ( و انا بالعادة في اسبوعين يبين عليي لكن مادري شو صار) المهم هني و قلت خلاص راح ابطل و كنت اقول في نفسي " على ايش انا متعبة روحي , على ايش اسوي ريجيم , اللي يحبني يحبني لشخصيتي مو شكلي , و انا مو سمينة كثير و و و و و و" كلام الفاشلين بعدين قلت يا بنت مادام كملتي شهر كملي شهر ثاني و لو ما ضعفتي خلاص بطلي. دخلت في الهر الثاني <<<<< هههههههه كأني حامل لأ جد دخلت في الشهر الثاني و شوي قاموا يلاحظوا و يقولوا نحفانة ( بس امي و صديقتي البقية لأ) ما تتصورون فرحتي على الأقل بان شوي على اخر الشهر الثاني بين عليي النحف و الكل صار يقولي نحفانة بس انا مو ملاحظة اي شي إلا لما مسكت الجينز مالي تتذكرونه اللي خنقني ؟؟ هو بذاته مسكته و قلت خليني اجربه و هني كانت احلى مفاجأة في حياتي البنطلون صار واااااااااااااااااااااااااااااااااااااااااااااااسع يعني مو عادي لأ واسع يطيح مني فرحت كثيييييييير قلت خلني اشوف صوري القديمة لقيت وجهي فيها كان سميييين ألحين نحيف و حلو الكل صار يقولي صرتي أحلى وجهج ألحين احلى بكثيييير و انا ميتة من الفرح و ألحين انا في الشهر الثالث و صرت نحفانة اكثر و اكثر و ملابسي صار شكلها يضحك عليي ألحين يا بنات مابي اطول عليكم زيادة لكن بعطيكم نصايح على هالريجيم ( نصايح انا كنت اسويها ) ضروري تتبعونها عشان ما تخربوا الريجيم ماشي؟؟ 1 - انا كنت كل نهاية الشهر اخلي يومين او ثلاث اكل فيهم كل اللي ابيه و بأي كمية ابيها من اول ما اقوم من النوم لييين ما انام ( يعني خلي لك يومين او ثلاث كل شهر او كل ثلاث اسابيع تاكلي فيه اللي تبيه عشان ما تحسي بالحرمان و هو اكبر سبب لفشل الريجيم ) 2 - العشاا ضرورييي جدا جدا جدا لكن يكون خفيف و بكمية بسيطة يعني انا كنت اكل فواكة و كنت اكل كل انواع الفواكة حتى الموز و العنب عااااادي 3 - لو نفسك في شي كلي لا تحرمي نفسك يعني انا في هالريجيم من بعد الشهر الأول كنت كل يوم اغش يعني لو نفسي في بيتزا اكل قطعة وحدة بس و لو نفسي في شوكولاتة اخذلي عضة وحدة بس و لو نفسي في شيبس اشتريلي كيس صغير هذا غير اليومين اللي كنت اكل فيهم براحتي ( و هذي الحركة تعلمتها من وحدة في المجلة قالت انا ماشية على ريجيم طول حياتي لكن كل يوم اغش ) 4 - يا بنات لازم تعرفوا شغلة مهمة جدا جدا جدا النحف ما يجي بين يوم و ليلة لازم الصبر على الأقل شهرين يلا تبين النتايج ادري إنه قهر و ادري إنه تعب لكن هذا هو الواقع و لازم تتعودي عليه لأنك من بعد الريجيم راح ترجعي للأكل العادي ( طبخ البيت ) و لازم تكوني تعودتي على التخفيف و التعود ما يجي في يومين 5 - لما تقرروا تنحفوا يا بنات انحفوا لنفسكم مو لغيركم عشان انتو تحسوا بالراحة و الرضا 6 - انا يا بنات كنت اخذ حبوب حديد من قبل لا اسوي الريجيم لأن الدكتورة وصفتهم لي ( عشان شعري كان خفيف ) و اظن لهالسبب وجهي ما تغير و صار لونه ليمونة مثل العادة ( انا ما اقول لكم خذوا حديد لكن ممكن تسألوا اي دكتور عن و حبوب فيتامينات ممكن تاخذوها ) و بسسسسسس اي اسئلة يا حبوبات تبون تسألوها اسألوا ولا تستحون انا في الخدمة ملاحظة : انا ما اعرف كم نزلت بالكيلو لأني ما احب الميزان ولا اقرب نحيته و اصلا ما يهمني كم وزني مادام شكلي زين و جسمي رشيق فيعني لا تسألو كم نزلتي بالكيلو آسفة سامحوني على الإطالة و يا رب تكونوا استفدتوا مني ( و فهمتوا شي من كلامي لأن الناس دايما تقولي انت مو واضحة في كلامك ابدااااا ) و مشكورين جدا على وقتكم اخخخخ ايدي تكسرت هههههه في امان الله >