السلام عليكم أشكر أختي غرشوب رعبوب على كلامك واهتمامك الله يقدرني وأساعدكم في يوم من الأيام وأرجع ولو شوي من أفضالكم واهتمامكم بالموضوع .
حبيبتي طيبة القلب إذا إنت بس قاعدة تغلي من اللي كتبته فما بالك اللي عايش في الوضع نفسه . والله ما تصدقين اشكثر أعصب بالبيت وما عندي غير بناتي اللي يطلع خلقي عليهم بس المساكين شنو ذنبهم معاش حق في كل اللي قلتيه وأنا ما نسيت ولا حرف من النصائح اللي كتبتوها وبالنسبة للخدامة اللعينة كلامك في مكانه تبي تشبع النقص اللي فيها على حسابي وأنا عارفة حركاتها زين وزوجي بعد يعرف علشان شذي ولأن ما عندي أحد من الأهل يساعدني فلجأت إلى صديق قديم جدا لنا وهو من النوع اللي دائما ينصحه ويقوله عندك جوهرة ما راح تحس فيها إلا لما تفقدها وقليل تحصل مثل زوجتك بس إنت ما تدري صاير أعمى علشان شذي استعنت فيه وخصوصا إنه يعرف كبيرة وصغيرة لأن بعد زوجي يشكيله الحال إذا كنا متهاوشين وكم مرة تصالحنا بسببه جزاه الله خير . وهو من النوع أول ما شاف الخدامة عندنا بالبيت قاله هذي مثل الحية دير بالك منها وللحين ينصحه إنه يمشيها وصدقيني مافي أحد يحبها أول ما يشوفوها يكرهوها وما يرتاحولها بس بعد ما سمعتني آخر مرة إنه قالها أنا ما أحبها ومن هالكلام حطيت في راسي إني ماراح أسمعلها مرة ثانية وعرفت إنها قاعدة تلعب بأعصابي وعلى فكرة هالكلام قلت لزوجي بالتفصيل شنو وصلتلي كلام وما خفت يزعل أو لأ بس هو شوي نكر بعض الأشياء وما جاوب إذا قالها إنه يحبني أو لأ بس حسيته تضايق وعلى فكرة هو يعرف إنها عقربه ومن تحت لتحت علشان شذي هو مفهمني إنه لازم يعاملها بطريقة حلوة علشان ما يحسسها بغربه ومن هالكلام وخصوصا لأنها حقوده فهو خايف عليها من البنات إنها تسوي شي وتدرين إنها لما تسوي قهوة الصبح ما يشرب من يدها ويخاف وقت اللي كنا متهاوشين كانت أول ما تشوفه قعد من النوم تسويله قهوة بس ما يشربها ومرة سألها منو سوى القهوة ووصلتلي هالكلام وقلت لها ليش خايف مني علشان متزاعلين وزعلت يومها وصرت أبكي مثل الهبلة وتفكيري راح بعيد ولما تصالحنا قالي سوي قهوة وبعدين فتحتله هالموضوع فقال لأ لما هي تسوي ما أشربها لأني أتعجب أنا ما قلتلها سوي شي ومن كيفها تجيبلي قهوة ولا مرة شربت من يدها واهني حسيت إني غلطانه بالتفكير .
هذا الرجال اللي قلتلك عنه قاله آخر مرة لما كنا متهاوشين بعد الخدامة عن البيت وزوجي قاله مو الحين أنا مو مرتاحلها وأدري بالأشياء اللي تصير واشلون تفكيرها بس أشوفها متحسنه عن أول بوايد وهي تفهمني أكثر ونقعد مع بعض بدون هواش والرجال قاله هذي حية راح تخرب بيتك . الحين قلت لبنتي الصغيرة لما تشوفيهم بهالوضع مساجات وضحك وأغاني بعد ما هي تروح المطبخ أو تكرمين الحمام قولي للبابا شنو أنت ما تشبع تدليك وهذي ليش وياك لتكون زوجتك وقلت لها إذا أبوك هاوشك ما يخالف قوليله بابا أنا ما أحب أشوفها وياك تضحك وياها هي مو زوجتك ولا أمي . لأن ترى هم بنتي تحس إنه هذا غلط وتسألني أسأله عنهم وبنتي ما تحبها أبدا لأن الخدامة مافي حنان حقهم أبدا إذا هي تاركة عيالها ومنحاشة من زوجها ومن المشاكل راح تحن على عيال الغرب طبعا مستحيل .
مرة شافني متضايقة لأنهم مع بعض ويضحكون وحس إني مضايقة تصدقين حتى كلمة أقولها ما خلاني وسكتني ولا يعطيني مجال أتكلم بالعكس بهالطريقة راح يكون بصفها ويدافع عنها خصوصا لما يقولي أنا مو قاعد أسوي وياها شي غلط وكله جدامك يعني ما يخليني أقول اللي في بالي . المهم الله كريم .عسى أن تكرهوا شيئا وهو خير لكم .
بس مافي أحد قالي شنو أسوي طريقة حتى بالمنتدى ما يبعثولي إيميل إذا في أحد كاتب رد هالشي خايفة منه حيل .

اختي انشالله اقدر اساعدك
بالنسبة للرسايل اللي تجيك على البريد اول شي روحي فوق في هاي الصفحة بتلقين عدة اختيارات اول اختيار مكتبك الخاص دشي هنيه بتلقين بعدين عدة اختيارات بعد منها الرسائل الخاصة وخيارات البريد
اختاري في الابلاغ البريدي لا
وتفعيل وظيفة الرسائل الخاصة لا
ابلاغ بريدي بوجودرسالة خاصة لك لا
بعدين تحت اخر شي بالصفحة تختارين تنفيذ التعليمات وانشالله تنجح هالطريقة :26:

اختى العزيزه
اولا هدا النوع من الرجال لايتغير لانه تربى على السلوك الخاطئ واعتمده منهجا لحياته بدليل
تعاملاته مع كل المحيطين به
من واقع تجربه اقول امامك طريقين
1-انك تستمرين معاه وتتغاضى عن كل كلماته البديئه وكانك ماسمعتى شى
تحت بند ليس على المريض حرج وتعتبريه مريض وتمشى الحياه ودوام الحال من المحال
اما يهديه الله او يهده عشان يعرف ان الله حق وما يضيع حق مضلوم
وتحاولى تركزى على ايجابياته وجوانب الخير اللى فيه
لكن لاتسمحى لبناتك ابدا بتقليد والدهم ومحاوله التقليل من قيمتك امامهم وفهميهم ليس امام والدهم انك تتحملين اسلوبه الخاطئ معك من اجلهم هدا بينك وبينهم
قفى معهم وقفه حازمه وانتقدى اسلوبهم امامه لعله يشعر بخطئه ولاتشعريه انه متهم او انه السبب 2-تكلمى معه عن نفسك عن احاسيسك ومشاعرك والالم اللى تحسيه طبعا هدا فى وقت يكون فيه هادى ومش باليل لان كلاام اليل مدهون بازبدة يطلع عليه النهار ايسيح
حاولى تحسسيه ان طريقته تقلل حبه فى قلبك وانت تحبيه
لو ما تغير وبعد صبر وصبر وصبر وصبر
راح يتمادى ويخترع وسائل جديده لادلالك ومن ضمنها الضره لان هدا النوع من الرجال
يبدا بالاهانه والسب واشتم وتقليل القيمه ليشعرك بفقدان الثقه حتى ياتى يوم ويشعر انك غير
جديره به هو يحبك وضامنك تتحملى ويحب اولاده بس يحب روحه اكثر بدليل احرمانك حتى من زياره اقاربك ويريته عاجب بالعكس تلاقى نفسك كل يوم تقدمى تنازلات وكل يوم يدور لك على حاجه حتى يمارس عليك رغبه التسلط والادلال لانه نوع لايحترم المراه ولايعطيها قدرها
لاتعتمدى على حبه لك وبناته لانه يعرف انك طبيه وصبوره فخدى بالك

السلام عليكم أختي بالله غرشوب رعبوب مشكورة وااااااايد سويت الطريقة بسرعة أول ما قرأت رسالتك مشكورة حبيبتي إن شاء الله تنفع .
أختي dunia مشكورة على مشاركتك وكلامك صحيح ما يتغير مثل أبوه كان ظالم أكثر منه ويعامل المرأة إنها ما تسوى شي بس بعد الستين بدأت فيه الأمراض وأعوذ بالله حاشة سرطان بالبلعوم اللي الحين ما يقدر يتكلم وإذا تكلم زيادة يكح وما يقدر يكمل ( اللهم لا شماته الله يشفيه ) . بس في ناس وايد قالولي راح يصير مثل أبوه وبعدين يانخمد ومثل ما قلت زوجة أبوه الحين هي اللي مسيطرة والآمرة والناهية حتى أولاده ما يسمعون كلامه أبدا وإذا كان بالغرفة نايم أو شي مافي أحد يطل عليه ويسأله شنو تبي وتحسين إنه عايش بروحه فعلا الله كبير بس المشكلة إن زوجي يشوف هالشي وما يتعظ وبالنسبة للبنات إذا عملوا شي خاطئ لما أكلمهم أقولهم بصوت عالي علشان هو بعد يسمع . يعني الحمد لله أنا ما أقدر أقول إن حياتي تعيسة بصراحة أنا شفت أتعس من شذي بوايد على الأقل ما عنده ديوانية وضياع الوقت على الفاضى يحب يستفاد من وقته . الحين زوجي وايد يشتكي من رقبته وفي تورمات ومفاصلة تعورة حيل خصوصا عند الرجل والكعب وأمس طول الليل ما قدر ينام من وجع اللي في بطنه لأنه عنده قولون ومرارة يعني زوجي سكراب صاير وفوق كل هذا مو راضي يروح يشوف سبب الورم في رقبته هو خايف إنه يصير مثل أبوه بس بصراحة هو وايد مهمل بصحته وهالشي مخليه كسلان ما يحب يسوي شي والله لولا أخوي بالبيت ما كنت أقدر أخلص شغل البنات وأجبلهم أغراض المدرسة الله سبحانه وتعالى رحمني من هالناحية ( الحمد لله ) . بس المشكلة لو يصير عندي شوي جرأة وأوقف أمامه وأقوله اللي أبيه وأصير قوية مثل بقية الحريم اللي يقولون بالطقاق يزعل وبعدين يرضى أنا مو شذي ما أقدر ونفسيتي تتعب حيل لا أكل ولا شرب ما أدري ليش أحس خلاص الدنيا مو حلوة وأظل أبكي بس لما يزعل مني وما يكلمني وهو عارف نقطة ضعفي ويستغلها يعني هو عارف شنو قاعد يسوي . تصدقين أحس نفسي بعدني صغيرة بتصرفاتي يعني مثلا الخدامة العقربة لما تشتغل أحيانا تشوفينها رافعة راسها فوق وتشتغل وإذا أحد مر بصوبها ترفع حواجبها لفوق يعني هي شي يعني اشلون الواحد يكون واثق من نفسه ويمشي بهالطريقة ولما تكون تفكر أو شي وبالها مشغول وأحد ضحك معاها مثلا ما ترد عليه وترفع راسها فوق وتمشي ما تهتم وإذا زعلنا منها بشي معين تقعد عادي وما تهتم بشي يمكن تكون هي بعد زعلانه بس ما تبين بس طبعا كله ولا زوجي يزعل منها يورجيها الويل وتضايق حيل بس هي تحاول ما تبينله بس أنا أشوفها تبكي وتضايق لما تشوفني آخذ مكانها وتطالعني من فوق لتحت . الحين اللي يقرأ راح يقول ليش مخلينها اشلون خدامة ونخليها بهالطريقة . إحنا بصراحة على علم فيها بس هي جايه للشغل ودفعنا مبلغ كبير وهذي ثاني واحدة عندي يعني إذا راحت إحنا الخسرانين وزوجي ما يبي يخسر اللي دفعه وبنفس الوقت يعاملها معاملة شنها منا وفينا وما يحسسها إنها خدامة ويشغلها بالبيت وايد وإذا عملت شي ضايقة يعاقبها وهو عارف نقطة ضعفها ويستغلها .
إن شاء الله ما أكون ضايقتكم بشي ولا تفكرون إني ما أنفذ اللي قلتوه بس ما يصير كل شي مرة واحدة حبة حبة .

السلام عليكم . حبيت أخبركم شنو صار وياي يوم الأربعاء . طبعا كالعادة الخدامة فتحت موضوع وياي عن زوجي شنو قالها وحبت إنها توصلي هالكلام وبنفس الوقت تعرف إذا صح كلامه ولا لأ وأنا ماكو دايريكت هاوشتها وصارخت عليها مع الصراخ وشوي بضربها وقلتلها لا تتدخلي بشؤوني وإذا قالك شي كيفك إنت وياه بس ما أبي أسمع ولا كلمة ولا تنقليلي كلام وإنت كيفك تبين تصدقينه ولا لأ وقلتلها أحسن شي حقك إنك لا تصدقي ولا كلمة تنقال لا مني ولا منه وإنت بكيفك لأن هذي مو مشكلتك خليكي مستمعة فقط لا غير وما لك شغل بهالسوالف إحنا مو عيلتك حتى تهتمين ومسويه نفسك برفوسورة حل مشاكل . والله بعد هالكلام طبعا صارخت ورفعت صوتها وزعلت وقالت بس ييجي زوجك بقوله قلتلها أحسن قوليله خليه يعرف شنو إنت بالضبط نقالة حشي وشنو قاعد يصير من وراه أنا مو هاممني . والله المهم عادي مشت الأمور وزوجي ما عرف شي بس بالليل تعبت تعب وبطني صار يعورني لأني شوي بعد تناجرت مع زوجي بسبة بنتي الكبيرة المسكينة مهما تغسل حلجها يطلع ريحة هو من بطنها أو خشمها ما أدري المهم صار يصارخ أمك ما تعلمك ومن هالكلام عاد أنا ما قصرت وقلتلها أنا ما أعلمك ما أقولك ساوي شذي وشذي قالت بلا انزين روحي قولي لأبوكي ماما تعلمني ليش تسكتين ليش ما تتكلمين شذي يعرف إني ما أعلمكم شي طبعا هالكلام بصوت عالي علشان يسمع بس وقت اللي سمع قالي راح أحاسبك على كل كلمة قلتيها وتشوفي إذا أنا مو قدها واهني بطني شوي بينفجر وتكرمون على الحمام علطول استفراغ وما قدرت أمشي وتعب تعب بغيت أموت من هالوجع الخدامة اهتمت فيني شوي شي حار شوي بارد شوي لبن وزوجي سمع صوتي يبي يكون مهتم بس بعيد ما يبين ولما شافني حسيته مهتم ونوع من الخوف علي بس طبعا ما سوالي شي بس كلام . المهم ثاني يوم الخميس والله أبوه متصل علشان يروحون البر وقالهم إني تعبانة وعزمونا على الغداء علشان أرتاح من الطبخ وبعدين رحنا البر اهني شفت الخدامة متغيرة وتطالعني بحقد ليش إني قاعدة وياهم وزوجي عادي وياي بصراحة الله يستر منها . امبارح الجمعة بعد الكلام اللي صار يوم الأربعاء قالتلي أنا ما راح أصدقك ولا أثق فيكي وكل الكلام اللي قلتيه محيته وإنت كذابة وحتى زوجك وعصبت عليها وقلت لها إذا ما تبين تشتغلين عندي روحي قولي لزوجي هالكلام أنا ما أتحمل واحدة قليلة أدب بس لما شافتني مصممة شان تضحك وحولتها مزح