السلام عليكم يا أختي طيبة القلب اشلونك ما قصرتي وياي والله يعطيك العافية وترى دوختك أنا أدري سامحيني إنت وكل الخوات وآسفة إذا كنت حملتكم مشكلتي . إن شاء الله بأقرب وقت بتخلص منها إنتوا بس تقرون اللي أكتبه ومدايقين فما بالكم أنا اللي عايشة الوضع ليل ونهار والله نفسيتي تعبانة وقاعدة أكتبلك وأنا أبكي من القهر . كان زوجي بالبيت وأول ما طلع قلت ما عندي غير هالمنتدى أفش قلبي . مو طالع شي بإيدي اشلون أسفرها أنا مو كفيلتها أولا وما أقدر أسوي شي بس اللي أقدر عليه إني أخرب عليها شغلات وأدايقها بشغلات وأخليها تطفش من كيفها وتجي منها مو مني وأخوي قاعد يساعدني وبنتي بعد وإن شاء الله خير . بقولك آخر شي سويته أمس بالليل . زوجي ناداها علشان تجيب قطرة للعين من عندي يعني تسألني وين القطرة وأعطيها . المهم ظليت بغرفتي لأنه دخل الحمام يتحمم وهي اللعينة موجوده بغرفتي وما استحت على وجهها وتطلع وقاعدة على فراشي وأنا بمقابل الممر مال الحمام وهي سوت نفسها قاعدة تقرأ الوصفة مالت الدواء ولما زوجي خلص أخذ الفوطة وعباله أنا مو موجوده وتفاجأ فيني وزورته المهم خلص وراح المطبخ وأنا ما طلعت من الغرفة فسألتني ليش واقفة مثل الحارس قلتلها ليش مو غرفتي كيفي حارس ولا مو حارس قالت لأ قاعده تفكرين بشي فقلتلها شوفي لما يكون زوجي بالحمام يتسبح ما أبي أشوفك بغرفتي وتطلعين برة ولما يناديكي تردي عليه وبس ما تستحين على وجهك الرجال بالحمام يبي يلبس وأنا زوجته بره وإنت بغرفتي وشان تزعل وتروح برة وقلتلها ليش تزعلين هذا حقي وإنت تشتغلين اهني أخاف زوجته وأنا ما أدري . والله أول مرة أتجرأ وأقولها هالكلام بس جسمي يرجف من الخوف لأنها بالعادة تروح عنده وتقوله شنو صار بس قلت بقلبي حتى لو قالتله بقوله هذا أقل شي قاعدة أسويه فيها ولا تنسى هذا حقي وبيتي وهي الخدامة مو أنا ولازم تزعل على زعلي مو على زعلها شنو تقربلك هي . هذا اللي فكرت فيه إذا صار شي . والله كريم دوختك مايخالف سووووري .

:( :( :(

وشالي مصبرج ؟

السلام عليكم أسيرة موني اللي مصبرني بناتي وعسى يكون بعد الصبر الفرج والسعادة ما أبي أكرر خطأ والدتي وتركتني وأنا عمري 3 سنوات لأني للحين ما أقدر أسامحها وقاعده أحملها كل الأخطاء اللي أنا فيها وبنفس الوقت محتاجتها وتشوفيني أحيانا أبكي من كثر ما أنا مشتاقتلها بس وينها ما أعرف وين أراضيها أحيانا أسمع إن أختي تكلمها وأعرف أخبارها من بعيد بس ما أقول إلا الله كريم حسبي الله ونعم الوكيل . مشكورة حبيبتي على ردك .

بالأمس حاولت أكلمه بالليل عسى يرجع كل شي لوضعه وطبعا ما رضى ولا بشكل من الأشكال وفهم الموضوع إنه غيرة وأنا أغار من الخدامة وقالي على أي أساس تقوليلي أنا أفرق بينكم شنو زوجتي هي ولا تقربلي وبدل ما أنتي تشجعيها تحسسيها بالغيرة شنو الفايدة واتهمتيني إني ما عندي إحساس منو اللي قاعد يصبر عليك طول هالسنين وصار يقول ما أبيكي تطلعين وياي وأنا مو مرتاح بالقعده وياك وحلف بعد ما تسافر الخدامة ما راح يجيب واحدة ثانية وقلت ما أبي واحدة ثانية بيتنا صغير وصار يقول أمهاتنا من قبل كانوا عايشين بيت عربي وحوش كبير وماكو خدم وأمي تقعد من الفجر وتحضر الفطور وتسوي شغل البيت شنو ناقصك بيتنا صغير لو عندنا فيله ما يخالف نحتاج . بصراحة حسسني بندم وبذنب وقالي ما راح أرجعلك إلا لما أشوفك إنسانه متغيرة وفاهمة وطبيعية لأنك مريضة بالغيرة اللي فيكي . وما أبي تطلعين وياي ولا بأي مكان لأنك للحين ما تعرفين ترتبين طلعة حلوة لازم كل طلعة فيها هواش . وسمعني إنه ندمان على زواجه مني ولما شافني أبكي حيل قالي البكي ما يجيب نتيجة وياي ما عندي رومانسية حقك ولا حبني وحبك أبي مخك يتغير ولا ما أرتاح أرجع مثل أول وإنت نفس الشي وما راح أقولك وأشاركك بكل اللي يصير وياي لأنك مو كفو .
اشرايكم والله ما قدرت أنام من كلامه بس راح أنادي واحد كبير بالعمر وبنفس الوقت صاحب عمر ويعرف عنا كل شي ودائما يساعدني ويوقف بجنبي وينصح زوجي ما عندي غيرة أقدر أستعين فيه بكلم زوجي جدامه ما إلا هالحل وأشوف شنو يصير وبفهمه اللي صار مو غيرة أبدا لأنها طبخت ومدحتوه الموضوع إنه مافي أحد مدحني وأنا بأمس الحاجة للمدح منكم علشان أنتج أكثر واللي عصبني أكثر لما صار يقول متينه وخمس سنين تسوي ريجيم وللحين مثل ما هي مع إنه بنتي الصغيرة عمرها 5 سنين ونصف اشلون ريجيم بعدين قال 4 سنين وأنا رضعتها سنتين كاملين وقاعده أحاول أخفف وزني لسببن لأني عندي بداية سكري والدكتورة قالت لازم تخففي شوي وزنك علشان لا يزيد والسبب الثاني لأني تأخرت بعد الولادة لعمل الريجيم عندي مشكلة ظهور البطن بس شني حامل وفعلا والله اشكثر حاولت وأخذ وياي سنة تقريبا بس هو ما يحس كان وزني 65 كيلو والحين قاعد يوقف على 57 كيلو وإذا بضعف كلش وغصب 55 كيلو وما أدري ليش ما قاعد ينزل أكثر الحين أنا مو متينة بس لأني قصيرة القامة وبطني ظاهر شني مربع هذا وصفه لي . بس هو ما يحس وفوق كل هذا بروحي أسوي بالبيت رياضة وما أقدر أمشي برة أو أروح النادي هو ما يخالف عنده دراجة يروح ويلعب ويشترك بالنادي أو يمشي برة بس أنا لأ ما يصير وينزل وزنه بسرعة وأنا سنه يالله ينزل 4 كيلو . بس لمنو تفهمون وفوق كل هذا يحطمك ياريت في تشجيع علشان تكملين .
الحين طلعوا من البيت ما أدري وين وأخذ وياه الخدامة اللعينة وما أدري شنو أسوي بحالي ودي أموت بهاللحظة وأرتاح هذا الحين بالضبط إحساسي .

حسبي الله ونعم الوكيل هذا عديم احساس
ماااااااااينفع معه شئ
وين اخذ الخدامه والبنات معاهم والا بس هو الخدامه
وربي يالخدامه لئييييييييييييييييمه مستغله الوضع زين
الله يعينك
شوفي غرفتك لا تطلعين منها حتى لو طلعك قولي غرفتي مارتاح الا فيها

كلميه بصراحه عن الخدامه وقوليله اغار منها عليك وماني مرتاحه وزني عليه لما يسفرها واوعديه بالتغير لاني احس من كلامكي ان عندك اشياء لازم تتغير
الخطوه الاولى تسفير الخدامه والتقرب للزوج وابعادها عنه وملاصقته وعدم الزعل منه مهما صار علشان تقدرين تقربيله وتبعدين عنه هالشغاله
الخطوات الثانيه بعدين اقولها لك بس اذا حاولت تتغيرين وبديتي بالخطوه الاولى وتركت البرود الي انت فيه والامبالاه
ترى ماينفع الزعل والهواش مع زوجك كلميه بالحنان وبادب علشان يسفر الشغاله وقولي ابي اخذ راحتي ببيتي وابي اخدمك بنفسي ومابي احد يشاركني فيك ومو مره وتستسلمين وارفعي شعار لاشغاله بعد اليوم اما الشغاله لاتعطينها وجه لاسوالف ولاضحك ولاهواش وانتبهي منها ومن رسايلها لاتسوي لكم شي
وبعدين كم لها عندك وعم زوجك سافر برا